SINABI ng Malakanyang na hindi sumasalamin sa policy direction ng Pilipinas ang maikling pagtatagpo nina Unang Ginang Liza Araneta-Marcos at Chinese Ambassador to the Philippines Huang Xilian sa isang event.
Nitong weekend, sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na ang Chinese Embassy sa Maynila ay nagbahagi ng larawan na magkasama ang Unang Ginang at Chinese envoy, sa gitna ng pagpapalitan ng maaanghang na salita sa pagitan ng Philippine at Chinese officials ukol sa isyu ng karapatan at soberanya ng bansa sa West Philippine Sea (WPS).
Sinabi ni Castro na na brief interaction ay dapat na hindi iniuugnay sa diplomatic matters.
“Unang-una po, kung dumalo man ang ating Unang Ginang sa mga public consular events, hindi po ito nagre-reflect ng policy direction at hindi po ito nali-link sa anumang diplomatic matters,” ang sinabi ni Castro.
Idinagdag pa ni Castro na batid naman ng mga mambabatas na ang Pangulo lamang ang may awtoridad na magdeklara ng isang foreign official na persona non grata.
“Alam naman po ng mga mambabatas na ang Pangulo po ang may authority kung magde-declare man ng isang tao bilang persona non grata. Kaya wala pong masasabi na political impasse,” ani Castro.
At nang tanungin kung ang “pleasant conversation” sa pagitan nina Unang Ginang Liza at Chinese envoy ay maaaring makatulong na de-escalate ang nagpapatuloy na ‘war of words’ sa pagitan ng mga mambabatas at Chinese Embassy, sinabi ni Castro na batid ng administrasyon na prayoridad ang diplomasiya sa paglutas sa sigalot.
“Alam naman po ng bansang China na ang ating Pangulo at ang administrasyong ito ay tanging diplomasya ang nais para maayos kung anuman ang isyu,” ang winika ni Castro.
“So malamang po, hindi na kinakailangan na magkaroon ng init o initan sa pagitan ng dalawang bansa,” aniya pa rin.
Nauna rito, mariing tinutulan ni Pangulong Ferdinand R. Marcos Jr. ang panawagan na idekladang persona non grata si Chinese Ambassador Jing Quan sa Pilipinas.
Sa gitna ito ng isyu sa agawan pa rin ng teritoryo sa West Philippine Sea at ang palitan ng mga pahayag sa pagitan ng ilang opisyal ng Pilipinas at ng Embahada ng China.
Sinabi ni Castro, isang maiksing “no” ang sagot ng Pangulo tungkol sa panawagang ito.
Nauna nang sinabi ng Department of Foreign Affairs (DFA) na diplomasya ang paiiralin sa usaping panglabas ng bansa.
Matatandaang nanawagan si Senate President Vicente Sotto III sa Senado na pag-aralan ang posiblidad na ideklara si Chinese Embassy Deputy Spokesperson Guo Wei na persona non grata sa Pilipinas dahil sa mga pahayag nito nang pag-atake sa mga mambabatas. (Daris Jose)
- March 27, 2026
Ang Diyaryong Pinagkakatiwalaan
Archive for February, 2026
Maikling pagtatagpo nina Unang Ginang Liza at Chinese envoy, hindi sumasalamin sa polisiya ng Pinas- Malakanyang
PBBM, pinababayaran na ang mga kontratista na maayos na tumupad sa kontrata
IPINAG-UTOS na ni Pangulong Ferdinand Marcos Jr., na bayaran agad ang mga kontratista na naging maayos ang paggawa sa mga proyekto.
Sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na buo ang paninindigan ng Pangulo na panahon na para iangat ang ekonomiya ng bansa.
Ito’y sa kabila ng pangunguna sa pagpapa-imbestiga sa malawakang pag-abuso sa pondo ng bayan.
Sa pakikipagpulong ng Chief Executive kasama ang economic team, hinikayat aniya ng Pangulo ang kanyang Gabinete na ‘to moved forward.’
Nagbigay na ng direktiba ang Pangulo sa mga Kalihim na tiyakin na nakatutok ang mga ahensiya sa mabilis at mas maayos na paggawa ng mga infrastructure projects ng gobyerno.
Ito’y upang matiyak na lubos na mapakikinabangan ng mga Filipino ang bawat proyekto.
Ipinag-utos din aniya na ng Pangulo na siguraduhin na mababayaran ang mga kontratista na maayos na tumutupad sa kanilang mga kontrata.
Mas mabilis na proseso ang bayad, mas maayos na trabaho para sa mga Filipino.
Kailangan din aniya magandang koneksyon at ugnayang national at local na pamahalaan para mabantayan at matapos ang mga infrastructure projects.
Karugtong nito, ilang araw matapos na mag-utos ang Pangulo sa mga ahensiya na i-monitor ang kanilang mga proyekto, pinaigting na ng Department of Agriculture (DA) ang pagbabantay sa kanilang farm-to-market road projects. Ito’y para siguruhin na totoong mararamdaman ng mga magsasaka at mangingisda ang mga magagandang kita mula sa mas mababang production cost.
Ang hakbang na ito ng DA ay pagtalima sa utos ni Pangulong Marcos na gawing mas masinsin ang pagtutok sa mga proyekto ng pamahalaan kahit anong ahensiya pa man.
Ang pagbabantay sa progreso ng farm to market road ay responsibilidad ng Bureau of Agricultural and Fisheries engineering ng ahensiya.
Dadaan sa masusing pagsusuri ang mga proyekto upang siguruhin na nasusunod ang engineering standards at consistent sa pagkakagawa ng mga ito.
Bantay pondo tungo sa progreso. Ito aniya ang nais ng Pangulo para sa ikabubuti ng mga Filipino. (Daris Jose)
Sa pagdeklara na “sufficient in form” ang dalawang impeachment complaints laban kay PBBM, iginagalang ng Malakanyang
IGINAGALANG ng Malakanyang ang naging pasya ng Mababang Kapulungan ng Kongreso kaugnay ng mga impeachment complaint na inihain laban kay Pangulong Ferdinand R. Marcos Jr.
Ito’y makaraang ideklarang ‘sufficient in form’ ang dalawang impeachment complaints sa pag-arangkada ng pagdinig ng House Committee on Justice, araw ng Lunes.
“So, that’s the process. We have to respect that,” ayon Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.
At sa tanong naman kung kumpiyansa ang Malakanyang na hindi naman lulusot at mapagpapasyahan na ‘sufficient in substance’ ang nasabing dalawang impeachment complaints laban sa Pangulo, ang naging tugon ni Castro ay “even before, sinabi na po ng Pangulo na alam niya na wala siyang ginawa na mali, wala siyang ginawang paglabag sa batas, at wala siyang ginawang impeachable offense kaya kumpiyansa siya sa sarili niya.”
Sinabi ni Castro na nababahala si Pangulong Marcos sa posibleng epekto ng impeachment proceedings sa ekonomiya ng bansa.
Kasunod ito ng babala ng isang mambabatas na maaaring magsilbing senyales ng political instability sa international community ang mga hakbang na ito.
Kasabay ng pag-usad ng impeachment laban sa Pangulo, inihain din ngayong araw ang dalawang impeachment complaint laban kay Vice President Sara Duterte.
Binigyang diin ng Malakanyang na wala silang kinalaman sa paghahain ng mga reklamo at ipinauubaya na lamang nila sa Kongreso ang magiging kahihinatnan ng impeachment proceedings. (Daris Jose)
₱69.8M ALLOWANCES NG MGA GURO SA MAYNILA, ILALABAS NGAYONG LINGGO
INANUNSIYO ni Manila City Mayor Francisco “Isko” Moreno Domagoso ang pagpapalabas ng ₱69.8 milyong allowances para sa 11,633 pampublikong guro ng Maynila sa ilalim ng Schools Division Office (SDO), na sasaklaw sa Oktubre hanggang Disyembre 2025.
Ayon sa alkalde, ilalabas ang naturang allowances ngayong linggo, kasabay ng ₱9.68 milyong ayuda para sa 6,452 Grade 12 students, kaya umabot sa ₱79.48 milyon ang kabuuang SDO-related releases para sa huling kwarter ng 2025.
Magpapalabas din ang pamahalaang lungsod ng ₱26.03 milyon para sa 8,675 mag-aaral ng Pamantasan ng Lungsod ng Maynila (PLM), at ₱11.10 milyon para sa 5,551 mag-aaral ng Universidad de Manila (UDM).
Kabilang din sa mga makakatanggap ng allowances ang mga kawani ng Manila Police District (₱26.03M), Manila Fire District (₱2.76M), Philippine Drug Enforcement Agency (₱150,000), at Bureau of Jail Management and Penology (₱3M).
Sa kabuuan, aabot sa ₱155.04 milyon ang ilalabas na allowances at subsidiya ng Pamahalaang Lungsod ng Maynila para sa edukasyon at mga sektor ng pampublikong serbisyo.
“Ikinagagalak kong makapagbigay ng ngiti sa halos 26,000 indibidwal—mga mag-aaral, kawani, at guro—sa pamamagitan ng tulong-pinansyal na ibinibigay ng inyong Pamahalaang Lungsod,” ani Domagoso. (Gene Adsuara)
House justice panel pinagtibay ang ‘sufficiency in form’ ng 2 impeachment complaints kay PBBM
IDINEKLARANG ‘sufficient in form’ ng House Committee on Justice na pinamumunuan ni Batangas Rep. Gerville Luistro ang dalawang impeachment complaints na inihain laban kay Pangulong Bongbong Marcos Jr.
Sa botong 46 pabor, isang no at isang abstain para sa impeachment complaint na inihain ni Atty. Andre de Jesus na inendorso naman ni Pusong Pinoy Partylist Rep. Jernie Nisay.
Habang nakakuha naman ng 35 pabor, 9 ang tutol at 1 abstain ang ikalawang impeachment complaints nina dating Rep. Liza Maza na inendorso naman nina Reps. Antonio Tinio (ACT Teachers), Sarah Elago (Gabriela) at Renee Co (Kabataan Partylist).
Paliwanag ni Luistro, hindi sapat na may binabanggit na mga pagkakamali,kailangang matukoy ito at maituturing na impeachable offense at sapat upang maging ground of impeachment.
Matapos ang talakayan, muling boboto ang mga miyembro ng komite upang pasyahan kung ang mga reklamong De Jesus at Maza et al. ay pumapasa sa parehong pamantayan ng anyo at nilalaman.
Binigyang-diin din ni Luistro na ang kasalukuyang yugto ay bahagi lamang ng mga paunang hakbang ng impeachment process. Sa ngayon, limitado ang pagsusuri ng komite sa mga nakasulat sa reklamo at hindi pa tumatanggap ng ebidensiya.
Kapwa tinutulan ni Manila Rep. Benny Abante ang nasabing reklamo habang nag-NO sa ikalawang reklamo sina Cagayan de Oro City Rep. Rufus Rodriguez, Davao Rep. Boboy aquino at Zambales Rep. Jefferson Khonghun.
Ngayong Martes ay tatalakayin naman ang usapin ng sufficiency in substance ng dalawang complaint.
(Vina de Guzman)
TRICYCLE DRIVER, PINAGBABARIL, PATAY SA MAYNILA
NASAWI ang isang 35 anyos na tricycle driver matapos pagbabarilin sa Sta. Barbara Street, Ermita, Maynila noong Linggo.
Ayon sa isang saksi na hinabol ng mga nakamotorsiklong suspek ang biktima habang sakay ng kanyang traysikel at ilang beses itong binaril.
Bumagsak ang biktima sa kalsada, habang patuloy na umandar ang kanyang traysikel bago bumangga sa isang traffic island.
Nagtamo ang biktima ng maraming tama ng bala, at natagpuan ang ilang basyo ng bala sa lugar ng insidente.
Hindi naman lubos akalain ng kaanak ng biktima na dumating sa pinangyarihan ng insidente na naging target ng mga salarin ang biktima.
Ayon sa pulisya, walang closed-circuit television (CCTV) sa lugar. Patuloy ang imbestigasyon at nagsagawa na ng manhunt ang mga awtoridad para mahanap ang dalawang suspek. (Gene Adsuara)
NHA, NAGSAGAWA NG APAT NA ARAW NA GAD CLIENT-FOCUSED ASSESSMENT
NAGSAGAWA ang National Housing Authority (NHA) ng isang Four-Day Client-Focused Assessment ng GAD-Funded Training Programs para sa Calendar Years 2022-2024. Bilang bahagi ng patuloy na pagsisikap nitong suriin ang bisa at epekto ng mga programang nakatuon sa Gender and Development (GAD) ng buong ahensya
Sa patnubay ni NHA General Manager at GAD Champion Joeben A. Tai, ang apat na araw na aktibidad ay pinangunahan ng NHA GAD Client-Focused Committee na pinamunuan ni Community Support Services Department (CSSD) Officer-in-Charge, Maricris G. Maninit. Dinaluhan ito ng 60 miyembro ng NHA Gender and Development Focal Point System (GFPS) mula sa iba’t ibang rehiyon.
Ang assessment ay naglalayong matukoy kung ang mga GAD-funded training programs na ipinatupad ng ahensya sa nakalipas na tatlong taon ay epektibong tumugon sa mga pangangailangan ng mga kliyente nito, pinahusay ang gender responsiveness nito, at nag-ambag sa pinahusay na paghahatid ng serbisyo sa loob ng mga NHA project sites.
Sa kanyang pambungad na mensahe, binigyang-diin ni NHA GAD Chairperson Atty. Maria Magdalena D. Siacon ang kahalagahan ng evidence-based at client-centered evaluation sa pagpapatibay ng GAD planning, implementation at budgeting, at nilinaw nito ang papel ng assessment sa pagtiyak na ang mga GAD initiatives ay nakaka-benepisyo sa mga kliyente, stakeholders, at empleyado ng ahensya.
Bilang pagpapahayag ng kanyang suporta sa inisyatibong ito, iginiit ni GM Tai ang patuloy na pagpapatupad ng NHA sa inobasyon at pagsasainstitusyon ng mga gender-responsive na mga gawi, kasabay ng pahayag na ang layunin ng ahensiya ay higit pa sa pagbibigay ng pabahay, pati na rin ang pagbuo ng mga inklusibo at mauunlad na komunidad.
Higit pa rito, aktibong nakibahagi ang mga kalahok sa mga talakayan sa pamamagitan ng pagbabahagi ng kanilang mga karanasan mula sa kani-kanilang rehiyon, pagbibigay ng mga inputs na gagamitin sa pagpino ng mga future GAD strategies, pagpapahusay ng program responsiveness, at pagtukoy sa mga areas of improvement at mga posibleng pilot interventions.
Nitong Setyembre 2025 ay pinarangalan ang NHA ng Philippine Commission on Women (PCW) para sa namumukod-tanging dedikasyon nito sa pagsusulong ng gender equality at women’s empowerment sa pamamagitan ng epektibo at estratehikong paggamit ng 2024 GAD Budget nito. Ito ay karagdagan sa mga naunang Silver at Bronze GADTimpala Awards na ipinagkaloob ng PCW sa NHA noong 2023 at 2018.
Alinsunod sa Republic Act No. 12216 o ang NHA Act at Section 24 ng Republic Act No. 9710 o Magna Carta of Women, na nag-uutos sa probisyon ng accessible, secure, at inclusive na pabahay para sa kababaihan at iba pang marginalized groups, isinusulong ng NHA ang 2026-2031 GAD Framework and Strategic Goals nito upang palakasin ang pangako ng ahensya tungo sa gender equality, inclusivity at accountability ayon sa mga national GAD policies at mandates. (PAUL JOHN REYES)
Paglawak ng PhilHealth benefits para sa middle class iniutos
MAAARING makatanggap nang pinalawak na benepisyo sa kalusugan ang mga middle-income Filipino na direktang nagbabayad ng kontribusyon sa Philippine Health Insurance Corp. (PhilHealth), habang pinag-aaralan ng ahensya ang mga bagong programa sa ilalim ng paggabay ng Department of Health (DOH).
Sinabi ni Health Secretary Teodoro Herbosa na layon ng mga panukala na mapabuti ang serbisyo para sa mga miyembrong direktang nagbabayad ng premium mula sa sahod o kita sa negosyo, bilang dagdag sa mga umiiral na programa para sa mga sponsored member.
“Sa loob ng maraming taon, ang pokus namin ay ang tinatawag na indirect o sponsored programs, kung saan ang mga benepisyaryo ay hindi nagbabayad ng premium ngunit patuloy na tumatanggap ng benepisyo ng PhilHealth na pinopondohan ng gobyerno,” ayon kay Herbosa sa salitang Ingles.
Dagdag pa niya, “sa bagong programang ito, kailangan nating pagbutihin ang mga serbisyo para sa middle class.”
Sinabi rin ni Herbosa na binigyang-diin ni Pangulong Ferdinand “Bongbong” Marcos Jr. ang pangangailangang suportahan ang mga direct contributor. Kabilang sa mga pinag-aaralang hakbang ang mas maayos na hospitalization.
Ang mga direct contributor ay kinabibilangan ng mga empleyado, self-employed, at mga may negosyo na regular na nagbabayad ng premium.
“Napag-usapan namin [ni Executive Secretary Ralph Recto] ang posibilidad ng mas maayos na accommodations para sa mga direct member. Sa ngayon, pare-pareho ang basic accommodations ng lahat, ngunit maaari nating pag-isipan ang dalawang pasyente kada kuwarto o paglalagay ng air conditioning upang mas mapabuti ang benepisyo para sa mga nagbabayad,” ani Herbosa.
Isa pang panukala ang pagpapalawak ng PhilHealth packages para sa mga ospital na nagpapatupad ng zero-balance billing (ZBB) program.
Makatuwiran ito dahil hinihikayat nito ang mga LGU hospital na ipatupad ang ZBB. Pag-aaralan ng aming actuarial team kung kakayanin ito ng PhilHealth. Malaki na ang ibinabayad namin sa mga ospital—umaabot sa P300 bilyon—at maaari pa itong tumaas ngayong taon dahil sa dami ng inilalabas na PhilHealth packages,” dagdag niya.
Matatandaang inanunsyo ni Marcos noong nakaraang taon na ipatutupad ang ZBB sa lahat ng 87 ospital na pinatatakbo ng DOH.
Warriors, nalasap ang 7-point loss sa kamay ng No.1 eastern conference team
Nalasap ng Golden State Warriors ang pitong puntos na pagkatalo sa kamay ng No.1 team sa eastern conference na Detroit Pistons.
Kinulang ang comeback ng Golden State sa huling quarter para burahin ang 13-point deficit at nalasap ang 131-124 na pagkatalo.
Muling nagpakita ng episyenteng peformance ang Detroit guard na si Cade Cunningham sa kaniyang 11-of-19 field goals at ibinulsa ang 29 points, kasama ang limang free throw.
Nagbulsa rin siya ng 11 assists at isang block, kasama ang apat na reboulnds.
Pitong players ng Pistons ang nagtapos na hawak ang double-digit score, at dalawa ang gumawa ng double-double performance.
Nasayang naman ang 23 points ni NBA superstar Stephen Curry sa muling pagkatalo ng Warriors. Ang magandang performance ni Curry ay natapos sa ikalawang bahagi ng laban matapos siyang umalis sa hardcourt dahil sa knee soreness.
Pinilit pa rin ng Golden State na itawid ang laban ngunit hindi naging sapat ang 18 3-pointers na naipasok ng koponan dahil binantayan ng Pistons ang paint area kung saan kumamada ang koponan ng 62 points habang 40 points lamang ang naging kasagutan ng 2022 NBA champion.
Gumamit ang Pistons ng fast-paced game kontra sa team ng 37-anyos na si Curry. Sa kabuuan ay kumamada ang Pistons ng 25 fast break points habang sampu lamang ang nagawa ng Warriors.