SA kulungan ang bagsak ng 32-anyos na construction worker na wanted sa kaso ng pagpatay matapos maaresto sa isinagawang manhunt operation ng pulisya sa Malabon City.

Sa kanyang ulat kay Northern Police District (NPD) Acting Director P/BGen. Arnold Abad, sinabi ni Malabon Police OIC chief P/Col. Allan Umipig na pinaigting nila ang pagtugis sa mga wanted person sa lungsod, kabilang si alyas “Totoy Magic”, na nakatala bilang No. 1 Top Most Wanted Person sa NPD, ganun din sa Malabon CPS.

Nang makatanggap ng impormasyon ang mga operatiba ng Warrant and Subpoena Section (WSS) ng Malabon police na naispatan ang presensya ng akusado sa kanilang lugar, agad nilang ikinasa ang operation laban kay alyas Totoy Magic.

Dakong alas-2:10 ng hapon nang tuluyang makorner ng mga tauhan ni Col. Umipig ang akusado sa kanilang lugar sa Sitio 6, Barangay, Catmon, ng lungsod.

Hindi naman umano pumalag ang akusado nang bitbitin siya ng mga tauhan ng WSS sa bisa ng warrant of arrest na inisyu ng Malabon City Regional Trial Court (RTC) Branch 169, noong April 11, 2025, para sa kasong Murder na walang inirekomendang piyansa.

Pansamantalang nakapiit ang akusado sa Custodial Facility Unit ng Malabon CPS habang hinihintay ang pagpapalabas ng commitment order mula sa hukuman para sa paglilipat sa kanya sa City Jail. (Richard Mesa)

PORMAL nang inanunsyo ng Malakanyang ang pag-upo ng dating journalist at isang corporate communications executive na si Dave Gomez bilang bagong Kalihim ng Presidential Communications Office (PCO).

Pinalitan ni Gomez si dating PCO Sec. Jay Ruiz na inilagay bilang miyembro ng Board of Directors ng Manila Economic and Cultural Office (MECO).

Sa press briefing sa Malakanyang, sinabi ni Palace Press Officer at Presidential Communications Undersecretary Claire Castro na bitbit ni Gomez ang karanasan sa pamamahayag, government and corporate communications, isang senior reporter, at itinalagang director general ng Philippine Information Agency (PIA).

Tiniyak aniya ni Gomez ang makatotohanan at malinaw na ‘government messaging’ para sa bawat mamamayang Filipino.

Sa kabilang dako, si Atty. Sharon Garin naman ay itinalaga bilang Kalihim ng Department of Energy (DOE).

Ani Castro, Atty. Garin ay isang abogado at CPA na may malawak na pampublikong karanasan, naging kinatawan ng Iloilo at Usec. ng DOE na may matibay na karanasan sa enerhiya.

(Daris Jose)

ISANG technical site assessment ang isasagawa ng  Department of Justice (DOJ) sa pagtutulungan ng Philippine Coast Gua rd, PNP-CIDG  sa isang bahagi ng Taal Lake.

Ayon kay DOJ Assistant Secretary Mico Clavano, sinuri muna ng team ang kundisyon ng tubig sa lawa at ang area kung saan gagawin ang search and retrieval operation.

Pero ito ay depende pa rin umano sa kundisyon ng panahon kaya naman posibleng bukas, Hulyo 11 pa simulan ang search and retrieval operations ng mga technical divers ng Philippine Coast Guard (PCG).

Base umano sa nakalap nilang impormasyon mula kay alyas Totoy at sa iba pang mga credible na mga impormante  ay nasa 30 meters ang lalim ng lake o ng eksaktong area na kanilang isi-search.

Inatasan din si Coast Guard District Southern Tagalog Commander, Commodore Geronimo Tuvilla na pamunuan ang lahat ng tactical operation kabilang ang pagbibigay ng gabay sa kaligtasan ng mga tauhan at pagsaalang-alang sa kalikasan.

Sinabi pa ni Clavano na kumpiyansa naman sila pero kailangan pa rin na i-validate ang bawat impormasyon na kanilang natatanggap lalo pa ngayon na mayroon na silang lead at hawak na testigo, bukod pa sa marami nang lumalapit pa na ibang impormante.  (Gene Adsuara)

UMAPELA si Bacolod City Rep. Alfredo Abelardo “Albee” Benitez sa publiko na isantabi na sana ang isyu laban sa kanya matapos na magdesisyon ang Makati City Prosecutor’s na ibasura ang reklamo laban dito.

Ang panawagan ay ginawa ng mambabatas matapos na i-dismiss ng Makati Prosecutor ang kasong isinampa laban sa kanya ng dating asawa.

Sa resolution ng Makati City Prosecutor’s Office na ipinalabas nitong Hunyo 23, 2025, ang reklamo ni Dominic “Nikki’ Lopez laban kay Benitez sa paglabag ng Section 5(e) (2) and (1) ng Republic Act 9262 o Violence Against Women and their Children Act of 2004; ay ipinag-utos na i-dismiss dahil sa kakulangan ng ebidensiya o lack of merit.

Matapos ang masusing rebyu, nakita ng prosekusyon na walang basehan ang ikinaso laban sa mambabatas na economic abuse o psychological violence.

Walang ebidensiyang naipakita na sumusuporta sa alegasyon at hindi rin nito napunan ang legal standards para sa criminal prosecution.

Sa kabuuan ng proseso, nanatili aniya ang Kongresista na manahimik bilang respeto na rin sa kanyang pamilya at kumpiyansa sa legal system.

“This resolution confirms what I have maintained from the beginning—that the accusations were baseless and malicious. I ask that this matter now be laid to rest, and that innocent individuals, especially my children, be given the privacy to move forward away from this controversy,” pahayag ni Benitez. (Vina de Guzman)

INIHAYAG ni House prosecutor Batangas Rep. Gerville “Jinky Bitrics” Luistro na dapat ituloy ng Senado ang impeachment trial ni VP Sara Duterte, dahil ang proseso ay isang constitutional duty na hindi dapat maapektuhan ng public opinion.

“Well, I have said this earlier, regardless of the result of the survey, we have a constitutional duty that we really have to face. There is nothing which is more supreme than the Philippine Constitution. Sapagkat ito ang mandato ng taong bayan,” ani Luistro.

Anuman ang naging resulta ng survey, mataas man ang porsyento ng sumusuporta sa impeachment o mababa ay mandatoryo para sa kanila na ituloy ang pagsasagawa ng trial.

Ang pahayag ng mambabatas ay kasunod na rin lumabas na pinakabagong Social Weather Stations (SWS) survey kung saan 59% ng mga Filipino respondents ang boto sa impeachment complaint laban kay Duterte.

Sa mga na-survey, 42% ay hindi pabor sa complaint, 32% ang pabor at 18% ang undecided. Habang ang natitirang 7% ay nagsabing walang sapat na kaalaman sa para magbigay ng opinyon.

Lumitaw din sa June 25 to 29 survey na 44% ng respondents ang naniniwala na ang Senado, bilang impeachment court, ay sinasadyang dini-delay ang trial. Nasa 25% naman ang hindi niniwala dito at 22% ang undecided, at 9% ang ‘lacked sufficient knowledge to answer.’

Sinabi ni Duterte na ang impeachment complaint ay isang political persecution at harassment. Hinahanda na aniya ng kanyang legal team ang solidong argumento para maipabasura ang kaso.

Kontra naman si Luistro sa pahayag ni Duterte na nagsabing ang proseso ay dapat husgahan sa pamamagitan ng lakas ng ebidensiya at hindi political rhetoric.

“Kung walang ebidensiya, that is political prosecution. Pero kung may ebidensya, that is a legitimate prosecution. As far as we are concerned, we have ample and strong evidence supporting the seven Articles of Impeachment,”ani Luistro.

(Vina de Guzman)

UMABOT sa mahigit P.3 milyong halaga ng shabu ang nasamsam sa dalawang tulak ng droga na itinuturing bilang High Value Individual (HVIs) nang matiklo sa ikinasang buy bust operation sa Caloocan City, kahapon ng umaga.

Kinilala ni Caloocan Police OIC chief P/Col. Joey Goforth ang naarestong suspek na sina alyas “Bossing”, 23, mangingisda ng Ususan, at 24-anyos na tricycle driver, ng Hagonoy, kapwa ng Taguig City.

Sa kanyang report kay Northern Police Distict (NPD) Acting Director P/BGen. Arnold Abad, nagawa umanong makipagtransaksyon ng isa sa mga operatiba ng Station Drug Enforcement Unit (SDEU) sa mga suspek kaya ikinasa ng SDEU ang buy bust operation, sa koordinasyon sa PDEA.

Dakong ala-1:29 ng madaling araw nang makipagtagpo umano ang mga suspek sakay ng isang motorsiklo sa Phase 4, Package 4 St., Brgy. 176, Caloocan City at bintahan ng P6,500 halaga ng shabu ang isang pulis na nagpanggp na buyer na nagresulta sa pagkakaaresto sa kanila.

Nakumpiska sa mga suspek ang humigi’t kumulang 55 grams ng hinihinalang shabu na nagkakahalaga ng P374,000, buy bust money na binubuo ng isang P500 bill at anim P1,000 boodle money, at gamit nilang PCX motorcycle.

Sasamahan ng pulisya ang mga suspek ng kasong paglabag sa Sections 5, 11, at 26 ng Article II ng R.Act 9165 o ang Comprehensive Dangerous Drugs Act of 2002 sa pamamagitan ng Inquest Proceeding sa Caloocan City Prosecutor’s Office. (Richard Mesa)