5 huli sa aktong sumisinghot ng shabu sa Valenzuela

REHAS na bakal ang kinasadlakan ng limang indibidwal matapos maaktuhang sumisinghot shabu sa Valenzuela City, kamakalawa ng gabi.

Sa report ni PCpl Christopher Quiao kay Valenzuela police chief P/Col. Salvador Destura Jr., nakatanggap ng tawag sa telepono mula sa isang concerned citizen ang mga tauhan ng Police Sub-Station 6 at ipinaalam sa kanila ang hinggil sa nagaganap umanong pot-session sa M. Gregorio St., Bagong Filipino Industrial Compuond, Brgy., Lingunan.

Kaagad namang inatasan ni SS6 Commander P/Cpt. Reymund Andujar ang kanyang mga tauhan na puntahan ang nasabing lugar.

Dito, naaktuhan ng mga pulis sa loob ng isang bahay na walang numero sina alyas ‘Christian’, 33, welder, “Fernando”, 24, massage therapist, “Avelino”, 55, warehouse staff, “Mart”, 26, helper at “Joseph”, 37, na abala umano sa pagsinghot ng shabu, dakong alas-10:15 ng gabi na nagresulta sa pagkakaaresto sa kanila.

Nakumpiska sa mga suspek ang tatlong transparent plastic sachets na naglalaman ng nasa 1.16 grams ng hinihinalang shabu na nagkakahalaga ng P7,888 at ilang drug paraphernalias.

Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002. (Richard Mesa)