NAKIUSAP si Education Secretary Juan Edgardo Angara sa publiko lalo na sa mga magulang na huwag i-presyur ang lokal na pamahalaan na magsuspinde ng klase kahit mahina ang ulan.

Ang katuwiran ng Kalihim, may masamang epekto sa pag-aaral ng mga estudyante ang madalas na kanselasyon ng pasok.

“Nakikiusap din kami sa publiko, mga magulang, mga estudyante, huwag natin masyadong i-pressure ang ating local government, chief executives na konting ulan mag-suspend na tayo. Dahil ‘pag sinumatotal natin ang nawawalang araw, malaki ang dagok o tama sa ating mga estudyante, yung tinatawag na learning loss,” ayon kay Angara.

Dahil dito, inatasan ng Department of Education (DepEd) ang mga paaralan na magsagawa ng make-up classes upang matiyak na makukumpleto pa rin ng mga estudyante ang kinakailangang oras sa pag-aaral.

“Yung ini-emphasize namin that there must be make-up classes kasi matindi na yung learning loss talaga. Apektado ang bata pag masyadong maraming cancellation,” anito.

Aniya, hindi naman kailangang na gawin ang make-up sessions tuwing weekends.

“Saturday or after school kung kailan. Depende rin sa availability ng guro,” aniya pa rin.

Winika ito ni Angara sa gitna ng lumalalang academic performance ng mga mag-aaral, partikular sa pagbabasa at matematika.

Aniya, pinalalakas ng DepEd ang mga intervention sa pamamagitan ng ARAL Program, na nagbibigay ng personalized na tutorial at remediation sessions.

“Well it’s still quite significant especially sa literacy at math. So we’re addressing it this year with the Aral program. Nakita natin na very effective yung pagbibigay ng personalized tutorials,” ang sinabi ng Kalihim.

Samantala, pinasalamatan naman ni Angara si Pangulong Ferdinand Marcos Jr. dahil sa suporta nito sa mga reporma sa edukasyon, kabilang ang pinalawak na feeding program, pagkuha ng mas maraming guro, karagdagang silid-aralan, at pagkuha ng non-teaching staff para maibsan ang pasanin sa mga guro.

Sa katunayan, sa inilunsad na Expanded School-Based Feeding Program na ginanap sa Antipolo, opisyal na sinimulan ang pinalawak na inisyatibo na layong maabot ang libu-libong mag-aaral sa kindergarten sa buong bansa.

Tinuran ni Angara, pinalawak na ang feeding program para tumagal ng 120 araw at saklawin ang lahat ng estudyante sa kindergarten sa buong bansa na unang beses na gagawin na kasama ang lahat.

“Nasa 120 days na tayo. At the first time universal feeding, ibig sabihin lahat ng bata sa kindergarten ay kasama sa feeding program this year. Dahil yun talaga ang instruction sa amin ni Secretary Ted Herbosa ni Pangulong Marcos na palawigin, palawakin, palalimin itong school feeding program natin,” aniya pa rin.

“Dati parang nasa 30-60 days lang. So ngayon umabot tayo ng 120 days,” ayon pa rin kay Angara. ( Daris Jose)

Para sa araw ng Miyerkules, Hulyo 23: Pasok sa trabaho sa gobyerno at klase sa lahat ng antas, sinuspinde ng Malakanyang

MULING sinuspinde ng Malakanyang ang pasok sa trabaho sa gobyerno at klase sa lahat ng antas sa Metro Manila, Pangasinan, Zambales, Tarlac, Bataan, Pampanga, Bulacan, Cavite, Batangas, Rizal, Occidental Mindoro, Ilocos Norte, Ilocos Sur, La Union, Quezon, Oriental Mindoro, Marinduque, Romblon, Masbate, Sorsogon, Albay, Camarines Sur, Catanduanes, Palawan, Antique, Aklan, Capiz, Iloilo, Guimaras, Abra, Mountain Province, Ifugao, Benguet, Nueva Vizcaya, Nueva Ecija, Laguna at Negros Occidental, araw ng Miyerkules, Hulyo 23, 2025.

Ito’y bunsod na rin ng patuloy na pagbuhos ng malakas na ulan na dala ng Southwest Monsoon.

Ang suspensyon sa trabaho sa gobyerno at klase sa lahat ng antas ay batay sa rekomendasyon ng National Disaster Risk Reduction and Management Council (NDRRMC).

Nakasaad sa Memorandum Circular No. 90 na inilabas ngayong araw ng Martes, Hulyo 22, tinintahan ni Executive Secretary Lucas Bersamin, na ang mga ahensiya na responsable sa ‘basic, vital at health services’, paghahanda at mga tungkulin sa pagtugon ay dapat na magpatuloy at manatiling operational upang matiyak na nagpapatuloy ang mahahalagang ginagawa ng gobyerno sa kabila ng nasabing deklarasyon ng work suspension.

“Non- vital government employees of subject agencies and all other government employees may be negaged under approved alternate work arrangements, subject to applicable law, rules and regulations,” ayon sa MC No.90.

Sa kabilang dako, ang localized cancellation o suspensyon ng klase at/ o trabaho sa mga tanggapan ng gobyerno sa ibang rehiyon ay maaaring ipatupad ng kani-kanilang Local Chief Executive, alinsunod sa kaugnay na batas at rules and regulations.

Samantala, ipinauubaya naman na ng Malakanyang ang suspensyon ng trabaho sa pribadong kompanya at tanggapan sa diskresyon ng kani-kanilang pinuno.

Ang nasabing circular ay kagyat na magiging epektibo. ( Daris Jose)

TINIYAK ni Defense Secretary Gilberto Teodoro Jr. sa publiko na ang gobyerno ay ‘fully engaged’ sa disaster response operations sa gitna ng patuloy na pananalasa ng monsoon rains dahilan para magbaha sa ilang bahagi ng Luzon at Visayas.

Si Teodoro, chairman ng National Disaster Risk Reduction and Management Council (NDRRMC), nagpahayag na nananatili at patuloy ang kanyang komunikasyon sa NDRRMC at sa Office of Civil Defense (OCD) sa kabila ng siya ay nasa Estados Unidos bilang bahagi ng delegasyon ni Pangulong Ferdinand R. Marcos Jr.

“Ako po’y binilinan constantly ng ating Presidente, bago pa man ako umalis, na bantayan maigi ang relief efforts, rescue efforts at iba pang coordinated responses ng ating gobyerno,” ang sinabi ng Kalihim.

Aniya pa, inatasan na niya ang Armed Forces of the Philippines (AFP) na makipagtulungan sa US Indo-Pacific Command para paganahin ang Enhanced Defense Cooperation Agreement (EDCA) sites sa bansa para sa ‘rescue and relief operations.’

Nilagdaan noong 2014, ang EDCA ang nagbigay pahintulot para sa mga Filipino at American soldiers na magsanay nang magkasama at payagan ang Estados Unidos na magtayo ng pasilidad at preposition supplies, at equipment sa loob ng estratehikong lokasyon ng mga base sa bansa.

Sa kasalukuyan, mayroong 9 na EDCA sites sa bansa, ang Cesar Basa Air Base in Floridablanca, Pampanga; Fort Magsaysay Military Reservation sa Nueva Ecija; Lumbia Airport sa Cagayan de Oro; Antonio Bautista Air Base sa Puerto Princesa, Palawan; Benito Ebuen Air Base sa Cebu; Naval Base Camilo Osias sa Sta. Ana, Cagayan; Lal-lo Airport sa Lal-lo Cagayan; Camp Melchor Dela Cruz sa Gamu, Isabela; at Balabac Island sa Palawan.

“Nandiyan na rin po ang Japan at iba pang mga kaalyado natin,” ayon kay Teodoro.

“Dito po makikita ng ating taumbayan ang benepisyo ng pakikipag-ugnayan ng mga armed forces para makaligtas ang ating taumbayan laban sa mga hamon ng kalikasan,” aniya pa rin.

Sa kabilang dako, kinumpirma rin ni Teodoro na mayroon nang koordinasyon kay Social Welfare Secretary Rex Gatchalian, pagtiyak na ang mga relief goods ay naka- preposition na sa vulnerable areas.

“Umasa po kayo na 24/7 nakatutok ang ating Pangulo,” anito.( Daris Jose)

ANIM na katao ang napaulat na nasawi dahil sa Tropical Cyclone Crising, Southwest Monsoon o Habagat, at low pressure area (LPA).

Sa naging pag-uulat ng National Disaster Risk Reduction and Management Council (NDRRMC), sinabi nito na, ‘as of 6 a.m., araw ng Martes, may tatlong napaulat na nasawi sa Northern Mindanao at isa Mimaropa, isa sa Davao Region, at isa sa Caraga.

Dalawa lamang mula sa anim na napaulat na nasawi ang kumpirmado sa ngayon, ayon sa NDRRMC.

Sa Barangay Poblacion sa Mambajao, Camiguin, ang biktima ay tinamaan ng bumagsak na puno noong Hulyo 19. Dinala siya sa ospital subalit idineklarang nasawi dahil sa trauma secondary sa external injury.

Sa Barangay Matin-ao sa Mainit, Surigao del Norte, isa pang biktima ang nakasakay sa motorsiklo mula sa bahay ng kanyang kaibigan nang may isang puno ang bumagsak at tumama sa kanya.

Sinabi ng NDRRMC na may limang katao ang napaulat na nasugatan at anim naman ang nawawala sa gitna ng masungit na panahon.

May kabuuang 1,266,322 katao o 362,465 pamilya ang apektado ng Crising, Habagat, at LPA sa lahat ng rehiyon sa bansa maliban sa Eastern Visayas.

Ang pagbaha, landslides, pagbagsak o pagguho ng mga istraktura at mga buhawi ay naiulat sa ilang apektadong lugar.

Sa mga apektadong populasyon, may 17,116 katao o 4,991 pamilya ang nananatili sa evacuation centers habang 65,219 katao o 14,524 pamilya ang nanunuluyan sa ibang lugar.

May kabuuang 1,501 bahay ang napinsala. May 348 ang totally damaged habang 1,153 naman ang partially damaged.

Ang pinsala naman sa imprastraktura ay nagkakahalaga ng P413,020,214 at sa agrikultura ay nagkakahalaga ng P54,067,336 ang iniulat, ayon sa NDRRMC.

Idineklara naman ang state of calamity sa Umingan, Pangasinan.

“Assistance worth P61,310,374 has been provided to the victims so far,” ayon sa NDRRMC. ( Daris Jose,)

BIBIGYAN ng bagong bihis ni Pangulong Ferdinand R. Marcos Jr. ang Presidential Legislative Liaison Office (PLLO).

Sa katunayan, nagpalabas ang Pangulo ng Executive Order (EO) 90, na nagsasad na ire-reorganisa ang PLLO at gawing simple at makatwiran ang trabaho nito alinsunod sa ‘rightsizing policy’ ng administrasyon.

Ayon sa EO 90 na nilagdaan ng Pangulo noong July 16, ang PLLO ay ilalagay sa ilalim ng superbisyon at kontrol ng Office of the Executive Secretary (OES) bilang isa sa delivery units ng Office of the President (OP) Proper.

Dahil dito, inaalis na ng kautusan ang posisyon ng Presidential Adviser on Legislative Affairs (PALA).

“The PLLO shall be headed by an Undersecretary who shall be assisted by two Assistant Secretaries, one for the Senate and one for the House of Representatives,” ang nakasaad sa EO.

Tinukoy ng EO 90 ang pangangailangan na i-reorganize ang PLLO upang magawa ng tanggapan na “to more effectively and efficiently deliver the President’s legislative agenda for the country.”

Ang makabuluhang mandato ng Administrative, Financial, and Management Division ng PLLO ay gagawin ng Office of the Deputy Executive Secretary for Finance and Administration (ODESFA) at ng Office of the Deputy Executive Secretary for Support Services and Auxiliaries (ODESSSA), sa oras na maging epektibo na ang kautusan.

“For this purpose, and in accordance with their respective mandates, the ODESA and ODESSA shall ensure the proper turnover of records, properties, and resources of the PLLO to the OP Proper, subject to relevant laws, rules, and regulations,” ang sinabi ng kautusan.

Pinahihintulutan naman ng EO 90 ang Executive Secretary na i- assess at suriin ang ‘organizational structure, staffing pattern, at corresponding qualification standards” para sa lahat ng posisyon sa PLLO.

Maaari ring magpatupad ang Executive Secretary ng ‘personnel actions at reorganization measures’ at maging lumikha ng ‘organizational structure at staffing pattern’ ng PLLO.

Magpapatuloy naman ang PLLO at mga nananatiling tauhan nito na mag-operate at kumilos sa ilalim ng umiiral na mandato, “in the exigency of service, and pending approval of the new organizational structure and staffing pattern,” base sa EO 90.

Ang pondong kailangan para sa implementasyon ng Kautusan ay huhugutin mula sa budget ng PLLO, “subject to relevant budgeting, accounting, and auditing rules and regulations.”

Ang susunod na funding requirements ay isasama sa budget proposal ng OP, isasailalim sa karaniwang budget preparation process.

Ang PLLO ay itinatag noong 1987 para i-promote ang presidential initiatives, umakto bilang conduit o daluyan sa pagitan ng OP at mga indibiduwal na miyembro ng Kongreso, magsilbi bilang Presidential Adviser on Legislative Affairs, at i-monitor ang progreso ng Administration bills.

Sa bisa ng Memorandum Order 3 na ipinalabas noong 1998, ang PALA, may ranggo na Kalihim, ay nilikha para pamunuan ang PLLO.

Taong 2022, ipinalabas ang EO 11, inilagay ang PLLO sa ilalim ng superbisyon at kontrol ng Special Assistant to the President bilang bahagi na gawing simple ang administrative structure ng OP.

Sa kabilang dako, ang pinakabagong direktiba ay inilabas matapos na magsumite ng kanyang resignation letter si PLLO head at PALA Secretary Mark Llandro Mendoza noong Mayo ngayong taon, sa gitna ng pagsisikap na i-recalibrate ang administrasyong Marcos.

Ang EO 90, isinapubliko araw ng Biyernes ay kaagad na magiging epektibo.

(Daris Jose)

IGINIIT ng Malakanyang na nananatiling ligtas ang bansa para sa mga dayuhang estudyante.

Ito’y sa kabila ng kinikilala at tanggap ng Pilipinas ang karapatan ng Tsina na magpalabas ng security alert para sa mga Chinese students kung saan kinokonsidera na mag-aral sa Pilipinas.

Tinukoy ni Palace Press Officer at Communications Undersecretary Claire Castro ang bumababang crime rate, kabilang na ang mga krimen na may kaugnayan sa war on drugs at operasyon ng Philippine Offshore Gaming operators (POGO).

“Ang kanilang advisory sa kanilang mga kababayan ay karapatan naman po nila. Obligasyon din naman po nilang pangalagaan ang kanilang mga kababayan,” ang sinabi ni Castro.

“Pero as far as the government is concerned, alam po natin na ang crime rate sa Pilipinas ay gumaganda at bumababa,” dagdag na wika nito.

Tinukoy din ni Castro ang mas mabilis na pagtugon ng kapulisan sa mga alalahanin ng mga mamamayan sa krimen.

Binigyang diin din ni Castro ang mga krimen na iniuugnay sa war on drugs ng nakalipas na administrasyon ay “decreased or disappeared,” at maging ang krimen na iniuugnay sa POGOs.

“A number of Chinese nationals, who were involved in the operations of POGO in the country, have also been deported,” ani Castro.

Gayundin, tinukoy din ni Castro ang naging ranking ng bansa sa 2025 Global Peace Index, na “indicates that safety and security in the Philippines is getting better—as far as we are concerned.”

“So ang pananaw po ng China ay ganun, hindi naman po natin ito hahadlangan dahil karapatan po nila ‘yan,” aniya pa rin.

Samantala, tiniyak din ni Castro na “everyone, not just Chinese nationals, will be given protection” habang ang mga ito ay nasa bansa.

Nauna rito, naglabas ng safety advisory ang gobyerno ng China kaugnay ng umano’y lumalalang sitwasyong panseguridad sa Pilipinas.

Ayon sa Ministry of Education ng China, pinayuhan ang mga estudyanteng balak mag-aral sa bansa na suriing maigi ang mga posibleng panganib at magdoble-ingat.

Kasunod daw ito ng mga naiulat na insidente ng krimen, kamakailan na kinasasangkutan ng ilang Chinese nationals.

Sa ngayon, wala pang pormal na tugon mula sa gobyerno ng Pilipinas tungkol sa advisory ng China. (Daris Jose)

BUKAS si Pangulong Ferdinand R. Marcos Jr. sa “makabuluhang” suhestiyon ng Office of the Vice President (OVP).

Ito’y matapos na sabihin ni OVP spokesperson Ruth Castelo na ang panatilihin na hindi bigyan ng pondo si Vice President Sara Duterte para sa mga proyekto at mga programa ng OVP ay isang “a great disservice to the country.”

“Kung anuman po ang suhestiyon na makabuluhan, magandang suhestiyon na magmumula sa OVP, hindi po ito tinatanggihan at hindi po sinasara ng Pangulo ang pintuan sa Bise Presidente,” ang naging pahayag ni Press Officer at Presidential Communications Undersecretary Claire Castro sa press briefing sa Malakanyang.

“Lahat po ng maaaring suhestiyon na makabuluhan ay tatanggapin po iyan kung ito naman po ay makakatulong sa taumbayan,” aniya pa rin.

Gayunman, sinabi ni Castro, na nakalulungkot na si VP Sara mismo ang nagsabi na hindi niya tutulungan ang administrasyong Marcos kahit pa binanggit nito na may alam siyang “formula” para bawasan ang presyo ng bigas.

Ani Castro, nakahandang makinig si Pangulong Marcos sa suhestiyon ng OVP para mas mapabuti ang bansa , subalit mas pinili ni VP Sara na hindi makipagtulungan.

“So, hindi po nanggagaling sa Pangulo o sa administrasyon na ito ang pagharang sa kaniyang mga gustong gawin para sa taumbayan,” ayon kay Castro.

Sa kabilang dako, itinanggi naman ni Castro na may kamay si Pangulong Marcos sa pagtapyas sa budget ng OVP para sa 2025, sinabi ni Castro itinaas pa nga ng Department of Budget and Management (DBM) ang budget ng OVP ng P170 million hanggang P903 million para sa 2026.

Humirit kasi ang OVP ng budget na P2.03 billion para sa 2025, subalit binawasan naman ng Mababang Kapulungan ng Kongreso ang appropriations sa P733 million dahil sa pagtanggi ni VP Sara na sagutin ang mga tanong ng mga mambabatas ukol sa budget utilization ng kanyang tanggapan.

Ang inisyal na panukalang budget ng OVP ay P733 million para sa 2026, tumutugma ito sa kanilang 2025 allocation.

“Kung anuman po ang naging desisyon ng House of Representatives, ng Congress ay hindi na po ito saklaw ng Pangulo,” ayon kay Castro.

“Mas mabuti po siguro, kung gusto, nais niya po ng mas malaking budget, katulad ng isang estudyante, kung meron kayong thesis na gustong idepensa, idepensa niyo po ng maayos para kayo’y mapagbigyan,” aniya pa rin. (Daris Jose)

TINIYAK ni Pangulong Ferdinand Marcos Jr., sa publiko na ipagpapatuloy ng gobyerno ang pagpo-produce ng physical national ID cards, kahit pa pinabilis na nito ang digitalization efforts sa pamamagitan ng eGovPH Super App.

Inihayag ito ng Pangulo matapos pangunahan ang paglulunsad ng eGovPH Super App, kung saan ang digital copy ng National ID ay maaaring matagpuan, sa San Juan City.

Sa naging pahayag ng Pangulo, tiniyak ng Pangulo sa publiko na habang ang digital services ay prayoridad para ma-meet ang demands ng modern governance, ang produksyon at distribusyon ng physical IDs ay mapapatuloy upang masiguro ang accessibility para sa lahat ng sektor.

“May sektor pa rin ng ating lipunan na nag-i-insist doon sa physical ID. So, isusunod na namin yun,” ayon sa Pangulo.

Winika ng Pangulo na ang digital version ng national ID ay kasalukuyang prayoridad dahil sa malawak na gamit nito sa online transactions.

“Inuna namin yung digital dahil siyempre iyon talaga ang pinaka-nagagamit, ang paliwanag ng Pangulo.

Tinuran ng Pangulo na may 88 milyong Filipino ang nakakuha na ng kanilang digital national ID.

Napatunayan aniya na ang digital ID ay mahalaga para sa pag-access ng serbisyo na isinama sa eGovPH Super App, isang one-stop mobile platform na dinisenyo para gawing simple ang mga government transaction.

“With the digital ID, we are able to do all of the things that the eGov app is able to do,” ang sinabi ni Pangulong Marcos.

“You can do all that in the comfort of your own home, in your office, or you know, while you’re playing Candy Crush,” aniya pa rin.

Samantala, sa pinakabagong data mula sa Philippine Statistics Authority (PSA), makikita na 93.48 milyong pinoy ang nakarehistro para sa national ID, mula sa kabuuang populasyon na 112.7 milyon.

‘As of June 6’, iniulat ng PSA ang delivery o paghahatid ng 54.91 milyong physical national ID cards. (Daris Jose)