Doxycycline, ‘wag gamitin kung walang reseta ng doktor – DOH

NAGPAALALA ang Department of Health (DOH) sa publiko na huwag gumamit ng Doxycycline kung walang reseta ng doktor.

Ang doxycycline ay isang antibiotic na ginagamit laban sa leptospirosis, na nakukuha sa paglusong sa baha, na maaaring kontaminado ng ihi ng daga.

Ayon sa DOH, kapag mali ang pag-inom ng naturang antibiotic ay maaaring mawalan ito ng bisa laban sa mga mikrobyo, na maaaring magresulta upang maging mas mahirap gamutin ang simpleng impeksiyon lamang.

Dagdag pa ng DOH, maaari itong humantong sa matagal o mas matinding pagkakasakit.

Payo pa ng DOH, “magpatingin sa doktor para sa tamang reseta sa paggamit ng antibiotic na ito”.

Matatandaang una nang nagbabala ang DOH sa publiko na mag-ingat laban sa sakit na leptospirosis dahil na rin sa malawakang mga baha dulot ng malalakas na pag-ulan na nararanasan sa ilang lugar sa bansa, na dala ng Habagat at mga bagyo.