Rekomendasyon ng pribadong sektor na tiyakin ang food security, isinumite na kay PBBM

NAKIPAGPULONG si Pangulong Ferdinand Marcos Jr. sa Private Sector Advisory Council (PSAC), araw ng Biyernes para talakayin ang rekomendasyon na naglalayong itaas ang local food production at suplay.

Nakasaad sa  kalatas na ipinalabas ng  Office of the President (OP) na kabilang dito ang “digital farming methods and strategies” para mapahusay ang  supply chain.

Ipinanukala rin sa nasabing miting ang  pagrerebisa ng polisiya at istraktura ng National Food Authority (NFA) upang makayanan ng ahensiya na mag-operate bilang logistics hub.

Bukod dito, tinalakay din ni Pangulong Marcos sa  PSAC ang kanyang mga plano para sa institutusyonalisasyon ng  digital platform Sarai ng Department of Science and Technology (DoST)  na naglalayong bigyan ang mga stakeholders  ng  site-specific crop advisories batay sa data na nakuha mula sa  Diwata microsatellite.

Naniniwala kasi ang Punong Ehekutibo na sa pamamagitan ng programang ito, ang mga magsasaka at mangingisda ay magkakaroon ng  real-time access sa farm conditions, kabilang na ang  “weather, drought, and flood forecasts” at maging ang  “disease detection and infestation.”

Sa kabilang dako, ipinag-utos naman ng Pangulo ang pag-arangkada ng muling  pagtatanim ng puno ng niyog  at pamamahagi ng mga punla at maging ang  intercropping para sa mas maayos na paggamit sa lupain.

Layon kasi ni Pangulong Marcos bilang  kasalukuyang hepe ng Department of Agriculture  na itaas ang food production sa bansa at ibaba ang presyo ng mga food products.

Nais din ng Punong Ehekutibo na ayusin ang  tinatawag na value chain upang kagyat na matugunan ang short-term at long-term na problema sa sektor ng agrikultura.

Nauna rito, sinabi ng Chief Executive na iiwan lamang niya ang kanyang posisyon bilang Kalihim ng DA kapag nagawa na ang  structural changes sa departamento. (Daris Jose)