SINABI ng Malakanyang na welcome kay Pangulong Ferdinand Marcos Jr., ang panukala mula sa business groups na i-adopt ang work from home setup para mabawasan ang fuel consumption at pagaanin ang epekto ng tumataas na presyo ng langis.
Para kay Presidential Communications Office Undersecretary at Palace Press Officer Claire Castro, ang panukalang ito ay makakatulong subalit ipinauubayan na ng Malakanyang ang desisyon sa pribadong kumpanya.
“Kung iyan ang magiging panukala ng mga private business companies, makakatulong na malaki ‘yan. Pero siyempre hindi naman didiktahan ng Pangulo ang mga pribadong kumpanya,” ayon kay Castro.
Binigyang diin pa ni Castro na malaya ang mga pribadong kumpanya na magdesisyon kung ano ang arrangements na makabubuti sa kanilang operasyon at manggagawa.
“Kung nakikita nila na ito’y makakabuti sa ating bayan, para sa interes ng ating mga kababayan para makatipid din sa fuel o sa produktong petrolyo, maganda ‘yang suggestion,” ang winika ni Castro.
Sa kabilang dako, sinagot din ni Castro ang itinulak ng Trade Union Congress of the Philippines (TUCP) na pagbibigay ng gobyerno ng P5,000 buwanang wage subsidy sa mahigit limang milyong minimum wage earners sa gitna ng mataas na presyo ng produktong petrolyo na inaasahang magpapataas sa presyo ng mga bilihin.
Sinabi ni Castro na “no option is off the table” subalti kailangan na balansehin ang mga prayoridad at simulan sa mga sektor na “most affected” ng tumataas na presyo ng petrolyo.
Gayunman, tiniyak naman ni Castro na handa ang gobyerno na tulungan ang lahat ng sektor hangga’t ang mga hakbang ay nakapaloob sa limitasyon ng national budget.
Tinukoy pa ni Castro na nagpapatuloy ang government initiatives para sa transportation relief, kabilang ang 50 percent discount sa train fares, free bus rides, at subsidies para sa public utility vehicles.
Kamakailan ay idineklara ni Pangulong Marcos ang state of national energy emergency, at iniutos ang pagpapatupad ng Unified Package for Livelihoods, Industry, Food, and Transport (UPLIFT) para sa mga apektadong sektor.
Kasunod ito ng paglagda ni Marcos sa Executive Order No. 110 na nagdedeklara ng state of national energy emergency, nagpapatupad ng UPLIFT, at paganahin ang whole-of-government response para matiyak ang katatagan ng suplay ng enerhiya, suportahan ang mahahalagang sektor tulad ng transportasyon, agrikultura, at MSMEs, at maprotektahan ang mga Pilipino sa gitna ng problema sa pandaigdigang suplay ng langis. (Daris Jose)
