PINANGUNAHAN nina Mayor Dale Gonzalo “Along” Malapitan at Senador Loren Legarda ng Caloocan City ang ika-162 paggunita sa anibersaryo ng kapanganakan ng dakilang Andres Bonifacio nitong Nobyembre 30, 2025 sa makasaysayang Lungsod ng Caloocan.

Ang pagdiriwang sa Bonifacio Monument ay may temang “Isang Bayan, Isang Laban: Katapatan at Katarungan Kontra Katiwalian.”

Sa kanyang mensahe, binigyang-diin ni Mayor Along ang kahalagahan ng pamumuhay ayon sa halimbawa ni Bonifacio sa pagtataguyod ng integridad, hustisya, at paggamit ng kolektibong kapangyarihan ng mga mamamayang Pilipino sa paglaban sa korapsyon sa bansa.
Inihalintulad ng alkalde ang patuloy na pakikipaglaban ng Pilipinas sa korapsyon sa pakikibaka ng mga bayani para sa kalayaan noong nakaraan.
“Sa kasalukuyan, batid natin na may bagong laban na kinahaharap ang mga Pilipino na nagbabantang muli tayong isailalim sa opresyon—ang pananamantala at katiwalian na patuloy nating nararanasan sa ating lipunan,” pahayag niya.
Hinimok din ni Mayor Along ang lahat ng mga lingkod-bayan, pati na rin ang mga ordinaryong Pilipino na patuloy na ipakita ang kanilang pagmamahal at pangangalaga sa kanilang bansa, kahit sa pamamagitan ng tila maliliit na gawain upang protektahan ang bansa at ang mga mamamayan nito.
“Ang paglaban sa katiwalian ay isang tungkulin na dapat isinabubuhay, hindi lamang ng mga lingkod bayan, kundi ng bawat Pilipino,” aniya. “Simulan po natin ito sa pagmamalasakit sa ating kapwa at kapaligiran. Maging responsable po tayong mga Pilipino. At patuloy po tayong manindigan na walang puwang ang katiwalian at korapsyon, sa ating lungsod at sa ating bansa.”
“Hindi po natin kailangang humawak ng bolo o gumamit ng dahas upang buhayin ang diwa ng himagsikan. Sa laban na ito, katapatan ang ating magiging sandata, katarungan ang ating magiging kalasag, at ang ating pagkakaisa ang ating magiging lakas,” dagdag ng alkalde.
Dumalo rin sa kaganapan sina Caloocan City 1st District Representative Oscar “Oca” Malapitan, Caloocan City 2nd District Representative Edgar “Egay” Erice, Caloocan City 3rd District Representative Dean Asistio, Caloocan City Vice Mayor Karina Teh-Limsico, National Historical Commission of the Philippines Chairperson Regalado Trota Jose Jr., at Atty. Arsenio Bonifacio, apo ng bayani. (Richard Mesa)

OPISYAL na binuksan nina Navotas City Mayor John Rey Tiangco at Metropolitan Manila Development Authority (MMDA) Chairman Romando Artes ang Navotas Green Zone Park Phase 4, kasunod ng pagpapasinaya nito na ginanap sa R-10, Brgy. North Bay Boulevard North.
Ang Navotas Green Zone Park, ay bahagi ng Adopt-a-Park Program ng MMDA na dating hindi gaanong nagagamit na bahagi ng kalsada tungo sa isang landscaped paraiso na may mga walkway, bukas na lugar para sa libangan, at mga luntiang lugar — isa pang hakbang tungo sa paglikha ng mga matitirhan at maginhawang espasyo sa siksik na urban landscape ng lungsod.
Para sa maraming residente, ang bagong park ay may espesyal na kahalagahan. Nakatayo sa isang siksik na komunidad kung saan kakaunti ang mga bukas na espasyo, ang Green Zone Park ay mabilis na naging isang kaakit-akit na lugar para sa mga pamilya, nakatatanda, at mga bata.
“Napakaganda ng proyektong ito sa ating lungsod,” pagbabahagi ni Catalina Dela Rosa, 69, matagal ng naninirahan sa North Bay Boulevard North. “Dati, puro tambak ng basura ang narito. Ngayon, may mapupuntahan kami para magpahinga. Masarap sa pakiramdam na may ganitong lugar para sa mga matatanda at bata.”
Pinangunahan nina Mayor Tiangco at Atty. Artes ang seremonya, na nagtatampok sa patuloy na pagpapalawak ng network ng mga bukas na pampublikong espasyo ng Navotas. Ang pagpapaunlad ng Phase 1, 2, at 3, na natapos noong 2021, 2022, at 2023, ayon sa pagkakabanggit, ay unti-unting nakapagtayo ng isang konektadong berdeng koridor sa isa sa mga pangunahing kalsada ng lungsod, na ginagawang isang kaaya-ayang karagdagan ang Phase 4 sa lumalaking kadena ng mga parke ng komunidad.
Binigyang-diin ni Mayor Tiangco ang mga pag-asa ng lungsod kung paano gagamitin at aalagaan ng mga residente ang bagong espasyo. “Gusto natin na maging lugar ito kung saan pwedeng mag-relax, magpahinga, at mag-exercise ang bawat Navoteño kahit gaano pa tayo ka-busy sa araw-araw,” ani Tiangco.
“Nagpapasalamat tayo sa MMDA sa patuloy nilang suporta at pakikipagtulungan para maging mas livable at mas environmentally resilient ang ating komunidad. Hinihiling din natin sa lahat na alagaan ang park na ito at ituring na parang extension ng ating sariling mga tahanan,” dagdag niya.
Dumalo rin sa seremonya ang mga miyembro ng Konseho ng Lungsod ng Navotas; mga opisyal ng barangay; at iba pang mga opisyal ng MMDA.
(Richard Mesa)

KASABAY ng pangako ni Mayor Jeannie Sandoval sa pagpapanatili at katatagan sa klima, nakiisa ang Pamahalaang Lungsod ng Malabon sa national at local na leaders sa pagsuporta sa mga pangunahing inisyatibo sa kapaligiran sa ginanap na Climate Convergence: Innovation, Leadership, and Advocacy Forum sa University of Makati (UMak).
Inorganisa ng Climate Change Commission (CCC) sa ilalim ng Tanggapan ng Pangulo bilang pagdiriwang ng Climate Change Week 2025, tinipon ng forum ang government officials, student leaders, climate advocates, at mga kinatawan mula sa iba’t ibang institusyong akademiko upang palakasin ang pagkilos tungo sa isang mas malinis at mas luntiang Pilipinas.
Itinampok ng kaganapan na isinagawa sa UMak Performing Arts Theater ang ibinahagi na responsibilidad ng mga komunidad at institusyon sa pagtugon sa climate crisis sa pamamagitan ng inobasyon, matibay na pamumuno, at inklusibong paggawa ng patakaran.
Isang mahalagang bahagi ng programa ang pagtatalaga ng mga bagong miyembro ng Climate Change Task Force at ng ASEAN Carbon Market Sustainability Council—na nagmamarka ng isang mahalagang hakbang sa pagpapabuti ng pambansang pamamahala sa klima at pagsusulong ng mga pakikipagsosyo sa kapaligiran sa rehiyon.
Binigyang-diin din ng kaganapan ang mahalagang papel ng mga institusyong pang-edukasyon sa paghubog ng mga mamamayang may kamalayan sa kapaligiran at matatag sa klima.
Muling pinagtibay ni Mayor Jeannie Sandoval ang pangako ng Malabon na suportahan ang mga pambansang inisyatibo sa klima, palawakin ang mga lokal na programa sa kapaligiran, at palakasin ang kultura ng pagpapanatili sa mga Malabueño.
“Ang pangangalaga sa kalikasan ay obligasyon nating lahat—mula pamahalaan, paaralan, hanggang sa bawat tahanan. Patuloy nating isusulong ang mga hakbang para sa mas malinis, mas ligtas, at mas luntiang kinabukasan para sa Malabon at sa buong bansa,” pahayag niya.
Kinilala naman ng CCC, sa pangunguna ni Commissioner Albert Dela Cruz, ang huwarang pamumuno ni Mayor Sandoval bilang pinuno ng Climate Change Task Force – NCR, pinuri ang kanyang walang humpay na suporta para sa mga programang nakasentro sa klima, ang kanyang matibay na pamamahala, at ang kanyang patuloy na pagsuporta sa mga inisyatibo na nagtataguyod ng pangangalaga sa kapaligiran at pag-aangkop sa klima. (Richard Mesa)

MULING pinagtibay ni Pangulong Ferdinand R. Marcos Jr. ang kanyang buong suporta para sa Armed Forces of the Philippines (AFP), pinuri ang walang tigil na pagsisikap para mapangalagaan ang mga komunidad at panatilihin ang kapayapaan sa iba’t ibang panig ng bansa.Inihayag ng Pangulo ang pagtiyak niyang ito sa kanyang naging pagbisita sa Western Mindanao Command (WESMINCOM) sa Zamboanga City, kung saan nakatanggap siya ng security briefing sa pinakabagong developments sa Zamboanga Peninsula at mga kalapit na lugar.Sa kabilang dako, isang video ng pagpupulong ang ibinahagi ng state-run Radio Television Malacañang (RTVM) sa isang Facebook post, araw ng Sabado.Sa nasabing briefing, pinuri naman ng Pangulo ang operational accomplishments ng WESMINCOM, sabay sabing ipagpapatuloy ng kanyang administrasyon na bigyan ng kinakailangang resources at policy support ang AFP para mapanatili ang kasalukuyang ‘peace and order initiatives.’Binigyang diin na ang pagpapalakas sa inter-agency security coordination ay nananatiling prayoridad upang masiguro ang katatagan sa Western Mindanao, na nag-host ng ilang critical security operations dahil sa tuloy-tuloy na banta mula sa mga kriminal at extremist groups.Binigyang diin ang kahalagahan ng pagpapanatili sa high morale sa loob ng military, sinabi na nananatili ang gobyerno sa pangako nito na paghusayin ang kapakanan ng mga tropa, operational capabilities, at overall readiness, ang sinabi ng Presidential Communications Office (PCO).“Ipinahayag din ni PBBM sa mga opisyal at sundalo ang buong suporta at pasasalamat ng pamahalaan sa kanilang patuloy at tapat na serbisyo,” ang sinabi pa rin ng PCO.Biyernes ng gabi, nag-host ang Pangulo ng isang traditional dinner sa Palasyo ng Malakanyang para sa miyembro ng AFP Council of Sergeants Major.Sa nasabing pagtitipon, hinikayat ng Pangulo ang military na manatiling nagkakaisa at nakapokus sa mandato na protektahan ang bansa sa gitna ng pagtatangka na maghasik ng pagkakahati-hati sa pamamagitan ng ‘misinformation at disinformation.’(Daris Jose)

BINUKSAN na sa publiko nina Navotas City Mayor John Rey Tiangco at Metropolitan Manila Development Authority (MMDA) Chairman Romando Artes ang Navotas Green Zone Park Phase 4 na bahagi ng Adopt-a-Park Program ng MMDA, kasunod ng pagpapasinaya nito na ginanap sa R-10, Brgy. North Bay Boulevard North.
(Richard Mesa)