INAYUDAHAN ng Manila City Government ang 13 bata na nangangailangan ng mga delikadong ope­rasyon sa Philippine Heart Center, Chinese General Hospital, at healthcare facilities sa India.

Nabatid na pinulong ni Manila Mayor Francisco “Isko Moreno” Domagoso ang pamilya ng naturang mga bata na kinabibilangan ng walong paslit na sasailalim sa liver transplants sa India, apat na batang sasailalim sa heart operations sa Philippine Heart Center, at isang pasyente na sasailalim sa operasyon para sa chronic kidney condition sa Chinese General Hospital.
Ayon kay Domagoso, naglaan ang city go­vernment ng kabuuang P16,818,557.49 pondo para sa naturang mga operasyon.

Kabilang dito ang P13,321,629.80 na inilaan para sa walong liver transplant cases, P3,323,311.50 na para sa isasagawang apat na heart operations, at P173,616.19 para sa kidney procedure. “Pagkatapos nito, una, magpasalamat kayo sa Diyos, ha? Magsimba kayo. Tapos, kung ’di man kalabisan, magpasalamat din kayo sa taxpayer ng Manila. Dahil sa kanila, nagagawa namin ’to. We’ll do our best, bagama’t gipit na gipit kami bilang siyudad. Kaya lamang, buhay ng mga anak niyo ’yung nakasalalay, eh,” ani Domagoso, sa mga magulang ng mga bata.

ISANG panukala na naglalayong palakasin ang kapangyarihan ng Filipino consumer na makontrol ang kanilang pananalapi at oportunidad sa mga modernong serbisyo sa mga banko ang inihain ng isang mambabatas bangko.
“Ayon sa Bangko Sentral ng Pilipinas, mga 44 porsyento ng mga Filipino adults ay walang bank accounts sa gitna ng pag usad ng digital payments at mobile banking,” ayon kay 1Tahanan Party-List Rep. Nathaniel Oducado, may akda ng House Bill No. 6669 o Open Banking and Open Financing Consumer Data Empowerment Act of 2025.
“This is often due to barriers such as distance from bank branches, documentary requirements, and the cost of maintaining accounts,” dagdag ni Oducado.
Inihain ni Oducado ang HB 6669 na nilalayong amyendahan ang Consumer Act at magtatag ng National Open Banking and Open Finance Framework, upang bigyan ng pagkakataon ang mga consumers, sa kanilang pahintulot, na ipamahagi ang kanilang financial data sa mga accredited banks, fintech firms, cooperatives, at iba pang regulated service providers.
“This bill puts the consumer at the center of the financial system,” Sinabi ni Oducado. “A framework which gives Filipinos ownership of their data would enable them to access better, more affordable, and more inclusive financial products.”
Ayon kay Oducado, ang Open Banking and Open Finance ay ginagamit sa mga mauunlad na bansa tulad ng Australia, sa European Union at United Kingdom, kung saan malaking benepisyo ang naidudulot sa mga consumers.
“Makakatulong ang ganitong sistema sa mga micro-entrepreneurs, low-income households, at mga malalayo at isolated communities kung saan ang mga residente rito ay may access sa credit, savings, at insurance products,” ayon kay Oducado.
(Vina de Guzman)

WALANG political agenda sa naging pagkikita nina Pangulong Ferdinand Marcos Jr. at dating Vice President Leni Robredo, araw ng Sabado sa Naga City.
Sa isang media interview matapos ang pag-inspeksyon sa implementasyon ng “Oplan Kontra Baha” project sa Sagop Creek sa Barangay Triangulo, Naga City, ipinagkibit-balikat ng Pangulo ang espekulasyon ukol sa intensyon nito sa pagbisita sa balwarte ni Robredo.
“We’re not talking about that. You know, I think the mayor will agree with me that it’s service first before politics. The most political thing we did today [was] I wore my pink socks. My pink socks in honor of Mayor Leni,” ang sinabi ni Pangulong Marcos sa mga mamamahayag nang tanungin kung ang kanyang naging pagbisita ay may kinalaman sa usaping politikal, lalo pa’t kapansin-pansin ang pagsusuot nya ng ‘pink’ na medyas na batid naman ng lahat na ang signature color ni Robredo sa kanyang naging kampanya ay ‘pink.’
“We still have a lot to do. We will get to that,” ang sinabi ng Pangulo.

Aniya pa, layunin ng pagpupulong nila ni Robredo ay ang isakatuparan ang “Oplan Kontra Baha” sa lungsod, na madalas na sinasalanta ng mga kalamidad.
Samantala, ang timing ng pagbisita ni Pangulong Marcos ay nagpalutang ng espekulasyon ukol sa posibleng alyansa para sa 2028 elections, lalo pa’t inanunsyo ito ni Presidential Communications Office (PCO) Undersecretary at Palace Press Officer Claire Castro matapos na ideklara ni Vice President Sara Duterte ang intensyon niyang tumakbo sa pagka-pangulo sa 2028 elections.
(DARIS JOSE)

TAHASANG sinabi ni Philippine National Police (PNP) Chief PGen. Jose Melencio Nartatez, Jr. na paiigtingin ng pulisya at local government units (LGUs) ang kampanya laban sa ciga­rette smuggling kung saan magsasagawa ng inspeksiyon sa ilang mga kahina-hinalang bodega na posibleng ginagamit bilang imbakan ng mga sigarilyo.

Ayon kay Nartatez, madaling makakuha ng mga impormasyon ang pulis at LGUs mula sa mga residente at ­barangay officials upang tuluyang mapasara ang mga bodega ng sigarilyo.

Binanggit niya ang dalawang kamakailang pagkakasabat ng multi-milyong pisong halaga ng smuggled na ­sigarilyo—isa sa San Simon, Pampanga na nagmula sa impormasyon ng isang netizen, at ang pinakahuli sa Maguindanao del Norte na nagsimula sa isang tip.

Gayunman, binigyang-diin niya ang panga­ngailangang tiyakin na ang lahat ng aksyon ng pulisya ay naaayon sa tamang operational procedures upang maiwasan ang suliraning legal at magsilbing mabuting halimbawa sa komunidad hinggil sa paghahari ng batas. (Richard Mesa)