AMINADO si Ejay Falcon na iniyakan niya ang pagkatalo niya sa 2025 elections sa pagka-Kongresista sa Second District ng Oriental Mindoro matapos manilbihang Bise Gobernador ng nabanggit na lalawigan.
“Hindi naman maiiwasan na iniyak ko siya. Ibinigay mo ‘yung best mo. Nangampanya ka.
“‘Yun nga lang, wala ka rin namang pera nung eleksyon. Hindi rin ganoon kalaki yung inilamang nung katunggali ko.”
“After nung iyak na yun, siguro, may purpose si Lord kung bakit nangyari yun. Hanggang biglang nag-SONA. “Nung SONA, pumutok na yung issues katulad ng flood control, malalaking corruptions.”
Naging blessing in disguise raw ang pagkatalo niya dahil tila naging mainit ang mga mata ng publiko sa mga congressmen.
“Ngayon, alam ko na yung purpose, God’s protection, redirection.
”Nung August, nanonood ako ng TV, naglabasan na yung issues. In fairness kay ninong, si direk Lauren Dyogi, nahimasmasan ako.
“Lumuwag yung pakiramdam ko. One time, nagkita kami after elections, lumabas na nga yung corruption issues, sabi niya, ‘Mahal ka talaga ng Holy Spirit. “Tingnan mo kung nariyan ka?’ Sabi ko, ‘Oo nga po.’”
Bakit hindi bilang Gobernador ang itinakbo niya?
“Basta sabihin na lang po natin na nung time na yun ay iniisip ko kung saan ako mas may magagawa. Sektor ng kabataan, education.
“Diyan ako galing. Gusto ko talagang pagtuunan ng pansin. Sa province namin, nakaka-relate yung mga tao sa akin. May mga kabataan na may kanya-kanyang talento.
“Ako, sino ang mag-aakala na from the barrio na walang kuryente at signal ng cellphone ay magiging PBB winner at vice governor.
“Yung nangyari sa akin, ganoon din sa kanila. Gusto kong makapag-aral sila.
“Galing din ako sa wala. Nakakapagtrabaho ako sa showbiz. Okay naman na ang buhay namin. Pero gusto mo kasing makatulong,” sinabi pa ni Ejay.
Ipinagmamalaki naman ni Ejay na nakapagtapos siya ng Bachelor of Arts in Political Science with a Major in Local Government Administration sa University of Makati habang nakaupo siya bilang Vice Governor.
Samantala, nagbabalik-pelikula si Ejay sa “Kappa-tiran,” sa direksyon ni Neal “Buboy” Tan at produced ng Marcos Production ni Nunungan Lanao del Norte Vice Mayor Marcos Mamay.
“Hindi ko puwedeng talikuran ang showbiz kasi mahal ko ang pagiging aktor ko,” saad ni Ejay.
“Dati yung mga ginagawa ko, pa-cute, mga love story. Ngayon, siguro ito yung mas mature na Ejay na makikita ninyo sa movie.
“Sa akin, ang importante, hindi lang basta pelikula. Makagawa lang tayo ng pelikula, sige basta may trabaho tayo, go na lang.
“Hindi kasi ganoon ngayon. Hindi katulad noong nag-uumpisa pa lang ako, kailangan magtrabaho. Kailangan kumita ng pera.
“Ang ganda ng message ng pelikula. Yun naman talaga ang purpose, ang makagawa ng magandang pelikula. Kung kumita, bonus na lang.
“Kung ganito ang mga pelikulang ibinibigay sa akin, kahit siguro araw-araw ako mag-shooting.”
Tungkol sa mga nangyayari sa isang fraternity ang pelikula at nagpapasalamat si Ejay kina direk Buboy at Vice Mayor Mamay dahil pinagkatiwalaan siya ng mga ito na magbida sa ‘Kappa-tiran.’
Kasama rin sa movie sina Sheryl Cruz, Bembol Roco, Sam Coloso, MJ Macalintal at Patricia Javier.
- March 27, 2026
Ang Diyaryong Pinagkakatiwalaan
Archive for February, 2026
Naniniwalang may purpose si Lord kaya ‘di nanalo… EJAY, aminadong iniyakan ang pagkatalo sa 2025 elections
Cast ng ‘I’mPerfect’, contract stars na ng Nathan Studios… SYLVIA, umaming ‘di sila madaling i-handle pero madaling ilapit para magka-project
PUMIRMA na ng tatlong taon na kontrata ang mga bida ng “I’mPerfect” sa Nathan Studios Artist Management last Tuesday, February 3.
Pinangunahan ito ng MMFF 2025 best actress na si Krystel Go at best actor nominee na si Earl Amaba.
Kasama ang iba pang actors with Down Syndrome na sina Carl Garcia, Angela Batallones, Bea Mendoza, Javi Sarmiento, Royce Gian Rivera, Gio Dicen at Jonathan Tilos, para maging Nathan Angels.
Hindi naman nakasama sa contract signing si Richelle Uy dahil nagkasakit daw ito.
Bukod siyam na nabanggit kasama sa pumirma at pinakilala si Ice Almeria, ang first champion ng reality show na “Time To Dance” na napanood sa ABS-CBN noong 2025, na co-produced ng Nathan Studios.
Nasaksihan namin na ang persons with DS mismo ang pumirma sa kanilang mga kontrata, kasama ang kanilang magulang at mga guardians.
Nagpapasalamat ang magulang dahil ang pangarap nilang mapanood ang mga anak o magkaroon ng endorsement ay tinupad ng Nathan Studios.
Balitang gagawa ng comedy series ang “I’mPerfect” cast at si Direk Sigrid Andrea Bernardo ang magdidirek at magsusulat.
Malaki rin ang pasasalamat ng premyadong aktres at producer na Sylvia Sanchez dahil ipinagkatiwala sila sa Nathan Studios.
Narito ang mensahe ni Sylvia sa naganap na contract signing…
“Magandang araw sa ating lahat. First and foremost, thank you all for being with us today. Today is a very special day for Nathan Studios and, more importantly, for our artists. Hindi lang ito contract signing ito ay simula ng isang pangarap na sabay-sabay nating binubuo.
“Sa Nathan Studios, naniniwala kami na ang talento ay walang limitasyon. Hindi ito nasusukat sa labels, kundi sa puso, sipag, at tapang na ipakita ang sarili sa mundo.
“These artists, our angels, our persons with down syndrome, are full of raw skills, creativity, at isang klase ng authenticity na bihirang-bihira. Totoo, buo, at galing mismo sa puso.
“Bago pa man magsimula ang pelikulang I’MPERFECT, nakikitaan na namin kayo ng potensyal. We believed in you even before the cameras rolled—before the lights, before the applause.
“And recently, that belief was proven true when you made history at the Metro Manila Film Festival: Best Picture, Best Actress for Krystel Go, and Best Cast Ensemble. “Isang napakalaking tagumpay—hindi lang para sa pelikula, kundi para sa bawat pangarap na pinanghawakan ninyo. We see your potential. We see your hard work. And most of all, we believe in you.
“Hindi lang bilang artists, kundi bilang individuals na may boses, kwento, at liwanag na kayang magbukas ng isip at puso ng marami.
“Maliban sa aming artists sa I’m Perfect, Ito rin ay contract signing ng nanalo sa aming dance competition na ‘Time To Dance’ sa ABS-CBN na si Ice.
“Although we are primarily a production company, itong contract signing namin ay paraan namin para ma-honor ang artists namin to watch them grow from one project to the next — sa showbiz man o sa labas nito.
“Hindi namin ipapangako ang langit at lupa. Pero isang bagay ang sigurado…gagawin namin ang lahat ng aming makakaya para samahan kayo, gabayan kayo, at tulungan kayong maabot ang inyong mga pangarap.
“Ang kontratang ito ay simbolo ng tiwala—tiwala namin sa inyo, at tiwala ninyo sa amin. At sa puntong ito, nais din naming magpasalamat sa mga magulang—salamat sa walang sawang suporta, tiwala, at pagmamahal na siyang pundasyon ng lakas ng mga batang ito.
“Welcome to Nathan Studios. This is just the beginning and we are so, so proud to be on this journey with you.”
Kuwento pa ni Sylvia, kahit hindi madaling i-handle ang showbiz career nila, madani silang ilapit sa TV stations tulad ng ABS-CBN at GMA and hopefully makakuha sila ng projects bukod sa endorsements, dahil brand ambassadors na sila ng Nailandia.
Ang mga girls ay kinukuha ng Wacoal para mag-model at magsu-shoot na sila this week. At sakto pa ito dahil ang February pala ay month ng may Down Syndrome.
Si Krystel naman ay kinukuha rin para sa Women’s month sa March.
Samantala, tuloy-tuloy lang ang internatioanal showing ng ‘I’mPerfect’, kaya dapat abangan sa Madrid (Spain), Lisbon (Portugal), Lithuania, Poland at Czech Republic.
(ROHN ROMULO)
Kai Sotto halimaw sa Japan B.League
PARANG hindi dumaan sa ACL injury si Kai Sotto matapos magpasiklab sa kanyang pagbabalik-aksyon kasama ang Koshigaya Alphas sa Japan B.League.
Nagtala si Sotto ng impresibong double-double output na 20 puntos at 14 rebounds kasama ang dalawang assists at isang block para pamunuan ang Alphas sa 81-80 panalo kontra sa Levanga Hokkaido.
Magandang resbak ito para sa Alphas na yumuko sa Hokkaido sa kanilang unang paghaharap noong Sabado sa iskor na 81-88.
Bumandera sa naturang panalo ng Levanga si Gilas Pilipinas standout Dwight Ramos na may 18 puntos, anim na rebounds at dalawang assists.
Naglista naman ang 7-foot-3 na si Sotto ng double-double na 14 points, 10 rebounds at anim na assists sa naturang laro.
Nakabalik na sa porma si Sotto matapos magtamo ng ACL injury noong nakaraang taon.
Sumalang si Sotto sa operasyon dahilan para sumailalim ito sa ilang buwan na rehabilitasyon para tuluyang gumaling ang kanyang injury.
At sa kanyang pagbabalik, tiniyak ni Sotto na muling magbabalik ang bangis nito tulad ng mga nakalipas na laro nito.
Magandang balita rin ito para sa Samahang Basketbol ng Pilipinas (SBP) dahil makalalaro na si Sotto sa mga susunod na laban ng Gilas Pilipinas.
Partikular na rito ang FIBA World Cup Asian Qualifiers kung saan matinding laban ang haharapin ng Gilas Pilipinas sa second window laban sa powerhouse teams Australia at New Zealand.
Alex Eala, patuloy ang pag-angat sa World Rankings
NAKUHA ni Alex Eala ang kanyang bagong career-best ranking na No. 45 sa Women’s Tennis Association (WTA) nitong Lunes, February 2 matapos ang solid na performance sa unang bahagi ng 2026 season.
Umakyat ng apat na puwesto si Eala mula No. 49 matapos umabot sa semifinals ng ASB Classic sa Auckland at makapasok sa main draw ng Australian Open.
Nanalo rin siya sa Kooyong Classic exhibition tournament sa Melbourne at umabot sa quarterfinals ng Philippine Women’s Open, ang kanyang kauna-unahang professional tournament sa sariling bansa.
Noong Martes, Pebrero 3, umusad si Eala sa susunod na round ng Abu Dhabi Open matapos talunin si Zeynep Sonmez ng Türkiye, 6-4, 6-3.
Nartatez dismayado sa pagkakasangkot ng mga pulis sa krimen
NAGPAHAYAG ng pagkadismaya si Philippine National Police (PNP) chief Gen. Jose Melencio Nartatez bunsod ng sunud-sunod na pagkakasangkot ng mga pulis sa iba’t ibang krimen.
Ayon kay Nartatez, nakakalungkot lamang na sa kabila ng morale boosting na ginagawa ng pamahalaan, ay may iilan pa ring gumagawa ng mga katiwalian tulad na rin ng panghoholdap ng anim na pulis ng Manila Police District sa Makati City kamakailan.
Ani Nartatez, walang cover up at walang white wash sa imbestigasyon ng mga kaso. Samantala, inatasan ni Nartatez ang lahat police commanders na paigtingin ang kampanya laban sa loose firearms. Nabatid sa record na nitong Enero, nasa 828 ang naaresto habang nasa 2,604 baril ang nakumpiska kabilang ang nasa 242 na nasa kustodiya ng pulisya.
Maging ang mga gunning syndicate ay dapat na tutukan ng Criminal Investigation and Detection Group (CIDG) at Special Action Force (SAF) na bahagi naman ng kanilang anti-crime measure.
Dagdag pa ni Nartatez, kailangan na ring magpatupad ang Civil Security Group (CSG) ng mga regulasyon laban sa mga delinquent gun owners para sa renewal ng kanilang mga baril.
“Gun ownership comes with an obligation that includes renewing their licenses on time,” ani Nartatez. ( Gene Adsuara)
3 excise tax vs Discaya ibinasura ng DOJ
IBINASURA ng Department of Justice (DOJ) ang tatlong reklamo sa excise tax na isinampa laban sa mga kontratistang sina Curlee at Sarah Discaya at iba pa dahil sa ilang luxury vehicle.
Ayon kay DOJ spokesperson Polo Martinez, ang excise tax ay hindi pananagutan ng mag-asawang Discaya dahil ang importer ang responsable sa aspetong ito.
“Nakita po ng panel na hindi po importer sila Sarah at Curlee kaya hindi sila mananagot sa hindi pagbabayad ng excise tax. Ang may pananagutan po na magbayad ng excise tax ay ‘yung nag-import talaga. Kung hindi ninyo binili ang mga kotse,” ani Martinez.
Sangkot sa ibinasurang mga reklamo ang Land Rover/ Range Rover at Cadillac Escalade para sa isang kaso; Land Rover at isang Mercedes Benz para sa pangalawang kaso; at isang Mercedes Benz.
Bahagi ito sa isinasagawang preliminary investigation ng DOJ sa tax evasion complaints laban sa mag-asawang Discaya.
Ang dalawang reklamo naman ay mga kasong isasampa ng DOJ sa Court of Tax Appeals. (Vina de Guzman)
LTFRB HINIMOK ANG MGA TRANSPORT GROUP AT OPERATOR NA TIYAKING MAAYOS ANG KONDISYON NG KANILANG MGA PUV
HINIMOK ng Land Transportation Franchising and Regulatory Board (LTFRB), sa ilalim ng pamumuno ni DOTr Secretary Giovanni “Banoy” Z. Lopez, ang lahat ng transport groups at operator na tiyakin ang maayos na kondisyon ng kanilang mga pampublikong sasakyan (PUVs) kaugnay ng nalalapit na mahigpit na pagpapatupad ng polisiya na magbabawal sa pag-renew ng prangkisa ng mga bulok at sirang yunit.
Binanggit ni LTFRB Chairman Atty. Vigor D. Mendoza II na ang pagpapanatili ng maayos at presentableng PUVs ay hindi lamang kondisyon para sa pag-isyu ng Certificate of Public Conveyance (CPC), kundi isang paraan din ng pagbibigay-galang sa mga pasahero.
“Hindi natin papayagan na bastusin ang mga Pilipinong commuter sa pamamagitan ng bulok na jeepney at iba pang PUVs. Hindi na uubra yan ngayon dahil nakataya rin dito ang kaligtasan ng mga pasahero,” ani Chairman Mendoza.
Ang kampanyang ito ay alinsunod sa direktiba ni Pangulong Ferdinand “Bongbong” R. Marcos Jr. na higit pang pagbutihin ang mass transport system sa bansa, na nakatuon sa kapakanan at kaginhawaan ng mga commuter.
Nauna nang ipinahayag ni Chairman Mendoza ang mas pinaigting na kampanya laban sa mga bulok na PUVs matapos ang mga reklamo at personal na karanasan sa mga jeepney at iba pang sasakyang pampubliko na marumi at sira-sira.
Ang naturang polisiya ay kasalukuyang binubuo at isusumite sa tanggapan ni Secretary Lopez para sa pagsusuri at pag-apruba. Binigyang-diin ni Mendoza na dapat nang kumilos ang mga operator at kumpanya upang masuri ang kanilang mga yunit, dahil hindi na papayagang makabiyahe ang mga bulok na PUVs.
“Hindi natin ipi-phase out ang passenger jeepneys sa kampanyang ito. Ang gusto lang natin ay ayusin nila at huwag ipilit na butas-butas ang upuan at bakbak na ang pintura,” dagdag pa ni Mendoza.
“Bigyan naman natin ng respeto ang ating mga pasahero at dignidad ang ating public transportation.”
Hinimok din ni Mendoza ang mga transport groups na obligahin ang kanilang mga driver na maging presentable, matapos ang mga reklamo na ang ilan ay nagsusuot ng sando, shorts, at tsinelas habang nagmamaneho. (PAUL JOHN REYES)
inang na tulak, timbog sa Caloocan drug bust
GLAGLAG sa selda ang isang babae na sangkot umano sa pagtutulak ng iligal na droga nang kumagat sa ikinasang buy bust operation ng pulisya sa Caloocan City.
Sa kanyang report kay Northern Police (NPD) Acting Director P/BGen. Christopher Dela Cruz, kinilala ni Caloocan Police Chief P/Col. Joey Goforth ang suspek na si alyas “Ning” 44-anyos.
Ayon kay Col. Goforth, nakatanggap ng impormasyon ang mga operatiba Station Drug Enforcement Unit (SDEU) ng Caloocan CPS hinggil sa umano’y pagtutulak ng iligal na droga ng suspek.
Nang magawang makipagtransaksyon sa suspek ng isa sa mga operatiba ng SDEU, ikinasa ng mga ito ang buy bust operation sa pangunguna P/Lt. Restie Mables, sa koordinasyon sa PDEA.
Matapos umanong tanggapin ng suspek ang marked money mula sa pulis na nagpanggap na buyer kapalit ng isang plastic sachet ng shabu, ay agad siyang dinamba ng mga operatiba ng SDEU dakong alas-10:15 ng gabi sa Daang Bakal St., Brgy., 59.
Nakumpiska sa kanya ang humigi’t kumulang 10.58 gramo ng hinihinalang shabu na may standard drug price na P71,944 at buy bust money.
Mahaharap ang suspek sa kasong paglabag sa R.A 9165 o ang Comprehensive Dangerous Drug Act of 2002.
(Richard Mesa)
Helper na wanted sa paulit-ulit na panghahalay sa minor sa Malabon, tiklo
NAGWAKAS na ang maliligayang araw ng 31-anyos na manyakis na mister na paulit-ulit na humalay sa isang menor-de-edad na biktima nang matunton ng tumutugis na pulisya sa pinagtaguang lugar sa Malabon City, Lunes ng umaga.
Sa kanyang report kay Northern Police District (NPD) Director P/BGen. Christopher Dela Cruz, kinilala ni Malabon police chief P/Col. Allan Umipig ang akusado bilang si alyas “Jonathan”, residente ng Gregory Homes, Brgy. Panghulo.
Sa ulat, naglabas si Malabon Regional Trial Court (RTC) Presiding Judge Catherine Therese M. Tagle-Salvador ng arrest warrant laban kay ‘Jonathan’ nitong Enero 22, 2026 para sa pitong bilang na kasong Qualified Rape of a Minor at dalawang bilang na kasong Acts of Lasciviousness.
Dahil dito, kaagad nagsagawa ng manhunt operation ang mga tauhan ni Col. Umipig na nagresulta sa pagkakaaresto sa akusado dakong alas-9:45 ng umaga sa tinutuluyang lugar sa Sanciangco St. Brgy. Catmon.
Ayon kay Col. Umipig, walang piyansang inirekomenda ang hukuman sa pitong bilang na kasong qualified rape laban sa akusado habang may inilaang kabuuang piyansang P216,000.00 sa dalawang bilang na kasong acts of lasciviousness para sa pansamantalang paglaya.
Nakadetine sa custodial facility ng Malabon Police Station ang akusado habang hinihintay pa ang ilalabas na commitment order ng hukuman para sa paglilipat sa kanya sa Malabon City Jail.
Pinuri naman ni BGen. Dela Cruz ang arresting team sa matagumpay na pagkakaaresto sa akusado na binigyang-diin nito ang pangako ng NPD para sa pagbibigay ng hustisya sa biktima.
(Richard Mesa)
PBBM, nababahala sa posibleng epekto sa ekonomiya ng impeachment complaint laban sa kanya
NABABAHALA si Pangulong Marcos sa posibleng epekto sa ekonomiya ng bansa ang impeachment complaint na inihain laban sa kanya.
”Una ko na pong sinabi, ang pagsasampa po ng impeachment complaint laban po sa Pangulo, hindi Pangulo lamang ang maapektuhan nito, kung hindi ang buong bansa at pati ekonomiya,” ang sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.
”So nababahala po ang Pangulo sa impeachment complaint na isinampa sa kanya, hindi para sa sarili niya, dahil alam niya na walang siyang ginawang mali at walang impeachable offenses siyang nagawa. Pero nag-aalala siya sa epekto nito sa ekonomiya,” aniya pa rin.
Sa kabilang dako, hindi naman aniya patitinag ang Pangulo na gampanan ang kanyang presidential duties sa gitna ng impeachment complaints na isinampa laban sa kanya.
Nauna rito, iginagalang ng Malakanyang ang naging pasya ng Mababang Kapulungan ng Kongreso kaugnay ng mga impeachment complaint na inihain laban kay Pangulong Ferdinand R. Marcos Jr.
Ito’y makaraang ideklarang ‘sufficient in form’ ang dalawang impeachment complaint sa pag-arangkada ng pagdinig ng House Committee on Justice, araw ng Lunes.
“So, thats the process. we have to respect that,” ayon Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.
At sa tanong naman kung kumpiyansa ang Malakanyang na hindi naman lulusot at mapagpapasyahan na ‘sufficient in substance’ ang nasabing dalawang impeachment complaint laban sa Pangulo, ang naging tugon ni Castro ay “even before, sinabi na po ng Pangulo na alam niya na wala siyang ginawa na mali, wala siyang ginawang paglabag sa batas, at wala siyang ginawang impeachable offense kaya kumpiyansa siya sa sarili niya.” (Daris Jose)