BILANG paghahanda sa posibleng epekto ng Bagyong Crising, nagsasagawa na  ang Pamahalaang Lungsod ng Malabon ng pagbuo ng lahat ng kinakailangang mapagkukunan upang matiyak ang kaligtasan at kahandaan ng lungsod.

Isang pagpupulong ang ipinatawag ni Mayor Jeannie Sandoval mula sa grupo ng emergency  response ng lungsod at mga kinatawan ng iba’t ibang departamento kabilang  ang Malabon DRRMO, at iba pang national at lokal na ahensya.

Kabilang sa mga tinalakay ang mga komprehensibong estratehiya sa pagtugon at mga contingency measures sakaling maapektuhan ng bagyo ang ilang bahagi ng lungsod at upang matiyak ang maayos na komunikasyon sa pagitan ng mga ahensya ng pamahalaan upang maprotektahan ang mga residente sa anumang banta ng sakuna sa panahon ng malakas ng malakas na pag-ulan.

“Sa mga ganitong panahon, maipapakita at maipapamalas natin ang bayanihan, ang ating pagkakaisa para sa kapakanan ng lahat. Lahat ng kagamitan para sa kaligtasan ng mga Malabueño sa panahon ng mga sakuna ay inihanda na, pati na rin ang ating mga tauhan sa pagtugon sa sakuna. Binabantayan namin ang Bagyong Crising at ang posibleng epekto nito sa ating lungsod. Mangyaring makipag-ugnayan, makipagtulungan, at manatiling mapagbantay at handa upang matiyak ang mabilis at epektibong operasyon at ang inyong kaligtasan,” ani Mayor Jeannie.

Tiniyak naman ng MDRRMO sa publiko na ang kanilang Command and Communication Center, ay handa  upang  subaybayan ang lahat ng bahagi ng lungsod sa panahon ng masamang lagay ng panahon.

Nakipagpulong din ang MDRRMO sa mga konseho ng disaster risk reduction and management ng 21 barangay ng lungsod upang palakasin ang kahandaan at koordinasyon habang in-update naman ng pamahalaang lungsod ang mga lugar na madalas bahain at landslide-prone, kasama ang bilang ng mga pamilyang posibleng maapektuhan.

Nakahanda na rin ang mga sasakyang pang-rescue, bangka, mga sistema ng maagang babala, backup na kuryente at suplay ng tubig, kagamitan sa komunikasyon, at mga relief goods.

Bukod dito, 47 na evacuation center sa lungsod ang nakahandang tumanggap sakaling may mga pamilya na maaaring ilikas habang ipinaalala sa publiko na isasagawa ang sapilitang paglilikas kung kinakailangan, alinsunod sa City Ordinance No. 11-2012, na nagbibigay ng pahintulot para sa pre-emptive evacuation sa panahon ng mga emerhensiya.

Kaugnay nito, hinimok naman ni City Administrator Dr. Alexander Rosete ang mga Malabueño na manatiling mapagbantay at updated sa pamamagitan ng opisyal na social media channels ng lungsod.

Para naman sa agarang tulong, gamitin ng mga residente ang All Hazards One Network (AHON) Alert 24/7 Application o makipag-ugnayan sa Malabon Command and Communication Center sa 8921-6009 / 8921-6029 / 0942-372-9891. (Richard Mesa)

MATAGUMPAY nang naresolba ng Land Transportation Office (LTO), sa pamumuno ni Atty. Vigor D. Mendoza II at sa patnubay ni Department of Transportation (DOTr) Secretary Vince Dizon, ang backlog na naging suliranin ng pamahalaan sa loob ng halos isang dekada.

Pinalakas ng LTO ang produksyon ng mga plaka sa nakalipas na dalawang taon, at batay sa datos noong Hunyo 30 ng kasalukuyang taon, umabot sa kabuuang 18,578,612 ang nalikhang plaka na nagsilbing mahalagang hakbang upang tuluyang mabura ang naipong backlog mula pa noong 2014.

Si Asec. Mendoza mismo ang nangako kay Pangulong Marcos na lulutasin ang backlog sa plaka, sa isang pagpupulong sa Palasyo ng Malacañang noong nakaraang taon, matapos tiyakin ng Pangulo ang kanyang buong suporta para sa layuning ito.

Sa naturang pagpupulong, tiniyak ni Asec. Mendoza kay Pangulong Marcos na tuluyang matatapos ang backlog sa plaka pagsapit ng Hunyo 2025.

“Ang tagumpay na ito, na lumagpas pa sa inaasahan ng marami, ay bunga ng sama-samang pagsisikap, lalo na ng dedikasyon at tiyaga ng ating Plate Making Plant,” ani Acting Assistant Secretary at LTO Chief Atty. Greg G. Pua.

Nagsimula ang problema sa backlog ng plaka noong 2014 at lalo pang lumala dahil sa iba’t ibang factors, na nagresulta sa milyun-milyong pending na plaka para sa parehong motorsiklo at sasakyan.

Ngayon na natapos na ang napakalaking hamong ito, sinabi ni Pua na sisimulan na ng LTO ang mas mabilis na paghahatid ng mga plaka sa mga motorista na naapektuhan ng backlog.

“Sa ngalan ng buong Team LTO, taus-puso po kaming nagpapasalamat kay Pangulong Marcos sa kanyang buong suporta at pagtutok upang maresolba ang problemang ito, at kay Secretary Dizon sa kanyang mahahalagang mungkahi na nakatulong upang mapabilis ang aming trabaho,” ani Pua.

“At ngayong naisakatuparan na ang gawaing ito, sinisiguro namin sa milyon-milyong kliyente ng LTO na bibilisan din namin ang proseso ng pamamahagi ng mga plaka, at patuloy kaming hahanap ng paraan upang ito ay maisagawa ng mas epektibo,” dagdag pa ni Pua.

Batay sa pinakahuling datos, mahigit pitong milyong plaka na ang naipamahagi sa kani-kanilang mga may-ari. (PAUL JOHN REYES)

MAS pinalakas ng National Capital Region Police Office (NCRPO) ang paghahanda, dalawang linggo bago ang ika-apat na State of the National Address ni Pangulong Ferdinand Marcos Jr., sa pagsasagawa ng civil disturbance management competition nitong umaga ng Huwebes, Hulyo 17.

Ang pagsasanay habang may hawak na shields ang kapulisan ay sumabak sa iba’t ibang chaotic at peace scenarios para sa pagtugon sa posibleng kaliwa’t kanang protesta, na ginanap sa Camp Bagong Diwa, sa Taguig.

Ang event ay dinaluhan ni Philippine National Police (PNP) Chief Gen. Nicolas D. Torre Ill, upang masiguro na handa na ang mga pulis sa posibleng gulo kabilang ang mga protesta sa SONA.

“In all these scena­rios, iisa ang ating iisipin, kung puwede natin ide-escalate ang situation para hindi umabot sa paggamit ng puwersa, sa paggamit ng lakas ay gagawin natin,” ani Torre.

Nasa 12,000 hanggang 13,000 tauhan ng NCRPO ang ipakakalat sa seguridad ng SONA.

Sa ngayon aniya, walang anumang “probable threat” ang kanilang na-monitor.

HINDI inalintana ni Filipino boxing icon Manny Pacquiao ang init na panahon para makapag-ensayo sa Las Vegas.

Nagsagawa ito ng shadow boxing at ab workout sa Raiders training facility sa Las Vegas.

Sa labas naman ng gym ay bahagyang nag-jogging ito ilang mga outdoor exercise.

IIan lamang ito sa huling workout na isasagawa ni Pacquiao ilang araw bago ang laban kay Mario Barrios na gaganapin sa araw ng Sabado.

Pinangunahan ng beteranong boxing coach Freddie Roach ang nagsasanay kay Pacquiao.

Pinagbigyan naman ng Pinoy boxing icon ang ilang mga fans niya na nag-abang sa labas ng gym para makapagpapicture.

Samantala,  nasa Las Vegas Nevada na ang pamilya Paquiao, ilang araw bago ang nakatakdang laban ng nag-iisang 8-Division world champion sa Hulyo-20.

Kasama ni Manny ang kanyang maybahay na si Jinkee at ang kanilang limang anak. Sa isang post sa kanyang social media account, tinukoy ng Filipino boxing legend ang pamilya bilang pinakamahalaga sa lahat, bagay na kaniya umanong ikinagagalak na makumpleto silang lahat sa Vegas.