PINARANGALAN si Manila Vice Mayor Chi Atienza bilang isa sa mga “People to Watch 2026” ng Rising Tigers Magazine bilang pagkilala sa kaniyang inklusibong pamumuno na nagsusulong sa kapakanan ng bawat Manileño.

Iginawad ang parangal sa isang seremonya na ginanap sa Presidential Suite ng The Manila Hotel noong Martes, Pebrero 10, kung saan kinilala ang mga lider mula sa pamahalaan at sektor ng negosyo na itinuturing na mga “Nation Builders” dahil sa kanilang dedikasyon sa kani-kanilang larangan.

Bilang Presiding Officer ng ika-13 Konseho ng Lungsod, inilaan ni Atienza ang kaniyang panunungkulan sa pagsusulong ng kapakanan ng mga pinaka-nangangailangan—kabilang ang mga senior citizen, persons with disabilities (PWDs), solo parents, at mga manggagawa. Tiniyak din niya na may matibay na representasyon ang Muslim communities, LGBTQIA+ sector, at mga animal welfare advocates sa lungsod.

Binigyang-diin din ng Rising Tigers Magazine ang kanyang pagsisikap na maisalin ang mga adbokasiyang ito sa mga konkretong polisiya, kasabay ng paniniwala na tunay na uunlad ang isang lungsod kung nagkakaisa ang mga lider at napoprotektahan, narerepresenta, at napakikinggan ang mamamayan.

Sa kanyang acceptance statement, sinabi ng bise alkalde na ang parangal ay paalala ng kaniyang tungkulin bilang lingkod-bayan.

“This award reminds me of my responsibility as a public servant to open my ears and my heart to the constituents who put me here,” ani Atienza.

Ginamit din niya ang pagkakataon upang bigyang-diin ang kaniyang papel sa kasalukuyang administrasyon, na nagsisilbing inspirasyon upang higit pang maging suportado at aktibo bilang katuwang ni Mayor Isko Moreno Domagoso.

“It is also a reminder of my role as the vice mayor to a Mayor who strives to make a mark; to be more supportive and more proactive in crafting laws to make the lives of our constituents better,” dagdag niya.

Bilang presiding officer, nangako si Atienza na patuloy niyang isusulong ang representasyon ng bawat sektor—lalo na ang mga nasa laylayan—upang matiyak na sila ay naririnig at nabibigyan ng boses sa pamahalaang lungsod (Gene Adsuara)

ANG TESDA Skills Passport ay tugon sa lumalalang problema ng working skills mismatch and underemployment sa bansa, ayon kay Tingog Party List Rep. Jude Acidre, chairman ng Committee on Higher and Technical Education ng Kamara.
Sinabi ni Acidre na napapanahon ang paglulunsad ng TESDA Skills Passport para maibsan ang kakulangan ng technical and vocational education and training (TVET) sa bansa.
“Sa pagsapit ng panahon, nababago ang sistema at kalidad ng ating trabaho kaya marapat lamang na ang ating skills systems must move faster and become more responsive,” sinabi ni Acidre.
“The TESDA Skills Passport is a reform that helps ensure Filipino workers are not left behind—by making skills visible, portable, and trusted, and by connecting training to real opportunities in the years ahead,” dagdag nito.
Ayon kay Acidre, co chairman ng Second Congressional Committee on Education’s (EDCOM II), ang employment rate ng mga nakatapos sa TVET ay umabot sa 58 percent mula 37 percent bago sa pagsasanay, isang taon matapos makumpleto ang programa.
Binigyan diin ni Acidre ang kahalagahan ng TVET at ang potensyal nito na matugunan ang pangangailangan ng mga employer na makahanap ng tamang kandidato.
Ang Skills Passport ay inilungsad ng Technical Education and Skills Development Authority (TESDA) kung saan nakasaad ang training records, national certificates at competency ng trainee o worker, habang may access sila sa mga scholarships, job matching at ilan sa mga training programs.
“Ang challenge ngayon ay hindi lamang karagdagang training kundi sa lahat ng credentials na nakuha at naipasa mo ay katumbas ng aktuwal na employment,” sinabi ni Acidre. “Yung mga digital tools tulad ng Skills Passport allow us to anticipate labor market needs and guide learners toward pathways that will remain relevant in the future.” (Vina de Guzman)

ANIM na bagong mga Regional Court Managers ang nanumpa sa tungkulin sa harap ni Chief Justice Alexander Gesmundo sa Session Hall ng Korte Suprema .

Kabilang rito sina Atty. Maria Alma Corazon H. Puncia ng First Judicial Region, Atty. Joevanni A. Villanueva ng Third Judicial Region, Judge Michelle Ann T. Villahermosa-Gacutno ng Seventh Judicial Region, Atty. Maria Pamela S. Oliver ng Eighth Judicial Region, Judge Janice Ivy G. Valparaiso-Chua ng Tenth Judicial Region, at Atty. Kyrie Dea Maia G. Morente ng Eleventh Judicial Region.
Enero 14, 2026 nang italaga ang anim ng Supreme Court en banc matapos magsilbi bilang interim Regional Court managers.
Ayon sa Korte Suprema itinatag ang Office of the Regional Court Manager upang tugunan ang pagkaantala at inefficiencies sa mga hukuman at mabawasan ang administratibong pasanin ng mga trial court judge.
Saklaw ng tungkulin ng mga Regional Court Manager ang mga usaping administratibo at piskal upang makapagpokus ang mga hukuman sa kanilang adjudicative functions, bilang bahagi ng modernization program sa ilalim ng Strategic Plan for Judicial Innovations 2022–2027.( Gene Adsuara)

DALAWANG magkasunod na sunog ang sumiklab sa magkahiwalay na lugar sa Caloocan, at Malabon Cities na naging dahilan upang mawalan ng tirahan ang mahigit 200 pamilya.

SA ulat, alas-11:27 ng Miyerkules ng umaga nang sumiklab ang sunog sa mga kabahayan sa C4 Barangay Tañong, Malabon City na mabilis na kumalat ang apoy kaya kaagad itong itinaas sa ikatlong alarma.

Idineklarang fireout ang sunog dakong 1:17 ng hapon kung saan isang babae ang napaulat na sugatan habang inaalam pa ang naging sanhi nito at kung magkaano ang halaga ng ari-arian ang natupok.

Kaagad namang nagbigay ng tulong ang lokal na pamahalaan ng Malabon sa pangunguna ni Mayor Jeannie Sandoval, kasama ang mga kawani ng City Social Welfare and Development, City Health Office at Malabon DRRMO na personal na kinamusta ang nasa 200 pamilyang naapektuhan ng sunog.

Naglagay din ng mga modular tents sa Covered Court ng Barangay Tañong, nagpaabot na din ng mga hotmeals para sa kanila, mga non food items KKB – Kumot Kulambo Banig at paglalagay ng Water Purification system bilang inisyal na tulong ng lokal na pamahalaan.

Namahagi rin si Mayor Sandoval ng food packs at hygiene kits sa mga apektadong pamilya, katuwang ang Philippine Red Cross na nagbigay din ng mga hot meals.

Sa Caloocan, nasa 30 kabahayan naman at tatlong gusaling pang-komersiyo ang tinupok ng apoy sa naganap na sunog sa kanto ng Baltazar St. at C3 Road, Brgy., 49 na sumiklab alas-5:26 ng umaga sa bahay na pagmamay-ari ng isang alyas “Felipe” na umabot sa unang alarma at idineklarang kontrolado alas-6:48 ng umaga.

Dinala naman sa barangay si alyas Felipe matapos inguso ng kanyang isang tauhan na nagsindi umano ng kandila na posibleng pinagmulan ng sunog habang wala namang iniulat na nasawi o nasugatan sa insidente at inaalam pa kung magkano ang halaga ng natupok na ar-arian. (Richard Mesa)

NANAWAGAN ang Gabriela women’s party list at mga miyembro ng Makabayan Bloc ng House of Representatives na imbestigahan ang mga napaulat na connection ni convicted sex offender Jeffrey Epstein sa Pilipinas.
Pinangunahan ni House Assistant Minority Leader and Gabriela Women’s Party Rep. Sarah Elago ang mga mambabatas ng Makabayan Bloc sa pagpasa ng House Resolution 762 upang imbestigahan ang mga napaulat na operasyon ni Epstein sa bansa at mga Pilipino na maaaring sangkot dito.
Partikular na tinukoy ni Elago ang mga Filipino experts sa backend digital work at digital reputation management at online operations para ma-improve ang online image ni Epstein matapos mahatulan ng sex trafficking.
“Bilang mga mambabatas, kailangan natin siguraduhin na ang ating mga batas at inter-agency coordination ay nakasasapat upang proteksyunan ang mga kababaihan at mga bata mula sa iba’t ibang porma ng pang-aabuso, online man o offline,” sabi ni Elago.
“Sa puntong ito, kailangan ng maagap at masinsin na imbestigasyon upang paunlarin ang ating mga batas lalo’t ang Pilipinas ay nananatiling ‘global hotspot ng online sexual abuse and exploitation of children’.”
(Vina de Guzman)

HINDI nawawalan ng interes si Pangulong Ferdinand Marcos Jr., na papanagutin ang sinuman na dapat na managot kaugnay sa flood control mess.
Itinatwa ni Presidential Communications Office (PCO) Undersecretary at Palace Press Officer Claire Castro na tinututukan lamang ng Pangulo ang ekonomiya dahil sa sobrang ingay na nagaganap sa bansa matapos buksan ng huli ang isyu sa paggamit ng maanomalyang flood control projects o paggamit ng pondo at pag-aabuso dito.
“Dahil kung galit po ang mga Pilipino sa korapsiyon, lalo pong mas galit ang ating Pangulo. At kailangan lang pong tutukan, move forward; ang sabi nga ng Pangulo, siya po ay tututok sa ekonomiya para naman po sa iba pa nating mga kababayan na hindi naman puro pulitika lang ang pinag-iisipan,” ang sinabi ni Castro.
Nagpahayag kasi ng pangamba ang ilan sa tila nawalan na nga talaga ng interes ang Pangulo na ipakulong ang mga sangkot sa maanomalyang flood control dahil sa pag-divert ng attention sa ibang problema ng bansa gaya ng ekonomiya.
Samantala, hindi pa tapos si Pangulong Marcos na repasuhin ang report ng Independent Commission for Infrastructure (ICI), dahil sa sobrang haba ng dokumento.
“Sa ngayon po ay hindi pa po tayo nabibigyan ng update kung natapos na pong mabasa dahil sa ating pagkakaalam ay medyo mahaba-haba po ang report ng ICI,” ani Castro. ( Daris Jose)

“JUST tell it to the Marines.”
Ito ang tugon ng Malakanyang sa sinabi ni Vice-President Sara Duterte na hindi na muna siya nakikipag-usap sa mga kaalyado niya sa Senado upang mailigtas ang mga ito sa harassment ng kasalukuyang administrasyon.
‘That Is another story-telling a lie,” ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.
“Tandaan po natin, hindi natin malaman kung saan ba nanggagaling ang kanilang mga talent sa pag-i-spread ng mga fake news. Nauna na pong nagpakalat ng fake news ang Bise Presidente patungkol sa diumano’y pagkaing baboy lamang ang bente pesos na bigas na ipapamigay, or rather, ibibigay at ibibenta sa mas murang halaga ng Pangulo through KADIWA centers,” anito.
“Nandiyan din po iyong fake police blotter, altered police blotter mula sa Beverly Hills. Nandiyan din po iyong mga fake videos – hindi isa, kung hindi dalawa – laban sa Pangulo at sa ating Unang Ginang. Lahat ng iyan ay fake,” aniya pa rin sabay tanong na “So, sino ba talaga ang may kakayanan na gumawa ng karahasan? Sino ba ang nagbabanta ng buhay?.”
Sa ulat, bukod sa mga senador, sinabi ni VP Sara na ginagawa rin niya ito sa iba pang indibidwal.
Samantala, nilinaw na rin ni VP Sara na wala siyang kinalaman sa pagkakaroon ng umano’y term-sharing sa pamunuan ng Senado. ( Daris Jose)