BINITBIT sa selda ang isang kelot matapos nakawin ang perang pangpagamot sa chemotherapy ng kalugar at makuhanan pa ng hindi lisensyadong baril sa Caloocan City.
Sa kanyang ulat kay Northern Police District (NPD) Acting Director P/BGen. Christopher Dela Cruz, kinilala ni Caloocan Police Chief P/Col. Joey Goforth ang suspek na si alyas “Pakyaw”, 22, na mahaharap sa kasong Theft at paglabag sa Comprehensive Firearms and Ammunition Regulation Act.
Lumabas sa imbestigasyon na madaling araw, habang natutulog ang biktima sa loob ng kanyang bahay sa Brgy., 12, nang looban ng suspek makaraang magawa nitong mapasok dahil hindi nakakandado.
Kinuha ng suspek ang ₱30,000 na pangpagamot ng biktima sa chemotherapy, stand fan at isang pares ng sapatos bago mabilis na tumakas habang ini-report naman ng biktima sa Caloocan Police Sub-Station 4 ang insidente.
Kaagad namang nagsagawa ng follow up operation ang SS4 sa pangunguna ni P/Capt. Ronald Soriano, kasama ang mga tanod ng Brgy. 12, na nagresulta sa pagkakaaresto sa suspek sa Kanduli Street, Dagat-Dagatan Avenue, sa nasabing Barangay dakong alas-6:30 ng umaga.
Nakumpiska sa suspek ang isang hindi lisensyadong kalibre .38 revolver na kargado ng isang bala habang hindi na nabawi ang ninakaw nitong pera at mga gamit ng biktima. (Richard Mesa)
- April 8, 2026
Ang Diyaryong Pinagkakatiwalaan
Archive for April 8th, 2026
Kelot, isinelda sa baril, pagnanakaw sa Caloocan
E-bike driver na nangholdap, at pumatay sa pasaherong bebot sa Caloocan, timbog
ARESTADO ang 26-anyos na e-bike driver na nangholdap at pumatay sa kanyang pasaherong bebot matapos inguso sa pulisya ng nakasaksing testigo sa Caloocan City.
Sa kanyang ulat kay Northern Police District (NPD) Acting Director P/BGen. Christopher Dela Cruz, kinilala ni Caloocan police chief P/Col. Joey Goforth ang suspek na si alyas “Rodman”, residente ng Gen. Luis St. Brgy. 13.
Sa imbestigasyon ng pulisya, dakong alas-6:05 ng uamaga, sakay ng e-bike na minamaneho ng suspek ang 33-anyos na biktimang si alyas “Angelica”, galing ng Monumento nang magkaroon ng komosyon matapos umanong magdeklara ng holdap ang suspek pagsapit sa 4th Avenue.
Tinangka umanong manlaban ng biktima na naging dahilan upang pagsasaksakin siya ng suspek hanggang makatakbo palayo para humingi ng tulong sa mga residente sa C. Namie Street.
Subalit, dahil sa dami ng tinamong tama ng saksak sa leeg at iba’t-ibang bahagi ng katawa, humandusay na lamang ang duguang biktima hanggang mawalan ng buhay sa isang eskinita sa C. Namie St. Brgy. 38.
Isang testigo naman na nakakilala sa suspek ang nagturo kay P/Capt. Zoilo Lopez, hepe ng Tuna Police Sub-Station 1 na agad nagsagawa ng manhunt operation na nagresulta sa pagkakaaresto kay alyas Rodman.
Nakuha naman ng mga tauhan ng Northern Police District Forensic Unit (NPD-FU) sa lugar na pinangyarihan ng krimen ang patalim na ginamit ng salarin na may bahid pa ng dugo. (Richard Mesa)
Malabon Exec, ibinida ang pinakamahuhusay na kasanayan sa pamamahala sa Japan conference
IBINIDA ni Malabon City Administrator Dr. Alexander T. Rosete ang pinakamahuhusay na pamamahala ng lungsod sa digital governance sa 17th International Conference on E-Education, E-Business, E-Management at E-Learning na ginanap sa Fukuoka, Japan mula Abril 1 hanggang 4, 2026.
Sa panahon ng kumperensya, inihatid ni Dr. Rosete ang kanyang presentasyon na pinamagatang “Digitalizing Governance: Implementing a SMART City Framework for Enhanced Public Services and Citizen Engagement in Malabon,” na itinatampok kung paano pinalakas ng integrasyon ng teknolohiya ang paghahatid ng mahahalagang serbisyo sa lungsod.
Binigyang-diin niya na ang isang “smart city” ay hindi lamang tinukoy ng advanced na teknolohiya, ngunit sa pamamagitan ng kung gaano epektibo ang mga pagbabagong ito na nagpapabuti sa buhay ng mga mamamayan. Para sa developing cities tulad ng Malabon, sinabi niya na ang tunay na hamon ay nakasalalay sa pagtiyak na ang digital solutions ay nakasentro sa mga tao, inklusibo, at tumutugon.
“Around the world, cities are rapidly transforming through digital technologies. SMART cities use ICT and IoT to improve services and efficiency. But more than systems or infrastructure, SMART cities are about people. Their success depends on how well they improve everyday life—making services faster, more transparent, and more accessible,” ani Dr. Rosete.
Sa kanyang presentasyon, binigyang-diin ni Dr. Rosete ang digital initiatives ng pamahalaang lungsod, kabilang ang Malabon Ahon Blue Card (MABC), isang flagship program ni Mayor Jeannie Sandoval na nag-streamline sa paghahatid ng mga serbisyong panlipunan kabilang ang Burial and Hospitalization Assistance, at Eskwela Savings Project.
Itinampok din ang Malabon AHON 24/7 Alert Application, na nagbibigay-daan sa mga residente na direktang makipag-ugnayan sa pamahalaang lungsod sa panahon ng emerhensiya.
Ang isa pang inisyatiba na ipinakita ay ang Electronic Business One-Stop Shop (EBOSS) system, na nagpapahintulot sa mga may-ari ng negosyo na mag-renew ng mga permit at magproseso ng mga buwis online, para mas mabilis, mas maginhawa, at mas madaling ma-access ang mga transaksyon.
Binigyang-diin din ni Dr. Rosete ang pagpapatupad ng lungsod ng Procurement and Inventory Management System (PIMS), na nagpapalakas ng transparency at accountability sa pamamagitan ng pagtiyak na ang mga mapagkukunan ng pamahalaan ay maayos na nasusubaybayan, pinamamahalaan, at natutugunan.
(Richard Mesa)
PNP, IPINAGPATULOY ANG FULL-SCALE LAW ENFORCEMENT OPERATIONS NITONG HOLY WEEK PERIOD
IPINAGPATULOY ng Pambansang Pulisya ng Pilipinas (PNP) ang malawakang operasyon sa pagpapatupad ng batas nitong Semana Santa, upang matiyak ang kaligtasan ng publiko habang patuloy ang pinaigting na kampanya laban sa lahat ng uri ng kriminalidad.
Mula 8:00am ng Abril 3 hanggang 8:00am ng Abril 4, 2026, nakapagtala ang mga unit ng pulisya sa buong bansa ng mahahalagang nagawa, kabilang ang pag-aresto sa 16 na wanted persons na sangkot sa mga mabibigat na krimen tulad ng pagpatay, panggagahasa, pagnanakaw, at sa mga sangkot sa ilegal na droga.
Kabilang sa mga naaresto ay apat na Top 2 most wanted persons, isang Top 3, apat na Top 4, at isang Top 7, kasama ang anim na iba pa. Marami sa kanila ang nahaharap sa mga kasong hindi maaaring piyansahan at ngayon ay nasa ilalim ng kustodiya ng pulisya.
Sa mga operasyon kontra-iligal na droga, apat na suspek kabilang ang tatlong mga kilalang high-value individuals ang naaresto sa magkakahiwalay na buy-bust operations. Nakumpiska ng mga awtoridad ang mga ilegal na droga na tinatayang aabot sa halagang ₱31.6-M, kabilang ang mahigit 3.28 kilogramo ng shabu na narekober sa Quezon at mahigit 1.2 kilogramo na narekober sa Cavite at Caloocan. Sa Benguet, isang malawakang operasyon sa pagpuksa ng marijuana ang nagresulta sa pagkawasak ng 5,920 na tumubong halaman ng marijuana na tinatayang aabot sa halagang ₱1.18-M.
Binigyang-diin ni PNP Chief, Police General Jose Melencio C. Nartatez Jr., na ang mga resultang ito ay sumasalamin sa patuloy at nakatutok na mga operasyon ng pulisya sa lugar.
“Ito ay resulta ng masigasig at tuloy-tuloy nating operasyon. Bawat naaresto at bawat na-sugpuang ilegal na aktibidad ay hakbang patungo sa mas ligtas na pamayanan, We will continue to press forward, especially under our PNP Focused Agenda on Enhanced Managing Police Operations. Sa ilalim ng pamumuno ni Pangulong Ferdinand R. Marcos Jr., mas pinalalakas natin ang ating kakayahan para masigurong nararamdaman ng taumbayan ang presensya ng pulis”, dagdag pa nya.
Tiniyak ng PNP sa publiko na mananatiling walang humpay ang mga operasyon at nakabatay sa impormasyon upang matugunan ang lahat ng uri ng kriminalidad.
Ang mga nagawang ito ay sumasalamin sa pangako ng PNP na maghatid ng mga resulta at itaguyod ang kaligtasan ng publiko, na ginagabayan ng prinsipyo nito: Bagong PNP para sa Bagong Pilipinas: Serbisyong Mabilis, Tapat at Nararamdaman.
(PAUL JOHN REYES)
Tigil biyahe ng mga dyip nakaamba
NASA kalahati na ng bilang ng mga operator ng passenger jeep na may ruta sa mga pangunahing lansangan ang nagtigil pasada na simula kahapon dahil sa hindi na makayanang taas na halaga ng mga produktong petrolyo.
Ayon kay Orlando Marquez, national president ng Liga ng Transportasyon at Operators ng Pilipinas (LTOP), mas darami pa ang bilang ng mga passenger jeep na magtitigil pasada sa mga darating na araw dahil sa epekto ng mataas na halaga ng petrolyo.
Aniya, magsasagawa sila ng national assembly sa Miyerkules para desisyunan ang gagawing work stoppage ng mga operator ng passenger bus at mga trak.
Kahapon Martes, April 7, madadagdagan pa ng mula P17 hanggang P19 kada litro ang taas-presyo ng diesel na gamit ng mga pampasaherong sasakyan.
Kinastigo rin nito ang hindi paggamit ng pamahalaan sa emergency powers na naipagkaloob dito ng Kongreso.
Una nang nilagdaan ni Pangulong Ferdinand Marcos Jr. noong Marso 25 ang pagsuspinde at pagbawas sa excise tax sa oil imports. Ang batas umano ay epektibo ng 15 araw makaraan ang anunsyo rito. Maaari umanong maglabas si Pangulong Marcos ng executive order para rito sa April 12 o sa April 13.
Kinondena rin ni Marquez ang aniya’y hindi na makayanang pagkakaloob umano ng pamahalaan ng fuel subsidy sa mga driver ng pampasaherong sasakyan na nasa P5,000.
Aniya, nagsumite ang isang chapter ng LTOP ng 168 qualified members pero 31 lamang ang nakatanggap ng cash aid.