INARESTO ng mga operatiba ng Bureau of Immigration (BI) ang ilang Chinese national sa tatlong magkakahiwalay na enforcement operations na isinagawa sa Zamboanga City at Tabuk City, Kalinga dahil sa paglabag sa mga batas sa imigrasyon ng Pilipinas.

Sa Zamboanga City, inaresto ng BI intelligence operatives si Rongtian Shi, 40, isang Chinese national, sa isang operasyon noong Pebrero 2 sa isang tindahan ng cellphone at accessories na matatagpuan sa Maria Clara Street, Barangay Zone 3.

Nadatnan si Shi na aktibong namamahala ng negosyo at nakikipagtransaksiyon sa mga kostumer sa oras ng kanyang pagkakaaresto.

Ayon sa BI, lumitaw ang mga iregularidad sa rekord ni Shi sapagkat ang kanyang working visa ay inihain ng isang kompanyang nakabase sa Quezon City. Ayon sa BI, ito ay paglabag sa umiiral na mga batas sa imigrasyon ng bansa.

Samantala, sa kaparehong araw sa Tabuk City, Kalinga, inaresto ng mga operatiba ng BI si Huang Xilai, 57, sa loob ng isang komersiyal na establisimyento sa Barangay Dagupan Centro.

Bago ang kanyang pagkakaaresto, naobserbahan si Huang na personal na namamahala ng operasyon ng tindahan, nagbibigay ng mga tagubilin sa mga Pilipinong empleyado, at gumaganap bilang kahera. Ipinakita ng mga rekord na siya ay overstaying at sangkot sa gainful employment nang walang kaukulang visa o permit. Nabigo rin siyang magpakita ng balidong travel documents at tanging digital na kopya lamang ng kanyang pasaporte ang naipresenta.

Sa hiwalay na operasyon noong Pebrero 2 sa Barangay Bulanao, Tabuk City, inaresto rin ng BI ang iba pang Chinese national sa loob ng isa pang komersiyal na establisimyento dahil sa kaparehong mga paglabag, kabilang ang overstaying, pakikibahagi sa gainful occupation nang walang wastong awtorisasyon, pagtatrabaho sa labas ng saklaw ng kanilang visa petition, at pagiging undocumented.

Kinilala ang mga inarestong dayuhan na sina Huang Huifang, 51; Huang Menggui, 24; at Huang Mengjiao, 28.

Lahat ng mga inarestong dayuhan ay dinala sa Maynila para sa booking, medical examination, biometrics processing, at kaukulang dokumentasyon bilang paghahanda sa paunang imbestigasyon at posibleng deportation proceedings.

Ayon kay BI Commissioner Joel Anthony Viado, ipinapakita ng mga operasyong ito ang patuloy na pagsisikap ng ahensiya na ipatupad ang mga batas sa imigrasyon at sugpuin ang ilegal na pagtatrabaho ng mga dayuhan sa bansa.

“Nanatiling matatag ang Bureau of Immigration sa mandato nitong habulin ang mga dayuhang umaabuso sa kanilang pananatili at lumalabag sa mga batas ng Pilipinas,” ani Viado. “Bahagi ang mga enforcement action na ito ng aming tuloy-tuloy na pagsisikap na pangalagaan ang pambansang seguridad at protektahan ang mga trabaho para sa mga Pilipino.” (Gene Adsuara)

NANGAKO si Pangulong Ferdinand R. Marcos Jr., araw ng Biyernes na palalakasin ang healthcare system sa bansa sa pamamagitan ng pagtugon sa kakulangan sa pasilidad, kagamitan at mga medical professionals lalo na sa mga lugar na kulang ang serbisyong pangkalusugan.

“Kaya’t bilang suporta ng pamahalaan, hindi bababa sa P500 bilyong piso ang inilaan nating budget ngayon upang maging mas epektibo ang ating health sector,” wika ng Pangulo sa groundbreaking ceremony ng Pamantasan ng Lungsod ng Maynila (PLM) College of Allied Health Sciences Building.

Nilahad ng Pangulo ang mga hamon sa serbisyong pangkalusugan gaya ng limitadong access sa medikal na serbisyo, kulang na makabagong teknolohiya at pasilidad sa mga ospital, at kakulangan ng health centers at health workers.

“Hindi na po natin hahayaang magtiis sa sakit ang ating mga kababayan dahil sa kawalan ng pantustos sa pagpapa-gamot. Hindi natin hahayaang nahihirapan ang mga pamilya sa mga probinsya dahil sa layo ng kanilang lalakbayin para makarating sa ospital,” diin ng Pangulo.

Ayon sa Pangulo, mahigit sa P247 ang inilaang pondo sa Department of Health at PhilHealth, higit na P13 bilyon para sa specialty hospitals, at halos P9 bilyon para ospital ng Department of National Defense at Philippine National Police habang P98 billion naman sa health programs ng LGUs.

Halos P1 bilyon naman ang inilaan para sa medical scholarships at tuition subsidies sa mga estudyante ng SUCs, at halos P1.4 bilyon para sa medical assistance at zero balance billing sa Philippine General Hospital (PGH).

“Lahat ng ito ay inaasahang magpapabuti ng serbisyong medikal at magpapalakas ng ating health sector,” ayon kay Pangulong Marcos, na nanawagan sa publiko na samantalahin ang mga programang pangkalusugan ng pamahalaan.

Samantala, nagbigay din ang Pangulo ng P15 milyon na tulong para sa Baseco Hospital upang mapabuti ang pasilidad at serbisyo nito.

Bumisita rin siya sa Ospital ng Maynila Medical Center (OMMC) na nakapagtala ng pinakamataas na bilang ng pasyenteng nakinabang sa PhilHealth’s Yaman ng Kalusugan Program (YAKAP) noong Setyembre.

“Sa puntong ito, nananawagan ako sa ating mga kababayan: Samantalahin ninyo ang mga programang ito upang mapangalagaan ang inyong mga sarili. Bukas po ang mga serbisyong ito para sa lahat—lalo na sa higit na nangangailangan,” wika ng Pangulo.
( Daris Jose)

ISANG “distractions” at isang “political move” lamang ang impeachment complaints na inihain laban kay Pangulong Ferdinand Marcos Jr. sa Mababang Kapulungan ng Kongreso kaya hindi ito naging matagumpay.
Ito ang paglalarawan ng Pangulo sa isang ambush interview sabay sabing kapos sa basehan ang nasabing impeachment complaints kaya’t hindi na ito umusad.

“These things are distractions from the things that we are doing,” ayon sa Pangulo nang hingan ng reaksyon sa naging desisyon ng House Committee on Justice na ibasura ang dalawang impeachment complaints laban sa kanya (Pangulo).
Inamin ng Pangulo na hindi siya masyadong nag-aalala dahil nakita niya ang impeachment complaint laban sa kanya na walang ‘real grounds’ para sa impeachment.
“Although I wasn’t very worried because I saw the impeachment complaint and I knew that I will be all right in terms of the impeachment kasi wala naman, there were no real grounds for the impeachment. It was a political move, as usual,” aniya pa rin.
Kamakailan ay binasura ng House Committee on Justice ang dalawang impeachment complaint na inihain laban kay Pangulong Marcos dahil sa “insufficient in substance” o kakulangan ng basehan para ipagpatuloy ang pagtalakay sa usapin.
Sa botohan sa unang impeachment complaint na inihain ng abogadong si Andre de Jesus, 42 kongresista ang bumoto na ibasura ito, isa ang tumutol, at isa ang hindi bumoto.
Samantala, sa ikalawang reklamo na inihain ng Makabayan coalition, pinagbotohan ito na ideklarang sapat sa sustansiya pero 39 na kongresista ang tumutol, at pito lang ang pumabor.
Nagsasaad sa dalawang impeachment complaint na inihain laban kay Marcos na:
Sa reklamong inihain ni De Jesus, inaakusahan niya si Marcos ng pagtataksil sa tiwala ng publiko at paglabag sa Konstitusyon, bukod sa iba pa, dahil sa umano’y pag-utos at pagpapahintulot sa pagdukot at pagsuko kay dating Pangulong Rodrigo Duterte sa International Criminal Court (ICC); kasama rin ang paratang na gumagamit ang pangulo ng ilegal na droga na nakaaapekto sa kaniyang pamumuno sa bansa; at sa kabiguang i-veto ang mga unprogrammed appropriations at iba pang probinsiyon na labag sa Konstitusyon sa pambansang budget para sa 2023, 2024, 2025, at 2026, at iba pa.
Sa reklamong inihain ng Makabayan bloc, nakasaad naman na nagkasala ang pangulo ng pagtataksil sa tiwala ng publiko dahil sa pagpapatupad ng Baselined-Balanced-Managed (BBM) Parametric Formula sa paglalaan ng mga proyektong pang-imprastraktura na umano’y nagresulta sa mga “ghost,” substandard, at over priced na flood management projects, at iba pa.
“Of course, I’m glad that impeachment complaints against me have been finished. And as the statement that we made earlier. I’m happy and we can get on with our work,” ang sinabi naman ni Pangulong Marcos.
( Daris Jose)

KALABOSO ang dalawang kelot nang tutukan ng baril ang dalawang biktima kabilang ang isang bebot sa magkahiwalay na lugar sa mga Lungsod Valenzuela at Navotas.
Sa nakalap na impormasyon sa tanggapan ni Northern Police District (NPD) District Director P/BGen. Christopher Dela Cruz, unang naaresto ng pulisya si alyas “Boy”, 33, Martes ng gabi sa Brgy. Marulas, Valenzuela nang humingi ng tulong ang isang lalaking binagbantaang babarilin kapag hindi nagsalita sa hinihingi niyang impormasyon hinggil sa isang kaalitan.

Nakumpiska ng pulisya kay alyas Boy ang isang improvised shotgun na kargado ng 12-gauge na bala na nakasukbit pa sa kanyang baywang.

Sumunod namang nadakip ng mga tauhan ni Navotas Police Chief P/Col. Renante Pinuela ang 24-anyos na si alyas “Maroy” nang matiyempuhan ng pulisya na hinoholdap ang isang bebot na biktima habang armado ng paltik na baril na kargado ng bala sa Brgy. NBBS Proper sa Navotas City.

Ayon kay BGen. Dela Cruz, isasailalim sa ballistic examination ang mga nakumpiskang improvised na baril sa dalawa upang alamin kung nagamit ang mga ito sa ibang krimen.

Kapwa mahaharap ang mga suspek sa mga kasong Grave Threats at of R.A. 10591 o ang Comprehensive Firearms and Ammunition Regulation Act. (Richard Mesa)

OPISYAL nang binuwag ni Pangulong Ferdinand Marcos Jr., ang Office of the Special Assistant to the President for Investment and Economic Affairs (OSAPIEA).

Sa pahintulot ni Pangulong Marcos, nilagdaan ni Acting Executive Secretary Ralph G. Recto ang Executive Order No. 108 may petsang Enero 26, 2026, ang pagbuwag sa OSAPIEA.

Dahil dito, ang lahat ng tungkulin ng OSAPIEA ay inilipat na sa Office of the Executive Secretary (OES).
“There is a need to further streamline the initiatives of the OP on investment and economic affairs to further establish a robust monitoring system and ensure a more holistic and cohesive approach to address the diverse economic challenges currently confronting the nation,” ang nakasaad sa EO 108.

“The OSAPIEA is hereby abolished. The powers, duties, and functions of OSAPIEA, except those that are within the powers, duties, and functions of other concerned agencies in accordance with their respective mandates, shall now be integrated into the Office of the Executive Secretary (OES),” ang dagdag na EO 108.
Nauna rito, ginawang simple ni Pangulong Marcos ang inisyatiba ukol sa ‘investment at economic affairs’ ng Office of the President (OP) para palakasin ang monitoring system at i-promote ang isang komprehensibong approach para tugunan ang kasalukuyang mga hamon sa ekonomiya.
Taong 2023, ipinalabas ni Pangulong Marcos ang EO 49 na nagtatag sa OSAPIEA sa ilalim ng Office of the President (OP) upang tiyakin ang epektibong ‘integrasyon, koordinasyon, at implementasyon ng ‘investment at economic policies and programs ng gobyerno.
Base sa EO No. 49, ang Special Assistant to the President for Investment and Economic Affairs (SAPIEA) ay nagsilbi bilang Chairman Economic Development Committee (EDCom) at bilang miyembro ng pinakamahalagang Economic Development Council (EDC) committees.
Sa ilalim ng pinakabagong EO No. 108, ang Kalihim ng Department of Finance ay magsisilbi ngayon bilang chairperson ng EDCom, habang ang Kalihim naman ng Department of Economy, Planning and Development ay magsisilbi bilang Vice Chairperson ng EDCom.
Sa nakaraan, ang SAPIEA ay nagsilbi bilang Chairperson ng Semiconductor and Electronics Industry Advisory (SEIA) Council, ang pinakamahalagang advisory body ng Pangulo sa semiconductor at electronics industry, base sa Administrative Order No. 31 na ipinalabas noong 2025.
Sa ilalim ng EO No. 108, ang Executive Secretary ay magsisilbi ngayon bilang Chairperson ng SEIA Council. ( Daris Jose)

KALABOSO ang dalawang kelot nang tutukan ng baril ang dalawang biktima kabilang ang isang bebot sa magkahiwalay na lugar sa mga Lungsod Valenzuela at Navotas.

Sa nakalap na impormasyon sa tanggapan ni Northern Police District (NPD) District Director P/BGen. Christopher Dela Cruz, unang naaresto ng pulisya si alyas “Boy”, 33, Martes ng gabi sa Brgy. Marulas, Valenzuela nang humingi ng tulong ang isang lalaking binagbantaang babarilin kapag hindi nagsalita sa hinihingi niyang impormasyon hinggil sa isang kaalitan.

Nakumpiska ng pulisya kay alyas Boy ang isang improvised shotgun na kargado ng 12-gauge na bala na nakasukbit pa sa kanyang baywang.

Sumunod namang nadakip ng mga tauhan ni Navotas Police Chief P/Col. Renante Pinuela ang 24-anyos na si alyas “Maroy” nang matiyempuhan ng pulisya na hinoholdap ang isang bebot na biktima habang armado ng paltik na baril na kargado ng bala sa Brgy. NBBS Proper sa Navotas City.

Ayon kay BGen. Dela Cruz, isasailalim sa ballistic examination ang mga nakumpiskang improvised na baril sa dalawa upang alamin kung nagamit ang mga ito sa ibang krimen.

Kapwa mahaharap ang mga suspek sa mga kasong Grave Threats at of R.A. 10591 o ang Comprehensive Firearms and Ammunition Regulation Act. (Richard Mesa)

TINIYAK ng Quezon City government na mas palalakasin nila ang mga programa para sa mga local vendors sa pamamagitan nang pag-institutionalize sa QC Vendors’ Business School (QC VBS) kasabay ng pinagtibay na Ordinance No. SP-3430, S-2025.

Layon ng ordinansa na iniakda nina Councilors Victor Bernardo, Aly Medalla, Emmanuel Banjo Pillar, Candy Medina at Wencerom Benedict Lagumbay na maitaguyod ang professionalization, sustainability, at development para sa mga local vendors ng QC.
Ang itatatag na QC VBS ay magbibigay ng mga pagsasanay para sa mga vendor mula sa pampubliko at pribadong pamilihan, mga hawker, ambulant, at street vendor.

Nagpasalamat naman si QC Mayor Joy Belmonte sa mga katuwang ng lungsod mula sa CGIAR Resilient Cities Initiative hinggil sa paglalaan ng kanilang oras at kaalaman upang suportahan ang lungsod at ang mga vendor.

HIGIT sa 58 na mga bagong appointee ang nanumpa sa Malakanyang na pinangunahan ni Executive Secretary Ralph Recto.
Sa naging mensahe ni Recto, sinabi nitong hindi gantimpala o simbolo ng pribilehiyo ang kanilang pagkakatalaga sa gobyerno kundi isang sagisag ng paglilingkod sa sambayanang Pilipino.
“Hindi ito titulo para tumaas ang tingin sa sarili. Ito ay panunumpang ibaba ang sarili para iangat ang taumbayan,” ayon kay Recto.
Binigyang-diin ni Recto na may kaakibat na buong bigat ng pananagutan ang kanilang pagkakahirang sa tungkulin at hindi na lamang nakatali sa kanilang sarili, kundi pati sa reputasyon ng administrasyon at sa tiwala ng mamamayan.
Hinimok din ni Recto ang mga bagong talagang opisyal na panatilihin ang pinakamataas na pamantayan ng pamamahala o governance.
Kailangan din aniyang nakatuon ang kanilang pansin sa mga resulta kaysa sa mga headline habang hindi aniya titulo ang kanilang mga posisyon kundi panunumpang ibaba ang sarili para iangat ang taumbayan.
( Daris Jose)