BINIGYANG linaw ng Department of Justice na nasa ‘provisional acceptance’ pa lamang ang status ng mga dating opisyal ng Department of Public Works and Highways at mag-asawang Discaya sa kanilang Witness Protection Program.

Batay sa opisyal na pahayag ng kagawaran na ipinadala ni Justice Assistant Sec. Mico Clavano, nilinaw rito na tanging proteksyon pa lamang ang saklaw sa ganitong uri ng probisyon.

Ibig sabihin layon sa programa na maseguro ang kaligtasan ng mga tatayong testigo o mga indibidwal na sangkot sa maanomalyang flood control projects.

Kung kaya’t itinuturing bilang ‘protected witnesses’ ang mga naisama sa naturang ‘Witness Protection Program’.

Partikular, kabilang na rito ay sina former DPWH Officials Brice Ericson Hernandez, Jaypee Mendoza, Henry Alcantara, Roberto Bernardo, at pati ang mag-asawang Pacifico at Sarah Discaya.

Habang ibinahagi naman ng kasalukuyang kalihim ng kagawaran na si Secretary Jesus Crispin ‘Boying’ Remulla ang pinagkaiba nito sa pagiging state witness.

Kanyang binigyang diin na ang pagiging isang probisyonal ay hindi nangangahulugang awtomatikong testigo ng testigo.
(Daris Jose)

ANIM na indibidwal, kabilang ang tatlong hinihinalang drug personalities ang arestado sa magkahiwalay na anti-gambling operation ng pulisya sa Valenzuela City.

Sa ulat, nakatanggap ng impormasyon ang mga tauhan ni Valenzuela Police Acting Chief P/Col. Joseph Talento na may nagaganap umanong illegal gambling activities sa Mercado St., Brgy. Gen T De Leon.

Kaagad rumesponde sa lugar ang mga tauhan ng Gen T De Leon Police Sub Station 2 na nagresulta sa pagkakaaresto sa dalawang kelot nang maaktuhang nagsusugal ng ‘cara y cruz’ dakong alas-12:45 ng tanghali.

Nasamsam sa kanila ang tatlong peso coins ‘pangara’ at bet money habang nakuha kay alyas “Roel” ang isang plastic sachet na naglalaman ng hinihinalang shabu.

Nauna rito, naaktuhan din ng mga tauhan ng Karuhatan Police Sub-Station 9 ang dalawang lalaki na nagsusugal umano ng ‘cara y cruz’ sa Industrial St., Brgy. Karuhatan bandang alas-8:50 ng gabi at nakuha sa kanila ang bet money, tatlong peso coins ‘pangara’ at isang plastic sachet ng umano’y shabu na nakumpiska kay alyas “Mando”, 56.

Sa Brgy. Malinta, alas-3:40 ng hapon nang maaktuha naman ng mga tauhan ng Malinta Police Sub-Station 4 ang dalawang lalaki nag naglalaro din umano ng sugal na ‘cara y cruz’ sa isang abandonadong bahay sa Makipot Street.

Nakumpiska sa kanila ang bet money at tatlong peso coins ‘pangara’ habang ang isang plastic sachet ng pinaghihinalang shabu ay nakuha kay alyas “Marlon”, 45.

Ayon kay P/MSgt. Carlito Nerit Jr., nahaharap ang mga suspek sa kasong PD 1602 o Anti-Illegal Gambling Law habang karagdagan pa na kasong paglabag sa RA 9165 o Comprehensive Dangerous Drug Act of 2002 ang kakaharapin ng tatlo sa kanila. (Richard Mesa)

TIKLO ang isang 41-anyos na lalaki na wanted sa kaso ng carnnaping sa Batangas nang matunton ng pulisya sa kanyang pinagtataguang lugar sa Valenzuela City.

Pansamantalang nakapiit ngayon ang akusado sa Custodial Section Facility Unit ng Valenzuela City police habang hinihintay ang pagpapalabas ng commitment order mula sa korte.

Batay sa ulat, nakatanggap ng impormasyon ang mga tauhan ni Valenzuela Police Acting Chief P/Col. Joseph Talento na nagtatago umano sa lungsid ang akusado na kabilang sa mga Most Wanted Person sa Batangas.

Nang makakuha ng kopya ng warrant of arrest na inisyu noong January 25, 2023, ng Regional Trial Court (RTC), Branch 87, Rosario, Batangas ang mga tauhan ni Col. Talento, ay agad nilang ikinasa ang pagtugis sa akusado.

Dakong alas-9:40 ng gabi nang madakip ng mga operatiba ng Station Intelligence Section ng Valenzuela Police ang akusado sa Sto. Niño Street, Barangay Mapulang Lupa, sa bisa ng arrest warrant para sa kasong New Anti-Carnapping Act of 2016 (R.A. 10883).

Ayon kay Col. Talento, may inirekomenda namang piyansa ang korte na halagang P300,000.00 para sa pansamantalang paglAya ng akusado. (Richard Mesa)

NAGWAKAS na ang pagtatago ng isang lalaki na wanted sa kaso ng pagpatay sa Lungsod ng Valenzuela matapos matunton ng tumutugis na mga pulis sa kanyang pinagtataguan sa Caloocan City.

Sa ulat, nakatanggap ng impormasyon ang mga operatiba ng Intelligence Section ng District Mobile Force Battalion (DMFB) ng Northern Police District (NPD) hinggil sa pinagtataguang lugar sa Caloocan ng 40-anyos na akusado.

Nabatid na ang akusado ay nakatala bilang No. 1 sa Top Ten Most Wanted Person ng Valenzuela City Police kung saan. kabilang umano ito sa mga suspek sa pagpatay sa isang barangay kagawad sa lungsod noong 2022.

Dakong alas-4:30 ng hapon nang tuluyang makorner ng mga operatiba ng DMFB ang akusado sa Zabarte Road, Phase 1, Barangay 176-A, Caloocan City.

Ang akusado ay binitbit ng pulisya sa bisa ng warrant of arrest sa paglabag sa Article 248 of the Revised Penal Code (Murder) na inisyu ng Valenzuela City Regional Trial Court (RTC) Branch 284, noong December 2, 2022 na walang inirekomendang piyansa.

Pansamantalang nakapiit ang akusado sa NPD Custodial Facility Unit habang hinihintay ang pagpapalabas ng commitment order mula sa korte para sa paglilipat sa kanya sa City Jail. (Richard Mesa)