TINULIGSA ni House Assistant Minority Leader at Gabriela Women’s Party Rep. Sarah Elago ang ginawang pagwalang sala ng Sandiganbayan 3rd Division kina dating Chief Presidential Legal Counsel Juan Ponce Enrile, kanyang dating chief of staff Gigi Reyes, at Janet Lim-Napoles mula sa 15 counts ng kasong graft kaugnay sa Priority Development Assistance Fund (PDAF) scam.

“Ito ang mukha ng bulok na hustisya sa Pilipinas—kung sino ang makapangyarihan, siya ang nakakawala,. Twelve years after the PDAF scam, the very same people who plundered public funds are once again walking free,” ani Elago.

Inihalintulad nito ang PDAF scam sa kasalukuyang flood control scam, na kapwa umqno nag ugat sa kaparehong pork barrel corruption na nagpatuloy hanggang sa kasalukuyang administration.

“Walang pinagkaiba ang PDAF scam noon sa flood control scam ngayon—parehong sistema ng katiwalian, parehong uri ng pandarambong,. Ang nakakagalit dito, makalipas lang ang ilang taon, nakakalaya rin ang mga salarin. Ganyan kabagal at kabulok ang sistema ng hustisya sa ating bansa.” anang mambabatas.

Hinikayat naman nito ang publiko na magalit sa pagkaligtas sa parusa na patuloy nannangyayari umano sa justice system, kasabay ng babala sa posibleng pagkakaulit nito sa ibang kaso ng korupsyon.

“Dapat panagutin ang lahat ng mga korap. Hangga’t walang hustisya, asahan ng gobyerno na mas lalaki at lalawak pa ang mga susunod na kilos-protesta ng mamamayan laban sa matinding korapsyon sa ating bansa,” pagtatapos nito. (Vina de Guzman)

KALABOSO ang isang tulak ng droga na itinuturing bilang High Value Individual (HVI) matapos makuhanan ng halos P.4 milyong halaga ng shabu makaraang kumagat sa ikinasang buy bust operation ng pulisya sa Valenzuela City, Biyernes ng madaling araw.

Kinilala ni P/Lt. Sherwin Dascil, OIC Chief ng Station Drug Enforcement Unit (SDEU) ng Valenzuela Police ang naarestong suspek na si alyas “Toyo”, 45, ng Brgy., Gen T De Leon.

Sa kanyang report kay Valenzuela City Police Acting Chief P/Col. Joseph Talento, sinabi ni Lt. Dascil na nakatanggap sila ng impormasyon hinggil sa umano’y pagtutulak ng suspek ng illegal na droga sa lungsod.

Nang magawa ng isa sa kanyang mga tauhan na makipagtransaksyon sa suspek, agad bumuo ng team si Lt. Dascil bago ikinasa ng buy bust operation laban sa kaya alyas Totoy, sa koordiansyon sa sa PDEA.

Hindi na nakapalag ang suspek nang dambahin ng mga operartiba ng SDEU matapos umanong bintahan ng shabu ang isang pulis na nagpanggap na poseur-buyer dakong ala-1 ng madaling araw sa San Vicente St., Brgy, Karuhatan.

Ayon kay Lt. Dascil, nasamsam nila sa suspek ang nasa 55 gramo ng hinihinalang shabu na may standard drug price na P374,000, buy bust money na isang tunay na P500 bill, kasama ang pitong P1,000 boodle money at P200 recovered money.

Sinabi ni PSSg Cris Pual Collo, nakatakda nilang sampahan ang suspek ng kasong paglabag sa Sections 5 at 11 sa ilalim ng Article II ng R.A 9165 o ang Comprehensive Dangerous Drug Act of 2002 sa Valenzuela City Prosecutyor’s Office. (Richard Mesa)

PERSONAL na pinangunahan ni Malabon City Mayor Jeannie Sandoval ang relief operations para sa 259 na pamilyang naapektuhan ng malaking sunog na tumama sa Sitio 6, Barangay Catmon noong Miyerkules.

Tiniyak ng alkalde na ang pagtugon ng pamahalaang lungsod ay mabilis, maayos ang pagkakaugnay, at nakatuon sa kaligtasan, kapakanan, at agarang pangangailangan ng mga lumikas na pamilyang Malabueño.

“Ang mga paunang tulong na ito ay agad po naming inihanda para maipamahagi sa inyo. Alam po namin ang bigat, lungkot, at pangangambang nararamdaman lalo na ng mga pamilyang naapektuhan ng naganap na sakuna sa Catmon. Kaya po sinisiguro ko sa inyo, na tayo sa pamahalaang lungsod ang inyong kakampi, kaagapay, at sandigan ngayong oras ng pangangailangan,” pahayag ni Mayor Sandoval

Ang City Social Welfare and Development Department (CSWDD) naman ay namahagi ng food packs na naglalaman ng bigas , coffee, noodles, water, at canned goods, Kasama ang hygiene kits na naglalaman ng toothbrus, toothpaste, soap, shampoo, etc., sleeping kits, at iba pa para sa 494 pamilya na pansamantalang nanunuluyan sa Malabon Evacuation Center, Catmon Integrated School, Tonsuya Integrated School, Tonsuya Covered Court at Acacia Elementary School.

Nagtalaga din ang pamahalaang lungsod ng mga water refilling station, ang Mobile Jeannie Services, 121 modular tents, portalet, ambulansya, a emergency vehicles. Nakaalerto rin ang health centers at medical stations na itinayo malapit sa mga evacuation area.

Agad namang nabigyan ng agarang medikal na atensyon ang pitong indibidwal na nagtamo ng mga pinsala habang inaapula ng mga awtoridad ang apoy.

“Tayo po sa pamahalaang lungsod, sa pangunguna ni Mayor Jeannie Sandoval, ay nakatutok sa kapakanan ng mga residenteng naapektuhan ng sunog na ito. Prayoridad po natin ang kanilang kaligtasan at kalusugan, at ang kaayusan sa loob at labas ng mga evacuation centers para sa kasiguraduhan na sila ay nasa maayos na kalagayan,” ani City Administrator Dr. Alexander Rosete.

Samantala, nagbukas ng donation drive ang pamahalaang lungsod para sa mga nasunugan. Hinihikayat ang mga Malabueño, organisasyon, at grupo na mag-donate ng disenteng damit, de-lata, toiletries, at iba pang mahahalagang gamit sa City Human Resource Management and Development Department (CHRMD) na matatagpuan sa 9th floor ng Malabon City Hall. (Richard Mesa)

BUKAS ang tanggapan ng Bureau of Immigration (BI)sa anumang puna o komento tungkol sa serbisyo ng ahensya.

Sinabi ni BI Commissioner Joel Anthony Viado kasunod sa naging pahayag ng isang kolum na kamakailan lamang na nagbahagi ng karanasan ng dalawang pasahero sa isinagawang inspeksyon sa paliparan.

Ayon sa artikulo, naiintindihan ng mga manunulat ang pangangailangan ng mga beripikasyon dahil sa mataas na bilang ng mga kaso ng human trafficking sa bansa. Gayunman, nabanggit din nilang nakaramdam umano ng diskriminasyon ang mga biyahero dahil hindi sila “nakasuot ng mga damit na may tatak… tulad ng mga NEPO babies.”

Ipinaliwanag ni Viado na ang mga inspeksyon sa paliparan ay isinasagawa upang maprotektahan ang mga Pilipino laban sa human trafficking, bilang bahagi ng pangako ng BI sa Inter-Agency Council Against Trafficking (IACAT) sa pagpapatupad ng Republic Act No. 11862 o ang Expanded Anti-Trafficking in Persons Act of 2022.

Dagdag pa niya, hindi batayan ng mga opisyal ang panlabas na anyo ng isang tao, kundi ang pagkakaroon ng mga hindi tugmang pahayag at dokumento.

Nagpasalamat si Viado sa may-akda ng kolum sa ibinahaging puna at sinabi niyang pinahahalagahan ng ahensya ang bawat komento at karanasang ibinabahagi ng publiko dahil ito ang tumutulong sa kanila upang mapabuti ang serbisyo.

Ibinahagi rin ni Viado na ang mga darating na pagsasanay para sa mga bagong frontline immigration officers ay magpapatuloy na magtuon sa soft skills development, partikular sa pagiging magalang, mahusay na pakikipagkomunikasyon, at tamang pakikitungo sa publiko.

Dagdag pa niya, napansin na ng ahensya ang magagandang resulta ng mga pagbabagong ito, dahil mas marami nang pasaherong nagpapahayag ng pasasalamat sa propesyonalismo at pasensya ng mga opisyal ng BI, kapwa sa personal at sa social media.

(Gene Adsuara)