SINABI ng Malakanyang na haharap sina Senator Ronald “Bato” dela Rosa at Christopher “Bong” Go sa kaparehong legal process na naranasan ni dating Pangulong Rodrigo “Digong” R. Duterte sa International Criminal Court (ICC).
Binigyang diin ng Malakanyang na susunod ang gobyerno sa batas kapag ipinalabas na ang arrest warrants.
Sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na ang pagkakasama ng pangalan nina Dela Rosa, Go at iba pang dating opisyal bilang di umano’y co-perpetrators sa ICC case ay nag-ugat mula sa proceedings na pinasimulan noong 2017.
“Kung ito naman ay legal process na nanggagaling po sa ICC, hindi naman po natin ito maaaring pakialaman dahil ang kasong iyan ay naisampa noon pa, 2017, at hindi pa po pangulo si Pangulong Marcos Jr.,” ayon kay Castro.
Nauna rito, pinangalanan ng International Criminal Court (ICC) sa isang dokumento nitong Biyernes (oras sa The Hague) ang mga umano’y co-perpetrator o kasabwat ni Digong Duterte kaugnay ng kasong kinahaharap nito.
Ayon sa Document Containing the Charges (DCC) na isinumite ng Prosecution, ang mga kasabwat umano ni Duterte sa “common plan” para mapuksa ang mga kriminal sa pamamagitan ng “violent crimes including murder” ay ang mga sumusunod:
Senador Ronald “Bato” dela Rosa, hepe ng Davao City Police mula Enero 2012 hanggang Oktubre 2013, at hepe ng Philippine National Police (PNP) mula Hulyo 2016 hanggang Abril 2018;
– Vicente Danao, hepe ng Davao City Police mula Oktubre 2013 hanggang Hunyo 2016; counterintelligence chief, PNP Directorate for Intelligence mula Hulyo 2016 hanggang Pebrero 2017; hepe ng Directorial Staff and Deputy Director for Operations ng PNP Criminal Investigation and Detection Group (CIDG) mula Pebrero 2017 hanggang Nobyembre 2018; at Manila Police District director mula Nobyembre 2018 hanggang Oktubre 2019
Camilo Cascolan, finance chief ng Davao Region Police Office mula 2011-2012; hepe ng PNP Directorate for Operations mula Hulyo 2016 hanggang Abril 2018; regional director ng National Capital Region Police Office (NCRPO) mula Abril hanggang Mayo 2018; at chief of staff ng PNP Office ng PNP Office of the Chief of Directorial Staff mula Setyembre 2018 hanggang Oktubre 2019
– Oscar Albayalde, regional director ng NCRPO mula Hulyo 2016 hanggang Abril 2018, at hepe ng PNP mula Abril 2018 hanggang Oktubre 2019
Senador Bong Go, personal aide at special assistant ni Duterte mula 1998 hanggang 2016; special assistant at chief ng Presidential Management Staff ni Duterte mula Hunyo 2016 hanggang Oktubre 2018
– Dante Gierran, Davao regional director ng National Bureau of Investigation (NBI) mula 2013 hanggang 2016; NBI director mula 2016 hanggang 2020;
– Isidro Lapeña, Davao City Police chief mula 1996 hanggang 1998; hepe ng Philippine Drug Enforcement Agency (PDEA) mula 2016 hanggang 2017
Vitaliano Aguirre II, abogado ni Duterte at iba pang miyembro ng Davao Death Squad (DDS); secretary ng Department of Justice mula Hulyo 2016 hanggang Abril 2018
-iba pang miyembro ng PNP at matataas na opisyal
Sinabi ni Castro na susunod ang administrasyong Marcos sa “due process.”
“Kung dadaan sa proseso, iyon naman po ang nais ng pamahalaang ito. Ang ginagawa ng pamahalaang ito ay dumadaan lahat sa proseso,” aniya pa rin.
Samantala, sa posibleng implementasyon ng arrest warrants sa pamamagitan ng International Criminal Police Organization (Interpol), winika ni Castro na ang kahalintulad na procedure ay sinundan sa nakaraan.
“’Yun po ang nangyari before at ‘yan din po ang mangyayari ngayon,” anito.
Consistent naman ang Malakanyang sa posisyon nito na ang pag-aresto kay Digong Duterte ay nag-ugat mula sa Philippines commitment sa Interpol, at hindi ang ICC.
Subalit, nilinaw naman ni Castro na pinanatili naman ng gobyerno ang posisyon nito na ang ICC ay kasalukuyang walang hurisdiskyon sa Pilipinas, di umano’y krimen na nagawa nang ang bansa ay nananatiling miyembro pa na maaaring iba ang pagtrato.
Hindi naman mino-monitor ng gobyerno kung nasaan ngayon ang mga pinangalanan, sabay sabing wala pang arrest warrants ang natatanggap.
“Kapag ka may warrant of arrest na na-issue na po, kailangan i-implement… sa ngayon, wala pa pong dahilan para sila i-bantayan,”a nito. (DARIS JOSE)
- March 25, 2026
Ang Diyaryong Pinagkakatiwalaan
Archive for February, 2026
Bato, Go haharap sa kaparehong legal route na kahalintulad ng kay Digong Dutrete sa ICC case – Malakanyang
Panukalang trimester system, nangangailangan ng karagdagang pag-aaral, public consultations- Malakanyang
SINABI ng Malakanyang na mas makabubuti kung magsasagawa ng public consultations para mipatupad ang isang trimester system para sa incoming school year 2026-2027.
”Mas maganda naman po talaga na pinag-uusapan lahat ito ng mga stakeholders, ng mga interested parties, lahat po, para po ma-reach iyong pinakamagandang programa para sa ating mga kabataan,” ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.
Winika pa ni Castro na ang pagsasagawa ng karagdagang pag-aaral ay mas magiging mas mahusay para sa panukalang ito.
”Mas mainam na mas agaran pang pag-aaral ang gawin kung dapat itong i-implement,” anito.
Sa ulat, plano nang ipatupad ng Department of Education (DepEd) ang trimester system para sa susunod na pasukan ng klase o school year 2026-2027.
Ayon sa isang pahayag, ang gagawing pagbabago ay isang “holistic approach” upang mabalanse ang pamamahala ng oras para sa mga mag-aaral na nagbibigay-daan para sa isang mas flexible na diskarte sa kalidad ng pagtuturo.
“Itinutulak natin ito upang magkaroon ng mas mahahaba, tuluy-tuloy na panahon ng pagkatuto, mas maayos na pacing ng mga aralin, at mas mababang administrative burden para sa ating mga guro. Sa ganitong paraan, napapangalagaan natin ang kalidad ng edukasyon,” ani DepEd Secretary Sonny Angara.
Sa trimester, ang 201 araw ay hahatiin sa tatlong termino: Hunyo hanggang Setyembre; Setyembre-Disyembre at Enero-Marso.
May 54 hanggang 61 araw ng pagtuturo na may minor interruptions sa mga non-academic activities. ( DARIS JOSE)
Valenzuela LGU, nagbigay ng mga bagong ambulansya sa 33 Barangay
UPANG palakasin ang emergency healthcare services sa Valenzuela City, pormal na ibinigay nina Mayor Wes Gatchalian at Senator Win Gatchalian ang 33 bagong ambulansya para sa bawat barangay, bilang bahagi ng pagdiriwang ng ika-28 Charter Day ng lungsod.
Ang mga ambulansya ay may mga makabagong pang-emerhensiyang medikal, kabilang ang mga stretcher bed na may mga safety restraints, spinal boards, at trauma kits. Mayroon din ang mga ito ng panloob LED na medical lighting at two-way radio communication system device upang matiyak ang mahusay na koordinasyon sa central command center ng lungsod.
Mataas rin ang bubong ng mga ito upang kumportable na makagalaw ang mga paramedic habang nagbibigay ng pangangalaga at nilagyan ng mga sirena at high-visibility emergency lighting para sa ligtas at mabilis na transportasyon lalo na pagtrapik.
Sa kanyang pahayag, binigyang-diin ni Mayor WES na ang inisyatiba ay sumasalamin sa proactive at people-centered na pamamahala ng lungsod. Nabanggit din niya na ang pamumuhunan sa emergency medical infrastructure ay mahalaga sa isang mabilis na lumalagong sentro ng lungsod, kung saan ang napapanahong pagtugon sa medikal ay maaaring mangahulugan ng pagkakaiba sa pagitan ng buhay at kamatayan.
Binigyang-diin pa ng alkalde na ang deployment ng mga dedikadong ambulansya bawat barangay ay nagbibigay ng kapangyarihan sa mga lokal na opisyal at frontline responders na kumilos nang mabilis.
“Ito pong programa natin ay bilang suporta sa ating programang pangkalusugan, ang mabili at efficient po na service sa ating mga constituents sa pamamagitan po ng mga brand new ambulance natin. ‘Wag po kayong mag-alala, pinapaalam ko rin sa inyo na ang LGU rin po ay patuloy pong sumusuporta sa ating mga barangay… Kaya sa ating mga kapitan at barangay officials na nandito, suklian po natin ng magandang serbisyo ang ating mga mamamayan,” ani Mayor Gatchailan.
Sa kabilang banda, muling pinagtibay ni Senator WIN ang kanyang pangako na tulungan ang mga lokal na pamahalaan na palakasin ang kanilang mga kakayahan sa pangangalagang pangkalusugan. Pinuri din niya ang pamunuan ng Valenzuela City sa pagbibigay prayoridad sa kalusugan at kaligtasan ng publiko.
Dumalo rin sa kaganapan sina Vice Mayor Marlon Alejandrino, 2nd District Congressman Gerald Galang, mga konsihal ng lungsod, at mga kapitan ng 33 Barangay. (Richard Mesa)
PBBM, kinilala ang mahalagang papel ng Meralco
KINILALA ni Pangulong Marcos Jr. ang mahalagang papel ng Manila Electric Company (MERALCO) sa pagsuporta sa renewable energy projects katulad ng Terra Solar Project at sa pagpapalawak ng electrification sa mga komunidad.
Sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na para kay Pangulong Ferdinand Marcos Jr., nararapat lang na ang bawat pamilyang Pilipino ay hindi mapag-iwanan sa dilim.
Dahil dito, malinaw ani Castro na walang-patid ang ginagawang pagsulong ni Pangulong Marcos para sa inklusibong pag-unlad ng Bagong Pilipinas.
Sa katunayan, patuloy na itinataguyod ni Pangulong Marcos ang mas maaasahan, makatarungan, at napapanatiling suplay ng enerhiya bilang pundasyon ng pag-unlad ng Pilipinas.
Sa katatapos lamang aniya ng Collective Response to Presidential Commitments in the Energy Sector, araw ng Sabado, muling binigyang-diin ng Pangulo ang layunin ng pamahalaan na palawakin ang koneksiyon, palakasin ang kapasidad, at pababain ang presyo ng kuryente upang maging mas abot-kaya sa bawat Pilipino lalong-lalo na ang mga nasa liblib na lugar partikular na dito ang pagpapadali ng Lifeline Rate Subsidy Program (LRSP) sa pamamagitan ng awtomatikong pagrehistro ng mga benepisyaryo ng 4Ps upang hindi na sila dumaan sa mahabang proseso ng aplikasyon.
Itinakda rin ang bagong lifeline consumption threshold kung saan ang mga 4Ps beneficiaries na may konsumo ng 50-kilowatt hour pababa ay libre na ang kanilang kuryente. Layunin ng programa na gawing mas maagap at makatao ang pagbibigay ng tulong.
Bukod pa rito, pinasimple rin ang proseso ng Net Metering Program sa ilalim ng renewable energy kagaya ng solar panels.
Sa tulong aniya ng mga bagong patakaran mula sa DOE, ERC at iba pang ahensiya, mas malinaw at mas mabilis na ang aplikasyon at interconnection process. ( Daris Jose)
Banta ng China dahil sa pagpuntirya ng mga Senador sa mga Diplomat… Milyong Pinoy mawawalan ng trabaho
NAGBABALA ang Chinese embassy sa Maynila na ang hakbang ng mga senador sa pagpuntirya sa mga diplomat nito ay maglalagay sa panganib ng ugnayang pang-ekonomiya at maaring magdulot ng pagkawala ng milyong trabaho para sa mga Pilipino.
Ang pahayag ng China ay sa gitna ng tumataas na tensyon sa pagitan ng Beijing at mga mambabatas kaugnay sa patuloy na usapin sa West Philippine Sea.
Sa pahayag ng spokesperson ng China Embassy na si Ji Lingpeng, binatikos nito ang panukala ng ilang senador na idineklarang “persona non grata” ang Chinese diplomat o i-recall ang Chinese ambassador.
“Any serious damage to diplomatic relations, including downgrading of those relations, would cost millions of jobs,” ani Ji, na nagsabing isaalang-alang ang potensyal na economic impact at mag-ingat sa mga aksyon kaugnay sa diplomatic matters.
“When it comes to serious diplomatic affairs, some politicians behave like children playing house. Could they at least try to act like adults?” dagdag ni Ji.
Ang pahayag ng embahada ay kasunod ng Resolution No. 256 ng Senado na kumokondena sa pahayag ng Chinese embassy official sa pagpuna sa mga opisyal ng Pilipinas dahil sa pagtatanggol sa pambansang soberanya at mga karapatan sa karagatan.
Samantala, inalmahan ni Akbayan Partylist Rep. Perci Cendaña ang nasabing banta ng Chinese Embassy na isa umanong uri ng pangho-hostage sa ekonomiya.
Iginiit nito na dapat tiyakin ng pamahalaan ang kaligtasan at seguridad ng mga Pinoy na naninirahan sa China, Macau at Hong Kong kapag inulit ng China ang palit-ulo hostage diplomacy nito tulad ng sinapit ng tatlong Pinoy na nakulong doon sa umano’y kaso ng pang-e-espiya.
Umaasa ang solon na babawiin ng Chinese Embassy ang pahayag nito at iiwasan ang mga mapagbantang mga salita bagaman hindi na aniya ito bago sa karakter ng China.
Ayon kay Cendaña noong 2011 ay nagpatupad ng ban ang China sa pagpasok ng mga ini-export na saging at pinya ng Pilipinas sa kanilang bansa bilang Ganti sa standoff sa Bajo de Masinloc.
Kaya dapat anyang umaksiyon ang mga kinauukulang opisyal ng pamahalaan upang protektahan ang ekonomiya sa mga posibilidad na panggigipit ng China.
( Daris Jose)
MALABON LGU, MAGTATAYO NG EXTENSION BUILDING NG OSPITAL NG MALABON
BILANG pagtupad sa pangako na lalo pang palawakin ang serbisyong medikal, magtatayo ng karugtong na gusali ng Ospital ng Malabon (OsMal) ang Pamahalaang Lungsod ng Malabon para madaling puntahan ng mamamayan.
Sa isinagawang groundbreaking ceremony na pinangunahan ni Mayor Jeannie Sandoval, sinabi niya na ang pagtatayo ng extension ng OsMal ay makakatulong sa pagtugon sa lumalaking pangangailangan ng serbisyong medikal sa lungsod.
“Dito, madadagdagan ang bed capacity ng ospital at magkakaroon ng mga bagong pasilidad na magbibigay ng dekalidad na serbisyo para sa mga nangangailangan nating kababayan. Ito ay bahagi ng ating mga layunin para sa mas ligtas, mas malusog, mas maganda, at mas maunlad na Malabon sa hinaharap,” pahayag ni Mayor Jeannie.
Ipinaliwanag ng alkalde na ang anim na palapag na itatayong gusali na kabilang sa kanyang layunin na magkaloob ng libreng serbisyo ang OsMal ay magsisilbing tulay tungo sa pagiging Level 2 Hospital na accredited ng Department of Health (DOH).
Dagdag niya, sa oras na matapos ang gusali ay makakapagtatag na ng mga pasilidad para sa kritikal na pangangalaga ang OsMal tulad ng Intensive Care Unit (ICU), Neonatal Intensive Care Unit (NICU), at mga pangunahing teknolohiyang medikal tulad ng high-tier imaging at tertiary laboratory services, modernong pasilidad tulad ng Dental Services, Rehabilitation Center, CT Scan Facility, at Major and Minor Surgery Operating Rooms.
“Ang proyektong ito, sa pangunguna ng ating mahal na Mayor Jeannie Sandoval, ay sumasalamin sa hangarin ng pamahalaang lungsod na masiguro na ang mga Malabueño na nangangailangan ng tulong para sa kanilang kalusugan ay makakatanggap ng agarang serbisyo. Sa pakikipagtulungan sa Department of Health at iba’t ibang organisasyon at ahensiya, mas palalakasin pa natin ang ating mga programa at mas ilalapit pa ang serbisyong pangkalusugan sa higit na nangangailangan,” pahayag naman ni City Administrator Dr. Alexander Rosete.
Dumalo rin sa seremonya ang mga konsehal ng lungsod, mga pinuno ng departamento, First Gentleman Ricky Sandoval, mga kinatawan mula sa Department of Health, Philippine Red Cross Malabon Chapter, Philippine Medical Association Malabon-Navotas Medical Society, San Lorenzo Ruiz General Hospital, at Malabon Hospital and Medical Center. (Richard Mesa)
NHA, PINASINAYAAN ANG PROYEKTONG PABAHAY PARA SA MGA ISF NG VALENZUELA
PORMAL na pinasinayaan ng National Housing Authority (NHA) ang unang tatlong (3) low-rise building (LRBs) bilang bahagi ng Disiplina Village – Arkong Bato, sa isang seremonya na ginanap sa Brgy. Arkong Bato, Valenzuela City.
Personal na pinangunahan ni NHA General Manager Joeben A. Tai ang inagurasyon at pagbabasbas ng mga gusali, katuwang si NHA NCR-North Sector Regional Manager Engr. Jovita S. Panopio.
Sa kanyang mensahe, binigyang-diin ni GM Tai ang kahalagahan ng kaganapan bilang bahagi ng pangako ng administrasyon ni Pangulong Ferdinand “Bongbong” Marcos Jr. na makapaghatid ng ligtas, disente, at sustenableng mga tirahan at komunidad.
“Ang NHA po, sa ilalim ng aking pamumuno at alinsunod sa adhikain ng Expanded Pambansang Pabahay Para sa Pilipino Program (4PH) na isa sa mga hangarin ng ating mahal na Pangulong Ferdinand “Bongbong” Marcos Jr., ay patuloy na sumusuporta at aagapay upang makapagbigay po ng ligtas na mga pabahay tungo sa pagpapabuti at pagpapaunlad ng pamumuhay ng ating mga kababayan,” ani ng pinuno.
Bilang bahagi ng seremonya, nagsagawa rin ang NHA ng ceremonial distribution ng Certificates of Unit Allocation (CUAs) para sa mga kwalipikadong benepisyaryo. Ang mga pamilyang ito ay dumaan sa verification at census na isinagawa ng LGU Valenzuela.
Higit pa rito, hinimok din ni GM Tai ang tatanggap ng proyekto na panatilihing maayos ang kanilang mga tahanan at tiyakin ito bilang isang lugar ng kapayapaan sa loob ng nasabing komunidad.
“Ang hiling lamang namin sa ating mga mahal na benepisyaryo: nawa’y alagaan at pagyamanin ninyo ang mga yunit ng pabahay na igagawad po namin sa inyo. Hangad po namin na ang bawat yunit na ito ay magsilbing sandigan at gabay ninyo tungo sa kaginhawaan,” dagdag ni GM Tai.
Bukod dito, ang kaganapan ay isa sa mga nakalinyang aktibidad alinsunod sa pagdiriwang ng ika-28 cityhood anniversary ng Valenzuela City ngayong buwan ng Pebrero.
Dumalo rin sa seremonya sina Department of Human Settlements and Urban Development (DHSUD) Secretary Jose Ramon P. Aliling, Department of Social Welfare and Development (DSWD) Secretary Rexlon T. Gatchalian, Valenzuela City First District Congressman Kenneth T. Gatchalian, City Mayor Weslie T. Gatchalian, City Vice Mayor Marlon Paulo C. Alejandrino, Arkong Bato Punong Barangay Alvin Feliciano Jr., at iba pang opisyal ng pamahalaan.
(PAUL JOHN REYES)
DepEd: Mga guro, staff may 5-day wellness leave
PAGKAKALOOBAN na ng Department of Education (DepEd) ng hanggang limang araw na wellness leave taun-taon ang kanilang mga teaching at non-teaching personnel upang masuportahan ang kanilang mental health at overall well-being, sa gitna na rin ng tumaas na demands sa sektor ng edukasyon.
“Ito ay handog natin sa bawat kawani ng DepEd—mula sa central office hanggang sa mga rehiyon, division offices, paaralan, at community learning centers, at anuman ang kanilang employment status. Kinikilala natin na ang kanilang kalusugan, lalo na ang mental health, ay mahalaga sa patuloy nilang paglilingkod sa ating mga mag-aaral,” ani Education Secretary Sonny Angara.
Ang wellness leave ay para sa lahat ng eligible na DepEd officials at employees, kabilang na ang nasa permanente, temporary, casual, contractual, coterminous, substitute, at provisional positions, gayundin ang Contract of Service at Job Order personnel na direktang sangkot sa departamento.
Paglilinaw ng DepEd, ang wellness leave ay hiwalay pa sa umiiral nilang vacation at sick leave benefits at maaaring gamitin para sa mental health care, physical wellness activities, o kahit sa pagkakaroon lamang ng restorative break mula sa trabaho.
Maaaring i-avail ng mga tauhan ang leave ng hanggang tatlong sunud-sunod na araw o maging non-consecutive days sa buong taon, depende sa kanilang pangangailangan at sasailalim sa approval procedures.
Mukhang may trauma na sa younger guys… AIAI, may requirements sa 50 hanggang 60 na type makipag-date
MAY nakaka-aliw na post si Comedy Queen AiAi delas Alas sa Tiktok account niya ilang araw bago ang Valentine’s Day.
May caption ang comedienne-actress, “Tingnan ko nga kung may gagawa hahahahhaha…matatawa ko pag meron [laughing emojis].
“Malay naten ‘di ba go mga brad let’s do this [laughing emojis].”
Ayon sa komedyana ang ilang criteria para sa makaka-date niya, kabilang na ang edad at lakas nito.
“Sige oh, lagay n’yo sa TikTok ha. Age 45 hanggang 65 ‘yan, pwede ‘yan,” sabi niya.
“Iyong 45 to 50, wala ‘yung requirements. ‘Yung 50 ah siyempre, gusto ko pogi tapos siya magbabayad nung pagkain namin ganyan.”
Diin pa niya, “Pero ‘yung 50 to 60 and above, kailangan makita ko 10 burpees, 15 push-ups, 10 pull-ups, and 5 kilometer run.”
“Oh, video n’yo ‘yan, ha, tapos tingnan ko kung pogi kayo and strong.”
Sabi pa niya, “Pero ‘yung 50 to 60 and above, kailangan makita ko 10 burpees, 15 push-ups, 10 pull-ups, and 5 kilometer run.”
Pahabol pa ni Ai-Ai, “Oh, video n’yo ‘yan, ha, tapos tingnan ko kung pogi kayo and strong, puwede, go!”
Sa comment section, maraming netizens naman ang game na game na pumatol sa nakakaaliw na post ni Ai-Ai.
“Daddy ko na lng po ayoko po kasi sa step mom ko HAHAHAHAHAHAHAAHHAHA.”
“Ako po ms beautiful…67 yrs old may napatayo na…gwapo din haha..[smiling face with hearts emoji].”
“Reto ko sayo tito ko, mam ai, mangingisda, may bahay na asawa nalang po kulang.”
“Baka swede 25 tagalong akong magtiktok hahahaha.”
“Pwede ba asana ko idol kc gusto kita.”
Comment naman ng isa, “Asawa ko Miss Ai…50 na siya, ipinamimigay ko na po Miss Ai.”
Na pabiro ring sinagot ni aktres ng, “Wag naman hahaha Kayoko ng 2nd hand, joke lang hehe, keep the fire of love burning.”
Say naman ng netizen, mas matindi pa raw requirements ni AiAi kesa sa pagpasok ng kadete sa PMA.
Marami pang nakaaaliw na komento na ‘yung ay hindi mo talaga seseryosohin.
Anyway, sa isa naman interview ni AiAi, nabanggit dito na ayaw na niya sa younger guy, after na magtapos ang relasyon ng dating asawa na si Gerald Sibayan.
Parang nag-trauma rin siya sa nangyari kaya never na raw siyang magpapakasal.
Well, ipag-pray na lang natin si Ms. AiAi na makahanap ng lalaking tapat at tunay na magmamahal sa kanya.
***
TUWANG-TUWA kami sa nasilayang pag-iilaw ng mga piling kalye at landmark sa Binondo, sa imbitasyon ng Federation of Filipino Chinese Chamber of Commerce and Industry, Inc. (FFCCCII).
Sumasagisag ito sa mahaba at kahanga-hangang paglalakbay ng distrito mula sa pagkakatatag nito noong 1594, ang pinakamatandang Chinatown sa mundo at isang makasaysayang sentro ng kalakalan at pagpapalitan ng kultura, hanggang sa kasalukuyang tungkulin nito bilang isang protektado ngunit makulay na distritong pamanang nasa gitna ng Maynila.
Ang Phase 1 ng Chinatown Revitalization Project: Lighting of the Jones Bridge ay nakakuha ng malakas na inspirasyon mula sa momentum at vision ng ‘Pasig River Bigyang Buhay Muli Project’ na nagpakita kung paano nagagawa ng heritage restoration ang urban renewal at civic pride.
Ang Phase 2 naman ay naglalayon na bigyang-liwanag at parangalan ang higit sa apat na siglo ng kasaysayan ng Filipino-Chinese, katatagan, at mga kontribusyon sa komersyal at kultural na buhay ng bansa.
Ang mga pangunahing lugar na inilawan ang mga sumusunod:
La Madre Filipina (Four Mother Pillars), na matatagpuan sa magkabilang dulo ng Jones Brigde, MacArthur Bridge (na kitang-kita sa Yuchengco Plaza), Sta. Cruz Church, Four Gates: Qing Shan Gate (Arch of Goodwill), Ongpin South Gat, Ongpin North Gate at Tuan Jie Gate (Arch of Solidarity), Hologram Lights along Quentin Paredes St., Ongpin St. and Sabino Padilla St. at Projection Mapping at the Binondo Church.
Matutunghayan na ito gabi-gabi at sakto rin sa pagdiriwang Year of the Fire Horse ngayong Martes, February 17.
Sigurado na babalik kami sa mga nabanggit na lugar kasama ang mga kaibigan.
Happy Chinese New Year to all!
Tuloy na ang paggiba ng Dolphy Theater sa August… ERIC, ibinahagi ang planong ilipat sa bagong studio ng ABS-CBN sa Bulacan
AYON mismo kay Eric Quizon ay malaking bahagi ng kanyang showbiz career ang ABS-CBN.
“I started my television career with them. My first television show was Loveli-Ness. I co-hosted with Alma [Moreno].
“In fact actually, this year… I started in the industry in 1986. I was 19. So this year is actually my 40th year in the industry. Forty years!”
Ang ABS-CBN rin ang nagbigay ng tiwala kay Eric upang bukod sa pagiging actor ay sumubok siyang maging direktor.
Kaya marami siyang hindi malilimutang alaala sa sa Kapamilya Network.
“Fond memories, marami. ABS-CBN also gave me my first game show. It lasted for almost eight years, Ready, Get Set, Go!.
“ABS is the one who gave me my first… it gave me the chance as a director.
“So my first directorial job was for Maalaala Mo Kaya, and then eventually, I was doing Maalaala, Once Upon A Time, and Star Drama.
“So, kumbaga, nag-switch talaga yung career ko from being just an actor, but to a director as well.
“To a point na puro pagdidirek na lang yung ginagawa ko,” kuwento pa ni Eric.
Kaya ikinalulungkot ni Eric na gigibain na ngayong taon ang compound ng ABS-CBN na naibenta na.
Bukod dito, kasama sa made-demolish ay ang Dolphy Theater, na tribute ng ABS-CBN sa ama ni Eric na Comedy King.
“I know by August. Yeah, I was told. Wala na, naibenta na, e. So, gigibain talaga yun,” pahayag ni Eric nang makausap namin sa grand opening ng JuanMeds Pharmacy sa Lemon Square, sa EDSA Quezon City.
Ang bagong studio ng ABS-CBN ay sa Bulacan at sa pagkakaalam ni Eric ay magkakaroon din doon ng Dolphy Theater.
“Alam ko kung may plans sila na ilipat yung theater doon.
“Kasi, dine-develop pa rin naman talaga nila yun.”
Kaya hindi pa sigurado si Eric kung ibibigay sa kanya ang hinihingi niyang insignia na nakalagay sa labas gigibaing ng Dolphy Theater kung saan may mukha ng namayapang niyang ama.
“Yung insignia, the signage? Hinihingi ko kay Tita Cory [Vidanes]. Sabi niya, ‘Tingnan natin, Eric, kasi baka gagamitin din namin yan.’
“They might put up another Dolphy Theater in Bulacan. “So, may ganun naman sila.
“Sabi ko, ‘Pagka ano, ha? Akin na lang yan,’” kuwento pa ni Eric.
Samantala, si Eric ang celebrity endorser ng JuanMeds Pharmacy na isang online drugstore na pag-aari ni Rico Fernando M. Chico na dating nagtatrabaho sa ABS-CBN.
Ihahatid mismo sa bahay ng um-oder ang mga gamot, branded at generic, na in-order.
Kasama si Eric sa pelikulang ‘Until She Remembers’ nina Barbie Forteza, Boots Anson-Rodrigo at Charo Santos-Concio na magso-showing sa mga sinehan sa Pebrero 25.
Sa direksyon at panulat ng maituturing naman na isa sa mga hari sa larangan ng pagdidirek, si Brillante Mendoza, ang Until She Remembers ay mula sa Center Stage Productions at Solar Studios, Inc. at executive producer Wilson Tieng kung saan tampok rin sina Albert Martinez, Angel Aquino, Eric Quizon, Vince Rillon, Erlinda Villalobos, Carlitos Siguion-Reyna, Perla Bautista, Angel Latorre, Bianca Kierulf, at iba pa.