UMUSAD ang walong priority measures ng Legislative-Executive Development Advisory Council (LEDAC) matapos itong maaprubahan sa committee level ng House of Representatives.
Ayon kay House Majority Leader at Ilocos Norte Rep. Sandro Marcos, hinihintay na lamang ang komento ng House Committee on Appropriations sa kaukulang pagpopondo sa mga panukala kung sakaling maisabatas ang mga ito.
“Ang mga committee-level approvals ay nagpapakita lamang na ang Kamara, sa pumuno ni Speaker Faustino “Bojie” G. Dy III, ay patuloy ang pagtatrabaho kahit nitong last week lang nag-convene ang LEDAC upang talakayin ang mga mauunang panukala na babalangkasin sa Kamara,” sinabi ni Marcos.
“Ang focus namin ay doon sa mga bills na may direktang kaugnayan sa sektor ng edukasyon, kalusugan, food security at social protection,” dagdag ni Marcos.
Kabilang sa mga LEDAC priority measures ay ang panukalang modernisasyon ng Bureau of Immigration; ang National Land Use Act; pagtatatag ng Independent People’s Commission; ang Presidential Merit Scholarship Program; amendments sa Universal Access to Quality Tertiary Education Act; amendments sa Pantawid Pamilyang Pilipino Program (4Ps) Act; amendments sa Magna Carta for Micro, Small, and Medium Enterprises, at ang panukalang resetting ng elections sa Bangsamoro Autonomous Region in Muslim Mindanao (BARMM).
Ang BARMM bill ay kabilang sa apat na panukala na inindorso ng LEDAC nitong Martes na isama sa Common Legislative Agenda (CLA).
Kabilang sa CLA ay ang panukala ni Rep. Marcos na tanggalin ang travel tax, ang expanded (Online Sexual Abuse or Exploitation of Children) o CSAEM (Child Sexual Abuse or Exploitation Material) Act of 2026, at ang panukala laban sa mga fake news at disinformation. (Vina de Guzman)

WALANG isasara ng kalsada sa Maharlika Highway sa Semana Santa ayon sa Department of Public Works and Highways (DPWH).
Sinabi ni DPWH Secretary Vince Dizon na inatasan na niya ang paglilinis ng mga sagabal at pansamantalang pag-aayos ng mga di-pantay na kalsada bago matapos ang Marso.
Sa nakalipas na dalawang buwan, ininspeksyon ni Dizon ang ilang bahagi ng Maharlika Highway sa Quezon, Bicol, at Samar.
Dagdag pa niya, ang pangmatagalang rehabilitasyon ng highway, na isang mahalagang daanan para sa mga produkto at pasahero sa bansa, ay sisimulan sa Hunyo o Hulyo, habang ang bidding para sa proyekto ay magsisimula sa Mayo.
Ang Semana Santa ngayong taon ay sa Abril, kung saan ang Huwebes Santo (Abril 2) at Biyernes Santo (Abril 3) ay regular holidays. Samantala, ang Abril 4 (Sabado de Gloria) ay isang special non-working day.
(Gene Adsuara)

AABOT ng P22 billion ang kikitain ng gobyerno kada taon sa pag-aalis ng travel tax, ayon kay Marikina City Rep. Miro Quimbo.
Ayon pa kay Quimbo, chairman ng House Committee on Ways and Means, ganito ang lumalabas sa kanilang kalkulasyon sa mga naunang pahayag na maaring malugi ang gobyerno ng aabot sa P7.5 billion sa buwis na dapat sanang makolekta.
“So ‘yun po ang overall for the 7.5 billion na mawawala po natin ‘pag tinanggal po natin annually. So, sa computation po namin ‘yung madadagdag in terms of income tax, dahil mas malaki ang kikita nila, aabot po ng P22 billion. No brainer po talaga siya,” sinabi ni Quimbo.

Ang panukala, House Bill (HB) No. 7443, na inakdaan ni House Majority Leader at Ilocos Norte Rep. Sandro Marcos, ay nag aalis sa pagbayad ng P1,620 sa economy-class passengers at P2,700 sa first-class travelers.
“Kapag tinanggal po natin yung P1620 sa isang plane fare… meaning mas maraming tao ang makaka-biyahe. So mas madadagdag ang kikitain ng ating travel agencies, ating airline companies. No brainer,” pahayag ni Quimbo.
Ipinaliwanag ni Quimbo na ang mas mababang pamasahe ay katumabas ng 20 porsyentong bawas halaga ng mga airline ticket sa mga popular na sa destinasyon tulad ng Singapore and Bangkok.
Aniya, ang Pilipinas lamang sa Association of South East Asian Nations (ASEAN) ang kumukulekta ng travel tax sa mga pasahero palabas ng bansa.
“At saka tayo na lang po ang nangongolekta ng tax for outbound travel sa buong ASEAN. Wala na po nangongolekta nyan,” ani Quimbo.
Maaaring magkaroon ng “initial na kawalan” sa pagkolekta ng buwis sa kawalan ng travel tax sa loob ng 18 buwan, “pero mas malaki po over the next 18 months ang mas makokolekta at higit pa doon,” pahayag pa ni Quimbo.
(Vina de Guzman)