PROPAGANDA na tinawag na “Rescue” noong Disyembre 26, inilabas ng Embahada ng Tsina sa Maynila ang ulat hinggil sa umano’y pagbibigay ng pagkain at tubig ng isang barko ng People’s Liberation Army Navy sa isang mangingisdang Pilipino, kasabay ng pahayag na may koordinasyon umano ito sa panig ng Pilipinas. Ipinresenta ito bilang makataong hakbang, ngunit malinaw na layunin nitong gawing katanggap-tanggap ang presensyang walang legal na batayan.
“Hindi ito usapin ng simpleng pagtulong,” ayon kay Chairman Emeritus Dr. Jose Antonio Goitia. “Ito ay pagtatangkang baguhin ang naratibo upang tabunan ang matagal nang rekord ng pananakot at panghihimasok.”
Nilinaw ng Philippine Coast Guard, sa pamamagitan ni PCG Commodore Jay Tarriela, na walang anumang paunang abiso mula sa People’s Liberation Army Navy. Hindi rin palutang-lutang nang tatlong araw ang mangingisda; siya ay nakadaong sa payao at narekober sa loob ng wala pang 24 oras.
Pinakamahalaga, naganap ang insidente sa loob ng Exclusive Economic Zone ng Pilipinas sa Zambales, kung saan walang legal na batayan ang People’s Liberation Army Navy upang mag-operate.
“Kung walang hurisdiksyon, ang presensya ay paglabag,” diin ni Goitia. “Kahit pa ito’y balutan ng makataong pananalita.”
Kinikilala ng Pilipinas ang makataong pagtulong, ngunit hindi ito maaaring gawing pahintulot sa iligal na presensya.
Sa ilalim ng United Nations Convention on the Law of the Sea at ng 2016 Arbitral Award, malinaw ang karapatan ng Pilipinas. Ang pag-amin sa isang makataong hakbang ay hindi nangangahulugang pagbura sa patuloy na panggigipit sa West Philippine Sea.
“Ang kabutihan ay hindi kapalit ng soberanya,” ani Goitia. Sa ilalim ng pamumuno ni Pangulong Ferdinand Marcos Jr., malinaw ang tugon ng Pilipinas: batas at ebidensya, hindi propaganda. Sa halip na makipagpalitan ng ingay, inilalatag ng pamahalaan ang datos, oras, at malinaw na legal na batayan.
“Hindi kailangang mag-ingay kapag malinaw ang katotohanan,” ani Goitia. Sa West Philippine Sea, hindi na ito simpleng usapin ng galaw ng mga barko. Isa itong tunggalian ng katotohanan at manipulasyon. At sa tunggaliang ito, kailangang manatiling malinaw ang isip, nagkakaisa ang bayan at matatag ang tindig ng Pilipinas.
Sinabi pa niya na sa ilalim ng pamumuno ni Pangulong Marcos Jr., malinaw na iginuhit ang linyang ito. Pinili ng bansa ang tahimik ngunit matatag na pagtatanggol sa karapatan nito—nakaugat sa batas, ebidensya, at dignidad ng sambayanan.
“Hindi props ang ating karagatan,” pagtatapos ni Goitia. “Ito ay bahagi ng Republika at ipagtatanggol bilang ganoon.” (Richard Mesa)

ITINANGGI ni House Appropriations Committee Chairperson at Nueva Ecija Rep. Mikaela Suansing ang pahiwatig na may insentibo na inalok sa mga mambabatas na boboto para sa ratipikasyon ng 2026 General Appropriations Bill, na inaprubahan ng Bicameral Conference Committee.

“Hindi po ini-impluwensiyahan ng House leadership ang sinumang indibidwal na miyembro ng Kamara na bumoto ng kung paanong paraan,” ani Suansing.

Ayon sa Kongresista, nananatili ang polisiya ng liderato ng Kamara at prinsipyong libreng makaboto ang bawat mambabatas sa mga panukalang batas na napili nilang suportahan o hindi.

“The House of Representatives is a collegial body. We respect each member to have the freedom to vote and to decide based on the needs of their constituents and their conscience,” diin ni Suansing.

Ilang reporma ang pinasimulan ng para gawing mas transparent ang proseso ng budget at mas accountable ang mga mambabatas sa national budget.

Kabilang sa reporma ang pagbuo ng Budget Amendment and Review Sub-Committee (BARSc) para palitan ang small committee na tutugma sa senate counterparts sa bicameral conference committee.

Nagsagawa rin ng konsultasyon sa kaukulang civil society organizations kaugnay sa budget.

Sa pamamagitan ng mga nasabing inisyatibo, nabusisi nang husto ang national budget.

Ang BARSc ay nagdagdag ng 20 oras para rebyuhin ang panukalang general appropriations bill bago ito isinumite sa plenaryo.

Nagkasundo ang dalawang kapulungan ng kongreso para s a pagsasagawa ng kauna-unahang bicameral conference committee meeting na bukas sa publiko ng livestream sa online platforms ng Kamara at Senado.

Natapos ng Bicameral Conference Committee ang trabaho para ayusin ang pagkakaiba sa bersiyon ng Kamara at senado sa GAB nitong Linggo ng lagdaan ng bicam members ang Committee report. (Vina de Guzman)

SA loob na ng selda magdiriwang ng Bagong Taon ang dalawang lalaki matapos mahuli sa akto ng pulisya na sumisinghot umano ng shabu sa Valenzuela City.
Kinilala ni Valenzuela police chief P/Col. Joseph Talento ang mga suspek na sina alyas “Erwin”, 30, at alyas “Kervin”, 22, kapawa ng Morning Ville, Brgy., Canumay West.
Batay sa ulat, nakatanggap ng SMS complaint mula sa isang concerned citizen Station Drug Enforcement Unit (SDEU) sa ilalim ng pangangasiwa ni P/Lt. Sherwin Dascil na sangkot umano sa illegal drug activities ang mga suspek.
Kaagad nagdispatch si Lt. Dascil ng kanyang mga tauhan sa nasabing lugar at naaktuhan ng mga ito ang mga suspek na sumisinghot umano ng shabu sa loob ng kanilang bahay dakong 1:00 ng madaling araw.
Hindi na nakapalag ang mga suspek nang dambahin ng mga tauhan ni Lt. Dascil at nasamsam sa kanila ang isang plastic sachet na naglalaman ng hinihinalang shabu, isang unsealed plastic sachet na may bahid ng umano’y shabu at drug paraphernalias.
Ayon kay SDEU investigator PSSg Cris Paul Collo, mahaharap ang mga suspek sa kasong paglabag sa R.A 9165 o ang Comprehensive Dangerous Drug Act of 2002.
Pinuri naman ni Northern Police District (NPD) District Director P/BGen. Christopher Dela Cruz ang arresting team sa kanilang kasipagan at propesyonalismo na binigyang-diin ang matibay na pangako ay nagpapalakas ng tiwala ng publiko at nakakatulong sa epektibong pag-iwas sa krimen. Hinimok din niya ang mga tauhan ng NPD na panatilihin ang antas ng pagganap at patuloy na maglingkod sa komunidad nang may kahusayan. (Richard Mesa)