NAGDAOS ng pagpupulong para sa unang buwan sa taong 2026 ang Mayor’s League ng Quezon Chapter na ginanap Enero 15, 2026 sa Kalilayan Hall, Lucena City. Ito ay pinangunahan ni Mayor Sonny Ubana ng Bayan ng Lopez, Presidente ng Liga kasama ang mga opisyales nito na sina Mayor Lord Arnel “L.A” Ruanto ng Bayan ng Infanta bilang Bise Presidente ng Liga, Mayor Cesar Isaac ng Guinayangan, bilang Secretary General ng Liga, Mayor Ogie Suayan ng Candelaria , bilang Treasurer ng Liga at Mayor Atty. Elvis Uy bilang Legal Adviser ng Liga. Kasama ang iba pang mga opisyales nito,tulad nila Mayor Alfred Rigor Mitra ng Panukulan Quezon, bilang Board of Director ng Liga, Mayor Artem Mamburao ng Macalelon, Mayor Reynaldo Rosilla Jr. ng Buenavista, Mayor Webster Letargo ng Gumaca , Mayor Orlan Calayag ng Dolores Quezon, Mayor Alfred Pujeda ng General Nakar, Mayor Nikko Devanadera ng Sampaloc Quezon, Mayor Jhonny Escolano ng Quezon, Quezon, Mayor Charrize Escalona ng Perez Quezon, Mayor Ays Canimo ng Alabat Quezon. Dumalo rin sina Mayor Benson Sanggalang ng General Luna Quezon, Mayor Erick Wagan ng San Antonio Quezon, Mayor Marivic Gayeta ng Sariaya Quezon, Mayor Venchie Aguilar ng Agdangan Quezon, Mayor Aris ng Mulanay Quezon, Mayor Carlo Eleazar ng Tagcawayan Quezon, Mayor Piwa Lim ng Tayabas City, Mayor Tenten Villaverde ng Lucban at Mayor Ninong Erwin Pastrana ng Mauban Quezon. Isa sa naging panauhin nila ay si PCol. Romulo Albacea ng Quezon Police Provincial Office at iniulat niya ang mga kaganapan noong nakaraang taon 2025 at tinalakay ang pagsugpo sa droga na pangungunahing problema ng nasabing Lalawigan.(Kim Bornella/Photos by Boy Morales)
- March 2, 2026
Ang Diyaryong Pinagkakatiwalaan
Archive for January 17th, 2026
PBBM, nangako na palalakasin ang water, sanitation infra sa NCR
NANGAKO si Pangulong Ferdinand Marcos Jr. na palalakasin ng kanyang administrasyon ang ‘water at sanitation infrastructure’ sa Metro Manila.Inihayag ito ng Pangulo sa inagurasyon ng 60-million-liters-per-day (MLD) Aglipay Sewage Treatment Plant, magsisilbing 2,115-hectare catchment area sa mga lugar sa Mandaluyong, San Juan, at Quezon City, mapakikinabangan nang mahigit sa 650,000 residente.”At this scale, wastewater management and sanitation become essential foundations of public health, of environmental protection, and of sustainable development,” ayon sa Pangulo.”By reducing pollution flowing into rivers within its service area, this facility will improve local water quality. It also supports the long-term rehabilitation of Manila Bay by limiting the pollution load that eventually reaches our seas,” aniya pa rin.Winika pa ni Pangulong Marcos, mas maraming proyekto sa water at wastewater facilities ay nasa pipeline. Aniya, na ang five wastewater treatment plants sa buong service areas ay kasalukuyan ngayong nasa ilalim ng konstruksyon.Aniya, ang nga inisyatiba ay sumasalamin sa commitment ng administrasyon na palakasin ang water at sanitation infrastructure sa buong Metro Manila at sa labas nito.”Guided by the Revised Concession Agreement under Republic Act Nos. 11600 and 11601, our goal is this: by 2047, 76% of households in Metro Manila, in Cavite, and Rizal will be connected to sewerage systems, while the remaining 24 percent will be covered by proper sanitation services,” ayon sa Chief Executive.”This means that no community is left without safe and responsible wastewater management,” aniya pa rin. ( Daris Jose)
Butler, pinangunahan ang dominanteng panalo ng Warriors laban sa Knicks
PINANGUNAHAN ni Jimmy Butler ang panalo ng Golden State Warriors laban sa Eastern Conference No. 2 team na New York Knicks.
Gumawa si Butler ng 32 points sa naturang laban mula sa 14 field goals na ipinasok, kasama ang walong rebounds at dalawang steal.
Nag-ambag naman si NBA superstar Stephen Curry ng 27 points, pitong assists, at tig-isang steal at block.
Naging dominante ang laro ng Warriors sa kabila ng tuloy-tuloy na paghahabol ng Knicks, kung saan mula second quarter hanggang sa huling quarter ay nagawa ng Warriors na panatilihin ang kanilang lead.
Nasayang naman ang tig-50 points nina Knicks forward OG Anunoby at guard Miles McBride, kasama ang 20 rebounds na ambag ng bigman na si Karl-Anthony Towns.
Hindi kinaya ng Knicks ang 54% overall field goal percentage ng Golden State, kabilang ang impresibong 20 3-pointers.
Sa unang bahagi ng laban, nagawa pa ng Knicks na lumamang ng hanggang 17 points ngunit mabilis din itong nahabol ng Golden State.
Dahil sa panalo, hawak na ng Golden State ang 23-19 win-loss record, habang 25-15 naman ang kartada ng Knicks.
Alex Eala makakaharap si Parks ng US sa first round ng Australian Open
INILABAS na ng Australian Open ang mga makakaharap ng mga manlalaro sa nasabing torneo.
Kabilang na dito si Pinay tennis star Alex Eala na nakatakdang makaharap nito sa first round ng torneo si Alycia Parks ng US.
Ito ang unang pagtatagpo ni Pinay ranked 49 na si Eala laban kay WTA number 100 na si Parks.
Ang 25-anyos na si Parks ay nakakuha ng career-high ranking ng World number 40 noong Agosto 2023 ng magwagi ito sa 2023 Lyon Open.
Mayroon record din ito na pinakamabilis na mag-serve kung saan katapat niya si Venus Williams na mayroong bilis na 129 miles per hour.
Ang Australian Open ay siyang unang Grand Slam tournanament na lalahukan ni Eala.
Magsisimula ang Australian Open mula Enero 18 hanggang Pebrero 1.
ICI, walang kakayahan na ipagpatuloy ang operasyon matapos ang pagbibitiw sa tungkulin ng dalawang commissioners
SINABI ng Independent Commission for Infrastructure (ICI) na hindi nitong magawang ipagpatuloy ang opisyal na operasyon kasunod ng pagbibitiw ng dalawang Commissioner.
Nagbitiw na kasi sa puwesto bilang mga ICI members sina dating Department Of Public Works And Highways (DPWH) Secretary Rogelio Singson at Rosanna Fajardo at ang naiwan na lamang sa komisyon ay si ICI chairperson Justice Andres Reyes.
Sinabi ng ICI na itinakda ng Executive Order No. 94 na ang komisyon ay binubuo ng chairperson at dalawang miyembro.
“As a collegial body, the ICI may take official action only with the approval of a majority of its members,” ang sinabi ng ICI.
“Consequently, following the resignation of its two commissioners, the Commission is unable to resume its official operations until a quorum is restored,” dagdag na pahayag ng ICI.
Mismong si ICI chairman Andres Reyes Jr. ang nag-anunsiyo ng pagbibitiw ni Singson mula sa ICI dahil sa kanyang edad at ang stressful na trabaho sa ICI habang si Fajardo naman ay sa dahilang tapos na ang kanyang tungkulin.
“We haven’t really decided on that yet. Again, it all depends on the work that ICI still has in front of them. Pag kailangan pa, then we will. But if the work is done, kung naibigay na lahat ng information sa DOJ tsaka sa Ombudsman, then the focus now of the investigation will go to the DOJ and the Ombudsman,” ang pahayag naman ni Pangulong Marcos
Nauna nang sinabi ni ICI special adviser Rodolfo Azurin Jr. na hindi magawa ng ICI ng anumang referrals dahil sa kakulangan ng mga komisyonado.
“In the meantime, the Commission continues to process, organize, document, and safeguard all records and evidence in its custody,” ayon sa ICI.
Sinabi ng ICI, nakapaghain na ito ng walong referrals sa Office of the Ombudsman, hindi kasama ang joint referrals sa Department of Public Works and Highways, laban sa 100 indibiduwal. ( DARIS JOSE)
Tiangco sa members ng House of Representatives; “Manalamin muna kami bago kami humusga ng iba.”
HINIKAYAT ni Navotas Representative Toby Tiangco ang mga miyembro ng House of Representatives na linisin muna ang kanilang hanay para magkaroon ng moral authority sa impeachment proceedings.
“Manalamin muna kami bago kami humusga ng iba. How can the defenders of Martin Romualdez and Zaldy Co posses the moral authority if kasama sila sa katiwalian o ayaw man lang nilang magsalita tungkol sa katiwalian dati sa House? Hindi ba’t ang dami pa ring tumatawag sa amin na House of Crocodiles?” ani Tiangco.
“I am totally for accountability. Pero wag naman tayong ipokrito, at lalong wag mag-bato ng putik sa iba para lumabas na malinis. Manalamin ka muna bago mo punahin ang iba,” dagdag niya.
Nilinaw ni Tiangco na hindi siya nagbibigay ng mga kundisyon para sa pagsama niya sa impeachment complaints.
Sa halip, binibigyang-diin niya ang pangangailangang tiyakin na ang mga sangkot sa pinakamalaking iskandalo sa badyet at imprastraktura sa kasaysayan ng Pilipinas ay mananagot at ang isyu ay hindi maibabalik sa back burner.
“I’ve been very clear from the start. No one is exempt from accountability. Panagutin natin ang dapat panagutin. Kaya nga ang panawagan natin, huwag kalimutan ang issue ng maanomalyang pagbenta ng insertions sa 2023 hanggang 2025 budget at ang flood control scam,” aniya.
Sinabi pa niya, “Hindi ba’t may mga nagsasabi, bakit yung nagnakaw ng bigas at sardinas kulong agad pero may due process pag milyon ang ninakaw? By using the same analogy, bakit yung trilyon anomalya nung panahanon ni former Speaker Martin Romualdez at House Appropriations Chairman Zaldy Co parang walang nagsasalita, pero sa P140M grabe ang ingay,”.
Ikinalungkot ni Tiangco ang katotohanan na mula nang palitan ni Rep. Faustino “Bojie” Dy III si Rep. Romualdez bilang speaker ng Kamara, isang malaking posisyon sa pamumuno lamang ang nagbago at lahat ng iba pang posisyon sa pamumuno sa ilalim ni Romualdez ay napanatili.
Hinimok din niya ang kanyang mga kasamahan na magsalita tungkol sa mga anomalya sa Kamara para makuha ang moral ascendancy sa impeachment proceedings.
“Bakit mas maingay pa ang marami laban kay VP Sara, pero tahimik o hindi kasing-ingay pag dating kay Martin Romualdez at kay Zaldy Co? Pati mga sangkot sa mga anomalya sa House nakapirma sa nakaraang impeachment complaint,” giit ni Tiangco. (Richard Mesa)
Batangas Rep. Leviste, nagsampa ng libel case vs Usec. Claire Castro; PCO official, bumuwelta
NAGSAMPA ng P110 milyong libel case si Batangas First District Rep. Leandro Leviste laban kay Presidential Communications Undersecretary Claire Castro.
Ayon kay Leviste, isinampa niya ang kaso dahil umano sa mga “libelous statements” ni Castro hinggil sa kanyang solar business.
Nilinaw ni Leviste na wala siyang kumpanyang may prangkisa na ibinenta. Ang kanyang ibinenta ay isang kumpanyang walang prangkisa.
Dagdag pa niya, hindi niya intensyon na saktan si Usec. Castro, ngunit kailangan niyang ipagtanggol ang kanyang pangalan dahil ilang beses na umanong naglabas ng vlog si Castro laban sa kanya.
Ito rin umano ang naging payo ng kanyang abogado na si Atty. Ferdinand Topacio, at aniya, pinagpaplanuhan pa ang iba pang legal na hakbang kaugnay nito.
“Gusto ko pong linawin sa inyong lahat, wala akong binentang prangkisa,” ani Leviste.
Dagdag naman ni Atty. Topacio, hindi nila layong ipakulong si Usec. Castro kundi panagutin ito dahil umano sa maling pahayag na ginawa.
Aniya, mahalagang maipagtanggol ang pangalan at reputasyon ng kanyang kliyente na si Leviste na sinira umano ni Castro “with malice.”
Giit pa ni Topacio, ito ay isang targeted attack laban kay Rep. Leviste at hindi simpleng usapin ng Freedom of Expression.
Samantala, nagpahayag naman si Presidential Communications Undersecretary Claire Castro kaugnay ng kasong libel na isinampa laban sa kanya ni Batangas First District Rep. Leandro Leviste. Ayon kay Castro, hindi pa niya natatanggap ang kopya ng reklamo ngunit tumugon siya batay sa naging panayam kay Leviste.
Binanggit ni Castro na mismong si Leviste ang nagsabi sa isang interview na ang pinagmulan ng impormasyon hinggil sa umano’y pagbebenta ng kumpanyang may prangkisa ay mula kay Ombudsman Remulla, ngunit hindi ito kinasuhan dahil sa personal na paggalang at ugnayan ng kanilang pamilya.
“Pero ang response ko sa ngayon ay ayon lamang muna sa kanyang interview. Inamin ni Cong. Leviste sa isang interview na ang source ng di umano’y pagbebenta ng company na may franchise ay galing kay Ombudsman Remulla. Pero hindi niya sasampahan ng kaso ang Ombudsman dahil sa ginagalang niya ito at kaibigan ng nanay niya,” wika ni Castro.
Tinuligsa ni Castro ang umano’y double standard ni Leviste, na handang kasuhan siya ngunit hindi ang Ombudsman. Giit niya, kung may batayan ang pahayag ng Ombudsman, bakit ang kanyang mga pahayag na mula rin sa parehong source ay itinuturing na libelous.
Dagdag pa ni Castro, inamin mismo ni Leviste na hindi na siya ang may-ari ng Solar Para sa Bayan, ang kumpanyang may prangkisa, dahil naibenta na niya ang kanyang shares.
Ayon kay Castro, malinaw na si Leviste mismo ang naging pinagmulan ng impormasyon. Aniya, ang pagsasampa ng kaso ay paraan lamang upang siya ay patahimikin at pigilan sa pagtatalakay ng mga isyu.
Binigyang-diin pa niya ang tanong kung sino ang tunay na nasa likod ng kaso, sino ang nais na busalan ang kanyang bibig, at sino ang makikinabang sa hakbang na ito. Sa huli, sinabi ni Castro na mas makabubuting ituon ni Leviste ang pansin sa mga isyung inilabas ng Department of Energy laban sa Solar PH at sa multang ipinataw dito. ( Daris Jose)
Para matiyak na walang akusado ang makalalabas ng bansa… Airports, seaports bantay sarado vs Atong Ang- PNP
BANTAY sarado na ang lahat ng airports at seaports sa bansa laban sa posibilidad ng paglabas ng bansa ng negosyanteng si Charlie “Atong” Ang kaugnay ng kaso ng missing sabungeros.
Ayon kay PNP Acting Chief PLtGen. Jose Melencio Nartatez, Jr., bukod sa pinaigting na koordinasyon sa immigration authorities, inilunsad din ang mga dedicated tracker team at intelligence units para matiyak na walang akusado ang makalalabas ng bansa habang may nakabinbing mga warrant of arrest.
Ani Nartatez, mas makabubuti kay Ang na sumuko na lamang dahil hindi mangingimi ang PNP na ipatupad ang pagsisilbi ng warrant of arrest.
Sa kabuuan, may 18 akusado sa kaso: 10 pulis, isang dating pulis (dismissed), at walong sibilyan, kabilang si Ang.
Naglabas ang Regional Trial Court ng Sta. Cruz, Laguna ng warrant of arrest laban kay Ang at sa ilan pang sangkot kaugnay ng pagkawala ng ilang sabungero. Si Ang ay nahaharap sa 15 bilang ng kidnapping at serious illegal detention, at apat na bilang ng kidnapping with homicide. ( Richard Mesa)
Panibagong warrant of arrest, inilabas kay Atong Ang
KINUMPIRMA ng Department of Justice (DOJ) ang pagpapalabas ng panibagong warrant of arrest ng korte sa Batangas laban sa negosyanteng si Atong Ang at iba pa na sangkot sa missing sabungeros.
Ayon kay Prosecutor General Richard Anthony Fadullon , base sa kopya ng warrant of arrest ng Lipa City Regional Trial Court Branch 13 , na pirmado ni Presiding Judge Pamela Torres Chavez Izon, nahaharap si Ang sa 6 counts ng kidnapping with homicide.
Wala ring inirekomendang piyansa o non- bailable ang kaso na isinampa laban sa kanya para sana sa kanyang pansamantalang paglaya.
Nitong Huwebes sinabi ng DOJ na maituturing nang pugante si Atong Ang dahil hanggang ngayon ay hindi pa nasisilbi ang kanyang arrest warrant dahil hindi pa rin matunton ang kanyang kinaroroonan at hindi pa sumusuko at naaresto ng mga awtoridad.
Unang inisyuhan ng arrest warrant si Atong Ang ng RTC Branch 26 ng Sta.Cruz, Laguna kasama ang iba pang sangkot sa nawawalang mga sabungeros sa kasong kidnapping with homicide at kidnapping and serious illegal detention . (Gene Adsuara)
Pulis binentahan, tulak timbog sa drug bust sa Valenzuela
HINDI inakala ng isang umano’y tulak ng iligal na droga na pulis na pala ang kanyang nabintahan ng shabu matapos maaresto sa isinagawang buy bust operation sa Valenzuela City, Biyernes ng umaga.
Sa kanyang ulat kay Valenzuela Police Chief P/Col. Joseph Talento, kinilala ni Station Drug Enforcement Unit (SDEU) chief P/Lt. Sherwin Dascil ang suspek na si alyas “Ody”, 40, ng Brgy. Paso De Blas.
Ayon kay Lt. Dascil, nakatanggap sila ng impormasyon hinggil sa umano’y pagbebenta ng shabu ng suspek kaya kaagad siyang bumuo ng team bago ikinasa ang buy bust operation sa koordinasyon sa PDEA.
Dakong alas-8:30 ng umaga nang makipagkita ang suspek sakay ng isang motorsiklo at makipagtransaksyon umano sa isa sa mga operatiba ng SDEU na nagpanggap na buyer sa gilid ng Paso De Blas Chapel, sa E. Miranda St., Brgy. Paso De Blas na nagresulta sa pagkakaaresto sa kanya.
Nakumpiska sa kanya ang humigi’t kumulang 5 gramo ng hinihinalang shabu na nagkakahalaga ng P34,000, buy bust money na isang tunay na P500 bill at isang P1000 boodle money, P150 cash at gamit niyang motorsiklo.
Ayon kay P/MSg. Ana Liza Antonio, mahaharap ang suspek sa kasong paglabag sa Sections 5 at 11 ng RA 9165 o ang Comprehensive Dangerous Drug Act of 2002.
Pinuri naman ni Northern Police District (NPD) District Director P/BGen. Christopher Dela Cruz ang arresting team sa kanilang dedikasyon at pagsisikap para mapigilan ang pagkalat ng droga sa lungsod.
(Richard Mesa)