ISASARA ng Pamahalaang Lungsod ng Caloocan ang kahabaan ng 9th Street, Grace Park East, Caloocan City – South sa mga motorista tuwing Linggo mula 5:00 pm hanggang 11:00 pm para bigyang-daan ang mga joggers, cyclists, at iba pang fitness enthusiasts simula Marso 2026.

Ang programang Car-Free Sundays ay sinusuportahan ng City Ordinance No. 1158, Series of 2025 kung saan pinapayuhan ang mga motorista na dumaan sa mga alternatibong ruta sa panahon ng pansamantalang pagsasara ng kalsada.

Malugod na tinanggap ni Mayor Dale Gonzalo “Along” Malapitan ang buong pagpapatupad ng ordinansa ng lungsod at sinabi nito na isa ito sa mga paraan ng lokal na pamahalaan upang isulong ang wellness at isang malusog na pamumuhay sa mga nasasakupan nito, at upang ipakilala ang mas maraming open space sa lungsod.

“Bukod sa pagpapalakas ng ating mga ospital at pagpapaganda ng ating health services, malaking bagay din sa pangangalaga ng kalusugan ng mga mamamayan na nabibigyan sila ng oportunidad na gumalaw at makapag-ehersisyo,” ani Mayor Along.

“Dumarami na rin po ang joggers, runners, cyclists, at kahit skaters dito sa Caloocan kaya tuloy-tuloy po kami sa pagbubukas ng mga parke at espasyo para magawa nila ang kanilang mga aktibidad sa ligtas na lugar,” dagdag niya.

Sinabi rin ng alkalde na ang inisyatiba ay naaayon sa layunin ng pamahalaang lungsod na ibalik sa mga tao ang mga lansangan at pampublikong lugar sa halip na mga sasakyan.

“Ang mga lansangan ng Caloocan ay para sa tao at hindi sa mga sasakyan. We will keep working to give the public more safe and open spaces for their activities, at pagsusumikapan nating gawing walkable city ang Lungsod ng Caloocan,” giit ni Mayor Along. (Richard Mesa)

BIBIGYANG-diin ni Pangulong Ferdinand Marcos Jr., ang commitment ng Pilipinas na isulong ang kapakanan ng mga kababaihan sa 70th session ng Commission on the Status of Women (CSW) sa New York, Estados Unidos.
Sinabi ni Department of Foreign Affairs (DFA) spokesperson Assistant Secretary Angelica Escalona na inaasahan na magbibigay ng kanyang pananalita si Pangulong Marcos sa nasabing event.
“Magsasalita po ang Pangulo sa 70th Session ng Commission on the Status of Women o CSW 70,” ang sinabi ni Escalona sa press briefing sa Malakanyang.
“He will also highlight here the Philippines’ commitment to promote, advance and protect the rights and well-being of women and girls,” aniya pa rin.
Ang working visit ng Pangulo sa Estados Unidos ay mula Marso 8 hanggang 11.
Makakasama naman ng Pangulo sa byahe niyang ito si Unang Ginang Liza Araneta-Marcos, pati na rin sina DFA Secretary Maria Theresa Lazaro, Migrant Workers Secretary Hans Leo Cacdac, Presidential Peace Adviser Carlito Galvez Jr., at Presidential Communications Office acting Secretary Dave Gomez.
Ang CSW ay isang UN commission na nagsisilbi bilang principal global intergovernmental body na nakatuon para i-promote ang ‘gender equality, karapatan ng mga kababaihan, at women’s empowerment.’

Ang CSW 70 ay nakatuon naman sa pagpapalakas ng access sa katarungan para sa lahat ng mga kababaihan, pino-promote ang inclusive at equitable legal systems, inaalis ang discriminatory laws, at tinutugunan ang structural barriers.
( Daris Jose)

KINONDENA ng Gabriela Women’s Party si Atty. Ferdinand Topacio sa ginawa nitong pagbatikos at umano’y pambabastos kay Rep. Sarah Elago, kinatawan ng sektor ng kababaihan sa Kongreso.
Sa isang radio program sa dwIZ, pinagtanggol ni Topacio si Quezon City Rep. Bong Suntay sa ginawa nitong kontrobersiyal na pahayag sa pagdinig ng House Committee on Justice nitong Martes.
Ayon kay Topacio, ang ginawang paghahalimbawa ni Suntay na imahinasyon sa isang babae ay relevant sa isyu. Sa nasabing pagdinig ng House Committee on Justice sa impeachment complaint laban kay Vice President Sara Duterte, inihalimbawa ni Suntay ang kanyang “desire” kay Anne Curtis, isang batikang aktres.
Sinabi ni Topacio natural lamang sa lalake tulad ni Suntay ang mag-imagine at kanya pang sinabi na kahit siya mismo ay nagnasa kay Elago.
Dahil dito nagalit si Elago at nagbantang magsasampa ng kaso laban sa abogado na tinawag niyang “misogynic.”
“Mariin naming kinukondena ang kanyang misogynistic at mapanirang mga pahayag. Hindi na ito nakakagulat mula sa isang abogado kuno na may mahabang track record sa panre-redtag at pambabastos sa kababaihan,” sinabi ni Elago.
Ayon kay Elago, hindi dapat pahintulutan na maging abogado si Topacio. “Ang mga katulad niya ay hindi dapat hinahayang maging abogado kung ginagamit lamang ang propesyon upang mang-alipusta sa kababaihang lumalaban sa abuso at korapsyon.”
“Pinag-aaralan namin ang mga posibleng ligal na hakbang upang mapanagot si Topacio. Hindi ito katanggap-tanggap, at lalong hindi dapat pinapalampas,” sinabi ni Elago.
(Vina de Guzman)

IBINAHAGI ng mga kawani ng Department of Labor and Employment (DOLE) sa Pamahalaang Lungsod ng Navotas ang pinakabagong updates sa labor policies ngayong taon, pati na ang mga revisions at dagdag sa inspection at enforcement procedures sa ginanap na NTIPC Pre-Inspection Seminar Intervention.
Ayon kay Mayor John Rey Tiangco, mahalaga ang ganitong seminar upang mas maging handa ang mga negosyo sa Lungsod ng Navotas at mas maintindihan ang tamang pagsunod sa mga umiiral na batas
“Alam nating mabusisi ang proseso ng inspection, at kapag may kakulangan ay may kaakibat na compliance order na nakakaapekto sa oras, resources, at operasyon ng negosyo,” aniya.
“Kaya patuloy nating hinihikayat ang ating mga stakeholders na makiisa at maghanda upang masigurong maayos, ligtas, at compliant ang ating mga workplace para sa kapakanan ng lahat,” dagdag niya.

Ginawaran din si Mayor Tiangco at ang Navotas Tripartite Industrial Peace Council ng Plaque of Appreciation ng DOLE para sa pagiging program partner ng lungsod sa implementasyon ng Child Labor Prevention and Elimination Program sa pamamagitan ng Information and Service Caravan on Child Labor noong 2025. (Richard Mesa)

NANGAKO si Pangulong Ferdinand R. Marcos Jr. na patuloy na susuportahan ang micro, small and medium enterprises (MSMEs) at skills training programs para lumikha ng mas maraming hanapbuhay para sa mga Filipino.
Matapos pangunahan ang paglulunsad ng Trabaho at Negosyo, araw ng Biyernes, Marso 6 sa Pasay City, sinabi ni Pangulong Marcos na patuloy na palalawigin ng gobyerno ang employment initiatives, kabilang na ang job fairs at mga programa, para matulungan ang mga manggagawa na makasabay sa nagbabagong mundo kung saan ang mga industriya ay muling hinuhubog ng digital technology at artificial intelligence (AI).
“Today, we live in a very uncertain world. What many of us have studied and developed a decade—or even just a couple of years ago— are sometimes no longer relevant,” ayon sa Pangulo.
“Traditional jobs are transforming. The skills that were once optional, now they are essential,” aniya pa rin.
Winika pa ng Pangulo na maraming matagumpay na entrepreneurs ang nagsimula sa maliit na pakikipagsapalaran gaya ng ‘food carts, market stalls, o online stalls’ at naharap sa mga pagsubok dahil sa limitadong capital, market access, at mabilis na technological advancement.
Nagpahayag naman ng kumpiyansa ang Pangulo na maaaring makasabay ang mga pinoy sa pagbabago, tinukoy ang kanilang ‘resilience at resourcefulness.’
“Naniniwala ako kayang makasabay naman ang mga Pilipino. Alam naman natin na sa kabila ng mga hamon, maabilidad at madiskarte ang ating mga kababayan,” ang winika ng Pangulo.
Binigyang diin pa ng Chief Executive ang mahalagang papel ng pribadong sektor sa employment gaps, partikular na sa pamamagitan ng partnerships na nagpo- promote ng ‘entrepreneurship at skills development.’
Sa kabilang dako, pinuri naman ng Pangulo si Go Negosyo founder Jose Ma. “Joey” Concepcion III dahil napagtagumpayan ang MSMEs development sa bansa.
Sinabi pa ni Pangulong Marcos na pinalalawig ng kanyang administrasyon ang mga programa na may kinalaman sa ‘reskilling, upskilling, at enterprise-based training’ upang tulungan ang mga employers na sanayin ang mga potensiyal na manggagawa base sa pangangailangan ng industriya.
“We equip our people not only to survive, but to succeed in this changing world,” ang tinuran ng Pangulo sabay sabing “Through the advocacy of Go Negosyo, we promote a positive mindset towards business—not as a last resort, but as a strong complement to our collective role in nation-building.”
Aniya pa, may mahigit sa 74,000 katao na naghahanap ng trabaho ang nagawang makakuha ng trabaho nang magsagawa ang gobyerno ng 2,300 job fairs sa buong bansa noong 2025
Idinagdag pa na ng Pangulo na sa January 2026 lamang, may 47 job fairs ang inorganisa, mayroong mahigit sa 2,400 aplikante ang kinuha ‘on the spot.’
“Government services for entrepreneurs are being streamlined through Negosyo Centers, which provide mentorship, advisory services, and assistance in expanding market access,” ang sinabi ng Chief Executive.
Hinikayat naman ng Pangulo ang mga nagpartisipa na samantalahin ang learning sessions at oportunidad na inalok sa pamamagitan ng Trabaho at Negosyo program para palakasin ang kanilang kasanayan at negosyo
“Because when we build skills, we build confidence. When we create jobs, we restore the dignity of our people. And when we strengthen our economic foundations, we build a stronger nation for tomorrow,” ayon sa Pangulo.
Ang The Trabaho at Negosyo program, inorganisa ng Go Negosyo, ay nagtatampok ng learning sessions kasama ang industry experts at mga lider sa business development.
Kabilang din sa event ang job fair na nagkokonekta sa mga jobseekers sa mga employers sa iba’t ibang sektor.
Samantala, ang mga ahensiya ng gobyerno gaya ng Department of Trade and Industry, Technical Education and Skills Development Authority, at Bureau of Internal Revenue ay nagbibigay naman ng one-stop services at pre-employment assistance. (DARIS JOSE)