TULUYAN nang binitawan ni Pangulong Ferdinand Marcos Jr. si Presidential Communications Office Senior Undersecretary Analisa “Ana” Puod.

Kinumpirma ni Presidential Communications Office Undersecretary at Palace Press Officer Claire Castro sa press briefing sa Malakanyang na tinanggap na ni Pangulong Marcos ang pagbibitiw ni Puod sa puwesto.

Sa ulat, sa nasabing resignation letter, binanggit ni Puod na ang dahilan ng kanyang pagbibitiw ay ang “untenable condition” sa ilalim ng kasalukuyang pamunuan ng PCO.

Bagama’t hindi na idinetalye ang mga isyung kanyang tinutukoy, nagpahayag pa rin siya ng pasasalamat kay Pangulong Ferdinand Marcos Jr. para sa tiwala at oportunidad na makapagsilbi sa ilalim ng kanyang administrasyon.

“In the short period that I have been with PCO I have gained much appreciation with your sincere and kind leadership, anchored on your genuine vision for better, greater Filipino nation,” ani Puod sa kanyang liham.

Bago maupong senior undersecretary, nagsilbi si Puod bilang general manager ng government television station na PTV. ( Daris Jose)

TUMAAS ang inflation rate ng Pilipinas nito lamang Hunyo, dahilan para malagot ang four-month down streak.

Ang itinuturong dahilan, ang mas mabilis na utility costs sa nasabing panahon, ayon sa Philippine Statistics Authority (PSA).

Iniulat ni National Statistician at PSA chief Claire Dennis Mapa na ang inflation print nitong nakaraang Hunyo—na sumusukat sa rate ng paglago sa consumer goods at services costs— bahagyang umakyat sa 1.4% mula 1.3% noong buwan ng Mayo.

Sinasabing ‘consistent’ ito sa naging pagtataya ng Bangko Sentral ng Pilipinas (BSP) na ang inflation rate noong nakaraang buwan ay papalo sa 1.1% hanggang 1.9% range.

“June’s inflation rate brought the year-to-date rate to 1.8%, still below the government’s comfortable inflation rate ceiling of 2% to 4% for 2025,” ayon sa ulat.

“Ang pangunahing dahilan ng mas mataas na antas ng inflation nitong Hunyo 2025 kaysa noong Mayo 2025 ay ang mas mabilis na pagtaas ng presyo ng Housing, Water, Electricity, Gas and Other Fuels sa antas na 3.2%. Ito ay may 63.3% share sa pagtaas ng pangkalahatang,” ayon naman kay Mapa. ( Daris Jose)

https://remate.ph/wp-content/uploads/2025/05/KULONG-REMATE-2.jpgHIMAS-REHAS ang 24-anyos na kelot na akusado sa kasong rape by sexual assault sa isinagawang manhunt operation ng pulisya sa Malabon City.

Sa kanyang report kay Northern Police District (NPD) Acting Director P/BGen. Arnold Abad, kinilala ni Malabon Police OIC chief P/Col. Allan Umipig ang akusado na si alyas “Ching”, ng Brgy. Potrero ng lungsod.

Ayon kay Col. Umipig, iniutos niya sa kanyang mga tauhan ang pagtugis sa akusado na nakatala bilang No. 7 Top Most Wanted Person sa NPD at No. 9 Top MWP sa Malabon police.

Dakong ala-1:35 ng hapon nang masukol ng mga operatiba ng Malabon Police Warrant and Subpoena Section (WSS) ang akusado malapit sa kanyang tinitirhang bahay sa Brgy. Potrero.

Hindi naman umano pumalag si ‘Ching’ nang bitbitin siya ng mga operatiba ng WSS sa bisa ng warrant of arrest na inisyu ng Malabon City Regional Trial Court Branch 291 noong June 18, 2025, para sa kasong Rape by Sexual Assault.

May inirekomenda namang piyansa ang hukuman na halagang P120,000 para sa pansamantalang paglaya ng akusado na ipiniit muna sa Malabon Police Custodial Facility Unit habang hinihintay ang pagpapalabas ng commitment order mula sa korte para sa paglilipat sa kanya sa City Jail. (Richard Mesa)

MAHIGIT P1.3 milyong halaga ng shabu ang nasabat sa dalawang tulak ng droga na itinuturing bilan high-value targets (HVI) nang matiklo ng pulisya sa buy bust operation sa Caloocan City, kamakalawa ng hapon.

Kinilala ni Caloocan Police OIC chief P/Col. Joey Goforth ang naarestong mga suspek na sina alyas “Amo,” 42, at 19-anyos na kelot na kanyang kasabwat, kapwa residente ng Brgy. 188.

Sa kanyang report kay Northern Police District (NPD) Acting District Director P/BGen. Arnold Abad, sinabi ni Col. Goforth na dakong alas-5:47 ng hapon nang maaresto ng mga operatiba ng Station Drug Enforcement Unit (SDEU) ang mga suspek sa Brgy. 188, Tala ng lungsod.

Nauna rito, nakatanggap ng impormasyon ang mga operatiba ng SDEU hinggil sa pagputok umano’ ng pangalan ni alyas Amo sa pagbebenta ng shabu sa area ng Caloocan North kaya agad nakipag-ugnayan ang mga tauhan ni Col. Goforth sa PDEA bago ikinasa ang buy bust operation na nagresulta sa pagkakadakip sa mga suspek.

Nakumpiska sa mga suspek ang humigi’t kumulang 205 grams ng hinihinalang shabu na may estimated standard drug price na P1,394,000, buy bust money na binubuo ng isang tunay na P500 bill at apat na P1,000 boodle money.

Ayon kay Col. Goforth, sasampahan nila ang mga suspek ng kasong paglabag sa Sections 5, 11, at 26, Article II under ng R.A 9165 o ang Comprehensive Dangerous Drugs Act of 2002 sa Caloocan City Prosecutor’s Office.

Pinuri naman ni Gen. Abad, ang Caloocan City Police Station para sa kanilang pagsisikap at hindi natitinag na pangako sa paglaban sa ilegal na droga. (Richard Mesa)

DEDBOL ang isang babaeng traffic enforcer na tumulong sa paghahatid sa ospital ng isang pasyente matapos mapagod sa pagtulak sa tumirik na e-trike sa Malabon City, Biyernes ng hapon.

Ayon kay Ret. Col. Rey Medina, Jr. hepe ng Malabon City Public Safety and Traffic Management Office (PSTMO), nagsasa-ayos ng daloy ng trapiko sa kanto ng Leoño Street at Rizal Avenue, Brgy. Tanong Poblacion si T/E Janet Respicio, 48, residente ng Bayan-bayanan, nang humingi sa kanya ng tulong ang e-trike driver na maghahatid ng pasyente sa Ospital ng Malabon.(Osmal) dakong alas-3:10 ng hapon.

Tumirik umano ang e-trike nang ma-lobat kaya’t humingi ng tulong ang driver para makakuha ng ambulansiyang maghahatid sa pasyente.

Dahil matatagalan pa ang pagdating ng ambulansiya, nagpasiya si Respicio na itulak ang e-trike patungong Osmal sa F. Sevilla St. sa likod ng Malabon City Hall subalit nang malapit na sa naturang pagamutan, napansin ng isa pang traffic enforcer sa lugar na si T/F Evelyn Encenarial ang paninikip ng dibdib ng biktima at dumadaing na nahihirapang huminga.

Kaaagad silang kumuha ng wheelchair sa pagamutan aT isinakay dito si Respicio subalit napansin na nila na naninigas at naihi na suot na uniporme ang traffic enforcer hanggang bawian ng buhay sa emergency room ng naturang ospital.

Sinabi ni Col. Medina na irerekomenda niya kay Mayor Jeannie Sandoval na mabigyan ng posthumous commendation ang nasawing traffic enforcer dahil sa ipinakitang pagmamalasakit hindi lang sa kanyang trabaho kundi sa serbisyo sa kapuwa. (Richard Mesa)

KALABOSO ang 44-anyos na lalaki matapos tutukan ng baril at pagbantaan pang patayin ang may-ari ng motorsiklong kanyang tinangay sa Valenzuela City.

          Ayon kay Valenzuela Acting Police chief P/Col. Gerson Bisayas, mahaharap sa kasong paglabag sa R.A 10883 o ang Anti-Carnapping Law, Grave Treat at R.A 10591 o ang Comprehensive Firearms and Ammunation Regulation Act ang suspek na si alyas “Eman”, Brgy. Gen T De Leon.

Sa imbestigasyon ni P/MSgt. Harold Ian Sagun, dakong alas-7 ng umaga nang matuklasan ng biktimang si Gedeon Roldan, 37, truck helper, ng Gumamela Street ang pagkawala ng kanyang Yamaha Mio Sporty motorcycle na ipinarada niya sa harap ng Magnolia Homes, Santolan Road, Brgy. Gen T De Leon.

Nang rebisahin ang kuha ng CCTV ng barangay, nakita nila ang pagtangay ng suspek ng kanyang motorsiklo kaya pinuntahan ng biktima si alyas Eman sa bahay nito upang komprontahin.

Gayunman, nauwi sila sa pagtatalo hanggang maglabas umano ng baril ang suspek at tinutukan ang biktima sabay binantaang patayin kaya humingi na ng tulong si Roldan sa Patrol Base 2.

Kaagad namang rumesponde sina Pat. Raymundo Gamboa, Pat. Dominic Dela Cruz at Pat. Sherwin Caampued na nagresulta sa pagkakaaresto sa suspek at nakumpiska sa kanya ang isang hindi lisensiyadong kalibre .38 revolver na kargado ng dalawang bala at nabawi din ang motorsiklo ng biktima. (Richard Mesa)

PINAIGTING ng Department of Human Settlements and Urban Development (DHSUD) ang pakikipag-ugnayan sa iba’t-ibang stakeholders upang maiayon ang mga patakarang pangpabahay ng pamahalaan sa pangangailangan ng sektor.

Pinangunahan ni DHSUD Assistant Secretary Frank Lloyd Gonzaga, na kumatawan kay Secretary Jose Ramon Aliling, ang pagpupulong kasama ang Technical Working Group (TWG) para sa Price Ceiling Adjustment ng mga Socialized Housing Developments.

Ang pag-uusap ay nakatuon sa pagsusuri at pagsasaayos ng mga polisiya kaugnay sa pagpepresyo ng socialized housing projects sa buong bansa.

Layunin ng inisyatiba na mapanatiling makatarungan, praktikal at tumutugon ang mga price ceiling at patakaran sa tunay na pangangailangan ng mga pamilyang Pilipino habang binabalanse ang affordability para sa mga mamimili at sustainability para sa mga developer at katuwang na ahensya.

Hindi lang ito usapin ng numero kundi ng katarungan. Ang kasiguraduhang walang Pilipinong maiiwan habang isinusulong natin ang mas progresibong Bagong Pilipinas sa pamamagitan ng Expanded 4PH,” ayon kay Secretary Aliling.

Bahagi ng mas malawak na pagsisikap ang pagsusuring ito sa ilalim ng Expanded Pambansang Pabahay para sa Pilipino (4PH) Program ni Pangulong Marcos Jr., na sa ngayon ay kinabibilangan ng mga horizontal developments o mga subdibisyong pabahay, pati na rin ang iba pang uri ng pabahay upang mas matugunan ang mga pangangailangan ng mga mamamayan.

Kaugnay rin nito, ang pag-uusap ay bahagi ng 8-Point Agenda ni Secretary Aliling na nagsusulong ng mga patakarang pangpabahay na akma sa mga layunin ng Sustainable Development Goals (SDGs) ng bansa.

Kabilang sa TWG ang mga opisyal ng DHSUD at mga kinatawan mula sa Subdivision and Housing Developers Association, Inc. (SHDA), National Real Estate Association, Inc. (NREA), Chamber of Real Estate and Builders’ Associations (CREBA) at Organization of Socialized and Economic Housing Developers of the Philippines, Inc. (OSHDP)

Nilalayon ng grupo na matapos ang mga rekomendasyon bago ang Oktubre 2025 para sa planong pagbabago sa Joint Memorandum Circular No. 2023-003 na ipinalabas noong Oktubre 19, 2023 tungkol sa pag-aadjust ng price ceiling para sa mga socialized subdivision at condominium projects.

Nauna na ring nakipagpulong si Secretary Aliling sa iba’t ibang mga non-government organizations at pribadong grupo upang humingi ng mga mungkahi sa pagpapabuti at pagpapalawak ng flagship housing program ng gobyerno.

“Ang malinaw na direktiba ni Pangulong Ferdinand R. Marcos Jr. ay tugunan ang mga sektor na tunay na nangangailangan,” sabi ni Secretary Aliling. (PAUL JOHN REYES)