SAMPUNG araw bago Valentine’s Day, mas pinaigting ni Philippine National Police (PNP) Gen. Jose Melencio Nartatez, Jr., ang mga hakbang laban sa tumataas na banta ng AI-assisted love scams.

Ayon kay Nartatez, pinalalakas ng Anti-Cybercrime Group (PNP-ACG) ang kakayahan nito laban sa cybercrime habang patuloy na gumaga­mit ang mga scammer ng mas makabagong sistema upang mabiktima ang mga Pilipino.
“The PNP is continuously strengthening its cybercrime units by enhancing our technical capabilities, specia­lized training, and inter-agency coordination. AI scams are evolving so we really need to step up in terms of improving the investigation skills and operational capabi­lity of our personnel,” ani Nartatez.

Sumasailalim sa tuluy-tuloy na pagsasanay ang mga tauhan ng PNP-ACG sa AI detection, deepfake analysis, at digital forensics para hadlangan ang mga umuusbong na uri ng love scams sa gitna ng artificial intelligence o AI.
Isinusulong din ng PNP ang pag-upgrade ng mga kagamitang panlaban sa cybercrime at mga kasangkapan sa imbestigasyon, habang pinaiigting ang koordinasyon sa iba pang ahensiya ng pamahalaan at civil society groups para mapabilis ang pagbabahagi ng impormasyon at ang agarang pagpapatigil sa mga operasyon ng scam.
Ipinaliwanag nila na gumagamit na ngayon ang mga scammer ng AI para lumikha ng mga pekeng identidad at mapanatili ang emosyonal na manipulasyon, dahilan para maging mas organisado at kapani-paniwala ang kanilang mga operasyon bago tuluyang mauwi sa pananamantalang pinansyal.

Anim sa mga laganap na uri ng love scam sa bansa ang kinabibilangan ng “Sad Boi/Sad Gurl”, “Seducer”, “Investor”, “Serviceman”, “Escort”, at “Slow Burn”, na bawat isa ay may kanya-kanyang pamamaraan para makuha ang tiwala at makahingi ng pera. (Richard Mesa)

NAKIISA si Navotas Mayor John Rey Tiangco sa Taiwan Three Acts of Goodness Educators and Promoters Benchmarking activity na isinagawa sa Kapitbahayan Elementary School. Bumisita sa paaralan ang Taiwanese stakeholders ng programa para magbahaginan ng kaalaman kasama ang mga gurong Navoteño. Ani akalde, habang bata pa ang mga anak ay itanim na sa kanilang mga isip ang paggawa ng kabutihan sa kapwa para lumaki silang mabuting mga mamamayan. (Richard Mesa)

SUPORTADO ni Kamanggagawa Partylist Rep. Elijah “Eli” San Fernando ang panukalang 7432 o “No Work, No Pay for Members of Congress Act”.

Ayon sa mambabatas, kung ang isang ordinaryong manggagawa ay hindi pumasok ay otomatikong walang sahod.

Kapag na-late naman aniya ay makakaltasan ang mga ito at pag nag-OT (overtime), kadalasan walang OT pay.

“Bakit kapag Members of Congress umabsent, na-late, o hindi nagrereport sa opisina e buo pa ring nakukuha ang sahod at benepisyo? What makes us so special? Dapat i-apply ang nararanasan ng ordinaryong manggagawa sa mga halal na opisyal,” anang mambabatas.

Ito ang dahilan aniya kung bakit binibigyan ng buong suporta ng Kamanggagawa ang HB 7432 na inihain ni Majority Leader Sandro Marcos.

Inihayag nito na isang napakalaking bagay na ang presidential son at majority floor leader ang nagpanukala ng batas.

“At this point in time where our institution is beleaguered, this move sends a message to ordinary Filipino workers that we are serious in bringing reforms from within our ranks. Ang suweldo namin ay galing sa buwis ng taumbayan, kaya dapat lang na may kapalit itong aktwal na trabaho at presensya,” saad nito.

Dagdag ng mambabatas, kung gustong maibalik ang tiwala ng tao sa Kongreso ay kailangan nilang ipakita na hindi sila exempted sa pamantayang sinusunod ng karaniwang manggagawa.

“Wala akong nakikitang rason na hindi ito suportahan ng mga kasamahan sa Kongreso.
Mga kasama, pumasok at magtrabaho po tayo!” pagtatapos ni San Fernando.
(Vina de Guzman)