PLANO nang ipatupad ng Department of Education (DepEd) ang trimester system para sa susunod na pasukan ng klase o school year 2026-2027.Ayon sa isang pahayag, ang gagawing pagbabago ay isang “holistic approach” upang mabalanse ang pamamahala ng oras para sa mga mag-aaral na nagbibigay-daan para sa isang mas flexible na diskarte sa kalidad ng pagtuturo.“Itinutulak natin ito upang magkaroon ng mas mahahaba, tuluy-tuloy na panahon ng pagkatuto, mas maayos na pacing ng mga aralin, at mas mababang administrative burden para sa ating mga guro. Sa ganitong paraan, napapangalagaan natin ang kalidad ng edukasyon,” ani DepEd Secretary Sonny Angara.Sa trimester, ang 201 araw ay hahatiin sa tatlong termino: Hunyo hanggang Setyembre; Setyembre-Disyembre at Enero-Marso.May 54 hanggang 61 araw ng pagtuturo na may minor interruptions sa mga non-academic activities. (Daris Jose)
- February 17, 2026
Ang Diyaryong Pinagkakatiwalaan
Archive for February 16th, 2026
Dating Speaker Jose de Venecia Jr, bibigyang pugay sa Kamara
PINAGHAHANDAAN ng House of Representatives ang nakatakdang burol ni dating Speaker Jose de Venecia Jr. sa plenaro ng Kamara ngayong Lunes.Kaugnay nito, nilagdaan ng mga mambabatas ang House Resolution (HR) No. 758 na nagbibigay pugay sa dating Speaker at bilang hudyat sa pagsasagawa ng memorial service sa Lunes 10 a.m.Sa pangunguna ni Speaker Faustino “Bojie” G. Dy III of Isabela, ilan sa mga mambabatas kabilang sila House Majority Leader Ferdinand Alexander “Sandro” A. Marcos ng Ilocos Norte at House Minority Leader Marcelino “Nonoy” Libanan ng 4PS Party-list ang pumirma sa HR No. 758 na nagsasaad ng “profound condolences of the House of Representatives to the family of the Honorable Jose C. de Venecia Jr., former Speaker of the House of Representatives during the Ninth, Tenth, Twelfth, Thirteenth, and Fourteenth Congresses and spouse of the Honorable Ma P. de Venecia, Representative of the Fourth Legislative District of Pangasinan.”Sumakabilang buhay si De Venecia nitong February 10, 2026 sa edad na 89. Kilala bilang “JDV” o “Speaker Joe,” ipinanganak si De Venecia noong Dec. 26, 1936 sa Barangay Pogo Grande, Dagupan City, Pangasinan kay Judge Jose Ravago de Venecia Sr. at Casimira Villamil Claveria. Sinabi ng pamilya sa pangunguna ni Pangasinan Rep. Georgina at mga anak na si dating Pangasinan Rep. Christopher de Venecia, Joey, Vivian de Venecia- Garcia, Leslie de Venecia-Norton at Alexandra de Venecia- Hanner at mga apo, inilaan ni JDV ang kanyang buhay sa pagseserbisyo sa publiko, bilang isang mamamahayag, diplomat, entrepreneur, mambabatas, Speaker of the House at “global advocate for peace.”Kinilala ng Kamara si de Venecia na katangi-tanging miyembro nito na nanilbihan bilang Speaker ng limang beses, mula sa Ninth, Tenth, Twelfth, Thirteenth and Fourteenth Congresses, at representative ng fourth district ng Pangasinan sa anim na beses.Sa nasabing resolusyon, kinilala rin si De Venecia bilang arkitekto ng Rainbow Coalition, kung saan pinagsanib niya ang magkakaibang partido politikal sa liderato ng Lakas-Christian Muslim Democrats (Lakas-CMD) sa ilalim ng administration ni dating Pangulong Fidel V. Ramos.(Vina de Guzman)
Bloated pa dahil sa gamot at nakakapaglakad na… KRIS, ibinahagi ang ‘birthday salubong’ kasama ang mga anak at kaibigan
KITANG-KITA na puno ng pagmamahal ang birthday salubong para kay Queen of All Media Kris Aquino nang pumasok na ang February 14 para sa kanyang ika-55th birthday.
Nandun siyempre ang dalawang anak na sina Josh at Bimby, kasama ang malalapit na kaibigan, para sa pagsaluhan ang simple pero makahulugang selebrasyon, dahil muli siyang pinagkalooban ng Diyos ng bagong taon sa buhay niya.
Makikita ang photos na pinost ng kanyang doktor na si Dra. Geraldine Zamora sa Instagram dito.
Caption ni Dra. Ging, “Birthday salubong for ate K, the #brave #lovelovelove.”
Medyo namamaga pa ang face ni Kris sa naturang photo, kaya comment niya sa post…
“I love you but i am so bloated from the only steroid i am not allergic to. I found us a place to walk safely, but of course knowing me you and my nurses need to stay alert that i don’t stumble.
Ibinahagi naman hair and makeup artista na si Jonathan Velasco, ang video habang inaayusan si Kris, pati na ang nagbo-blow ng candle sa kanyang mga cake, kasama ang dalawang anak.
“Happy Birthday Madam Kris, and Happy Valentine’s Day,” pagbati ni Jonathan.
Message pa niya, “You are such an inspiration, and my prayer is for your healing, peace, and love today and always. May all the love you give return to you tenfold. Love love love.”
Sobrang grateful nga si Kris na umabot sa kanyang 55th birthday at nauna na siyang nag-wish na hopefully ma-reach din niya 60 years old para makakuha na rin siya ng senior citizen card, na siguradong pakikinabangan niya.
Muli, isang maligayang kaarawan Kris, sana ay tuloy-tuloy na ang paggaling mo.
***
SA diwa ng pagpapalakas ng makabuluhang koneksyon sa buong creative industry, buong pagmamalaking ini-reveal ang official nominees para sa NDM+ Acting Awards 2026.
Magaganap ang NFE Gala Awards Night ngayong Martes, Feb. 17 , 6PM sa Artson Event Gala Hall sa A. Roses Ave., Q.C.
Naninindigan ang NDM+ Acting Awards 2026 na isa itong pagpupugay sa mga artista na ang talento, disiplina, at hindi natitinag na dedikasyon ay nagpapataas ng pagkukuwento sa pinakamataas nitong anyo.
Ang mga nominado ay kumakatawan hindi lamang sa kahusayan sa pag-arte, ngunit isang malalim na pangako sa pagbabagong wika ng entablado at pinilakang tabing.
Sa Best Actress category, magtatagisan ng galing sa pag-arte sina Angelica Panganiban (“Unmarry”), Jennylyn Mercado (“Everything About My Wife”), Glaiza de Castro (“Sinagtala”), Barbie Forteza (“P77”), Morisette Amon (“Song of the Fireflies”) at Maris Racal (“Sunshine”).
Sa Best Actor naman, pawang mahuhusay at award-winning ang magtutunggali na sina JC Santos (“Journeyman”), JM de Guzman (“Lasting Moments”), Jericho Rosales (“Quezon”), Baron Geisler (“The Delivery Rider”), Richard Gomez (“Salvageland”) at Zanjoe Marudo (“Unmarry”).
Ilan pa sa paglalabanang award ay para sa Best Supporting Actress na kung saan nominated sina Dimples Romana (“The Caretakers), Jennica Garcia (“The Delivery Rider”), Heaven Peralejo (“Out of Order”), Cindy Miranda (“Salvageland”) at Kate Alejandrino (“Baka Doon sa Buwan”).
Pasok naman sa listahan ng Best Supporting Actor sina Cesar Montano (“Selda Tres”), Mon Confiado (“Quezon”), JK Labajo (“Sana Sinabi Mo”), Kelvin Miranda (“Everyone Knows Every Juan”) at Nonie Buencamino (“Out of Order”).
Ipagkakaloob din ang Best Breakthrough Acting Performance, na kung saan sina Ivana Alawi (“Shake, Rattle & Roll”), Pearl Gonzales (“I See You”), Maeg Medina (“Finding Santos”) Aaliyah Marciano (“Baka Doon sa Buwan”) at Klea Pineda (“Open Endings”).
Ang NDM+ Acting Awards 2026 ang unang magbibigay ng awards para sa natatanging pagganap ng mga artista para sa nagdaang taon.
Goodluck sa lahat ng nominees, mabuhay ang Pelikulang Pilipino!
(ROHN ROMULO)
Maraming nagbigay ng tribute dahil sa ginintuang puso… Veteran actress na si VANGIE, pumanaw na sa edad 83 sa Australia
MARAMING tao sa entertainment ang nagmamahal sa veteran actress na si Vangie Labalan na pumanaw sa edad na 83 noong nakaraang Feb. 12 sa Australia.
Sa Facebook ay maraming nagbigay ng tribute sa aktres, hindi lang dahil professional ito at mahusay sa drama at comedy, kundi dahil sa ginintuang puso nito.
Sa Facebook post ng kanyang anak na si Carlo Labalan, nakipaglaban si Vangie sa karamdaman noong Pebrero 12.
“To everyone who know her, love her, and was touched by her kindness, we extend our deepest gratitude. She is deeply loved and will be dearly missed by her family, friends, and all whose lives she touched.
“She will be coming home soon. Further details regarding her wake and funeral services will be shared in the coming days,” caption ni Carlo.
Na-meet at na-interview namin si Tita Vangie noong 1992 sa isang taping sa studio ng Broadcast City. Tuwing nakikita namin siya, tawag namin sa kanya ay “Aling Susie” dahil sa role na ginampanan niya sa 1989 comedy film na ‘Elvis & James.’
Maria Christina Bonghanoy Labalan ang tunay na pangalan ni Tita Vangie. Nagsimula siya bilang radio talent in 1963 hanggang pasukin na niya ag paggawa ng pelikula noong ‘80s sabay ang pagiging dubbing supervisor para sa iba’t ibang film production.
Nakatrabaho niya ang mga mahuhusay na direktor tulad nila Lino Brocka, Ishmael Bernal, Mike de Leon, Marilou Diaz-Abaya, Eddie Garcia, Maryo J. delos Reyes, Elwood Perez, Celso Ad Castillo, Chito Roño, Jose Javier Reyes, Tikoy Aguiluz, Carlos Siguion-Reyna, Mel Chionglo, Leroy Salvador, Joel Lamangan, Jeffrey Jeturian, Raymond Red, Olivia Lamasan, Peque Gallaga and Lore Reyes.
Una siyang napansin bilang ina ni Nora Aunor sa pelikulang ‘Himala’ in 1982. Napuri rin ang pagganap niya sa mga pelikulang ‘Alyas Baby Tsina’, ‘Hihintayin Kita Sa Langit’, ‘Aliwan Paradise’, at ‘Ang Manananggal sa Unit 23B.’
Naging suki siya sa mga comedy films ng Regal, Viva, Star Cinema, Seiko Films at iba’t ibang film outfits. Parating role niya ay masungit na kasera, tindera sa palengke, mayordoma, yaya at chismosang kapitbahay.
Sa TV ay huling siyang napanood sa FPJ’s Batang Quiapo at Lolong: Pangil ng Maynila.
(RUEL J. MENDOZA)
Kasama ang soulmate sa Valentine’s Day… AIKO, kinumpirma na rin na may relasyon na sila ni ONEMIG
KINUMPIRMA na mismo ni Aiko Melendez na may relasyon na nga sila ni Onemig Bondoc.
Sa kanyang official Facebook account, kalakip ang ilang mga larawan kung saan makikitang sweet na sweet ang dalawa sa kanilang Valentine getaway sa isang hindi pinangalanang beach resort, ay naghandog si Aiko ng isang tula para kay Onemig.
“To my soulmate, @uno_111 @onemigbondoc
“You are not just the love I asked for, you are the love I didn’t even know I needed.
“With you, love feels calm, safe, and true.
“You understand me in silence, hold me in my weakest moments, and choose me every single day.
“Thank you for loving me beyond my flaws, for standing by me when things aren’t easy, and for reminding me that real love doesn’t rush, it stays.
“In a world full of noise, you are my peace.
“In every lifetime, I would still find my way to you.
“I choose you today, tomorrow, and always.
“Happy Valentine’s, my soulmate. First valentines day!”
Unang naging aware ang publiko tungkol sa dalawa sa vlog ni Aiko nitong nakaraang December kung saan nabulgar na twenty-nine years ago ay nanligaw na si Onemig kay Aiko pero walang nangyari dahil hindi sinipot ni Aiko noon si Onemig tatlong oras na naghintay sa Subic.
At nito namang birthday party ni Aiko last December rin kung saan isa ang inyong lingkod sa mga bisita ay nasaksihan namin kung gaano na ka-sweet sina Aiko at Onemig na isa sa mga bisita sa birthday ni Aiko.
Pero hanggang sa Pebrero ngayong taon ay walang deretsahang pag-amin mula sa dalawa.
Hanggang sumapit ang Valentine’s Day kung saan nag-post na nga si Aiko sa kanyang FB account ng maituturing na pag-amin na sinagot na nga niya si Onemig.
In fairness, halos lahat ay pabor sa relasyon niang dalawa.
Sa kasalan kaya humantong ang kanilang pagmamahalan?
Sana!!!
(ROMMEL L. GONZALES)
Alex Eala at Hailey Baptiste muling magkakaharap sa Dubai Tennis opener
SISIMULAN ni Alex Eala ang kanyang kampanya sa Dubai Tennis Championship laban sa isang pamilyar na katunggali matapos siyang mapasama sa main draw ng prestihiyosong WTA 1000 event.
Makakaharap ng Filipino tennis ace si American bet Hailey Baptiste sa round of 64 ngayong Linggo, sa hangaring makausad na susunod na yugto ng torneo. Huling nagtagpo ang dalawang noong Hulyo ng nakaraang taon sa qualifiers ng Eastbourne International, kung saan nanaig si Eala sa dikitang laban, 6-7,7-6,-6-1.
Inaasahan hindi magiging madali ang laban ni Eala kontra kay Baptiste, sa kasalukuyan nasa World No. 40 si Eala at nasa World No. 39 si Baptiste sa WTA rankings kung kaya’t inaasahan na magiging isa nanamang mahigpit na bakbakan ang kanilang pagtutuos sa Dubai.
Ang torneo sa Dubai ang huling assignment ni Eala sa Middle East bago siya bumiyahe patungong United States sa Marso para sa Indian Wells Open. Bago ito, lumahok din siya sa Abu Dhabi Open at Qatar Open bilang bahagi ng kanyang international campaign.
Filipino Olympian Francis Ceccarelli, 54th place sa 2026 Winter Olympics
NAGTAPOS sa ika-54 na pwesto si Filipino Olympian at alpine skier Francis Ceccarelli sa men’s giant slalom event sa 2026 Winter Olympics.
Sa kanyang unang run, nagtala si Ceccarelli ng oras na 1:27.36 upang ma-ranggo sa ika-57, at sumunod naman ang 1:20.87 sa pangalawang run, na naglagay sa kanya sa ika-53 sa run na iyon. Sa kabuuan, ang kanyang combined time ay 2:48.23.
Naiuwi naman ni Brazil’s Lucas Pinheiro Braathen ang ginto na nagtala ng total time na 2:25.00. Sumunod si Switzerland’s Marco Odermatt sa 2:25.88, habang kapwa Swiss na si Loïc Meillard ang kumuha ng bronze sa 2:26.17.
Susunod na lalaban si Ceccarelli sa slalom event sa darating na Lunes.
Samantala, ang kapwa Filipino skier na si Tallulah Proulx ay nakatakdang lumahok sa women’s giant slalom sa Linggo at sa slalom event sa Miyerkules.
Ang paglahok nina Ceccarelli at Proulx ay bahagi ng patuloy na pagsabak ng Pilipinas sa mga Winter Olympic competitions, na nagbibigay-daan para sa mga kabataang atleta na maging inspirasyon sa bansa.
Kasalang Bayan 2026 Handog ng butihing Singing Mayor Allan De Leon para sa pagdiriwang ng Hamaka Festival 2026
ISANG daan at tatlumpu’t isang magsing- irog ang ikinasal at dumalo sa Kasalang Bayan na ginanap ika -13 ng Pebrero, 2026 sa Kalayaan Park, Taytay Rizal.
Ito ay pinangunahan ng The Singing Mayor Allan M. De Leon sa nasabing seremonya kasama ang Pangalawang Punong Bayan na si Vice Mayor JV Cabitac at ang Sangguniang Bayan nito.
Sa umpisa ng Seremonya ay nagkaroon muna ng isang seminar mula sa Municipal Health Office ukol sa Pagplaplano ng Pagbuo ng Pamilya.
Sinundan ito ng isang makabuluhang Seremonya ng kasal upang pagtibayin ang pagsasama ng mag- asawa at maging legal ang pagsasama.
Ang nasabing Kasalang Bayan 2026 ay parte ng Hamaka Festival 2026 na nagsimula noong Enero 31, 2026 na magtatapos hanggang sa ika -22 ng Pebrero taon kasalukuyang.
(Kim Bornella/ Photos Boy Morales Sr.)
Valentine message ni Castro kay VP Sara: magpalaganap ng pagmamahal, hindi ng “fake news”
HINIKAYAT ni Presidential Communications Office (PCO) Undersecretary at Palace Press Officer Claire Castro si Vice-President Sara Duterte na “spread love, not fake news.”
“At ang aking message, Valentine message sa kanya, VP Sara, spread love, not fake news, not immorality. Don’t be a chucky,” ang sinabi ni Castro nang hingan ng mensahe para kay VP Sara sa gitna ng bagong ‘word war’ sa pagitan ng dalawa.
Nag-ugat ang pahayag na ito ni Castro nang bigyang-diin ni VP Sara sa publiko na nagdadala ng kahihiyan sa bansa ang una.
“Sinasabi ko na nga na paulit-ulit na ano, na si Claire Castro, nagdadala ‘yan ng kahihiyan sa ating bayan dahil tinawag siya na Spokesperson ng Office of the President,” ayon kay VP Sara.
Paliwanag ni VP Sara na hindi lang kasi ang mga Filipino ang nakikinig sa mga sinasabi ni Castro bilang spokesperson ng OP, kundi naririnig din daw ng buong mundo ang mga pahayag nito.
Kaya nga aniya ay hindi na dapat na pakinggan at pansinin si Castro.
Ang resbak naman ni Castro, ang mga sinasabi ni VP Sara ay malinaw na “smears, insinuations, at immorality.”
“So, ganito po bang lider tulad ni VP Sara ang dapat nating hangaan at dapat nating ilagay sa pedestal. Ang anumang salitang nanggagaling sa kanya ay puro paninira, puro insinuation, puro ka-imoralidad,” aniya pa rin.
At sa mga ganitong sitwasyon aniya, hinihiling niya sa mga kaalyado ni VP Sara na nagmamarunong sa komunikasyon at mga propagandista na mangyaring turuan si VP Sara sa kanyang komunikasyon.
“Bigyan po ninyo ng Comms 101, para magkaroon naman ng kaunting or rather katiting na pagkaka-statesman,” diing pahayag ni Castro.
Samantala, naniniwala naman si Castro na dapat na maging maingat ang bansa kung ang ihahalal ng mga mamamayang pinoy ay isang Manchurian candidate.
“Ang kanyang sabi ay malamang wala nang maging bansa or Pilipinas sa 2028. Kung ang kanyang hula ay magkakatotoo, malamang mangyayari iyan kung ang isang lider na iboboto sa 2028 ay isang Manchurian candidate, isang puppet ng isang bansa kung saan maaaring ipamigay ang ating yaman, ang ating karapatan sa ibang bansa,” ang pahayag ni Castro.
( Daris Jose)
Variety Show handog ni Mayor Allan De Leon para sa pagdiriwang ng Hamaka Festival 2026
NAGSAGAWA ng isang variety show ang Bayan ng Taytay para sa pagdiriwang ng Hamaka Festival 2026 na ginanap noong ika 7 ng Pebrero taong kasalukuyan sa New Taytay Public Market.
Ito ay pinangunahan ni Singing Mayor Allan De Leon kasama si Vice Mayor JV Cabitac at mga Sangguniang Bayan Council na sina Konsehal JV Valera, Konsehal Minchie Bermundo, Konsehal Patrick Alcantara, Joanne Calderon at iba pa.
Nagkaroon ng exhibit ng mga damit mula sa Taytay at sa iba’t ibang lugar sa Rizal at Laguna para ipakilala ang mga produkto kasunod ang pampasiglang sayaw na sinundan ng videoke challenge na nanalo ng limang daan piso, limang kilong bigas at 20 kilong bigas ang naipamigay sa mamamayan ng Taytay.
Sumabak naman sa kantahan ang The Singing Mayor sa videoke challenge kasama si Vice Mayor JV Cabitac at mga Konsehal nito upang pasayahin ang mga mamamayan ng Bayan ng Taytay.
(Jeremiah Solomon / Photos by Boy Morales Sr.)