Metro Manila, iba pang lugar sa bansa, uulanin sa Pasko – PAGASA

IHANDA na ang payong ng mga mamamasyal sa araw ng Kapaskuhan sa Metro Manila at ilang bahagi ng bansa.

Ito ayon kay Joey Figuracion ng PAGASA sa QC Journalists Forum ay dahil makararanas ng pag-ulan sa Metro Manila at karatig lugar sa araw ng Pasko dulot ng epekto ng Easterlies.
Apektado din ng Easterlies kayat maulan sa Bicol Region, Eastern Visayas, Central Visayas, Caraga, Northern Mindanao, Mainland Cagayan, Isabela, Aurora, Quezon, Davao Oriental, Zamboanga Peninsula, Palawan at nalalabing bahagi ng Mindanao ay maulan dahil naman sa Intertropical Convergence Zone (ITCZ).

Maulan naman sa Batanes at Babuyan Islands dahil sa epekto ng amihan.
Sinabi ni Figuracion na hanggang sa matapos ang taong 2025 ay patuloy na makararanas ng pag-uulan sa iba’t ibang bahagi ng bansa dahil sa naturang mga weather disturbance.

Tinaya naman nito na sa pagpasok ng Enero 2026 ay makararanas ng zero o isang bagyo ang ating bansa kaya’t ang lahat ay pinag-iingat at ugaliing magmasid sa paligid at updated sa kundisyon ng panahon para makaiwas sa epektong dulot ng bagyo.