NANAWAGAN si Bacolod Rep. Albee Benitez sa Department of Justice nailagay sa whistleblower program ang mga empleyado mula sa Department of Public Works and Highways na nagnanais tumestigo sa maanomalyang flood control projects sa bansa.


Sa isang statement na inilagay sa social media, umapela ang mambabatas sa DoJ na protektahan ang mga opisyal at empleyado ng dpwh at iba pang personalidad na may impormasyon at nais maging saksi laban sa mga sangkot sa katiwalaan.


Dapat aniya maging proactive ang justice department sa pagkuha ng mga saksi upang lalo pang mapalakas ang kaso laban sa mga naakusahang nakinabang sa ghost projects.

"Pagkakataon na ito para maisiwalat nila ang katotohanan," dagdag nito.

Una nito, nanawagan ang mambabatas kay DPWH Sec. Manuel Bonoan na akuin ang responsibilidad sa kabiguan ng programa at bumababa sa posisyon

Nakiisa din ito sa panawagan na ilabas ang ulat ng small committee sa 2025 budget, kabilang na ang pangalan ng mga miyembro at mga pagbabagong ginawa sa badyet.
(Vina de Guzman)

NAKATAKDANG magsagawa ng motu proprio inquiry ang House Committee on Justice na pinaumunuan ni Batangas Rep. Gerville Luistro kaugnay sa extradition request ng Estados Unidos para kay pastor Apollo Quiboloy, upang linawin ang "insufficiencies and ambiguities" sa naturang proseso.


Ang gagawing imbestigasyon ay base na rin sa written request mula kay Akbayan Party-list Rep. Perci Cendaña, na humihikayat kay Luistro na magsagawa ng inquiry in aid of legislation sa kaso ni Quiboloy.


"There is an overwhelming public interest and concern over the process by which extradition requests are received, evaluated, and acted upon. It is imperative that Congress, through your Committee, provide a forum where concerned agencies may clarify the status of the present request, explain the legal and procedural steps involved, and identify any gaps or ambiguities in our existing laws and treaties," nakasaad sa liham ni Cendaña na binasa ni Luistro sa isinagawang organizational meeting ng komite.


Pormal na nagmosyon si Committee vice chairman at Bukidnon Rep. Jonathan Keith Flores para gawin ang imbestigasyon na naaprubahan matapos na walang humadlang mula sa mga miyembro.


Dalawang batas ang inaasahang tatalakayin ng komite, ang 1994 extradition treaty a pagitan ng U.S. at Pilipinas at ang PD 1069 o Philippine Extradition Law na isinabatas noong 1977. 


Ayon sa mambabatas, ang dalawang batas ay "silent" sa ilang usapin na siyang kailangang malinawan.
(Vina de Guzman)

IIMBESTIGAHAN ng Bureau of Customs (BOC) ang 40 mga mamahaling kotse ng pamilyang Discaya.

Ang pamilya ng mga Discaya ay kabilang sa mga kumpanya na nakakuha ng kontrata sa Department of Public Works and Highways na may kaugnayan sa mga flood control projects.

Subalit  nilinaw ni Customs Commissioner Ariel Nepomuceno na limitado lang ang kapangyarihan ng Bureau of Customs dito.

Ayon sa opisyal, tanging mga commercial establishments lamang ang sakop ng kanilang kapangyarihan kaya kakailanganin pa nila ng ibang dokumento para naman sa residential establishments. (Gene Adsuara)