UMABOT na sa P500 milyon ang halaga ng pinsala sa mga imprastraktura dulot ng bagyong Crising at Habagat, sinabi ng Department of Public Works and Highways (DPWH).

Sinabi ng DPWH na ang partial cost ng pinsala sa imprastraktura ay tinatayang nasa P526.81 milyon sa Westerm Visayas at Negros Island Region .

Kabilang dito ang pinsala sa national roads, tulay at flood control structures na halagang P195.52 milyon at P322.25 milyon, ayon sa pagkakasunod.

Ayon sa DPWH, ang nasabing halaga ay dadaan pa rin sa field validation. (Gene Adsuara)

IBUBUKOD na ang mga nakatatandang Persons Deprived of Liberty o PDL’s sa Manila City Jail.

Ito ay upang mapangalagaan ang mga nagkakaedad nang bilanggo kaya naman nilaanan sila ng pasilidad na tinawag na “Celda Sesenta’ sa male dormitoy .

Isinagawa ang blessing at pagbubukas ng Celsa Sesenta para sa mga PDL na edad 60 pataas, ayon kay JO2 Joan Sta. Ana, ang Chief Community Relations Service.

Ang bagong tayong pasilidad ay para lamang sa mga Senior Citizen Persons Deprived of Liberty (PDL) sa ilalim ng inisyatiba ni Supt. Lino M. Soriano upang matiyak ang kaligtasan, kalusugan at dignidad ng mga nakatatandang PDL.

Napag-alaman na 96 na senior citizen na PDL ang kayang i-accommodate sa Celda Sesenta na may bed bunks, living room o mess hall.

May nurse station din na pangangasiwaan ng BJMP Personnel Jail Nurse at mga jail nurse aide na PDL  at may eksklusibo ring wellness and care programs para sa mga nakatatanda.

Ayon kay Supt. Soriano ang Celda Sesenta ay naaayon sa BJMP J.A.I.L. Plan 2040, patungkol sa wastong klasipikasyon at pangangasiwa ng mga PDL na may natatanging pangangailangan. (Gene Adsuara)

UMABOT sa halos P.1 milyong halaga ng shabu ang nasamsam sa tatlong hinihinalang tulak ng illegal na droga matapos matimbog ng pulisya sa magkahiwalay na buy bust operation sa Malabon City.

          Ayon kay Malabon Police OIC chief P/Col. Allan Umipig, sa koordinasyon sa PDEA, ikinasa ng mga operatiba ng Station Drug Enforcement Unit (SDEU) ang buy bust operation laban sa magkapitbahay na tulak na sina alyas “Aries”, 28, at alyas “Jerome”, 26, tricycle driver at kapwa ng Brgy. Tañong.

          Dakong alas-11:30 ng gabi nang makipagtransaksyon umano ang mga suspek sa isang pulis na nagpanggap na buyer sa kanto ng Sacristia at Matahong Streets, Brgy. San Agustin, na nagresulta sa kanila.

          Nakumpiska sa mga suspek ang humigi’t kumulang 7 grams ng hinihinalang shabu na nagkakahalaga ng P47,600 at buy bust money.

          Nauna rito, nasakote naman ng kabilang team ng SDEU sa buy bust operation sa kanto ng Pasco at Mesina Streets, Brgy. Tonsuya si alyas “Bob”, 51, matapos bintahan ng shabu ang isang pulis na nagpanggap na buyer alas-2:30 ng madaling araw.

          Nasamsam sa kanya ang nasa 6.7 gramo ng umano’y shabu na may standard drug price value na P45,560 at buy bust money.

          Mahaharap ang mga suspek sa kasong paglabag sa R.A 9165 o ang Comprehensive Dangrous Drug Act of 2002.

          Pinuri naman ni Northern Police District (NPD) Acting District Director P/BGen. Jerry Protacio ang mga operatiba ng Malabon police sa kanilang pagsisikap sa paglaban sa illegal na droga. (Richard Mesa)

DAHIL sa patuloy na pagbuhos ng malakas na ulan na dala ng Habagat, lumubog sa tubig baha ang ilang lugar sa mga Lungsod ng Caloocan, Malabon, Navotas at Valenzuela (CAMANAVA).

Dahil dito, nagsuspende ng afternoon classes, Lunes, July 21, ang Local Government Unit (LGUs) ng CAMANAVA para sa kaligtasan ng mga mag-aaral.

          Sa Caloocan, inirekomendas ng City Disaster Risk Reduction Management Department (CDRRMD) na kanselahin ang panghapon na mga pasok sa eskuwela sa lahat ng antas sa mga pribado at pampublikong paaralan sa lungsod ngayong.

Tiniyak naman ni Mayor Along Malapitan na ligtas na makakauwi ang mga mag-aaral at para aniya sa oras ng emergency, 24/7 handang tumugon ang Alert and Monitoring Operations Center at tumawag lamang sa (02) 888-25664 o 0908-81-25664.

Suspendido din ang face-to-face afternoon classes sa lahat ng antas sa mga pampubliko at pribadong paaralan sa Lungsod ng Malabon kaya pansamatalang ipapatupad ang Alternative Delivery Mode sa mga paaralan.

Pinayuhan naman ni Mayor Jeannie Sandoval ang lahat na manatiling nakatutok sa mga mahahalagang impormasyon o anunsiyo ukol sa lagay ng panahon, maging alerto sa anumang oras at mag-ingat ang lahat para sa kaligtasan habang patuloy naman sa pag-iikot ang libreng sakay ng pamahalaang lungsod para matulungan ang stranded na commuters.

          Inirekomenda din ng Navotas City Disaster Risk Reduction and Management Office at ng Schools Division Office-Navotas ang pagkansela sa afternoon in-person classes sa lahat ng antas ng pampubliko at pribadong mga paaralan sa lungsod.

Ayon kay Mayor John Rey Tiangco, magsasagawa ng asynchronous o modular learning para matiyak na tuloy pa rin ang pagkatuto ng mga mag-aaral habang pinayuhan din niya Navoteños na maging alerto at sundan ang mga opisyal na anunsyo mula sa mga paaralan, lungsod, at iba pang kaukulang ahensya.

Bandang alas-10:45 naman ng umaga nang i-anunsyo ng Valenzuela LGU ang pagsunpende sa online at in-person classes sa lahat ng antas ng pampubliko at pribadong paaralan sa lungsod.

Pinayuhan naman ni Mayor Wes Gatchalin ang lahat na maging alerto sa lahat ng oras lalo na ang malalapit sa lugar na mabilis tumaas ang tubig baha at agad aniyang lumikas kung kinakailangan para sa kaligtasan ng lahat. (Richard Mesa)

TINIYAK ni Pangulong Ferdinand R. Marcos Jr. sa publiko na pinagana na ng national government ang lahat ng kaugnay na ahensiya para tumugon sa malawakang pagbaha sanhi ng southwest monsoon o “habagat.”

Sa isang recorded message mula Washington, DC, isinapubliko, gabi ng araw ng Lunes, sinabi ng Pangulo na ipinag-utos na niya sa pinakamahalagang mga ahensiya ng gobyerno na maghanda bago pa ang matinding ‘weather conditions’ at tiyakin na ang kinakailangang tulong at serbisyo ay makaaabot sa mga apektadong komunidad.

Tinuran pa ng Pangulo na ang Office of Civil Defense, Department of Transportation, Department of Health, Department of Science and Technology, Department of Social Welfare and Development, Department of Public Works and Highways, Department of Energy, at Department of the Interior and Local Government ay pinakilos at inatasan na mag-ugnayan sa isa’t isa.

Idineploy naman ang relief goods at medical teams sa mga apektadong lugar, habang ang mga kritikal na kagamitan gaya ng tubig, elektrisidad, at transport services ay siguruhin.

“Nandito kami lagi upang magbigay ng lahat ng serbisyo na kailangan sa harap ng hamon ng climate change,” ayon kay Pangulong Marcos.

Hinikayat naman niya ang publiko na manatiling naka-alerto, sumunod sa weather updates, at makinig sa mga instructions mula sa local government units upang masiguro ang kanilang kaligtasan.

“Siguraduhin natin mas lalo pang mapalakas ang kakayahan ng pamahalaan na tumugon sa ganitong klaseng sitwasyon,” aniya pa rin.

Samantala, ang Pangulo ay nasa Washington, DC mula July 20 hanggang 22 para sa isang official visit dahil na rin sa imbitasyon ni US President Donald Trump para lumalim pa ang Philippine-US bilateral ties sa ‘defense, trade, at climate resilience.’ ( Daris Jose)

NAGLUNSAD ang Local Government Unit (LGUs) ng Caloocan, Malabon, Navotas at Valenzuela ng disaster response at rescue operations sa iba’t ibang barangay na kanilang nasasakupan na lubos na naapektuhan ng baha dahil sa tuloy-tuloy na pagbuhos ng ulan na dala ng ‘Habagat’.

Sa Caloocan, hindi alinta ng mga tauhan ng CDRRMO ang malakas na agos ng tubig sa Aquarius St., Gremville, Brgy. 165, para ma-rescue ang mga pamilyang nangangailangan ng tulong, kabilang ang inanod na sasakyan sa Doña Aurora, Brgy. 177.

Bumisita naman para maghatid ng tulong na mga pagkain si Mayor Along Malapitan sa may 930 mga pamilyang dinala sa iba’t ibang evacuation centers sa lungsod.

Sa Malabon, nagdeploy ng 121 trained personnel ang MDRRMO, katuwang ang Bureau of Fire Protection–Malabon, Philippine Coast Guard, at barangay officials para maglunsad ng rescue operations at pre-emptive at forced evacuations sa iba’t ibang barangay na may mataas na tubig baha, patikular sa Barangays Tinajeros at Potrero.

Personal ding binisita ni Mayor Jeannie Sandoval para kamustahin at magbigay ng food packs sa may 685 na mga pamilya na dinala sa iba’t ibang evacuation centers sa lungsod habang 24/7 namang nakasubaybay ang Malabon Command and Communication Center dahil nasa ilalim pa rin ng ‘Red Alert’ status ang lungsod at nagpapatuloy pa rin ang ‘Libreng Sakay’ na aagapay sa mga stranded na communters.

Hinimok rin niya ang mga residente na makipagtulungan sa panahon ng paglikas para sa kaligtasan ng kanilang mga pamilya.

“Manatili po tayong nakahanda, at kalmado. Handa po ang ating mga kagamitan at ang mga personnel upang umalalay sa panahong kagaya nito. Ngunit kakailanganin po natin ang inyong kooperasyon lalo na kung mayroong baha sa inyong lugar,” pahayag ni Mayor Jeannie.

Ayon naman sa Navotas Public Information Office, as of 2pm, July 22, 2025, may 181 mga pamilya ang namamalagi sa iba’t ibang evacuation centers sa Navotas City kung saan personal silang binisita ni Mayor John Rey Tiangco para kamustahin at bigyan ng mga pagkain.

Inihayag din ni Mayor Tiangco na tuloy-tuloy ang Libreng Sakay ng Pamahalaang Lungsod, katuwang ang AFP NCR Command para matulungan ang apektadong commuters.

Samantala, as of 2pm ng July 22, 2025, may 2,559 mga pamilya ang nanatili sa iba’t ibang evacuation centers sa Valenzuela City kung saan personal silang binisita ni Mayor Wes Gatchalian para bigyan ng mainit na pagkain, disaster kits, relief goods, at health assistance.

Ayon sa alkalde, tuloy-tuloy rin ang Libreng Sakay ng pamahalaang lungsod para matulungan ang stranded na cmmuters habang tiniyak naman ng City Veterinary Services Office na ang mga alagang hayop ay ligtas na naalagaan at nabigyan ng sapat na pagkain at sa iba’t ibang mga evacuation area sa lungsod.

Alinsunod naman sa Memorandum Circular Blg. 90 ng Office of the President, suspendido pa rin ang lahat ng in-person classes sa Miyerkles, July 23, 2025 sa Metro Manila, kabilang ang Caloocan, Malabon, Navotas at Valenzuela.

Maging ang trabaho sa mga opisina ng gobyerno ay suspendido rin, maliban sa emergency at disaster response offices. (Richard Mesa)

BILANG tugon sa direktiba ni Presidente Bongbong Marcos, nasa ₱360 million na Ayuda Para sa Kapos ang Kita Program (AKAP) funds, family food packs, at iba pang relief items ang inilaan para sa agarang distribusyon sa 36 congressional districts na matinding naapektuhan ng bagyong Crising at southwest monsoon.

Ang AKAP and relief assistance, na pinangasiwaan ng opisina ni reelected Leyte Rep. Ferdinand Martin Romualdez sa pakikipagtulungan ng Tingog Party-list ay ipalalabas ng Department of Social Welfare and Development (DSWD) sa ilalim ni Secretary Rex Gatchalian.

Ang bawat congressional district ay makakatanggap ng ₱10 million na direct financial aid para sa mga residenteng naapektuhan ng pagbaha, displacement, at iba pang emergencies.

“This is just the beginning of our coordinated disaster response. Malayo pa ang mararating ng tulong na ito at hindi pa ito ang huli. Ang importante, agad nating naramdaman ang pagtulong ng administrasyong Marcos,” ani Romualdez.

Bukod sa financial aid, inihanda rin ang mga relief packs para sa mass distribution, kabilang na ang mainit na pagkain na inihanda ng Tingog sa mga evacuees na nasa mga eskuwelahan, covered courts, at iba pang temporary shelters.

“Nais nating iparating sa bawat apektadong pamilyang Pilipino na sa panahon ng kalamidad ay andito ang gobyerno ni Pangulong Marcos para tumulong. Lahat ito ay paalala na hindi kayo nag-iisa. Kasama ninyo kami sa bawat hakbang ng pagbangon,” pahayag nito.

Ang 36 congressional districts ay mabebenipisyuhan mula sa ₱360 million AKAP fund at iba pang kaukulang relief efforts.

Binuhay muli ng tanggapan nina Romualdez at Tingog Party-list ang Relief Coordination Desk, ibinigay na tulong noong pandemic at nagdaang bagyo.

Nagsilbi itong central link sa pagitan ng apektadong kongresista, national agencies, at local responders.

(Vina de Guzman)

PERSONAL na binisita ni Mayor John Rey Tiangco para kamustahin ang mga pamilyang lumikas at kasalukuyang namamalagi sa Tanza National High School pati na ang inaayos na Tangos-Tanza Navigational Gate. May 181 mga pamilya ang nasa evacuation centers sa buong lungsod habang hinimok ni Mayor Tiangco ang Navoteños na makipag-ugnay sa barangay o mag-Text JRT kung kailangang lumikas. (Richard Mesa)