TINATAYANG aabot sa P30 milyon pang halaga ng hindi rehistradong vape products ang nasamsam ng NBI-Special Task Force sa isang imbakan sa Biñan City, Laguna.

Ayon sa NBI, naaresto sa operasyon sina Kert Lester Simbajon, Javer Dirampatun, at Romeo Cada, na nahaharap sa mga paglabag sa Republic Act No. (RA) 11900 (Vape Regulation Act) at RA 10175 (Cybercrime Prevention Act) sa bisa na rin ng kautusan ni NBI Director Judge Jaime Santiago (Ret.) na paigtingin ang kampanya kontra illegal na vape.

Nag-ugat ang operasyon mula sa social media monitoring ng NBI kung saan nadiskubre ang illegal na pagbebenta ng vape sa Cavite at Laguna.

Napatunayang sangkot sa bentahan ng vape na walang BIR tax stamp at DTI registration ang Hype VapeShop sa Bacoor, Cavite sa pamamagitan ng test-buy.

Nang ikasa ang operasyon, nakipagkita noong Hulyo 7,2025 ang mga undercover agents sa mga suspek sa isang coffee shop sa Muntinlupa at dinala sila sa isang storage facility sa Rose Village, Sta. Rosa, Laguna.

Sa nasabing lugar nakita at nakumpiska ang 40,500 vape units na nagkakahalaga ng P31.9 milyon at 3,880 vape pods na nagkakahalaga ng P640,200.

Sumasailalim na sa inquest proceedings ang mga suspek. (Gene Adsuara)

ITINUTULAK ni Pangulong Ferdinand ‘Marcos Jr. ang ‘accountability at transparency’ sa gobyerno.

Hiningan kasi ng reaksyon si Palace Press Officer at Presidential Communications Undersecretary Claire Castro sa press briefing sa Malakanyang hinggil sa panawagan ni Senate President Chiz Escudero para sa transparency at accountability sa pamahalaan sa pamamagitan ng muling paghain ng isang panukala na nag-uutos sa lahat ng mga opisyal at kawani ng gobyerno na i-waive o talikuran ang kanilang karapatan sa ilalim ng Republic Act No. 1405 o Law on the Secrecy of Bank Deposits at Republic Act No. 6426 o Foreign Currency Deposit Act.

Tinanong si Castro kung suportado ba ng Pangulo ang panawagan na ito ng senador, at ang naging tugon naman nito ay ”Ang Pangulo po ay sang-ayon po at dapat lamang po nating ipatupad itong accountability and transparency sa gobyerno. So, hindi po tayo magkakaroon ng negatibong sagot mula sa Pangulo.”

Sa ilalim ng inihaing panukalang batas ni Escudero, nakasaad dito na ang lahat ng government personnel ay kinakailangang magsumite ng written waive na pinahihintulutan ang Office of the Ombudsman na suriin ang lahat ng kailangang deposit at investments kabilang ang foreign currency accounts.

“This bill has languished for too long,” ang winika ni Escudero “I’m hopeful that this time, we can turn the rhetoric of transparency into actionable policy.”

Noong 2013 pa unang inihain ang panukala para sa pagtanggal ng confidentiality ng bank deposits dahil sa paniwalang “public office is a public trust” at dapat may pananagutan sa publiko ang lahat ng mga kawani at opisyal ng pamahalaan.

Kung maaprubahan, titiyakin nitong walang civil servant, anupaman ang ranggo nito, ang puwede gamitin ang kaniyang posisyon para makapagnakaw sa kaban ng bayan.

“The laws may have served their purpose in the past, but their rigidity has enabled corruption to thrive under the guise of confidentiality,” ang sinabi ni Escudero sabay sabing “We are the last country standing in preserving absolute secrecy. That distinction doesn’t protect democracy but rather, it undermines it.”

(Daris Jose)

DAPAT ay matino, matapang at patas sa trabaho ang susunod na Ombudsman.

Bagama’t wala pa namang shortlist na ibinibigay pa kay Pangulong Ferdinand Marcos Jr., binigyang diin ni Palace Press Officer at Presidential Communications Undersecretary Claire Castro sa press briefing sa Malakanyang ang mga katangian na dapat ay taglay ng isang public servants, kabilang na ang Ombudsman.

”Sa kasalukuyan ay wala pa pong natatanggap na shortlist ang Pangulo at katulad ng ating sinabi dapat po isang matino, matapang, fair… ‘Yun po ang ilan lamang sa mga pangunahin na dapat maging isang katangian ng public servant, hindi lang ng Ombudsman, lahat ng public servant,” ayon kay Castro.

Sa ulat, ipinagbigay-alam ni Justice Secretary Jesus Crispin “Boying” Remulla kay Pangulong Marcos ang kanyang hangarin na maging kapalit ni Ombudsman Samuel Martires.

Ayon kay Remulla, tiniyak din niya sa Pangulo sa pamamagitan ng kanyang contact, na handa ang Department of Justice (DOJ) sakaling mawala siya rito.

“I told a mutual contact that I was very interested,” ayon sa kalihim.

Aniya, ihahain pa lamang niya ang application sa Judicial and Bar Council (JBC) sa Hulyo 4.

“I think I have a lot to offer there,” ayon sa DOJ chief.

Napaulat ang hangarin ni Remulla na pumalit sa puwestong babakantihin ni Martirez sa Hulyo 27.

Makakalaban ni Remulla sina Philippine Competition Commission (PCC) Chairman Michael Aguinaldo at Justice Undersecretary Jose Cadiz Jr. sa puwesto ng Ombudsman.

Si Remulla, 64-anyos, ay isang beteranong abogado at pulitiko. Natapos niya ang Bachelor’s Degree in Political Science at law degree sa University of the Philippines, kung saan siya miyembro ng Upsilon Sigma Phi fraternity. (Daris Jose)

MULING inihain ng mga lider ng House Quad Comm ng ika-19 Congress ang panukalang magkaklasipika sa extrajudicial killing (EJK) bilang heinous crime at pagbibigay hustisya sa mga biktima ng madugong war on drugs ni dating Presidente Rodrigo Duterte.

Kasama sa naghain ng House Bill (HB) No. 1629 sina Reps. David “Jay-jay” Suarez (Quezon, 2nd District), Bienvenido Abante Jr. (Manila, 6th District), Romeo Acop (Antipolo, 2nd District), Zia Alonto Adiong (Lanao del Sur, 1st District), Paolo Ortega V (La Union, 1st District), Ernesto Dionisio Jr. (Manila, 1st District), Rodge Gutierrez (1-RIDER Party-list), Lordan Suan (Cagayan de Oro City, 1st District), Jay Khonghun (Zambales, 1st District), Gerville “Jinky Bitrics” Luistro (Batangas, 2nd District), at Jonathan Keith Flores (Bukidnon, 2nd District).

Ang panukala ay unang inihain noong 19th Congress kasabay ng isinasagawang imbestigasyon ng the Quad Comm kaugnay sa mga naganap na EJK.

Binibigyang depinisyon sa panukala na ang EJK ay ang pagkuha ng buhay sa labas ng batas at pagpataw ng habangbuhay na pagkabilanggo sa public officials, state agents, o sinumang personalidad na gumawa nang pagpatay o nag-utos sa nasabing pamamaslang.

“Extrajudicial killings defined in this bill as the taking of life without the sanction of a lawful judicial process, pose a serious challenge to democratic institutions and erode public confidence in the justice system. When perpetrators are not held accountable, impunity thrives and the most basic human rights are rendered hollow,” nakapaloob sa panukala.

Ang panukala ay bilang tugon sa naganap na EJK sa kampanya kontra droga noong nakalipas na administrasyon na ayon sa Commission on Human Rights (CHR) ay nauwi sa imbestigasyon 846 pagpatay sa pagitan ng 2016 at 2022. sa naturang bilang, 577 ang ini-ugnay sa law enforcement agents, habang 269 ay ini-uugnay sa hindi kilalang assailants.

“These protections are meaningless if violations committed outside the justice system go unpunished. The State has a legal and moral duty to prevent such abuses and respond decisively when they occur,” anang mga mambabatas.

Sa ilalim pa ng panukalang Anti-Extrajudicial Killing Act, ang senior military o police officials na nag-utos sa kanilang subordinates na magpatupad ng EJKs ay mananagot sa batas.

Magbubuo din ng Extrajudicial Killings Claims Board sa ilalim ng CHR na siyang magpoproseso at magaapruba sa monetary at non-monetary reparations para sa pamilya ng biktima.

(Vina de Guzman)

SUPORTADO ni Navotas Congressman Toby Tiangco ang mas mahigpit na mga patakaran sa pagbili ng palay ng National Food Authority (NFA), at sinabing mapoprotektahan nito ang mga magsasaka mula sa mga oportunistang negosyante at makakatulong sa pagpapanatili ng P20 kada kilo ng bigas na programa ng administrasyon.

“Supporting our farmers and ensuring they are properly compensated is key to keeping the P20 rice program viable,” ani Tiangco.

“The stricter rules open the NFA’s palay procurement process to public scrutiny and ensure that only legitimate farmers—not traders—can sell to the agency.,” dagdag niya.

Aniya, ang panukalang ito ay maghihikayat sa mga “opportunistic traders” na bumili ng palay sa mababang presyo mula sa mga magsasaka at muling ibenta ito sa NFA sa halagang suportado ng gobyerno na P20 kada kilo.

“Close coordination between the LGU and our agencies is key. We must weed out middlemen who exploit the system to ensure our farmers receive fair market value for their harvests,” pahayag niya.

Sa ilalim ng bagong patnubay ng NFA, tanging mga verified farmer lamang ang maaaring magbenta ng palay sa NFA. Dapat silang nakalista sa Registry System for Basic Sectors in Agriculture (RSBSA) o kasalukuyang sertipikasyon mula sa kanilang local government unit (LGU).

Bilang karagdagan, ang mga sangay ng NFA ay kinakailangang magsumite ng buwanang listahan ng mga nagbebenta ng palay at ang kani-kanilang volume, na ipo-post sa publiko sa mga bulletin board para sa transparency.

Tinanggap ni Tiangco ang mga repormang ito bilang napapanahon at kinakailangan, na binanggit na ang P20 rice initiative ay nakikinabang na sa mga mamimili.

“The P20 rice program is clearly working and its benefits have already been felt by our kababayans. What we need now is to build on this momentum and make sure more Filipinos—and more farmers—benefit from it,” dagdag niya. (Richard Mesa)

KALABOSO ang dalawang drug suspects na itinuturing bilang High Value Individuals (HVI) matapos bintahan ng shabu ang isang pulis na nagpanggap na buyer sa Caloocan City, kamakalawa ng gabi.

Mahaharap sa kasong paglabag sa Sections 5, 26 at 11 under Article II ng R.A 9165, o ang Comprehensive Dangerous Drugs Act of 2002 ang mga suspek na sina alyas “Tetung”, 34, ng Tondo, Manila at alyas “Tonton”, 41, tricycle driver, ng Maypajo, Caloocan.

Sa kanyang ulat kay Northern Police District – District (NPD) Acting Director P/BGen  Arnold Abad, sinabi ni P/Capt. Regie Pobadora, OIC chief ng Drug Enforcement Unit (DDEU), dakong alas-4:43 ng madaling araw nang maaresto ang mga suspek sa Barangay 28, Caloocan City.

Ayon kay Capt. Pobadora, ikinasa nila ang buy bust operation sa pangunguna ni P/Lt. Victorino Ledesma, sa koordinasyon sa PDEA nang magawang makipagtransaksyon sa mga suspek ng isa sa kanyang mga tauhan.

Nang tanggapin umano ng mga suspek ang marked money mula sa pulis na nagpanggap na buyer, kapalit ng isang plastic sachet ng shabu ay agad siyang sinunggaban ng mga operatiba ng DDEU.

Nakumpiska sa mga suspek ang humigi’t kumulang 60 grams ng hinihinalang shabu, na may estimated standard drug price na P408,000 at buy bust money. (Richard Mesa)

UPANG makapagbigay ng round-the-clock na medical at healthcare services sa mga residente, magtatag ang Pamahalaang Lungsod ng Valenzuela sa pamumuno ni Mayor Wes Gatchalian ng mga dalubhasang community health clinics na mag-ooperate, simula Lunes hanggang Linggo, umulan man o umaraw at maging sa panahon ng bakasyon.

Ayon kay Mayor WES, ang mga pasilidad na ito ay tatawaging “Sentro Health Hub” na mag-aalok ng malawak na hanay ng mga serbisyong medikal at pangangalagang pangkalusugan, kumpleto sa gamit at puno ng mga gamot at iba pang mga pangangailangan, na may mas komportableng mga pasilidad at amenities, na pamamahalaan ng isang pangkat ng mga medikal at propesyonal sa kalusugan sa lahat ng oras.

Sa una, limang naturang hub ang itatayo sa mga strategic na lokasyon sa buong lungsod para mas madaling mapuntahan ng mga Valenzuelanos. Bawat isa ay pamamahalaan ng dalawa hanggang tatlong pangkat ng mga tauhan ng medikal at pangangalagang pangkalusugan.

“Itong mga mga mega hubs na itatayo natin, bukas, maging sa mga holidays. “Naniniwala ako na ang healthcare ay para sa lahat, hindi ito para sa mga piling tao, para ito sa lahat.” ani Mayor WES.

Sa buong linggong operasyon nito, sinabi niya na ang mga Valenuelano na hindi nakakabisita sa mga barangay health center tuwing weekdays ay maaari na ngayong makapunta sa weekend at holidays.

Ang inisyatiba ng Sentro Health Hub ay bahagi ng kampanyang adbokasiya ng “This is life, Valenzuelife” ni Mayor WES na naglalayong mapabuti ang kalagayan ng pamumuhay sa lungsod. (Richard Mesa)

MAGPAPATUPAD ng tax amnesty si Manila Mayor Francisco “Isko Moreno” Domagoso sa lungsod.

Nabatid na nilagdaan na ni Moreno kahapon ang Ordinance No. 9118 na nagkakaloob ng general tax amnesty sa Maynila.

Alinsunod sa ordinansa, ang lahat ng delingkwenteng tax payers na mag-a-avail ng tax amnesty ay hindi na pagbabayarin ng multa at surcharges mula Hulyo hanggang Disyembre 31, 2025.

Sakop umano ng programa ang mga hindi nabayarang business taxes, delinquent real property taxes, ordinance violation receipts (OVRs), regulatory and service fees at local transfer taxes.

“Despite this situation, everyone in this city, gusto namin iparamdam sa inyo na ang gobyerno ng Lungsod ng Maynila ay nakapagpagaan ng katayuan sa hirap na kinakaharap ng marami nating kababayan na nagbabayad ng buwis,” ayon kay Moreno, sa isang Facebook post.

“Una sa mahinang negosyo, pangalawa sa hirap ng buhay dahil ang ekonomiya’y may mabigat na hamon sa lahat dahil sa nangyayari sa mundo. Mas minabuti naming unawain ang mamamayan at bigyan ng tamang pansin ang hirap na kinakaharap ng ating nasasakupan,” dagdag pa ng alkalde. (Gene Adsuara)

BILANG bahagi ng pagdiriwang ng Nutrition Month 2025, nagsagawa ng nutri-parade ang Pamahalaang Lungsod ng Navotas sa pamumuno ni Mayor John Rey Tiangco, katuwang ang mga barangay na may temang, “Food at Nutrition Security, Maging Priority! Sapat na Pagkain, Karapatan Natin!” (Richard Mesa)