HINDI inakala 52-anyos na mister na sangkot umano sa pagtutulak ng iligal na droga na pulis na ang kanyang napagbinyahan ng shabu nang maaresto siyang buy bust operation sa Valenzuela City, Martes ng umaga.

Hindi na nakapalag ang suspek na si alyas “Chong”, ng Brgy., Malinta nang sunggaban ng mga tauhan ni P/Lt. Sherwin Dascil, hepe ng Station Drug Enforcement Unit (SDEU) ng Valenzuela City Police Station.

Ayon kay Lt. Dascil, unang nakatanggap sila ng impormasyon hinggil sa umano’y pagbebenta ng suspek ng iligal na droga sa kanilang lugar at sa kalapit na mga barangay sa lungsod.

Nang magawang makipagtransaksyon sa suspek ng isa sa kanyang mga tauhan, kaagad bumuo ng team si Lt. Dascil bago ikinasa ang buy bust operation laban kay ‘Chong’ sa koordinasyon sa PDEA.

Dakong alas-8:00 umaga nang makipagtransaksyon umano si ‘Chong’ sa isang pulis na nagpanggap na buyer sa Manggahan St., Brgy. Karuhatan na nagresulta sa pagkakaaresto sa kanya.

Nakumpiska sa kanya ang humigi’t kumulang 10 grams ng hinihinalang shabu na may standard drug price na P68,000, buy bust money na isang tunay na P500 bill, kasama ang 14-pirasong P500 boodle money, P300 cash at coin purse.

Ayon kay SDEU investigator PMSg Ana Liza Antonio, kasong paglabag sa Sections 5 at 11 ng RA 9165 o ang Comprehensive Dangerous Drug Act of 2002 ang isasampang kaso laban sa suspek sa pamamagitan ng Inquest Proceedings sa Valenzuela City Prosecutors Office.

Pinuri naman ni Northern Police District (NPD) Acting Director P/BGen. Christopher Dela Cruz ang SDEU team sa kanilang matagumpay na drug operation na bahagi aniya ng pinaigting na kampanya ng NPD laban sa mga indibidwal na sangkot sa pagpapakalat ng iligal na droga. (Richard Mesa)

NEWS 5
Bebot na wanted sa Carnapping, nalambat sa Navotas

BINITBIT sa selda ang isang bebot na wanted sa kaso ng Carnapping sa Lungsod ng Malabon nang malambat ng pulisya sa pinaigting na manhunt operation sa Navotas City.

Sa ulat ni Navotas Police Chief P/Col. Renante Pinuela kay Northern Police (NPD) Acting Director P/BGen. Christopher Dela Cruz, nakatanggap sila ng impormasyon na nagtatago sa Navotas ang 22-anyos na akusado.

Ang akusado ay kabilang umano sa talaan ng mga Most Wanted Person ng Malabon City Police Station dahil sa kasong paglabag sa R.A 10883 o ang New Anti-Carnapping Act of 2016.

Naglabas ng arrest warrant laban sa akusado ang Regional Trial Court, National Capital Judicial Region, Branch 289, Malabon City, nitong January 27, 2026, para sa naturang kaso na walang inirekomendang piyansa.

Sa isinagawang manhunt operation ng mga operatiba ng Warrant and Subpoena Section ng Navotas CPS ay matagumpay na naaresto ang akusado sa Barangay Tangos South, dakong alas-6:20 ng gabi.

Nakakulong ang akusado sa Custodial Facility Unit ng Navotas CPS habang hinihintay ang pagpapalabas ng commitment order mula sa hukuman para sa paglilipat sa kanya sa Malabon City Jail. (Richard Mesa)

IPINASA ng Kamara sa pamumuno ni Speaker Faustino “Bodjie” Dy III sa ikatlo at huling pagbasa ang House Bill No. 6676, o Energy Storage Systems Act.

Sa botong 192 pabor, tatlong no at zero abstentions, inaprubahan ang panukalang nagsusulong sa pagkakaroon ng national policy framework para sa development, utilization, at commercialization ng energy storage systems upang suportahan ang grid reliability, renewable energy (RE) integration, at power supply security sa grid-connected at off-grid areas.

Sinabi naman ni Committee on Energy Chairperson and Palawan Rep. Jose Alvarez na “this measure puts in place a clear policy direction for developing and commercializing energy storage systems, which are essential to stabilizing our power supply and maximizing the use of renewable energy.”

Sa pamamagitan ng panukala ay inihahanda na ang power sector para sa mas magandang RE integration sa enerhiya habang sinisiguro ang reliability at affordability para sa mga consumers.

Sa ilalim ng panukala, ang Department of Energy (DOE) ang magsisilbing implementing agency, habang ang Energy Regulatory Commission (ERC) ang siyang magbubuo ng regulatory framework para sa licensing, pricing, at cost recovery ng energy storage facilities.

Maglalaan din ng insentibo sa integrated renewable energy plants na may storage systems.
(Vina de Guzman)

WALANG nilabag na protocol sa pagpili ng venue para sa gagawing pagho-host ng PIlipinas sa Association of Southeast Asian Nations (ASEAN)-related events.
Ito ang binigyang diin ni Presidential Communications Office (PCO) Undersecretary at Palace Press Officer Claire Castro, sabay sabing “no breach of protocol” kung ang pag-uusapan ay venue—ang hotel-casino ay ginamit aniya para sa international summit, at hindi sa pagsusugal.
Kasunod ito sa alalahanin mula sa mga observers, na nagsabing ang kamakailan lamang na nagtapos na ASEAN Ministers’ Meeting sa Cebu na idinaos sa hotel-casino ay kinkonsiderang hindi akma para sa Muslim delegates.
At nang tanungin kung paano iwawasto ng gobyerno ang pagpili, sinabi ni Castro na “there is nothing to resolve over the venue selection.”
“Unang-una po, there’s nothing to rectify dahil kung ito naman po ay hotel casino at ang nature ng event ay gagamitin po ito para sa isang international event like summit, hindi po para magsugal, wala naman pong nilalabag na protocol ang bansang Pilipinas,” ang sinabi ni Castro.
“So, iba po kasi ang usapan kung pupunta doon para magsugal. Pero kapag ang hotel although may kasamang casino pero ang purpose po ay um-attend ng isang event, hindi po naman …wala pong nilalabag na anumang protocol ang Office of the President or ang administrasyon na ito,” aniya pa rin.
Nagbigay naman ng katiyakan si Castro na ang procurement process para sa pagho-host ng Pilipinas ngayong taon para sa ASEAN events ay mahigpit na tinutukan at sinuri.
“Patungkol po naman sa sinasabi nating procurement, ang proseso po na ito ay mahigpit po na tinututukan at kasama na rin po ang evaluation of cost at ang nature ng event,” ang winika ni Castro.
“Pero ang katulad po nitong event ay masasabi po nating high-profile international events na karamihan po ay nagka-qualify po for exemptions from standard open competitive bidding, allowing for alternative procurement methods katulad ng negotiated procurement at direct contracting,” aniya pa rin. (Daris Jose)

IKINATUWA ng Malakanyang ang naging deklarasyon ng House Committee on Justice sa dalawang impeachment complaint laban kay Pangulong Ferdinand Marcos Jr. bilang “insufficient in substance.”

Sinabi ni Presidential Communications Office (PCO) Undersecretary at Palace Press Officer Claire Castro, natutuwa sila na nasunod ang proseso.
“Nagpapasalamat po tayo na nakita po ng mga mambabatas kung ano po talaga ang katotohanan, at doon tayo lagi sa katotohanan, nakita po natin wala naman po talagang merito ang mga nasabi pong complaint. At maski na po ang Pangulo ay kumpiyansa na wala siyang ginawang anumang impeachable offense. At maraming salamat po dyan,” ani Castro.
Sa ngayon aniya ay nakatutok ang Pangulo sa pag -angat ng ekonomiya ng bansa kaya sabi aniya ng Pangulo ay “Let’s move forward.”
At sa tanong kung napanood ng Pangulo ang proseso kanina ay sinabi ni Castro na hindi ito napanood ng Pangulo.
“Nasabihan lang po namin kung ano ang naging resulta, dahil po ang Pangulo ay nasa dalawang events po,” aniya pa rin.
Sa kabilang dako, ang initial reaction aniya ng Pangulo nang masabihan nila sa development na ito ay “natuwa po siya. Ang sabi nga po niya ay nasunod ang proseso. at yun naman po talaga ang gusto ng Pangulo, masunod ang proseso at makita ang katotohanan.”
“So, sa ating mga kababayan, sana po ay nakita nyo po, at inisa isa naman po ng mga mambabatas ang mga nasabing akusasyon at sana po at napaliwanagan na at naging maliwanag sa kanila,” aniya pa rin.
Nauna rito, tuluyan nang ibinasura ng House of Representatives ang dalawang impeachment complaints na nakabala laban kay Pangulong Marcos.

Samantala, sa panayam ng media kay ACT Teachers Partylist Rep. Antonio Tinio, tahasan niyang pinuna ang naging desisyon ng justice committee.
“Sabi nila wala raw ebidensya, sabi nila hindi raw impeachable ang mga offense na nasa complaint. Hindi po yun ang tungkulin ng mga kinatawan ng justice committee,” ani Tinio.
Hirit pa niya, “Hindi nila tungkulin na mag-abogado para sa Presidente.”
Noong Enero 19 nang unang ihain ang kauna-unahang impeachment laban kay PBBM sa pangunguna ni Atty. De Jesus.
Habang ang ikalawang impeachment complaint laban kay PBBM ay pormal na naihain noong Enero 22. (Daris Jose)