NAGPAABOT nang pakikiramay si Pangulong Ferdinand Marcos Jr., sa pamilya ng isang Pinay na kumpirmadong nasawi sa naganap na missile attack sa Haifa, Israel nitong nagdaang Linggo ng gabi, April 5.“Kasama nating nagluluksa ang kanyang pamilya sa gitna ng isang trahedyang hindi dapat maranasan ninuman,” ayon kay Pangulong Marcos.Sinabi pa ng Pangulo na inatasan na niya ang mga ahensiya ng gobyerno na magpaabot ng ‘full assistance’ sa pamilya at tiyakin ang agarang repatriation sa labi ng Pinay na hindi pinangalanan dahil humiling ang pamilya ng biktima ng privacy para makapagluksa, ayon sa Department of Foreign Affairs (DFA).“Nakaantabay ang ating Embahada upang maibigay ang lahat ng kinakailangang tulong,” ang sinabi pa rin ng Pangulo.Sinabi pa ni Pangulong Marcos na patuloy na binabantayan ng gobyerno ang sitwasyon sa rehiyon. “Ang kaligtasan ng bawat Pilipino ang ating pangunahing prayoridad,” ang winika ng Chief Executive.“Nakikiisa ang buong sambayanan sa kanilang pagdadalamhati. Nawa’y matagpuan nila ang lakas at kapanatagan sa gitna ng trahedyang ito,” aniya pa rin. ( Daris Jose)
- April 8, 2026
Ang Diyaryong Pinagkakatiwalaan
Archive for April 8th, 2026
INISYATIBO NG PNP NA “SAFER CITIES”, INILUNSAD SA METRO MANILA
OPISYAL nang inilunsad ng Pambansang Pulisya ng Pilipinas (PNP) ang inisyatibong “Safer Cities,” na magsisimula sa Metro Manila at nakatakdang palawakin sa mga pangunahing sentro ng lungsod sa buong bansa. Ang paglulunsad ay naganap sa isang press briefing na pinangunahan ni Secretary of the Department of the Interior and Local Government (DILG), Juanito Victor C. Remulla, kasama si PNP Chief PGEN Jose Melencio C. Nartatez Jr., PMGEN Anthony Aberin, NCRPO Regional Director, at PBGEN Ponce Rogelio Peñones Jr., Acting Director for Operations.Ang inisyatibo ay nakatuon sa pagpapalakas ng visibility at presensya ng pulisya sa mga urban area, kung saan nagaganap ang karamihan sa mga krimen, upang matiyak na mas ligtas ang mga komunidad sa kanilang pang-araw-araw na buhay. Ang hakbang na ito ay naaayon sa Focused Agenda ng PNP sa ilalim ng Enhanced Managing Police Operations, bilang suporta sa direktiba ni Pangulong Ferdinand R. Marcos Jr. na paigtingin ang mga hakbang sa kaligtasan ng publiko.Sentro ng programa ang proteksyon ng mga estudyante, kung saan nangangako ang PNP na magtatalaga ng mga tauhan ng pulisya sa lahat ng paaralan sa buong Metro Manila. Ang mga force multiplier, kabilang ang mga barangay tanod, ay makikipagtulungan sa mga opisyal ng pulisya upang mapanatili ang ligtas na kapaligiran sa pag-aaral. Hinihikayat ang publiko na tumawag sa 911 kung walang maobserbahang presensya ng pulisya sa mga paaralan.Kasama rin sa inisyatibo ng Safer Cities ang increased deployment in transportation hubs sa mga paliparan, daungan, terminal ng bus, at mga istasyon ng MRT/LRT, pati na rin sa mga lugar na mataas ang trapiko, mga mall at iba pang lugar na pinagtatagpuan ng mga pulis. Magkakaroon ng mga Police Assistance Desk na madaling magagamit at paiigtingin ang mga pagpapatrolya sa mga lugar na maraming turista, kabilang ang Bonifacio Global City, Makati, Pasay at Parañaque.Mahigpit na ipatutupad ang mga ordinansa sa curfew, partikular para sa mga menor de edad, kasabay ng pagtaas ng presensya ng pulisya sa mga nightlife areas. “Mas magiging visible ang mga pulis sa mga lugar na may gimikan. Andito kami para magpaalala at panatilihing ligtas at maayos ang ating komunidad,” sabi ni PGEN Nartatez.Binigyang-diin naman ni Kalihim Remulla ang pagpapatupad ng mga patakaran sa kaayusan ng publiko, kabilang ang pagbabawal sa pag-inom ng alak sa mga lansangan at paglalagay ng mga pansamantalang mesa para sa mga inuman, na kadalasang iniuugnay sa mga panggugulo at panliligalig. Binigyang-diin din niya ang pagsunod sa mga oras ng curfew, pagbabawal sa mga lalaking naglalakad nang walang damit sa mga pampublikong lugar at mga regulasyon sa ingay tulad ng mga limitasyon sa videoke lampas sa alas-10 ng gabi.Tiniyak ng PNP sa publiko na ang inisyatibo ng Safer Cities ay patuloy na magbabago habang inilulunsad ito sa buong bansa, na magpapalakas sa isang proaktibo at nakatuon sa komunidad.(PAUL JOHN REYES)
Stephen Curry, balik na sa NBA hardcourt
BALIK na sa paglalaro si NBA superstar Stephen Curry matapos ang mahigit dalawang buwan na pagpapahinga dahil sa kaniyang minor injury sa kanang tuhod.
Hindi nakapaglaro ang 4-time NBA champion sa loob ng 21 games mula noong January 30, 2026 at sa kaniyang pagbabalik sa hardcourt ay nananatili siya sa minutes restriction o limitadong oras ng paglalaro.
Samantala, sa naging laban ng Warriors at Houston Rockets, hindi naging sapat ang comeback ng GS sa huling bahagi ng laban upang ibulsa sana ito bilang isang panalo.
Hawak pa ng GS ang 5-point lead sa pagtatapos ng unang quarter, 31-26, ngunit tuluyan itong binawi ng Rockets sa ikalawang quarter sa tulong ng 29-22 dominant run.
Umabot pa sa 10 points ang kalamangan ng GS sa pagtatapos ng 3rd quarter ngunit pinilit ng 2022 NBA champion na bumawi sa 4th quarter.
Nagawa ng Warriors na hawakan ang 1-pt lead, 16 secs bago tuluyang matapos ang 4th quarter, 116-115. Gayonpaman, nagawa ni Houston shooter Alperen Sengun na ipasok ang isang layup, dalawang segundo bago matapos ang laban.
Tinangka pa ni Curry ang isang stepback jump shot 3-pointer bago tuluyang matapos ang regulation ngunit hindi na ito pumasok, daan upang matapos ang laban sa score na 116-117.
Sa pagbabalik ni Curry, naipasok niya ang 11 field goals – lima dito ay pawang mga 3-pointers. Sa kabuuan, nagbulsa ang NBA superstar ng 29 points.
Nanguna naman si Kevin Durant sa panalo ng Rockets sa kaniyang 31 points, walong assists, at walong rebounds, kasama ang tatlong blocks.
Karl Yulo, nakuha ang ikatlong pwesto sa Horizontal Bar sa Cairo World Cup
NAKAMIT ni Karl Eldrew Yulo ang bronze medal sa horizontal bar finals sa Cairo leg ng Artistic Gymnastics World Cup noong Lunes na dumagdag sa kanyang medal tally para sa Pilipinas.
Ito na ang ikalawang bronze medal ni Yulo sa Cairo, matapos makuha ang third place sa floor exercise finals noong Linggo.
Nakapuntos ang batang gymnast ng 13.733 sa horizontal bar, na halos dikit lang nina Li Hongyan na nanalo ng ginto na may 14.400, at Marios Georgiou na kumuha ng silver na may 13.900.
Noong nakaraang buwan sa Antalya leg ng World Cup, napanalunan ni Yulo ang gold medal sa floor exercise.
Ang susunod na stop ng Gymnastics World Cup series ay gaganapin sa Osijek, Croatia, sa katapusan ng linggong ito.
Multi-panel hearing, sisimulan na sa Kamara bilang tugon sa oil price crisis
NAKATAKDANG simulan ng Kamara ngayong Abril 8 ang multi-panel hearing bilang tugon sa oil price crisis.
Gagawin ng 13 key committees ang high-level joint hearing ngayong Miyerkules, April 8, upang mapabilis ang mga panukala na naglalayong magbigay solusyon sa tumataas na presyo ng gasolina at matulungan ang publiko sa agaran at long-term solutions.
Ang hearing, nakatakda ng alas-9:30 ng umaga sa People’s Center Building, na pangungunahan ni Marikina City Rep. Miro Quimbo, chairman ng Committee on Ways and Means.
Inatasan ni Speaker Faustino “Bojie” G. Dy III ang mga komite na pagsama-samahin ang mga datos, makipag-coordinate sa Executive, at magbuo ng konkretong policy interventions bilang tugon sa krisis sa presyo ng langis.
Inaasahang dadalo sa hearing ang mga chairpersons ng 12 iba pang komite kabilang sina Palawan Rep. Jose C. Alvarez (Energy), Quezon Rep. Mark Enverga (Agriculture and Food), Nueva Ecija Rep. Mikaela Angela B. Suansing (Appropriations), Camarines Sur Rep. Tsuyoshi Anthony “Hori” Horibata (Aquaculture and Fisheries Resources), Antique Rep. Antonio B. Legarda Jr. (Economic Affairs), Pangasinan Rep. Maria Rachel J. Arenas (Foreign Affairs), Camarines Sur Rep. Miguel Luis R. Villafuerte (Information and Communications Technology), Cavite Rep. Ramon “Jolo” Revilla III (Labor and Employment), Agimat Party-list Rep. Bryan Revilla (Overseas Workers Affairs), Davao Oriental Rep. Cheeno Miguel D. Almario (Social Services), Mountain Province Rep. Maximo Y. Dalog Jr. (Trade and Industry), at Quezon City Rep. Franz S. Pumaren (Transportation).
Pagtutuunan sa pagdinig ang sitwasyon sa langis at energy supply kasunod ng tensiyon sa Middle East.
Inimbitahan sa pagdinig ang miyembro ng gabinete, regulators, at economic managers.
Inaasahang dadalo sina Energy Secretary Sharon Garin, Finance Secretary Frederick Go, Migrant Workers Secretary Hans Leo Cacdac, Economy, Planning and Development Secretary Arsenio Balisacan, Foreign Affairs Secretary Ma. Theresa Lazaro, at Budget Secretary Rolando Toledo.
Inimbitahan din sina Energy Regulatory Commission Chairperson Francis Saturnino Juan, National Electrification Administration Administrator Antonio Mariano Almeda, Philippine National Oil Company representative Ma. Cristina Sheila Cabaraban, at PNOC-Exploration Corporation official Atty. Adrian Ferdinand Sugay.
Kasama rin sa inimbitahan sina Bureau of Internal Revenue Commissioner Charlito Martin Mendoza, Bureau of Customs Commissioner Ariel Nepomuceno, at National Treasurer Sharon Almanza.
Opisyal mula sa Overseas Workers Welfare Administration, Bangko Sentral ng Pilipinas, at National Tax Research Center at representante mula sa World Bank at Asian Development Bank.
Una ng sinabi ni Quimbo na layon ng joint hearings na makakuha ng datos at maihanay ang tugon ng Kamara sa hakbang ng Executive upang agad na maipatupad ang mga solusyon at programa upang protektahan ang bulnerableng sektor.
(Vina de Guzman)
PBBM, TUTUGON SA MGA SULIRANING ADMINISTRATIBO AT PINANSYAL NG LGUs
NANGAKO si Pangulong Ferdinand R. Marcos Jr. na tutugunan ang mga hamong kinakaharap ng mga local government units (LGUs), kabilang ang kakulangan sa kapasidad sa administrasyon, pananalapi, at teknikal na aspeto na nakaaapekto sa kanilang serbisyo.
Sa panunumpa ng mga opisyal ng Vice Mayors’ League of the Philippines sa Malakanyang, araw ng Lunes, sinabi ng Pangulo na isinusulong ng pamahalaan ang pag-amyenda sa Local Government Code katuwang ang Union of Local Authorities of the Philippines, Department of the Interior and Local Government, at Department of Economy, Planning, and Development upang mapabuti ang pamamahala at pananagutan.
Sinabi ng Pangulo na batay sa datos, 29 percent lamang ng LGUs ang nakapasa sa Seal of Good Local Governance noong 2023, habang ang iba ay may kakulangan sa pamamahala ng pondo, kahandaan sa sakuna, at serbisyong panlipunan.
Inihayag din ng Pangulo na 64 percent ng LGUs noong 2021 ay umaasa sa National Tax Allotment (NTA), at 71 percent ng kanilang kita ay mula sa panlabas na pinagkukunan.
Binanggit din ng Pangulo na marami rin ang nahaharap sa problema sa digital governance gaya ng mahinang internet, kakulangan sa ICT, at hindi malinaw na paghahati ng tungkulin sa pagitan ng pambansa at lokal na pamahalaan.
Bilang tugon, pinapalakas ng administrasyon ang koordinasyon ng pambansa at lokal na pamahalaan at itinutulak ang digitalisasyon ng serbisyo sa pamamagitan ng Electronic LGU System (eLGU).
Kabilang sa mga hakbang ang pagpapatupad ng Automatic Income Classification of LGUs Act at pagpapalawak ng Local Government Support Fund sa ilalim ng programang “Sa Bagong Pilipinas, Bawat Bayan Makikinabang,” upang pondohan ang mahahalagang proyekto tulad ng distribusyon ng bigas, imprastraktura sa kalusugan, at elektripikasyon sa kanayunan.
Maglalaan din ng tulong sa mga barangay sa pamamagitan ng Socio-Civic Projects Fund, kung saan bawat barangay ay makatatanggap ng tig-P100,000 na educational grant at kaparehong halaga para sa mga proyektong pang-imprastraktura.
“This will equip LGUs with the tools, the resources, and the clarity of mandate that they need to serve effectively,” ayon sa Pangulo.
“More importantly, they are designed to unlock the full potential of LGUs: make you more self-reliant, make you more responsive, and more competitive,” dagdag na pahayag ng Pangulo.
Itinatag noong 1988, ang Vice Mayors’ League of the Philippines (VMLP) na binubuo ng 1,634 na kasaping LGU ay isang organisasyon ng lahat ng mga bise alkalde sa bansa.
Pangunahing tungkulin nito ang makipagtulungan sa pambansa, lokal, at pandaigdigang mga katuwang upang maisulong ang epektibong lokal na batas, bumuo ng mga programa para sa pagpapalakas ng kakayahan sa paggawa ng batas, at itaguyod ang lokal na otonomiya.
( Daris Jose)
PCO, dumulog sa DoJ para paimbestigahan ang mga nagpapakalat ng fake news sa social media
PERSONAL na dumulog sa Department of Justice (DoJ) si acting Presidential Communications Office (PCO) Secretary Dave Gomez para paimbestigahan ang nasa likod ng Facebook page na Malasakit News Pilipinas na nagpapakalat aniya ng fake news.
Tinukoy ni Gomez ang naka-post sa nasabing Facebook page na nagsasabing magkakaroon ng energy lockdown, o magkukulang ang suplay ng langis sa bansa na labis na ikababahala ng mga mamamayang Filipino.
Aniya pa, dahil sa sa mga ganitong pekeng balita ay magiging dahilan ito ng panic buying ng mga Filipino at mag-hoarding ng suplay ng mga produktong petrolyo.
Bukod dito, mayroon din aniya sa mga nagpakalat ng pekeng balita na ginagamit ang deklarasyon ni Pangulong Ferdinand Marcos Jr., na energy emergency para magbenta sila ng produktong may kaugnayan sa solar power.
Winika ni Gomez na inatasan sila ni Pangulong Marcos na kagyat na aksyunan ang ganitong mga malinaw na panloloko, dahilan ng paghiling sa nasabing departamento na imbestigahan ang mga nasa likod ng fake news.
Para naman sa DoJ, hindi pa maituturing na complaint ang idinulog ng PCO kundi referral kay Justice Secretary Frederrick Vida para maimbestigahan ang insidente.
Samantala, tinuran ni Gomez na hindi ligtas ang iba pang nagpapakalat din ng fake news laban sa first family lalo na kay Pangulong Marcos ukol sa tunay na lagay ng kalusugan nito.
Tiniyak ni Gomez, walang malilibre o maliligtas sa imbestigasyon at kapag nakakita ng matibay na ebidensiya ay makakasuhan. (Daris Jose)
Ang ” AMA ” ng kaayusan sa Barangay, Hon.Brgy Ch. Efren B. Dela Cruz ng Pampano St. Caloocan
HINDI matatawaran ang pagiging masigasig ni Brgy.Chairman Efren B. Dela Cruz sa kanilang komunidad pagdating sa kalinisan at kaayusan sa kanilang nasasakupan. Siyempre higit sa lahat ang kaligtasan ng kanyang mga residente. Sa ilalim kasi ng kanyang pamumuno, nagpalagay agad siya ng may halos 200 CCTV sa kanilang barangay upang ma-monitor ang anumang kaganapan sa kanyang mga nasasakupan. Gayundin, prayoridad niya ang kaligtasan ng kanyang mga kabarangay.
Sa kalinisan naman nagpa de- clogging ang masipag na kapitan Dela Cruz upang maalis ang mga nakabara sa bawat drainage. Ayon pa sa kanya ” pinapanatili ko talaga ang kalinisan at pag de-clogging nang sa gayon kung dumating man ang tag-ulan at least hindi kami gaanong maperwisyo dahil bababa agad ang tubig ulan!”.
Concerned rin ang nasabing kapitan sa mga kabataan lalo na sa mga estudyante may libreng school supplies ang mga ito mula Grade-1 hanggang High school!
Sa katunayan nga sa darating na pasukan nakahanda na ang mga school supplies para sa kanila,” saad pa ng butihing ” AMA” ng Brgy. Pampano, Caloocan at hindi lang yan, may Scholarship Program pa si kap sa kanyang mga estudyante.
Sa kasalukuyan, ang kanilang pamayanan ay tahimik naman at may kaayusan. Bilang patunay makikita ang Award of Recognition ipinagkaloob sa kanyang pagmamalasakit at pagtulong sa mga nangangailangan.
Ang nasabing Barangay ay may 22,500 populations at may 14,000 mga botante. Ito ang pinakamalaking barangay sa Caloocan sa ilalim ng administration ng Malapitan!
Nagpapasalamat din ang mabait na KAP. Efren B.Dela Cruz sa kanyang mga KABARANGAY sa kanilang pakikiisa at pakikipagtulungan sa kanyang mga proyekto na inilunsad para sa kabutihan ng lahat!
( Sonny Asignacion/Photos by Boy Morales Sr.)
PINOY NA BIKTIMA NG ILLEGAL RECRUITMENT, NASABAT NG BI
NASABAT ng Bureau of Immigration (BI) ang isang pasaherong Pinoy na hinihinalang biktima ng illegal recruitment at human trafficking sa Davao International Airport. Napigil ng Immigration officers ang pag-alis ng isang 39-anyos na babaeng biktima na nakatakdang sumakay ng Cebu Pacific flight biyaheng Thailand. Ini-refer ng BI ang biktima para sa secondary inspection dahil sa pabago-bago ang kanyang mga salaysay gayundin ang kanyang mga travel documents. Base sa ulat, sumama ang biktima sa kanyang tiyahin sa biyahe gayunman, walang maipakitang travel document sa kanyang trabaho sa isang sangay ng gobyerno. Sa secondary inspection ng immigration protection and border enforcement section (I-PROBES), dito inamin ng biktima na patungo siya sa Albania, kung saan na-recruit siya sa Facebook na magtrabaho bilang cleaner. Sinabihan siya ng biktima na titigil ito sa Thailand ng 45 na araw habang pinoproseso ang kanyang employment documents at babayaran nito ang kanyang placement fee na katumbas ng kalahati ng kanyang buwanang sahod na P50,000.00. “This case highlights the evolving schemes of illegal recruiters who exploit vulnerable Filipinos through deceptive travel arrangements,” ayon kay BI Commissioner Joel Anthony Viado.
“We will not allow our ports to be used as gateways for human trafficking. Our officers remain vigilant in detecting red flags, and we will continue to protect our kababayans from falling prey to these illegal activities,” dagdag pa nito.Ang biktima ay in-tun over sa Inter-Agency Council Against Trafficking (IACAT) para sa assistance at case build-up. (Gene Adsuara)
5 PUGANTENG JAPANESE NATIONAL, PINA-DEPORT
PINA-DEPORT ng Bureau of Immigration (BI) ang limang puganteng Japanese national na sangkot sa fraud syndicate patungong Tokyo.
Ayon kay BI Warden Facility Chief Velasco Felix, ang mga pina-deport ay kinilalang sina Iwamoto Miyako, 34; Osawa Ayumi, 33; Norichika Harada, 48; Nobuyuki Arima, 45; at Yuya Yano, 34 na sakay ng Japan Airlines flight patungong Tokyo mula sa Ninoy Aquino International Airport Terminal 3.
Nauna nang inaresto ng Fugitive Search Unit (FSU) ng BI ang grupo sa magkahiwalay na operasyon sa Bulacan at Quezon dahil sa umano’y pagkakasangkot sa mga aktibidad na panloloko at pagnanakaw sa Japan.
Kinilala ng mga awtoridad na ilan sa kanila ay miyembro ng humiwalay na grupo ng kilalang “JP Dragon” syndicate, na sangkot sa malakihang scam operations na target ang mga biktima, kabilang ang mga nakatatanda.
Naglabas na ng arrest warrants ang mga awtoridad ng Japan laban sa kanila kaugnay ng mga kasong fraud at theft, kabilang ang mga modus kung saan nililinlang ang mga biktima upang ibigay ang kanilang bank information at pera. Kinumpirma rin ng BI na ang mga pugante ay sangkot sa kahina-hinalang aktibidad sa Pilipinas, kabilang ang pagpapatakbo ng mga online workstation na may kaugnayan sa scamming operations.
“Ibinabalik namin sila upang harapin ang hustisya. Magsilbi sana itong malinaw na babala — hindi pahihintulutan ng Pilipinas na gawing kanlungan ng mga sindikatong kriminal ang bansa. Hahanapin namin kayo, at ipapa-deport namin kayo,” ayon kay BI Commissioner Joel Anthony Viado.
Kasama rin ang kanilang pangalan sa blacklist ng BI, na nagbabawala na muling makapasok sa bansa sa hinaharap.
(Gene Adsuara)