ALINSUNOD sa direktiba ng Department of Transportation (DOTr) Acting Secretary Giovanni Z. Lopez na maging maagap sa pagtugon sa mga hinaing ng lahat ng sektor sa transportasyon, magsasagawa ang Land Transportation Franchising and Regulatory Board (LTFRB) ng pambansang konsultasyon kaugnay ng mga petisyon para sa dagdag-pasahe na inihain ng iba’t ibang grupo ng transportasyon.

Binigyang-diin ni LTFRB Chairperson Atty. Vigor D. Mendoza II na ang lahat ng konsultasyon ay dapat isagawa sa lalong madaling panahon. Inatasan niya ang lahat ng Regional Directors na tiyakin ang pagdalo ng lahat ng kinauukulang sektor, alinsunod sa direktiba ni Pangulong Ferdinand R. Marcos, Jr.

Sa LTFRB Central Office sa Quezon City, nakatakdang idaos ang pampublikong konsultasyon sa Nobyembre 10, 2025, na inaasahang dadaluhan ng iba’t ibang sektor upang magkaroon ng malawak na palitan ng pananaw hinggil sa mga petisyon.

“Naglabas na kami ng Board Resolution para sa pagsasagawa ng public consultation sa Nobyembre 10 dito sa Central Office. Sisiguraduhin naming lahat ng kinauukulang sektor ay makadadalo,” ani Chairperson Mendoza.

“Habang nauunawaan natin ang mga hinaing ng nasa PUV sector dahil talaga namang sunod-sunod ang pagtaas ng presyo ng petrolyo at mga piyesa ng sasakyan, kailangan din nating marinig ang panig ng lahat ng maaapektuhan ng anumang taas-pasahe.”

Ang paglalabas ng Board Resolution ay bunsod ng pagsusuri sa lahat ng nakabinbing mosyon at petisyon, alinsunod sa utos ni Chairperson Mendoza. Batay sa resulta, nakatanggap na ang LTFRB ng ilang petisyon mula sa mga operator ng public utility vehicles (PUVs), partikular na mula sa mga public utility buses (PUBs), public utility jeepneys (PUJs), taxi, at iba pang uri ng transportasyon.

Binigyang-diin ni Chairperson Mendoza ang kahalagahan ng inklusibong proseso:

“Hindi puwede na isang panig lang ang marinig sa usaping ito, at lalong hindi puwede na hindi mabigyan ng pagkakataon ang lahat ng stakeholders na maipahayag ang kanilang opinyon dahil lahat ay magiging apektado ng anumang desisyon sa pagtaas ng pasahe.”

“Mahigpit ang bilin ng ating DOTr Secretary na dapat ay may agarang aksyon sa anumang hinaing na ipinararating ng taumbayan, kaya titiyakin natin na magkakaroon agad ng mabilis na resulta ng public consultation at rekomendasyon ukol dito.”

Inatasan din ni Chairperson Mendoza ang lahat ng Regional Directors na isumite sa kanyang tanggapan ang resulta at rekomendasyon mula sa bawat rehiyon hindi lalampas ng Nobyembre 14.

Sa Nobyembre 17, target ng LTFRB na maisumite ang opisyal na posisyon at rekomendasyon nito sa tanggapan ng DOTr Secretary. (PAUL JOHN REYES)

DALAWANG pahayag ng Ombudsman ang nakakabahala. Una ay ang pahayag na “possible raw na maidemanda si Romualdez ng “GROSS INEXCUSABLE NEGLIGENCE FOR HIS PURPORTED ROLE IN THE APPOINTMENT OF FORMER AKO BICOL REP. ELIZALDY ZALDY CO AS THE HEAD OF THE APPROPRIATION COMMITTEE AND THE LATTER’S CONNECTION TO THE ANOMALOUS FLOOD CONTROL PROJECTS.

Kung mga tuta lang ni Romualdez ang magsasabi ng ganito ay mauunawaan ko. Pero kung galing sa Ombudsman na siyang magpapasya kung sino ang kakasuhan sa husgado at kung anong kaso ang isasampa sa mga kasabwat sa flood control projects ay nakakabahala ito.

Aba’y hindi pa nga nagsisimula ang preliminary investigation may premature declaration na siya! Paano kung sa mga testimony ng mga nirerekomenda ng ICI na kasuhan ay bangitin nila na may kinalaman si Romualdez? Paano kung mismo si Zaldy Co ang magsabi niyan?

Gross negligence pa rin ba? At anong kaso ba yan – Gross Negligence Resulting to Plunder – na yan kung meron mang ganun.

Napakadaling lusutan ni former Speaker yan at sasabihin na anong kapabayaan niya eh buong House of Representatives ang pumayag na si Zaldy Co ang Chairman ng Appropriations. MALAMYA, DI BA?

At heto pa — ayon sa isang Spokesman hindi daw pwede pilitin ang dating Quezon City Congressman na mag “tell all”.

Hindi daw pwede sya i-intimidate or to coerce him.

Aba’y wala naman nagsabi na dapat i-coerce or takutin si Cong para magsalita pero maaaring ma subpoena si ex-Cnong. Mismo si Ombudsman ang nagsabi sa media nyan na may mag te-tell all nga. So bakit hindi niya ipatawag? Wala ba sa kanyang kapangyarihan yun?

Sa Ombudsman Act ( RA NO. 6770) ay maari ma subpoena si ex Cong. Ibig bang sabihin ni Spokesman pag nag-issue ng subpoena sa isang maaaring magbigay ng liwanag sa imbestigasyon ay pananakot na yun? O ayaw na lang nyo dahil baka may masabi si ex Cong na hindi aangkop sa “Gross Negligence” theory na kasong direksyon ng Ombudsman.

At kung sakaling ipagpalagay na natin na may inexcusable Gross Negligence Resulting to Plunder si former Speaker, paano naman yung pumirma ng national budget kung saan nandun ang ang appropriations ng flood control projects? Gross negligence resulting to plunder din ba yun dahil hindi niya gaanong napagaralan ang national budget? ‘Yun nga lang may immunity from suit hangga’t nakaupo siya.

NAKATAKDANG maglunsad ang Department of Public Works and Highways (DPWH) ng malawakang paglilinis sa mga waterways sa National Capital Region (NCR) sa susunod na linggo.

Nabatid na isasagawa ang massive waterways clean up sa Nobyembre 12 upang mabawasan ang mga pagbaha sa Metro Manila.

Sa kanyang pakikipagpulong sa Metro Manila Council (MMC), sinabi ni DPWH Secretary Vince Dizon na maglalaan sila ng P2.14 bilyon mula sa kanilang hindi nagalaw na budget para pondohan ang aktibidad.

Isasagawa aniya ang inisyatiba sa pakikipag-ugnayan sa Metropolitan Manila Development Authority (MMDA), local government units, at mga pribadong kumpanya na nangakong magkakaloob ng heavy equipment at iba pang suporta.

“Hindi na po bago ito. Matagal na po ginagawa ito ng ating mga LGUs at ating MMDA pero ang gusto po ng pangulo in the next almost straight quarters… Eh talagang full force po ang national government, kasama na ang MMDA,” dagdag pa ng DPWH chief.

Aniya, “Lahat po ng area na ma-identify natin ay talagang lilinisin natin, i-ki-clear natin, i-de-dredge natin.”

Dagdag pa ni Dizon, target ng paglilinis na makapagtanggal ng hanggang apat na milyong cubic meters ng basura at banlik sa mga daanang-tubig.