PAGKATAPOS ng Pasig River Esplanade, ang Binondo naman ang susunod na pagagandahin.
Inilunsad ni Pangulong Ferdinand R. Marcos Jr. ang Phase II ng Chinatown Revitalization Project sa Binondo, Manila, araw ng Biyernes upang pangalagaan ang pamana ng distrito habang pinalalakas ang turismo at mga lokal na negosyo.
Sa opisyal na paglulunsad na ginanap sa Hotel Lucky Chinatown sa Binondo, sinabi ni Pangulong Marcos na pinarangalan ng proyekto ang matagal nang ugnayan sa kalakalan at ng kultura sa pagitan ng Pilipinas at Tsina.
“Itong inisyatiba ay tungkol sa paggalang sa kasaysayan at pagbibigay sa distrito ng pansin at paggalang na nararapat dito,” ayon sa Pangulo.
Matapos ang tagumpay ng Phase I na nagpanumbalik sa kagandahan ng Jones Bridge, sinabi ng Pangulo na layon ng Phase II na gawing masiglang sentrong pang-kultura at pang-ekonomiya ang Binondo.
“Lalo nating pauunlarin ang Ongpin Street bilang sentrong kultural at pang-ekonomiyang, at pagagandahin ang mahahalagang makasaysayang landmark gamit ang ilaw at tematikong presentasyon sa Ongpin at Escolta Streets,” ang winika ng Pangulo.
Katuwang din ito ng Pasig Bigyang Buhay Muli Program ng Administrasyon upang mapanumbalik ang Pasig River at mga komunidad sa paligid sa pamamagitan ng pag-aayos ng mga pampublikong espasyo, makabagong sistema ng transportasyon at paglilinis ng waterways.
Maaari na ngayong maglakad, mag-jogging, o magbisikleta ang mga tao mula Intramuros hanggang makarating sa Binondo, ayon sa Pangulo.
Binigyang-diin ng Pangulo na ang proyekto ay para sa kapakinabangan ng mga Chinese-Filipino na tinuturing ang Binondo bilang tahanan, ng lahat ng mga Manileño na pumupunta sa lugar araw-araw, at ng bawat Pilipinong nais na higit na maunawaan ang kultura at kasaysayan.
Sinabi ng Pangulo na naging posible ang proyekto dahil sa matibay na pagtutulungan ng gobyerno, pribadong sektor, at Filipino-Chinese community.
Sa nasabing launching, pinanood din ng Pangulo at First Lady Louise Araneta-Marcos ang nailawang MacArthur Bridge; La Madre Filipina; Minor Basilica of Our Lady of the Pillar (Parokya ng Sta. Cruz); Qui Shan Gate; at ang Dragon Lights sa kahabaan ng Quentin Paredes Street.
(Daris Jose)

NASAMSAM sa dalawang tulak ng droga kabilang ang isang itinuturing na High Value Individual (HVI) ang mahigit P.3 milyong halaga ng shabu at dalawang baril nang matiklo ng pulisya sa buy bust operation sa Caloocan City.

Sa ulat ni Caloocan Police Chief P/Col. Joey Goforth kay Northern Police District (NPD) Acting Director P/BGen. Christopher Dela Cruz, nakatanggap ng impormasyon ang mga operatiba ng Station Drug Enforcement Unit (SDEU) ng Caloocan Police hinggil sa umano’y illegal drug activities ni alyas “King”, 25.

Kaagad ikinasa ng mga operatiba ng SDEU sa pangunguna ni P/Lt. Restie Mables ang buy bust operation laban kay alyas King, sa koordinasyon sa PDEA nang magawang makipagtransaksyon sa kanya ng isa sa mga operatiba.

Nang matanggap ang signal mula sa isa nilang kasama na nagpanggap na buyer na hudyat na positibo na ang transaksyon, kaagad sumugod ang mga operatiba ng SDEU saka dinamba ang suspek at kanyang kasabwat na si alyas “Wendel”, 22, dakong alas-4:13 ng hapon sa Blk 6 Lot 78, Tanigue St., Brgy. 14.

Nakumpiska sa mga suspek ang humigi’t kumulang 53.61 grams ng hinihinalang shabu na may standard drug price na P364,548, buy bust money na isang tunay na P500 bill at 12 pirasong P1000 boodle money, dalawang baril, tatlong bala, digital weighing scale at itim na sling bag.

Mga kasong paglabag sa R.A 9165 o ang Comprehensive Dangerous Drug Act of 2002 at R.A 10591 o ang Comprehensive Firearms and Ammunition Regulation Act ang isinampa ng pulisya laban sa mga suspek sa Caloocan City Prosecutor Office.

“Hindi titigil ang kapulisan sa paghuli ng mga lumalabag sa batas, upang mapanatili ang kaligtasan, kapayapaan, at katarungan para sa Komunidad,” pahayag ni NPD Director P/BGen. Dela Cruz. (Richard Mesa)

INANUNSYO ng Metropolitan Manila Development Authority (MMDA) na suspendido ang expanded number coding scheme sa Pebrero 17, para sa pagdiriwang ng Chinese New Year.

“Suspendido ang pagpapatupad ng expanded number coding scheme sa Martes, Pebrero 17, 2026, isang special-non working holiday, bilang pagdiriwang ng Chinese New Year,” ayon sa Facebook post ng MMDA .

Awtomatikong sinususpinde ang number coding tuwing official at special non-working holidays.

Ayon pa sa post, ina­asahan ang mabigat na daloy ng trapiko sa mga lugar tulad ng Binondo sa Maynila kung saan isinasagawa ng mga Tsinoy ang kanilang tradisyon kaya nagpaa­lala na rin na planuhin ang pagbiyahe, sumunod sa trapiko at mag-ingat sa pagmamaneho.

“YOU complete me,”
Ito ang taos pusong mensahe ni Pangulong Ferdinand R. Marcos Jr. sa kanyang esposa na si Unang Ginang Liza Araneta-Marcos, sa pakikiisa ng Pangulo sa pagdiriwang ng Araw ng mga Puso, araw ng Sabado, Pebrero 14.
“My forever Valentine, Liza, you are the love of my life, the heart of our home, and the calm in the middle of everything. You make it all make sense. You complete me,” ang sinabi ng Pangulo sa kanyang Facebook post.
Sa kanyang vlog, sinabi ng Pangulo na nais niyang ilaan ang kanyang free time kasama ang kanyang asawa, idagdag pa na ang kanilang kaligayan ay “just be(ing) with one another” nang hindi masyadong nag-iisip tungkol sa trabaho.
“Mababaw lang ang kaligayahan namin. Makalibre lang kami ng isang evening na kung ano ang gagawin, hindi naman importante,” ang sinabi ng Pangulo.
Inamin ng Pangulo na kapuwa sila nahihirapan ni Unang Ginang Liza na maghanap ng oras para sa isa’t isa dahil pareho silang abala.
Habang tanggap naman ng Pangulo ang mga hamon ng pagbalanse sa trabaho at oras sa pamilya, binigyang diin ng Pangulo na mahalaga na magkaroon ng oras para sa isa’t isa sa kabila ng ‘busy schedules.’
Ang sekreto aniya ng panghabang-buhay na relasyon ay nakasalalay sa kapangyarihan ng komunikasyon at pang-unawa.
Kaya ang payo ng Pangulo sa mag-asawa ay tratuhin ang isa’t isa ng may kabutihan at lumikha ng ‘bond’ na pinalalim ng oras at puso-sa-pusong pag-uusap.
Binigyang diin ang kahalagahan ng pagtatatag ng isang “real and true” friendship sa mag-asawa sabay sabing ito ay isang pangunahing elemento sa pagbuo ng isang malusog na relasyon.
“For me, the basis of any good relationship is true friendship. The best relationships I’ve seen have all been started by being friends,” ayon kay Pangulong Marcos.
“‘Yung sinasabi nga, nade-develop yan. Pero kung hindi kayo magkaibigan, you don’t have fun with each other, you don’t enjoy each other’s company, and you don’t amuse each other,” (Daris Jose)

PINANGUNAHAN nina Philippine Red Cross (PRC) Malabon City Chapter Chairman Ricky Sandoval, at Malabon City Mayor Jeannie Sandoval, katuwang ang PhilHealth-Yakap, at Life Saver ang isinagawang Valentine’s Day Health Caravan kung saan umabot sa 1,500 Malabueños ang nabigyan ng mga iba’t-ibang libreng serbisyong medikal kagaya ng libreng konsultasyon sa Doktor, libreng Vision Screening, Libreng Laboratory kagaya ng Urinalysis, Blood Sugar, libreng Xray at ECG, libreng Dental Services at libreng mga gamot. (Richard Mesa)