3 huli sa aktong bumabatak ng droga sa Valenzuela

BINITBIT sa selda ang tatlong hinihinalang drug personalities matapos mahuli sa aktong sumisinghot umano ng droga sa magkahiwalay na lugar sa Valenzuela City.

Batay sa ulat, nakatanggap ng impormasyon ang mga tauhan ng Valenzuela Police Sub-Station 3 mula sa isang concerned citizen na may nagaganap umanong illegal drug illegal drug activities sa isang abandonadong bahay sa kanto ng Israel at Engracion Sts., Brgy., Marulas.

Kaagad namang rumesponde sa lugar ang mga tauhan ng SS3 at naaktuhan ng mga ito ang dalawang lalaki na abala umano sa pagsinghot ng shabu sa loob ng nasabing bahay dakong alas-3:00 ng Huwebes ng hapon.

Nakumpiska sa dalawang naaresto na sina alyas “Michael” at alyas “Toper” ang isang nakabukas na plastic sachet na may bahid ng umano’y shabu at ilang drug paraphernalias.

Nauna rito, alas-7:05 ng Miyerkules ng gabi nang mahuli din sa akto ng mga operatiba ng Police Sub-Station 6 si alyas “Erwin”, 44, na bumabatak din umano ng shabu sa loob ng kanyang bahay sa Esteban St., Brgy. Dalandanan. Nakuha sa kanya ang isang nakabukas na plastic sachet na may bahid ng hinihinalang shabu at drug paraphernalias.

Pinasalamatan naman ni Valenzuela Police Chief P/Col. Joseph Talento ang publiko na nagbibigay ng impormasyon hinggil sa mga illegal na aktibidad parasa pagpapanatili ng kapayapaan at kaayusan sa lungsod. (Richard Mesa)