MULING nagmarka ang University of Caloocan City – College of Law (UCC-COL) sa Philippine Bar Examinations nang makamit nito ang 72.73 porsyentong passing rate sa 2025 Bar Exams, na mas mataas sa pambansang average na 48.98 porsyento.
Umabot sa 16 bagong abogado mula sa UCC-COL ang nakapasa ngayon, pinakamataas na bilang sa medyo batang kasaysayan nito bilang isang institusyon ng edukasyong legal at lalong nagpapatunay sa patuloy nitong mahusay na pagganap sa itinuturing na isa sa pinakamahirap na licensure exams sa bansa.
Binati ni City Mayor Dale Gonzalo “Along” Malapitan ang mga bagong abogado at itinuring ang kanilang tagumpay at ang mataas na passing rate ng UCC sa Bar Exams bilang isang ipinagmamalaki ng buong lungsod.
“Congratulations to our new UCCian lawyers! Pinasasalamatan at binabati rin natin ang buong UCC-COL sa pagkakamit ng 72.73% overall passing rate at sa inyong patuloy na paghubog sa mga mag-aaral upang maging mahuhusay na abogado,” ani Mayor Along.
“Sa ating mga bagong abogado, patunay kayo ng sipag, talino, at determinasyon ng Batang Kankaloo. Nawa’y gamitin ninyo ang inyong kaalaman at kakayahan sa pagseserbisyo nang tapat at may integridad para sa bayan,” dagdag niya. (Richard Mesa)

KAPAG ang isang aktibong opisyal ng militar tulad ni Audie A. Mongao ay hayagang nagbawi ng personal na suporta sa Pangulong Ferdinand Marcos Jr., hindi ito simpleng usapin ng malayang pagpapahayag. Ito ay usapin ng posisyon at pananagutan.
“Sa isang demokrasya, karapatan ng mga sibilyan ang tumutol,” ani Chairman Emeritus Dr. Jose Antonio Goitia.
“Ngunit kapag ikaw ay naka-uniporme, mas makitid ang espasyong ginagalawan mo. Iyon ang presyo ng disiplina.”
Hindi ito teknikalidad. Ang malinaw na hangganang ito ang nagpoprotekta sa republika laban sa kaguluhang nagsisimula kapag inuuna ang personal na opinyon kaysa tungkulin.
May mga pahayag na hindi hiwalay sa kanilang timing. Noong Enero 9, binawi ni Colonel Mongao ang kanyang suporta sa Pangulo. Dalawang araw lamang ang pagitan mula sa mass oath-taking ng mga bagong heneral noong Enero 7, kung saan hindi siya kabilang. Sa ganitong pagkakasunod, natural lamang na magtanong: ito ba ay prinsipyo, o personal na hinanakit?
Ang kapangyarihan ng Pangulo bilang Commander in Chief ay hindi nakabatay sa personal na pagsang-ayon ng sinumang opisyal, anuman ang ranggo o haba ng serbisyo. Ito ay nagmumula sa Saligang Batas at sa soberanong mandato ng sambayanang Pilipino.
“Ang moral na kapangyarihan ay hindi inaangkin,” wika ni Goitia. “Ito ay ibinibigay ng batas, inaalagaan ng mga institusyon, at hinahatulan ng kasaysayan.”
Kapag ang personal na saloobin ay inilalagay bilang moral na pamantayan laban sa sibilyang pamahalaan, nasisira ang balangkas ng Konstitusyon na sinumpaang pangalagaan ng sandatahang lakas.
Ang tugon ng pamunuan ng militar ay malinaw at may pagpipigil. Kinumpirma ni Michael G. Logico, Commander ng Training Command, na si Colonel Mongao ay pansamantalang inalis sa kanyang puwesto habang iniimbestigahan, kaugnay ng posibleng pananagutang administratibo at legal sa kanyang pahayag online.
Kasabay nito, nilinaw na patuloy ang pakikipag-ugnayan sa opisyal at ang pagbibigay ng kinakailangang emosyonal na suporta.
“Lakas ng Sandatahang Lakas ang mahigpit na tuntunin na ipinatutupad nang walang palabas,” ani Goitia. “Magkasabay na tungkulin ng pamunuan ang pananagutan at malasakit.”
Sa kasalukuyang administrasyon, nananatiling tahimik ngunit propesyonal ang Armed Forces of the Philippines, hindi kumakampi sa alinmang panig, at nananatiling tapat sa Konstitusyon. Hindi ginagamit ang command para sa pulitika, at hindi ginagawang simbolo ng pansariling interes ang uniporme.
“Mga katotohanan ito,” wika ni Goitia.
“At hindi ito anyo ng isang institusyong nawalan ng moral na paninindigan.”
Kapag ang mga sundalo ay nahila sa pulitika, ang unang nasasakripisyo ay ang tiwala ng mamamayan sa isang institusyong inaasahang manatiling neutral sa usaping pulitikal.
Hindi na bago ang aral ng kasaysayan. Kapag ang disiplina sa loob ng hanay ay napapalitan ng pansariling interes o pagpapapansin, ang katatagan ng republika ang unang naaapektuhan.
“Ang uniporme ay hindi entablado,” giit ni Goitia. “Ito ay pananagutan.”
Maaaring punahin ang pamahalaan sa sibilyang espasyo. Ngunit kapag ang militar ay nagsalita sa pulitika, nawawala ang linaw ng hangganan at ang tiwala ng bayan.
Hindi ingay ang kailangan ngayon. Ang kailangan ay tahimik na linaw ng isip at paninindigang hindi natitinag.
Matibay ang bansa kapag ang bawat institusyon ay nananatili sa papel na itinakda ng Saligang Batas.
“Diyan nagmumula ang tibay ng ating demokrasya,” pagtatapos ni Goitia, “hindi sa pagsuway, kundi sa disiplina.”
(Richard Mesa)

MULING nagsagawa ng Libreng Pneumonia Vaccine na handog ni Bokal Angelica Jones Alarva sa Bayan ng Rizal Laguna para sa mga nakayatanda noong ika- 9 ng Enero, 2026, sa RHU Rizal Laguna.

Ito ay pinangunahan ng butihing Board Member ng Ikatlong Distrito ng Laguna na si Bokal Angelica Jones Alarva katuwang ang Pamahalaan Bayan ng Rizal Laguna sa Pangunguna ni Mayor Vener Munoz, at kinatawan nito na si Admin Chris Esleta.

Labis ang pasasalamat ni Bokal Angelica sa mga naging katuwang nila tulad ni Philippine Charity Sweepstakes Office Director Imelda Papin, Gobernadora Sol Aragones, Ina ng Lalawigan ng Laguna, Congressman Loreto “Amben” Amante, Kongresista ng Ikatlong Distrito ng Laguna.

Kasama ang buong medical team na ipinadala ni Gobernadora Sol Aragones na sina Dra.Grethel, Dra. Malapitan, Dra. Heny, Dr. James Lee Ho, at Dr. Audie Public Affairs, Life Saver, Turkz at 2World.

Dahil sa birthday month ng nasabing Bokal ay magkakaroon nang malakihang Medical and Dental Mission katuwang ang Pamahalaang Bayan ng Calauan at ng PCSO at ni Congressman Amben Amante sa darating na Enero 18, 2026 sa Lamot 2, Calauan Laguna.
(Jeremiah Solomon/ Photos Boy Morales Sr.)

PINASINAYAAN ang dalawang palapag na Bagong Gusaling Modernong Pampublikong Paaralan ng Padre Garcia Central School na isinagawa ika-8 ng Enero, 2026 sa nasabing eskwelahan.
Ito ay pinangunahan ng Pamahalaang Bayan sa pamumuno ni Mayor Celsa B. Rivera kasama si Vice Mayor Micko Rivera sa nasabing seremonya ng ribbon cutting kasama sina Bb.Marites Ibañez, CESO V at miyembro ng Sangguniang Bayan na sinundan ng pagbebendisyon ng buong gusali sa pangunguna ni Rev. Fr. Royger Ballaran, OSJ.

Dumalo rin sa nasabing programa ang mga guro, school heads, at ilang PTA Officers ng paaralan.
Sa ginanap na maikling programa ay ipinangako ng Bise Alkalde na si Vice Mayor Micko Angelo Rivera para sa mga l mamamayan at SB Committee Chair on Education, na hindi siya titigil sa pagkalap ng pondo upang patuloy na mapunan ang pangangailangang pang-edukasyon ng mga kabataan.
“Only in Padre Garcia!” saad ni Ma’am Marites Ibañez, CESO V, Schools Division Superintendent, na hindi naitago ang pagkamangha sa malalaking proyektong nagsusulputan sa munti ngunit kasiya-siya at kahanga-hangang bayan.
Labis ang pasasalamat ng Pamahalaang Bayan ng Padre Garcia sa Pamumuno ng ina ng Bayan na si Mayor Celsa B. Rivera Sa tulong ni Senator JV Ejercito para maisagawa ang nasabing proyekto para sa mga mag-aaral ng mga Garciano.
(Yvonne Bagang/ Photos Boy Morales Sr.)