‘Political differences’, hindi dapat maging hadlang sa mga tao para maglingkod sa bayan- PBBM

HINDI dapat maging hadlang ang ‘political differences’ sa mga tao para magtrabaho para sa bayan.
”Differences in politics should never prevent us from working together for our people,” ang sinabi ni Pangulong Ferdinand Marcos Jr., sa isang social media post kung saan ibinahagi niya ang clip ng panayam sa kanya ng media sa Naga City.
”Nation first. Personal agendas later,” ayon pa sa Pangulo sa isang panayam habang katabi si Naga City Mayor Leni Robredo.
Sa hiwalay na post, binigyan naman ito ni Pangulong Marcos ng kapsyon na ”Serve first. Argue later. Less noise. More nation-building.”
Binibigyang-diin ng Pangulo na ang kanyang pagbisita sa Naga City ay nakatuon sa pampublikong serbisyo at pagtugon sa mga agarang suliranin ng lungsod, at hindi sa pulitika.
Dumating si Pangulong Marcos sa Naga City upang inspeksyunin ang Department of Public Works and Highways (DPWH) Oplan Kontra Baha, na inilunsad sa lungsod para isagawa ang malawakang paglilinis ng mga daluyan ng tubig.
Sinalubong ang Pangulo nina Naga City Mayor Maria Leonor “Leni” Robredo, DPWH Secretary Vince Dizon, at iba pang lokal na opisyal.
“Hindi namin pinag-uusapan ‘yun. Alam mo, I think the mayor (Robredo) will agree with me na ano, serbisyo muna bago politika,” ani Pangulong Marcos nang tanungin sa isang panayam tungkol sa posibleng alyansa sa politika para sa pambansang halalan noong 2028.
“The most political thing that we did today, I wore my pink socks. My pink socks in honor of Mayor Leni,” dagdag ng Pangulo.
Una rito, tinanong din ng media si Mayor Robredo kung saan ay sinabi nito na ang pagbisita ng Pangulo ay naka-iskedyul na ilang buwan na ang nakalipas at wala pa siyang isang taon bilang alkade ng Naga City. “Marami pa kaming gagawin,” diin pa niya.
Sinabi ni Pangulong Marcos na hindi siya makikipag-usap sa politika sa pagbisita, at binigyang-diin na ang kanyang layunin sa Naga City ay maghanap ng solusyon sa problema ng pagbaha sa lungsod, na inilarawan niya bilang isang “napakahalagang isyu” na nakakaapekto hindi lamang sa Naga City kundi pati na rin sa Camarines Sur at buong Bicol Region.
“That’s what we are concentrating on,” ani Pangulo, binibigyang-diin ang kahandaan ng pambansang pamahalaan na tulungan ang mga lokal na pamahalaan kapag kinakailangan.
“Kung sino ang nangangailangan ng tulong, the national government is here to help. I came from local government kaya I have great sympathy for the situations of local government,” dagdag niya.
Dagdag ng Pangulo, “Kaya, whoever comes to us for help, we will do what we can to help. This is not an increase, not a decrease. It’s not political. It’s only because it depends on the need, and that’s why we are here today.”
Nagsimula ang Oplan Kontra Baha (OKB) operations sa Naga City noong Pebrero 18, 2026, at inaasahang matatapos sa Hulyo 31, 2026. Saklaw ng proyekto ang 29 ilog at sapa at dalawang lawa, kabilang ang paglilinis at clearing ng drainage system ng lungsod. (DARIS JOSE)