SUGATAN ang isang 49-anyos na negosyante matapos barilin ng kapwa negosyante makaraan ang mainitang pagtatalo habang nag-iinuman sa Malabon City, kamakalawa ng gabi.

Nakaratay sa Ospital ng Malabon habang ginagamot ang tinamong tama ng bala sa kanang binti ang biktimang si alyas “Ricky”, ng Gabriel Compound, Brgy. Catmon, ng lungsod.

Mahaharap naman sa kasong Attempted Homicide at paglabag sa R.A10591 (Comprehensive Law on Firearms and Ammunition) ang suspek na si alyas “Arnel”, 53, at kapitbahay ng biktima.

Ayon kay Malabon Police OIC chief P/Col. Allan Umipig, dakong alas-10:30 ng gabi nang maganap ang insidente sa bahay ng suspek habang nag-iinuman ang mga biktima at ang suspek, kasama ng dalawa pa nilang kakilala.

Lumabas sa imbestigasyon na matapos umanong makaubos ng ilang bote ng alak ay nauwi sa mainitang pagtatalo ang biktima at ang suspek sa hindi nabanggit na kadahilanan.

Kaagad umanong sinapak ng biktima ang suspek na naglabas naman ng baril at pinutukan sa kanang binti si ‘Ricky’ na naging dahilan upang isugod sa nasabing pagamutan.

Naaresto naman ng rumespondeng mga tauhan ng Malabon Police Sub-Station 4, kasama ang SWAT Team ang suspek at nakumpiska sa kanya ang ginamit na baril na isang kalibre .45 pistol na may dalawang bala sa magazine na rehistrado sa kanyang pangalan. (Richard Mesa)

TUTULONG ang Philippine Coast Guard (PCG) sakaling ipag-utos ang pagsisid sa Taal Lake para mahanap ang mga nawawalang sabungeros.

Ayon kay PCG spokesperson Captain Noemie Cayabyab, hinihintay na lamang ang go signal para tumulong sa pagsisid ang kanilang technical divers bagama’t aminado siyang may mga hamon pa rin sa kakaharapin sa isasagawang retrieval operation.

Isinaalang-alang kasi rito ang lalim at lawak ng Taal Lake , ang kasalukuyang kondisyon ng Bulkang Taal at ang tagal ng panahon na nasa ilalim ng lawa ang mga labi.

Sakali namang matukoy na ang eksaktong lokasyon sa lawa sa kinaroroonan ng mga labi handa na aniya ang remote-operated vessel ng PCG para sa operasyon.

Ang pahayag ng PCG ng kahandaan na tumulong ay kasunod ng pahayag kahapon ni Justice Sexretary Jesus Crispin Remulla na posibleng simulan ang technical diving operation sa lawa ngayong linggo. (Gene Adsuara)

MALUGOD na tinanggap ni Navotas Representative Toby Tiangco ang pagpapalawak ng VAT exemptions sa essential medicines, na nagpapatunay lang aniya na ang mga patakaran sa buwis sa ilalim ng administrasyong Marcos ay naghahatid ng tunay at makabuluhang benepisyo sa mamamayang Pilipino.

Ito’y matapos ipahayag ng Bureau of Internal Revenue (BIR) na 19 pang gamot ang nadagdag sa listahan ng mga gamot na exempted sa value-added tax (VAT), kabilang ang para sa cancer, diabetes, at iba pang kritikal na sakit.

“Lagi pong sinasabi ng ating Pangulo na walang maiiwan sa Bagong Pilipinas, and this VAT exemption is proof that the government is taking steps to ensure that all Filipinos have equal access to life-saving medication,” ani Tiangco.

Tinukoy ng solon kung paano ang batas na CREATE MORE na nilagdaan ni Pangulong Ferdinand “Bongbong” Marcos Jr. ay nag-utos sa Food and Drug Administration (FDA) na tukuyin at ipadala ang VAT-exempt na mga produktong pangkalusugan sa iba pang ahensya tulad ng BIR, Bureau of Customs (BOC), at Department of Trade and Industry (DTI).

“Tax policies should always be designed with the people’s well-being at the center. What we’re seeing today are the results of tax reforms that truly prioritize the needs of ordinary Filipinos,” dagdag niya.

Hinimok din ni Tiangco ang publiko na ang pharmaceutical companies at drugstore na hindi sumunod ay iulat sa BIR sa pamamagitan ng contact_us@bir.gov.ph. (Richard Mesa)

MAY sapat na pondo ang Department of Health (DOH) para bayaran ang claims o mga sinisingil ng mga pribadong ospital para sa serbisyo at paggamot na ibinigay sa mga indigent patients.

Dahil dito, itinanggi ni Palace Press Officer at Presidential Communications Undersecretary Claire Castro na may ilang health facilities ang itinigil na ang pagtanggap ng government guarantee letters saklaw ang mga hospital bills ng mga pasyente na walang pinansiyal na kakayahan na magbayad.

Sa katunayan, may 39 hospitals sa Batangas ang nahaharap sa isyu na may guarantee letters dahil sa ‘incomplete o missing documentation.’

“Hindi naman po nagkakaproblema ang gobyerno patungkol po sa pagbabayad ng mga bills po ng ating mga kababayan na covered po ng guarantee letters,” ayon kay Castro.

“Dito lamang po sa 39 hospitals na kinakailangan po ng DOH iyong ibang mga dokumento para po sila’y mabayaran. So doon po sa maniningil na mga hospitals, kumpletuhin lang po iyong inyong mga dokumento dahil po ang DOH ang sinasabi sa atin ay may sapat na pondo,” aniya pa rin.

Winika pa ni Castro na sa ilalim ng Universal Health Care Act at isang memorandum of agreement (MOA sa pagitan ng DOH at mga pribadong ospital, ang huli ay kinakailangan na maglaan ng 10% ng kanilang authorized bed capacity para sa mga mahihirap na pasyente.

Aniya, ang mga indigent patients ay “entitled to zero hospital billing through the Philippine Health Insurance Corp. (PhilHealth).”

Sinabi pa ni Castro na maaari ring bisitahin ng mga ito ang DOH hospitals na hindi na kailangan pa ang guarantee letters mula sa mga government official.

(Daris Jose)

IPINATAWAG ng Department of Foreign Affairs (DFA) si Chinese Ambassador Huang Xilian hinggil sa pagpapataw ng Tsina kay dating senador Francis Tolentino na bawal tumuntong at pumasok ng Tsina.

Matatandaang, pinagbawalan ng Tsina si dating Senator Tolentino na makapasok sa kanilang mga teritoryo gaya ng mainland China, Hongkong, at Macau dahil sa umano’y inasal nito kaugnay sa mga isyung may kinalaman sa China.

Sa press briefing sa Malakanyang, binasa ni Palace Press Officer at Presidential Communications Undersecretary Claire Castro Castro ang kalatas ni Foreign Affairs Secretary Ma. Theresa Lazaro, na nagsasaad na ”punitive” measure of China was inconsistent with the norms of mutual respect and dialogue ”that underpin relations between two equal sovereign states.”

”The Department reminded the Ambassador that as a democracy, the Philippines values freedom of expression. In the Philippines’ adherence to the constitutional separation of powers among the three branches of government, it is the mandate of senators and other elected officials to inquire on the matter of national and public interests,” ang sinabi ni Castro.

Sa ulat, ipinatawag ang envoy noong Hulyo 4, araw ng Biyernes.

Sa kabilang dako, sinabi ng DFA na nananatiling committed ang departamento na tugunan ang hindi pagkakaunawaan sa pamamagitan ng diplomasiya at dayalogo.

Looking forward naman ito na magpapatuloy ang ‘constructive engagement’ sa Tsina para i-promote ang mutual understanding.

Samantala, hindi na maaaring makapasok sa mainland China maging sa Hong Kong at Macao si dating senator Francis Tolentino bilang parusa sa kanyang pagbanat sa nasabing bansa dahil sa isyu ng West Philippine Sea.

Ginawa ng tagapagsalita ng Chinese foreign ministry ang anunsyo isang araw matapos ang termino ni Tolentino.

Tinawag na “egregious conduct” ang ginawa ni Tolentino na nagtaguyod sa Senado ng Philippine Maritime Zones Act.

Binigyang-diin ng tagapagsalita na ipagtatanggol ng gobyerno ng China ang pambansang soberanya, seguridad, at interes sa pag-unlad sa kabila ng mga pahayag ng mga tinaguriang anti-China politician mula sa Pilipinas.

“For quite some time, driven by selfish interests, a handful of anti-China politicians in the Philippines have made malicious remarks and moves on issues related to China that are detrimental to China’s interests and China-Philippines relations,” naka-post sa website ng Chinese Ministry of Foreign Affairs.

(Daris Jose)

Bukod dito, nahukay din ang isang Japanese grenade sa ground floor ng  Salcedo Hall ng nasabing unibersidad, ayon sa post ng official publication ng Unibersidad— The Manila Collegian.

Ayon sa mga awtoridad, ang nasabing bomba ay maaaring ginamit noong World War II .

Nasa pag-iingat na ng Manila Police District – District Explosive and Canine Unit ang nadiskubreng pampasabog ng mga kontraktor na gumagawa ng gusali sa unibersidad. (Gene Adsuara)