SA SUPORTA ng mayorya o botong 269, sinabi ni Speaker Romualdez na tinatanggap niya ang panibagong tiwalang iniatang sa kanya para magsilbing pinakamataas na lider ng Kamara.

Nagpasalamat din si Romualdez sa mga Kongresistang bumoto at patuloy na nagtiwala sa kanya.

“With humility in my heart and a deep sense of duty, I rise today to accept the renewed trust you have given me to serve once again as Speaker of the House of Representatives. Ang tiwala ay hindi gantimpala, kundi panibagong hamon. At bawat hamon ay pagkakataon para maglingkod nang mas tapat, mas totoo, at mas buo,” anang speaker.

Inihayag din nito na bagama’t nirerespeto niya ang Korte Suprema maging ang desisyon nito ay hindi naman aniya yuyuko ang Kamara kalakip ng katahimikan.

Iginiit nito na ang papel ng kamara ay usapin ng accountability at pagpapatupad ng constitutional boundary sa pagitan ng mga sangay ng gobyerno.

“At the same time, we draw a line: the power to initiate impeachment is the exclusive domain of this Chamber. It flows from the people’s will and rests solely on the clear language of the Constitution. It is neither granted nor guided by any outside institution. The Court may close a case, but it cannot close a cause. The pursuit of accountability is not a moment — it is a mandate,” patuloy ni Romualdez.

(Vina de Guzman)

INIHALAL ng Kamara si re-elected Ilocos Norte 1st District Rep. Ferdinand Alexander “Sandro” Marcos bilang Majority Leader matapos magbukas ang first regular session ng 20th Congress kasunod nang botohan ng Speaker kung saan muling nahalal si Speaker Ferdinand Martin Romualdez.

Isa si Marcos sa pinakabatang mambabatas na nailuklok sa mataas na posisyon matapos mag-mosyon si acting floor leader, Iloilo 3rd District Rep. Lorenz Defensor.

“There is a motion to elect the Hon. Ferdinand Alexander A. Marcos as the Majority Leader of the House of Representatives. There being no objection, the Hon. Ferdinand Alexander A. Marcos is elected as Majority Leader of the House of Representatives,” pahayag ni Speaker Romualdez.

Samantala, si Quezon 2nd District Rep. David “Jay-jay” Suarez ang napili naman bilang Senior Deputy Speaker.

Kasama rin sa nahalal bilang Deputy Speakers sina Janette Garin (Iloilo, 1st District), Yasser Alonto Balindong (Lanao del Sur, 2nd District), Paolo Ortega V (La Union, 1st District), Jay Khonghun (Zambales, 1st District), Kristine Singson-Meehan (Ilocos Sur, 2nd District), Ronaldo Puno (Antipolo City, 1st District), Faustino Dy III (Isabela, 6th District), Ferjenel Biron (Iloilo, 4th District), at Raymond Democrito Mendoza (TUCP party list).

Inihalal ding muli si Reginald Velasco bilang Secretary General at retired Police Maj. Gen. Napoleon Taas bilang Sergeant-at-Arms.

(Vina de Guzman)

INIHAYAG ni Navotas City Representative Toby Tiangco na magsisilbi na lamang siya bilang independent member of the House of Representatives.

Ayon kay Tiangco, dahil ito sa nangyari sa 2025 national budget na hindi na umano niya kayang suportahan ang liderato sa House of Representatives at hindi na rin aniya ito dapat mangyari ulit.

“Hindi ito isang madaling desisyon, ngunit ito ay hindi na rin bago sa akin—mula December 2011 hanggang 2019, ako rin ay naging independent, at alam kong hindi madali ang landas na ito,” pahayag niya.

Aniya, pagkatapos ng SONA, ang pinakaimportanteng panukalang batas na tatalakayin ay ang 2026 national budget kaya napakahalaga ng maayos na 2026 budget dahil dito nakabase ang mga proyekto, programa at serbisyo para sa tao.

“Hindi na pwede ang dating sistema ng pagtalakay sa budget. May mga kailangang baguhin sa proseso ng pagbubuo ng budget, kailangan na transparent ito mula simula hanggang matapos,” ani Tiangco.

“Hindi na pupwede ‘yung mga sikretong sinisingit (budget insertions) na mga items. Mas magiging epektibo ako na maisusulong ang mga repormang ito bilang isang independent,” dagdag niya. (Richard Mesa)

NAHALAL muli si Leyte Rep. Ferdinand Martin Romualdez ng walang kalaban at ibinoto ng mayorya ng mga mambabatas bilang Speaker ng Kamara ngayong 20^th Congress.

Ito na ang ikalawang pagkakataon na maninilbihan bilang Speaker si Romualdez kung saan nagsilbi itong Speaker nitong nakalipas na 19^th Congress.

Sa naging botohan, nakakuha ng 269 boto si Romuladez para sa Speaker.

Nanumpa si Romualdez kasama ng kanyang pamilya sa harap ni Bulacan Rep. Salvador Aquino Pleyto Sr.

Para naman sa majority leader, si Ilocos Norte Rep. Ferdinand Alexander ‘Sandro’ Marcos ang nahalal matapos inominate ni Quezon Rep. David ‘Jayjay’ Suarez.

(Vina de Guzman)

NAGDEKLARA bilang independent members sina Davao City Representatives Paolo Duterte, Omar Duterte, at Isidro Ungab, kasama na si Puwersa ng Pilipinong Pandaragat (PPP) Party-list Representative Harold Duterte sa kamara matapos mag-abstain sa pagboto para sa eleksyon ng Speaker.

“A House member who chooses not to join the majority or minority can be considered an independent member of the House,” pahayag ni Rep. Paolo Duterte.

Sinabi ni Ungab na isang historical precedent ang kanilang naging desisyon kung saan nagkaroon din ng ganitong historical precedents sa Philippine Congress, U.S. Congress, at maging sa British Parliament kung saan mas pinili ng mga miyembro na manatiling independent sa halip na pumanig sa majority o minority.

Sinabi naman nina Rep. Omar Duterte at Rep. Harold Duterte na ang kanilang desisyon ay nagpapakita sa dedikasyon na magsilbi sa kanilang constituents ng walang partisan constraints.

“Our choice to become independent members demonstrates our commitment to principled governance and our intent to serve our country and constituents free from partisan considerations,” pahayag ng mga ito.

(Vina de Guzman)

ISANG most wanted na kriminal sa lalawigan ng Bohol ang timbog nang matunton ng pulisya sa kanyang pinagtaguan lugar sa Valenzuela City, Sabado ng hapon.

Nakipag-ugnayan sa National Capital Region Police Office (NCRPO) ang Tracker Team ng Tagbilaran City Police Station at Provincial Mobile Force Company (PMFC) ng Bohol Provincial Police Office nang matanggap sila ng impormasyon na sa Valenzuela City nagtatago si alyas “Rodel”, 27.

Nagawa umanong pumuslit ng akusado sa kanilang lalawigan nang malamang nasa No. 2 na siya sa listahan ng mga Top Most Wanted Person, hindi lamang sa Lungsod ng Tagbilaran, kundi sa buong Police Regional Office (PRO)-7 na sumasakop sa Bohol, Cebu, at Siquijor, matapos isagawa ang karumaldumal na krimen.

Nang makarating ang impormasyon P/Col. Gerson Bisayas, hepe ng Valenzuela Police Station sa lungsod nagtatago si alyas Rodel, agad niyang inatasan ang kanyang mga tauhan na alamin ang kinaroroonan nito.

Dakong alas-5:40 ng hapon nang tuluyang matunton at maisilbi ng pinagsamang mga tauhan ng Warrant and Subpoena Section (WSS) at Station Intelligence Section (SIS) ng Valenzuela police ang warrant of arrest na inilabas nito lang Enero 30,2025 ng Tagbilaran Regional Trial Court (RTC) Branch 49, para sa kasong Murder laban sa akusado sa pinagtaguan sa Brgy. Gen. T. De Leon.

Walang piyansang inirekomenda ang korte para sa pansamantalang paglaya ng akusado na ipiniit muna sa Custodial Facility Unit ng Valenzuela Police Station hangga’t hinihintay ang utos ng korte para sa pagbiyahe sa kanya sa Tagbilaran City Jail. (Richard Mesa)