2026 February Archive - People's Balita

Archive for February, 2026

Gawing regular national holiday ang komemorasyon ng 1986 People Power Revolution tuwing Pebrero 25, ipinanukala ng mambabatas

Posted on: February 24th, 2026 by @peoplesbalita No Comments

IPINANUKALA ni Akbayan Partylist Rep. Chel Diokno na gawing regular national holiday ang komemorasyon ng 1986 People Power Revolution tuwing Pebrero 25.

Kasama sina Akbayan Partylist Representatives Perci Cendaña at Dadah Kiram Ismula, at kabilang Dinagat Islands Rep. Kaka Bag-ao, naghain sila ng House Bill No. 7911 na gawing regular holiday ang February 25 bilang pagpupugay sa mga nakilahok sa mapayapang rebolusyon sa EDSA na naging simbolo ng pakikipaglaban sa rehimen ng yumaong Ferdinand E. Marcos Sr. at pagbabalik ng demokrasya sa bansa.
“February 25, 1986 is more than a date etched in history — it marks the moment when the Filipino people peacefully rose to reclaim their democracy. It stands as a testament to courage, unity, and the enduring power of collective action,” sinabi ni Diokno.
“It is our responsibility to honor this defining moment with the full recognition and dignity it deserves as a regular national holiday,” dagdag ni Diokno.
Sinabi ni Diokno na naging inconsistent ang komemorasyon ng EDSA revolution. Naging special non-working holiday noon 2023, regular working day noong 2024, at special working holiday sa 2025 at 2026.
“Nawala na ‘yung historic at civic significance ng EDSA Revolution. We must end the uncertainty and institutionalize its commemoration once and for all,” pahayag ni Diokno.
Sa ilalim ng HB 7911, inaatasan ang National Historical Commission of the Philippines na manguna sa mga preparasyon at koordinasyon sa mga educational institutions, government agencies at civil society organizations sa mga programa at selebrasyon ng 1986 People Power Revolution.
“Institutionalizing EDSA People Power Day affirms that the spirit of people power remains central to our national identity,” Diokno said. “Democracy survives not by accident, but because the people choose to defend it.” (Vina de Guzman)

Shabu laboratory sa Valenzuela, nalansag

Posted on: February 24th, 2026 by @peoplesbalita No Comments

NALANSAG ng mga tauhan ng Philipine Drug Enforcement Agency (PDEA) ang isang shabu laboratory sa loob ng isang warehouse, kasunod ng pagkakaaresto sa isang High-Value Drug Personality sa buy bust operation sa Valenzuela City, Linggo ng madaling araw.

Sa ulat, ikinasa ng pinagsamang mga operatiba ng PDEA Cavite Provincial Office, PDEA RO-NCR Northern District Office, kasama ang mga operatiba ng Station Drug Enforcement Unit (SDEU) ng Valenzuela City Police sa pangunguna ni P/Lt. Sherwin Dascil laban sa isang alyas “John”, 30, ng Cubao, Quezon City.

Matapos umano ang transaksyon sa pagitan ni alyas John at ng isang PDEA Agent na nagpanggap na buyer dakong alas-4:10 ng madaling araw sa Brgy., Viente Reales, ng lungsod, ay biglang tumakbo umano ang suspek papasok sa loob ng isang warehouse.

Dahil dito, hinabol siya ng mga operatiba hanggang sa maaresto sa loob ng warehouse at nakumpiska sa kanya ang isang plastic bag na naglalaman ng humigi’t kumulang kalahating kilo ng hinihinalang shabu na may standard drug price na P3.4 milyon at buy bust money.

Kasunod nito, nadiskubre ng mga operatiba ng PDEA sa loob ng nasabing warehouse ang isang shabu laboratory kung saan ginagawa ang shabu.

Nasamsam sa nasabing shabu laboratory ang humigi’t kumulang 25 kilos ng umano’y shabu, mga kemikal at kagamitan sa paggawa ng shabu at ilang drum na naglalaman ng suspected cocaine.

Ayon sa PDEA, tinatayang aabot lahat sa bilyong piso ang halaga ng mga nasamsam na ilegal na droga, mga kemikal at mga kagamitan sa paggawa ng shabu habang inaalam pa kung sino ang nagpapatakbo ng naturang shabu laboratory. (Richard Mesa)

CALOOCAN LGU, KINILALA NG GCASH

Posted on: February 24th, 2026 by @peoplesbalita No Comments

KINILALA ng pinakamalaking financial technology (FinTech) na GCash ang Pamahalaang Lungsod ng Caloocan sa pagsisikap na maisama ang teknolohiya sa pagkakaloob ng serbisyo at digitalize na transaksiyon sa lungsod.

Sa ginanap na GCash Digital Excellence Award (GDEA), tinanggap ng pamahalaang lungsod ang Excellence in Digital Transformation Award at ang Palengke Digital Breakthrough Growth Award na patunay sa patuloy nilang pakikipag-partner sa FinTech para sa pagbibigay ng buwanang allowance sa mga Solo Parents, Senior Citizen Birthday Cash Gift, at Agapay sa Manggagawa.

Nagpahatid ng lubos na pasasalamat si Mayor Dale Gonzalo “Along” Malapitan sa GCash sa ipinagkaloob na parangal at tiniyak na magpapatuloy ang ganitong inisyatiba sa paggamit ng teknolohiya para na rin sa kaginhawahan ng kanilang mamamayan.

“Malaking bagay po ito para sa atin dahil dito, nakikita natin na nasa tamang direksyon ang ating mga programa, Mula nga po nang nakipagtulungan tayo sa GCash, mas napagsilbihan natin ang mga mamamayan lalo na ang mga taxpayer at mga miyembro ng vulnerable sectors dahil hindi na nila kailangan pang pumunta sa city hall at pumila para lang makapagbayad o matanggap ang benepisyong para sa kanila,” pahayag ni Mayor Along.

Sabi pa ng alkalde, malaking bagay aniya ang magkaroon ng katuwang ang lokal na pamahalaan tulad ng GCash dahila ang kanilang programa at serbisyo ay mabilis at maayos na maipapaabot sa mga Batang Kankaloo. (Richard Mesa)

Proud na proud na flinex ni Dingdong ang photo… SIXTO, kitang-kita ang saya nang ma-meet na finally si MICHAEL V.

Posted on: February 24th, 2026 by @peoplesbalita No Comments

PROUD na flinex ni Kapuso Primetime King Dingdong Dantes sa Facebook ang photo ng kanyang anak na si Sixto kasama si Michael V, na iniidolo pala ng bagets.
Caption ni Dong, “At six years old, his Michael universe is simple: Schumacher for speed, Jordan for hoops, and Michael V for good vibes and comedy.
“Today, he finally met one of his favorite Michaels…definitely a highlight.
“Salamat, Kuya Bitoy sa piktyur.”
Tuwang-tuwa naman ang netizens sa kaguwapuhan ni Sixto, na manang-mana sa kanyang Daddy Dong.
Kinaaliwan din ang suot niyang viral na CNY jacket.
Ilang sa comments na nabasa namin…
“Legit na may taste and high standard ang Sixto. Yown!”
“Poging pogi mana sa daddy.”
“Bigay todo smile ni kuya sixto gwapo talaga.”
“Ngiting may kilig dito si Sixto.”
“Six na si Sixto”.
“Ang laki na nya in pwede na mag-alaga ng isa pang kapatid Dong!”
“Matalinong bata to! matalino yung inidolo e.”
“Mukhang mabait na bata like ate.”
“Ay gwapo ni Sixto yan ang swerte ng DongYan mga anàk nla idol nya pla si bitoy genius Michael v.”
***
SPEAKING of Dingdong Dantes, silang dalawa ni Iza Calzado-Wintle ang mag-i-induct sa mga bagong opisyal ng Society of Philippine Entertainment Editors (SPEEd).
Magaganap ito ngayong alas-onse ng umaga, Pebrero 24.
Pangungunahan nina AKTOR — League of Filipino Actors Founding President at Chairman na si Dingdong at President na si Iza ang panunumpa ng mga opisyal ng organisasyon sa Induction and Recognition Ceremony sa JY Hall ng The Bayanihan Center sa Pasig City.
Itatalaga bilang pangulo si Tessa Mauricio-Arriola, Entertainment and Lifestyle Editor ng “The Manila Times.”
Kasama rin ang mga bagong opisyal na sina Maricris Valdez Nicasio (“Hataw”), bise-presidente para sa panloob na gawain; Gerardine Trillana (“Malaya Business Insight”), bise-presidente para sa panlabas na gawain; Ervin Santiago (“Inquirer Bandera”), kalihim; Rohn Romulo (People’s Balita), kapwa-kalihim; Dondon Sermino (“Abante TNT” at DWAR 1494), ingat-yaman; Anna Pingol (Pika-Pika.com), kapwa-ingat-yaman; Jerry Olea (PEP.ph), tagasuri; at mga opisyal ng ugnayang-pampubliko na sina Nickie Wang (“Manila Standard”), Janice Navida (“Bulgar”) at Neil Ramos (“Tempo”).
Ang iba pang miyembro ng SPEEd ay sina Eugene Asis (“People’s Journal”), Ian Farinas (“People’s Tonight”) at Salve Asis (“Pilipino Star Ngayon” at “PangMasa”), kasama sina Nestor Cuartero (“Manila Bulletin” at “Tempo”), Dinah Ventura (“Daily Tribune”), Jun Lalin (“Abante”), Nathalie Tomada (“Philippine Star”), Bobby Requintina (“Manila Bulletin”), at mga nagretiro nang patnugot na sina Dindo Balares (“Balita”) at Rito Asilo (“Philippine Daily Inquirer”).
Bilang bahagi ng programa, ibibigay ng SPEEd ang kauna-unahang Recognition Awards nito sa mga katuwang na nanindigan sa organisasyon sa mga nakaraang taon. Pararangalan sina Claire Papa, assistant vice-president at head ng external affairs and social partnerships ng Unilab Inc.; Maria Yolanda “Yoly” Crisanto, chief sustainability at corporate communications officer ng Globe Telecom; Joy Andrade, direktor para sa Corporate Communications sa Newport World Resorts; Angeli Pangilinan-Valenciano, board member ng SoundCheck Inc.; Juancho Robles, presidente at punong ehekutibo ng ChanRobles & Company CPAs; at Rhea “Rei” Anicoche-Tan, presidente at chief executive officer ng Beautéderm.
“Habang minamarkahan natin ang ating ika-10 taon bilang isang organisasyon, nararapat lamang na parangalan natin ang mga katuwang na tumulong sa atin na umunlad, mapanatili ang The Eddys at mabigyang-parangal ang talentong Pilipino sa bawat matagumpay na yugto,” ayon sa bagong pangulo na si Mauricio-Arriola.
“Ang kanilang patuloy na suporta ay sumasalamin sa aming pangako na mapahusay pa ang Philippine entertainment.”

Samantala, kikilalanin din ng SPEEd ang kanilang mga miyembrong publikasyon bilang pasasalamat sa kanilang patuloy na suporta para sa misyon ng organisasyon na itaguyod ang integridad, propesyonalismo at responsableng entertainment journalism.

Gaganapin ang seremonya sa Bayanihan Center, isang kilalang event venue sa loob ng compound ng Unilab sa Kapitolyo, Pasig City. Kilala sa mga flexible na pangunahing bulwagan, modernong teknikal na pasilidad at on-site na paradahan, matagal nang tinutugunan ng center ang mga corporate conference, award ceremonies at malalaking pagtitipon sa industriya.

Sa panunumpa ng mga opisyal ng SPEEd para sa taong 2026 at pagkilala sa mga katuwang nito sa industriya, sumusulong ang organisasyon nang may panibagong determinasyon at muling pinagtitibay ang pangako nitong kilalanin ang talentong Pilipino at itaguyod ang kredibilidad at may prinsipyong pamamahayag sa larangan ng aliwang-lokal.

(ROHN ROMULO)

Sa laki ng kinikita sa projects at social media platforms… IVANA, humahabol kina SHARON, BEA at MARIAN sa pagiging bilyonarya

Posted on: February 24th, 2026 by @peoplesbalita No Comments

WOW ang laki talaga ng kinikita ni Ivana Alawi sa kanyang social media platforms tulad ng Youtube channel, IG, at Facebook.
Idagdag pa ang mga income ng famous sexy vlogger sa projects sa TV at movie plus her endorsements.
Hindi imposible na humahabol na siya sa pagiging bilyonarya nina Sharon Cuneta, Bea Alonzo, Marian Rivera, atbp.
Sa latest interview nga kay Ivana ni Korina Sanchez ay tumawa lang ito sa tanong kung ilang daang milyones na meron ang sexy actress.
Say pa ng isang advertising agency, nasa 10 to 20 million raw ang bayad kay Ivana sa bawat endorsement nito ng produkto, pagkain, at online bingo.
May mga alok pa na corporate and out-of-town shows kay Ivana na limitado lang o pinipili lang ang kanyang tatanggapin, dahil ayaw niyang mag-suffer ang vlog, lalo’t dito nanggagaling ang bulk of income.
As of presstime, ay meron nang 20.3 million (and still counting) subscribers si Ivana sa kaniyang official Youtube Channel.

***

MALIBAN sa magandang takbo ng singing career ni Janah Zaplan, na bahagi ng Star Pop Artists ng Star Music Philippines, ay napabilang lang naman ang latest single niya na “I LUV U” sa Spotify Fresh Find PH Playlist.
Ibig sabihin nito malakas ang dating ng song ng pretty singer-celebrity endorser. At happy at inspired siyempre si Janah sa naging magandang outcome ng single niyang ito sa Star Music Ph.
At pagdating naman sa pagiging celebrity endorser, very proud na i-pinost sa Facebook ng daddy nitong si Mr. Boyet Zaplan na as of Feb 23, ay umabot na sa 100 million views, ang said new endorsement ni Janah para sa San Miguel Flavored Beer ( Apple, Lemon, & Lychee flavors) siyempre still counting pa ito.
Aba’y yung mga ganitong nakalululang views at pagtanggap ng public sa social media sa beer commercial ni Janah.
Lume-level na siya kina Anne Curtis, Kathryn Bernardo, Marian Rivera, Toni Gonzaga, Alex Gonzaga, etc.
Kaya naman super proud ang kanyang Mommy Dencie.
By the way, ilan pa sa endorsement ni Janah ay ang Watsons Summer Beats na Ad campaign ng Watsons Philippines.

(PETER S. LEDESMA)

Walang mai-share si Barbie dahil hindi pa naliligawan… CHARO at BOOTS, aminadong may humangang kapwa-babae noong kabataan nila

Posted on: February 24th, 2026 by @peoplesbalita No Comments

DAHIL tungkol sa lesbian love ang pelikulang ‘Until She Remembers’, tinanong namin ang lead cast members ng pelikula, sina Ms. Boots Anson-Rodrigo, Barbie Forteza at Ma’m Charo Santos-Concio, kung naranasan na ba nila na maligawan ng isang tomboy.

Lahad ni Ms. Boots, “Nung nasa… I was in a girls’ school ano, so hindi nawawala iyon, yung girls’ crushes na tinatawag nila.

“Some of the… when I was in my senior high school year, we used to keep study periods for the lower classmates, and I was told that some of these younger women took a fancy on me and…

“Kasi ako yung pinakamataas dun sa klase namin.

“Siguro I was active, I was in honors, I did theater and all of that, so maybe it was some kind of admiration or looking up to, which at that time siguro na-interpret nila as a crush.

“I receive letters, mayroon silang mga sulat, mga little notes.

“And it was good for the ego ‘no, magandang pakiramdam na makatanggap ka.

“Hindi ako, ni minsan hindi ako ba nandiri at the thought na ‘Eeewww, babae ito, babae ako…’

“Wala.

“Ang tiningnan ko yung kanilang attitude, yung pagtingin nila which I think is the, parang the core, the virtue, the value of this film.

“Hindi tumitingin sa kung lesbyana sila, kung same gender sila, pero ang tutok nandun sa pagmamahal,” pagbabahagi pa ni Ms. Boots.

Si Barbie naman ay wala raw maikukuwento dahil wala siyang karanasan na may nanligaw o nagkagusto sa kanya na isang lesbian.

“Wala po,” at tumawa si Barbie, “sorry po, wala akong mase-share, wala po.”

“Siguro may nagka-crush sa akin pero yung sulat-sulat wala, paghanga lang,” pahayag ni Ma’m Charo.

Samantala ay palabas na ngayong February 25 ang ‘Until She Remembers’ sa panulat at direksyon ni Brillante Mendoza at mula sa executive producer na si Wilson Tieng.

Mula ito sa Center Stage Productions at Solar Studios, Inc. kung saan tampok rin sina Eric Quizon, Albert Martinez, Angel Aquino, Vince Rillon, Erlinda Villalobos, Carlitos Siguion-Reyna, Perla Bautista, Angel Latorre, Bianca Kierulf, at iba pa.

***

IKINASAL si Kenneth Villamayor, bunsong anak ng Superstar na si Nora Aunor, nitong Sabado ng gabi, February 21 sa longtime girlfriend nitong si Sam de Leon.

Ang pinagdausang ng napakagandang garden wedding nina Kenneth at Sam ay ang malapalasyong tahanan ng tita ni Sam na si Ruby Lim.

Si Lotlot de Leon ang kasabay ni Kenneth na naglakad patungo sa harap mismo ni Pastor John David Auxtero dahil ang nasa US for a concert tour ang ama ni Kenneth na si Christopher de Leon with wife and my kumare Sandy Andolong, pareho kaming ninang at ninong sa kasal naman nina Lotlot at mister niyang si Fadi El-soury years back.Parte ng entourage ang dalawa pang mga kapatid ni Kenneth na sina MateT de Leon at KikoVillamayor, gayundin ang mister ni Matet na si Mickey Estrada.

Kabilang sa mga principal sponsors ang actress na si Shyr Valdez, Senator Robin Padilla, Senator Bong Go (represented by Phillip Salvador) and Senator Jinggoy Estrada na represented ng husband ni Arlene Muhlach na malapit kay Senator Jinggoy.

In attendace rin siyempre ang mga pamangkin ni Kenneth tulad nina Janine Gutierrez and siblings Jessica, Maxine and Gutierrez, and actress Nadia Montenegro.

A month ago ay idinaos na ang church wedding nina Kenneth at Sam na very intimate dahil close family members lamang ang pinapunta, kaya muli sila ikinasal in a much fabulous garden

wedding, kasama rin nila siyempre ang anak na si Summer.

Congratulations, Sam and Kenneth!

Para palakasin ang pondo ng LGU at matiyak na direktang makinabang ang mga Pilipino…PBBM INILUNSAD ANG ‘SA BAGONG PILIPINAS, BAWAT BAYAN MAKIKINABANG’

Posted on: February 24th, 2026 by @peoplesbalita No Comments

INILUNSAD ni Pangulong Ferdinand R. Marcos Jr., araw ng Lunes ang inisyatibong “Sa Bagong Pilipinas, Bawat Bayan Makikinabang,” na naglalayong palakasin ang kapasidad ng mga local government units (LGUs) sa pamamagitan ng mas mataas na suporta sa pananalapi upang mas epektibong matugunan ang pangangailangan at hinaing ng kanilang mga komunidad.
Sa paglulunsad ng programa sa Palasyo ng Malakanyang, binigyang-diin ng Pangulo ang mahalagang papel ng mga LGU bilang frontliners sa serbisyo publiko, na alam ang sitwasyon sa ground level at unang nakakarinig sa hinaing ng kanilang nasasakupan at kumikilos tuwing may emergency.
“Ngayong araw, inilunsad natin ang ‘Sa Bagong Pilipinas, Bawat Bayan Makikinabang,” isang inisyatiba na naangkla sa prinsipyo na dapat patatagin ang kapangyarihan ng lokal na pamahalaan na tumugon sa pangangailangan ng mga tao.,” ayon sa Pangulo.
“Bilang local chief executives, kayo ang unang nakakaramdam ng problema at unang nakakarinig ng hinaing dahil kayo ang nakakaalam ng tunay na kalagayan sa inyong komunidad, sa inyo nagsisimula ang pagbabago,” aniya pa rin.
Winika pa ng Pangulo na sa loob ng higit tatlong dekada, ang Local Government Support Fund (LGSF), bilang karagdagan sa National Tax Allocation (NTA), ay nagsilbing tulay sa pagitan ng pambansang pamahalaan at lokal na komunidad, na nagpopondo ng maraming proyekto na nakatulong sa pagpapabuti ng buhay ng mga mamamayan.
Gayunpaman, inamin ng Pangulo na ang LGSF ay gumana sa ilalim ng demand-driven system na kinakailangan munang kumpletuhin ng LGUs ang lahat ng requirements bago maipalabas ang pondo, at madalas ay naantala ang implementasyon ng proyekto, lalo na sa maliliit at geographically isolated na lugar.
Upang matugunan ang problemang ito, nagsagawa ang Pangulo ng konsultasyon sa mga pangunahing grupo ng local government, kabilang ang Union of Local Authorities of the Philippines, League of Municipalities of the Philippines, at League of Cities of the Philippines.
Ngayong taon, itinaas ng pamahalaan ang allocation ng LGSF sa higit PhP34 bilyon, na nagdala sa kabuuang pondo ng halos PhP58 bilyon – pinakamataas sa kasaysayan.
Sinabi ni Pangulong Marcos na ang pinalaking LGSF ay magpo-prayoridad sa mga programang tulad ng pamamahagi ng 60 kilo ng bigas sa higit limang milyong pamilya; pagtatayo ng mga ospital at health stations at pagbili ng karagdagang medical equipment; pagtatayo ng evacuation facilities; pagpapaunlad ng farm-to-market roads; at pagpapabuti ng water supply systems at rural electrification projects.
“Upang matiyak na ang bawat sentimo ng pondo ay may malinaw na direksyon, nagtakda tayo ng mga prayoridad na programa na magpapalakas ng ating mga sektor,” sabi ng Pangulo.
“Bahagi ang LGSF ng mas malawak nating layunin na isulong ang Bagong Pilipinas kung saan ang pag-unlad ay nararamdaman sa bawat rehiyon at bawat komunidad,” dagdag pa niya.
Bukod dito, iniutos din ni Pangulong Marcos ang direktang pagpapalabas ng pondo sa mga LGU upang matiyak na ang mga komunidad ay makatatanggap ng tulong nang walang hindi kailangang pagkaantala.
“Pinabilis at pinadiretso na natin ang pagdating ng LGSF sa bawat lokal na pamahalaan. Ginawa namin ito dahil sa pagkilala na ang pangangailangan ng tao, gaano man kaliit o gaano kalaki ay hindi pa naghihintay pa,” sabi ng Pangulo.
(Daris Jose)

Shabu laboratory sa Valenzuela, nadismantol

Posted on: February 24th, 2026 by @peoplesbalita No Comments

NADISMANTOL ng pinagsamang mga operatiba ng PDEA Cavite Provincial Office, at PDEA RO-NCR Northern District Office, kasama ang Station Drug Enforcement Unit (SDEU) ng Valenzuela City Police sa pangunguna ni P/Lt. Sherwin Dascil ang isang shabu laboratory sa loob ng isang warehouse Brgy., Viente Reales, Valenzuela City matapos ang pagkakaaresto sa isang High-Value Drug Personality na si alyas “John”, 30, sa ikinasang buy bust operation sa lugar. Tinatayang nasa bilyong piso halaga ng ilegal na droga, mga kemikal, at mga kagamitan sa paggawa ng shabu ang nasamsam. (Richard Mesa)

PAGKAKATALAGA KAY MATIBAG SA NBI, HINDI REWARD

Posted on: February 24th, 2026 by @peoplesbalita No Comments

NILINAW ng bagong talagang National Bureau of Investigation Director Melvin Matibag na hindi in-offer o inalok sa kanya ang posisyon kundi dumating lang ang pagkakataon na siya’y magbalik serbisyo publiko.
Ginawa ni Matibag ang pahayag matapos siyang mag courtesy call sa Department of Justice (DOJ) kung saan kinontra ang naging pahayag ni Atty Harry Roque na nakuha niya na ang premyo o reward mula sa administrasyong Marcos sa pagtatalaga sa kanya sa NBI.
Ayon pa kay Matibag noon pa man ay matagal na siyang nanungkulan sa gobyerno at naramdaman niya na panahon na para bumalik sa serbisyo publiko at siya ay dati nang nag-apply sa NBI.
“Noon pa man po ay mayroon na akong mga sinasabi na gusto kong makatulong sa ating administrasyon –siguro po nag-align lang ang mga bituin kaya tayo tinawag para manungkulan sa posisyon” pahayag pa ni Matibag sa ambush interview ng mga mamahayag.
Magugunitang naghain ng disbarment case si Matibag laban kay Roque matapos nitong inilabas ang video na nagpapakitang gumagamit ng iligal na droga si Pangulong Ferdinand Marcos Jr, pero iginiit at kinumpirma ni Matibag na peke ang naturang video.
Samantala nangako naman si Matibag na magiging transparent sila sa lahat ng iniimbestigahan nilang mga kaso para sa kapakanan ng publiko .(Gene Adsuara)

QC gov’t nilinaw na walang tinanggihang permit sa EDSA 40th anniversary rally

Posted on: February 24th, 2026 by @peoplesbalita No Comments

AGAD nilinaw ng Quezon City local government na wala silang tinanggihang permit para sa mga pagtitipon sa Pebrero 25, kasabay ng ika-40 anibersaryo ng People Power Revolution.

Ayon kay Retired Gen. Elmo San Diego, hepe ng QC Department of Public Order and Safety (DPOS), binigyan ng permiso ang pagtatayo ng common stage sa People Power Monument na inorganisa ng Trillion Pesos March Movement.

Gayunman, may ilang grupo na tumangging sumama sa iisang programa at mas piniling magsagawa ng hiwalay na kilos-protesta sa EDSA Shrine.
Ipinaliwanag ni San Diego na hindi sakop ng Quezon City ang EDSA Shrine kaya ang pagbibigay ng permiso ay nakadepende sa Mandaluyong LGU at Eastern Police District.
Samantala, nakatakdang magsagawa ng “Prayer Power sa EDSA” sa EDSA Shrine na pinangungunahan ng mga church leaders at civic groups.
Bukod dito, muling maglulunsad ng protesta ang Trillion Pesos March Movement laban sa korapsyon at political dynasties.
Tiniyak ng Quezon City LGU na nakakalat ang mga tauhan ng pulisya upang matiyak ang kaayusan at kapayapaan sa araw ng anibersaryo.
Mahigpit din nilang babantayan ang mga grupong posibleng maglunsad ng hiwalay na rally kahit walang permiso.
(DARIS JOSE)