SA patuloy nitong pagsisikap na suportahan ang mga residente sa panahon ng masamang kondisyon ng panahon, personal na pinangunahan ni Mayor Jeannie Sandoval ang pamamahagi ng family food packs sa mga pamilyang apektado ng habagat na pinalakas ng Super Typhoon Nando.

“Agarang tulong po sa ating mga kababayan ang ating ipinabot dahil alam po natin ang hirap na nararanasan ng mamamayan tuwing may bagyo o kalamidad. Makakaasa po ang bawat isang Malabueno na tayo ay nakatutok sa masamang panahon para masiguro ang kaligtasan ng bawat isa. Nakahanda po ang ating Command and Communication Center at mga kagamitan, at gumagana ang ating mga pumping stations. Kaya palagi po nating paalala na tayo ay magtulungan. Makiisa sa ating mga hakbang para sa kaayusan at kapakanan ng mga miyembro ng tahanan,” ani Mayor Jeannie.

Nitong Martes, bumisita ang alkalde sa Dampalit Integrated School para simulan ang pamamahagi ng relief goods sa 45 indibidwal o 14 pamilya na pansamantalang sumilong sa paaralan sa panahon ng malakas na buhos ng ulan.

Nakatanggap din ng food packs ang 29 pang pamilya na lumikas sa Maysilo at Tinajeros Elementary Schools habang namahagi rin ang CSWD ng mainit na pagkain sa mga evacuees.

Patuloy namang nakikipag-ugnayan ang Pamahalaang Lungsod sa pamamagitan ng City Disaster Risk Reduction and Management Office (CDRRMO) sa iba’t ibang departamento at barangay units para magpatupad ng mga proactive na hakbang para sa kaligtasan ng lahat.

Nananatili ring gumagana ang Command and Communication Center ng Lungsod para subaybayan ang Super Typhoon Nando at isa pang nagbabantang bagong bagyong “Opong”.

Naka-standby at nakahanda na rin ang lahat ng city at barangay Disaster Risk Reduction and Management Council (MCDRRMC) para sa agarang deployment habang tiniyak naman ng City Engineering Office na gumagana ang lahat ng pumping station at floodgates.

“Ngayong may isa pang low pressure area na binabantayan sa ating bansa, sinisigurado ng pamahalaang lungsod na bawat isa po sa atin ay handa at ligtas. Makipag-ugnayan po sa pamahalaang lungsod kung kinakailangan ng tulong dahil nakahanda itong umagapay anumang oras,” pahayag naman ni City Administrator Dr. Alexander Rosete. (Richard Mesa)

KAAWA-AWA ang sinapit na kamatayan ng kambal na batang babae makaraang malapnos ang katawan habang pito pa ang sugatan sa sunog na sumiklab dulot ng malakas na pagsabog na sanhi ng naka-imbak umanong kuwitis Miyerkules ng tanghali sa Valenzuela City.

Dead-on-the-spot ang kambal na pitong taong gulang, habang isinugod naman sa Valenzuela Medical Center ang pito pang sugatan, kabilang ang 5-taong gulang na batang lalaki at anim na babae na may mga edad na 63, 52, 31, 9, 7, at ang 13-taong gulang na kritikal ang kondisyon.

Sa isinagawang pulong-balitaan na pinangunahan ni Valenzuela City Mayor Wes Gatchalian, nagsimula ang sunog dakong alas-11:33 sa bahay ng isang alyas “Rodjay” sa 173 Pieces St. Batimana Compound, Marulas,matapos ang malakas na pagsabog na yumanig sa mga kabahayan sa naturang lugar.

Itinaas lamang sa unang alarma ang sunog na kaagad ding naapula makaraang ang 15-minuto na nakaapekto sa apat na pamilya makaraang mawasak at masunog ang tirahan sa lakas ng pagsabog.

Ayon sa alkalde, lumabas sa pagsisiyasat na posibeng nag-imbak ng mga kuwitis ang pamilya habang mura pa ang halaga nito para ibenta sa Bagong Taon.

“Ang masakit pa, kamag-anak ng may-ari ng bahay yung dalawang nasawi. Wala naman kasing permiso sa pag-iimbak ng pyrotechnics ang may-ari ng lalu na’t may ordinansa dito na bawal ang pag-manufacture dito sa aming lungsod ng mga paputok. Isolated case lang yan,” pahayag ni Mayor Gatchalian.

Tiniyak naman ni Mayor Wes na pananagutin nila ang may-ari ng bahay na pinagmulan ng pagsabog lalu’t may ordinansa sila na bawal ang pag-manufacture at pagbebenta ng paputok sa lungsod at hindi sila nagbibigay ng permiso sa ganitong uri ng hanapbuhay. (Richard Mesa)

INAPRUBAHAN ng House committee on information and communications technology (ICT) na pinamumunuan ni Cam Sur Rep. Migz Villafuerte ang consolidated bill na nagmamandato sa lahat ng Internet Service Providers (ISPs) na magpatupad ng roll-over data allocation scheme para magamit o ma-carry over ng kanilang prepaid at postpaid subscribers ang natitira o unused data sa susunod na billing cycle o hanggang makunsumo ng buon ang naturang load.

Ang panukalang “Roll-Over Internet Act,” pinagsamang tatlong panukalang batas na magkahalintulad na nagsusulong na alisin ang data o load caps na ipinatutupad ng ISPs sa kanilang subscribers ay inaprubahan kasabay ng organizational meeting ng komite.

Kapag naging ganap na batas, ang prepaid at postpaid subscribers ng lahat ng ISPs o telcos (telecommunications companies) ay magagawang magamit ang natitirang data ng kanilang mobile data packages kahit na nag-expire na ng ilang araw o isang buwan, depende sa kanilang respective subscription plans.

“This means goodbye to the currently unfair, anti-consumer practice of telcos to have their subscribers, whether with prepaid or postpaid data packages, forfeit their unused data when their particular subscriptions end after a day, three days, a week, 15 days or one month,” anang mambabatas.

Isang kahalintulad na panukala ang inaprubahan sa kamara noong 18th Congress ngunit hindi naiasabatas dahil wala itong after counterpart bill mula sa senado.

Sinabi ni Villafuerte na sa ilalim ng kasalukuyang data packages, nawawala ng postpaid subscribers ang kanilang unused data sa katapusan ng 30-day billing cycles, habang kailangang bumili muli ang mga prepaid users ang nasabing purchase data promos upang mamentina ang kanilang internet connections kapag nag-expire na ang load mula isa, tatlo, 7, 15 or 30 araw.

“As has been pointed out by the proponents of this measure, the forced loss of mobile data under the current prepaid or postpaid ISP subscription plans is not only inefficient but inherently unfair to consumers as well,” anang mambabatas. (Vina de Guzman)

INARESTO ng mga ahente ng Bureau of Immigration (BI) ang siyam na Chinese national sa isang operasyon laban sa illegal na pagmimina sa Aroroy, Masbate.

Ayon kay BI Intelligence Division Chief Fortunato Manahan Jr. ang operasyon ay isinagawa ng pinagsanib na puwersa ng BI Regional Intelligence Operations Unit 5 (RIOU5), Armed Forces of the Philippines, the Philippine Army, the Philippine Navy, Philippine National Police, Masbate Provincial Police Office.

Ang grupo ay inaresto sa dalawang hiwalay na lugar sa Barangay Cabangcalan at Barangay Pangle. Kung saan ay naaktuhan silang nagtatrabaho sa minahan na walang kaukulang permits at visas habang ang iba ay mga overstaying na.

Kasunod ng kanilang pagkakaaresto ay dinala sila sa Manila para sa booking at kasalukuyang nakakulong sa BI Facility sa Taguig City at sasailalim sadeportation facilities.

“Illegal mining not only undermines our immigration and labor policies but also threatens the environment and the livelihood of local communities,” ayon kay BI Commissioner Joel Anthony Viado.

“We will continue to strengthen enforcement efforts, with the support of other government agencies, to ensure that violators are held accountable and our resources are safeguarded.” dagdag pa nito. (Gene Adsuara)

MAHIGIT P.3 milyong halaga ng shabu ang nasamsam sa isang hinihinalang tulak ng illegal na droga matapos maaresto ng pulisya sa ikinasang buy bust operation sa Valenzuela City, Martes ng gabi.

Pansamantalang nakapiit sa custodial facility unit ng Valenzuela City Police ang naarestong suspek na kinilala bilang si alyas “Mosi”, 59, caretaker at residente ng Tayog Street Barangay Liputan, Meycauayan, Bulacan.

Sa kanyang ulat kay Valenzuela Police Acting Chief P/Col. Joseph Talento, sinabi ni Station Drug Enforcement Unit (SDEU) OIC Chief P/Lt. Sherwin Dascil na nakatanggap sila ng impormasyon hinggil sa umano’y illegal drug activities ng suspek.

Sinabi pa ni Lt. Dascil na dahil mainit na umano ang suspek sa kanilang lugar sa Bulacan ay sa Valenzuela na umano ito nagbebenta ng droga, partikular sa Brgy. Balangkas.

Nang magawang makipagtransaksyon sa suspek ng isa sa mga operatiba ng SDEU, kaagad bumuo ng team si Lt. Dascil bago ikinasa ang buy bust operation sa koordinasyon sa PDEA.

Dakong alas-11:55 ng gabi nang dambahin ng mga operatiba ng SDEU ang suspek sa Kabisang Imo Road, Brgy., Balangkas matapos umanong bentahan ng P7,500 halaga ng shabu ang isang pulis na nagpanggap na buyer.

Nakumpiska sa kanya ang humigi’t kumulang 45 gramo ng hinihinalang shabu na may standard drug price value na P306,000, buy bust money na isang tunay na P500 bill at pitong P1,000 boodle money, P200 recovered money at green coin purse.

Ayon kay PSSg Alfredo Mendoza III, nakatakda nilang sampahan ang suspek ng kasong paglabag sa Sections 5 at 11 under Article II ng RA 9165 (Comprehensive Dangerous Drugs Act of 2002) sa Valenzuela City Prosecutor’s Office. (Richard Mesa)