P2.7 milyon halaga ng shabu nasabat sa buy bust sa Navotas

Nasamsam ng mga awtoridad ang mahigit sa P2.7 milyon halaga ng shabu sa isang hinihinalang drug pusher na natimbog sa isinagawang buy bust operation sa Navotas City, kahapon ng madaling araw.

Kinilala ni Navotas police chief Col. Dexter Ollaging ang naarestong suspek na si Crisanto Lazaro, 39 ng 300 Roldan St.Brgy. Tangos South.

Ayon kay Col. Ollaging, dakong 12:30 ng madaling araw nang magsagawa ng buy-bust operation ang mga operatiba ng Station Drug Enforcement Unit (SDEU) sa pangunguna ni PSSg David Santos sa ilalim ng pangangasiwa ni deputy chief for operation PLTCOL  Antonio Naag sa Wawa, Brgy. Tangos South kung saan nagawang makapagtransaksyon ni Pat Leo Dave Legaspi na nagpanggap na buyer sa suspek ng P3,000 halaga ng shabu.

Matapos tanggapin ng suspek ang marked money mula sa poseur-buyer kapalit ng isang plastic sachet ng shabu ay agad siyang dinamba ng mga operatiba.

Ani SDEU investigator PSSg John Mikhail Garces, nakumpiska sa suspek ang nasa 405.4 gramo ng hinihinalang shabu na may corresponding standard drug price P2,756,720.00, buy bust money at isang kulay maroon na belt bag.

Kaugnay nito, pinuri ni Northern Police District (NPD) Director PBGEN Nelson Bondoc ang Navotas Police SDEU sa ilalim ng pangangasiwa ni P/Col. Ollaging dahil sa matagumpay na drug operation na nagresulta sa pagkakaaresto sa suspek at pagkakakumpiska sa naturang illegal na droga. (Richard Mesa)