NAGHAIN si 4Ps Party-list Rep. Marcelino Libanan ng panukalang batas na nagmamandato sa pagbuo ng isang Centralized Patient Record System (CPRS) sa lahat ng munisipalidad at siyudad sa bansa upang mapabuti ang pagbibigay ng healthcare sa publiko.

Sa ilalim ng House Bill No. 1907 o panukalang Local Health Record System Act of 2025, ang bawat pasyente na nagpatingin sa barangay health centers, rural health units (RHUs), at iba pang local primary care facilities ay magkakaroon ng comprehensive, accessible, at secure medical record.

“In many underserved communities, a patient’s medical history often vanishes with each consultation. Our health workers do their best, but without a reliable record-keeping system, they’re often forced to work blindly,” ani Libanan.

Ayon sa mambabatas, ang pagkakaroon ng centralized record system ay hindi lamang makakatulong upang maiwasan ang pagkakaroon ng misdiagnosis at medical duplication kundi makakatulong din sa pagligtas ng buhay dala na rin sa pagbibigay sa health professionals ng impormasyon sa kondisyon ng pasyente.

Nakapaloob sa panukala na ang mga local governments ay kailangang magmentina ng isang unified patient database na naglalaman ng impormasyon kanilang na ang dating diagnoses, medications, treatments, at lab results.

Sa pamamagitan nito, naniniwala ang mambabatas na mabibigyan ng sapat na imporasyon at datos ang mga frontliners para maibigay ang tamang gamutan.

“This is about fairness, access, and dignity in healthcare. Every Filipino, regardless of their income or location, deserves a documented medical history that follows them—not the other way around,”dagdag nito.

Sa ilalim ng panukala, ang bawat municipality o city ay naatasang mag-develop at magmentina ng sistema sa loob ng kanilang RHUs o kahalintulad na health facilities.

Ang Department of Health (DOH) ay maglalaan ng kinakailangang technical guidelines, training, at financial assistance upang masiguro ang malawakang implementasyon nito sa loob ng dalawang taon.

(Vina de Guzman)

HINDI pa rin natatagpuan ang katawan ng 11-taong gulang na batang lalaki na iniulat na nalunod sa ilog sa kasagsagan ng malakas na buhos ng ulan sa Caloocan City, Sabado ng hapon.

Inatasan ni Mayor Dale Gonzalo “Along” Malapitan ang mga tauhan ng City Disaster Risk Reduction and Management Department (CDRRMD) na huwag tigilan ang paghahanap sa biktima hangga’t hindi natatagpuan ang kanyang katawan.

Sa nakarating na ulat sa tanggapan ng alkalde, nadulas at nahulog umano ang 11-anyos na bata na nakasuot ng asul na t-shirt at asul na short sa Creek Side na malapit sa NHC Elementary School sa  Brgy. 186 sa kasagsagan ng malakas na buhos ng ulan.

Kaagad na pinakilos ng alkalde ang CDRRMD upang magsagawa ng search, rescue, at retrieval operation kasabay ng paggamit ng dalawang drone upang maging mapabilis at mapalawak ang kanilang paghahanap.

Gayunman, naging pahirapan ang paghahanap ng mga awtoridad, kasama na ang Philippine Coast Guard (PCG) at Barangay Rescue, bunga ng pabugso-bugsong pagbuhos ng malalakas na ulan na dahilan upang mag-zero visibility sa ilog.

Tiniyak naman ng CDRRMD na hindi sila titigil sa paghahanap sa katawan ng bata hangga’t hindi nila ito nakikita. (Richard Mesa)

LAGLAG sa selda ang 40-anyos na mister na wanted sa kasong homicide matapos maaresto ng pulisya sa pinaigting na operation laban sa mga wanted na puganti sa Valenzuela City.

          Sa ulat ni Valenzuela Police OIC chief P/Col. Gerson Bisayas kay Northern Police District (NPD) Acting District Director P/BGen. Jerry Protacio, ang akusado ay kabilang sa talaan ng mga Most Wanted Person sa Valenzuela CPS.

          Nang makatanggap ng impormasyon ang mga operatiba ng Warrant and Subpoena Section ng Valenzuela CPS na naispatan ang presensya ng akusado sa kanilang lugar sa Brgy. Malinta, agad ikinasa ng mga ito ang manhunt operation na nagresulta sa pagkakaaresto sa kanya dakong alas-10:40 ng gabi.

          Maayos naman umanong sumama ang akusado nang isilbi sa kanya ng mga tauhan ni Col. Bisayas ang arrest warrant na inisyu ng Valenzuela City Regional Trial Court (RTC) Branch 282, para sa kasong Homicide (Article 249 of the Revised Penal Code).

          Matapos nito, dinala ang akusado sa Valenzuela City Health Department para sa medical examination bago tinurnover sa Custodial Facility Unit ng Valenzuela CPS kung saan siya pansamantalang ipiniit habang hinhintay ang pagpapalabas ng commitment order mula sa hukuman.

          Pinuri naman ni NPD Director Gen. Protacio ang operating team para sa kanilang mabilis at mapagpasyang aksyon na nagresulta sa matagumpay na pagkakaaresto sa isa sa mga most wanted na puganti sa lugar.

“This arrest is a testament to our unwavering commitment to justice, public safety, and the rule of law. We will not stop until every wanted criminal is held accountable,” pahayag niya. (Richard Mesa)

HANDA ang Kamara na i-welcome si Vice President Sara Duterte kung sakaling magbago ang desisyon nito at dumalo sa ika-apat na State of the Nation Address (SONA) ni Pangulong Bongbong Marcos sa July 28, sa kabila na nagsabi na itong hindi siya dadalo.

Sinabi ni House spokesperson Atty. Princess Abante na nananatiling bukas ang Kamara sa lahat ng government officials, kabilang na ang Vice President, at iginiit ang importansiya ng kanyang papel sa pagsaksi sa taunang ulat sa Kongreso at bayan ng Pangulo.

“Ready naman po ang House of Representatives to welcome all officials of the government to attend the SONA. Especially bilang isang Vice President, dapat din kasama sa kanyang tungkulin na makinig sa magiging report ng ating Presidente. The House of Representatives is ready to welcome her to attend and listen to the report of the President,” ani Abante.

Ang pahayag nito ay kasunod na rin sa kumpirmasyon ni House Secretary General Reginald Velasco noong nakalipas na linggo na nagpadala ng liham ang Office of the Vice President (OVP) nang hindi pagdalo ni Duterte sa SONA ni Marcos sa ikalawang pagkakataon.

Sa kabila nito, sinabi ni Velasco na magpapatuloy pa rin ang preparasyon kabilang na ang paglalaan ng designated seat sa VIP gallery at holding room para sa Vice President at kanyang staff kung sakaling nagbago ang kanyang desisyon.

Walang ibinigay na dahilan ang OVP sa hindi niya pagdalo, ngunit sinabi ni Velasco na ang lahat ng ibapang inimbitahang government officials ay nagkumpirma sa kanilang attendance.

(Vina de Guzman)

NANAWAGAN ang mga lider ng House Quad Comm noong 19th Congress sa mga mambabatas na muling buuin ang mega panel ngayong 20th Congress para ipagpatuloy at resolbahin na ang ginagawang imbestigasyon ukol sa drug-related killings, Chinese-linked syndicates at government corruption .

Ang Quad Comm ay binubuo ng Committees on Dangerous Drugs, on Public Order and Safety, on Human Rights, at on Public Accounts ay nagsagawa ng ilang joint hearings sa nakalipas na kongreso na nagbunyag sa links sa pagitan ng offshore gaming hubs, extrajudicial killings at high-level corruption sa loob ng gobyerno.

Ngunit naputol ang trabaho nito dahil sa pulitika, banta sa mga saksi at pagtatangka umano para ilibing ang katotohanan.

“We cannot just move on. What we uncovered in those hearings was not fiction, not rumor, but fragments of a frightening reality,” pahayag ni reelected Manila Rep. Bienvenido “Benny” Abante Jr., na siyang nagsilbing chairman ng Committee on Human Rights noong 19th Congress.

Sinabi ni Abante na nadiskubre sa nakalipas na Quad Comm ang mga patterns ng pang-aabuso. (Vina de Guzman)

MULING hinikayat ni election lawyer Atty. Romulo Macalintal si Pangulong Ferdinand Marcos Jr., na i-veto ang panukalang batas na nagpapaliban sa Barangay at Sangguniang Kabataan Elections (BSKE)sa Disyembre 2025 at itinutulak ang halalan sa Nobyembre 2026.

Para kay Macalintal, ang pagpapaliban sa 2025 BSKE ay pagsikil sa karapatan ng mga Filipino na bumoto.

Bukod pa sa pagiging unconstitutional nito dahil sa unang desisyon ng Korte Suprema na labag sa Saligang Batas ang 2022 BSKE Postponement Law (RA 11935).

Sa ilalim kasi ng panukalang niratipikahan ng Kongreso, ang mga barangay officials ay magkakaroon na ng four-year single term at puwede silang mahalal ng hanggang tatlong magkakasunod na termino.

“For President Marcos to approve this bill or allow it to lapse into law would be tantamount to abandoning the sacred right of suffrage of the Filipino electorate. Filipinos justly deserve to elect their leaders and should not be led by individuals without the people’s mandate,” ayon kay Macalintal.

Sinabi pa ni Macalintal na kung matutuloy ang halalan sa November 2, 2026, araw ito kung saan maraming pinoy ang inaalala ang kanilang mga namayapang mahal sa buhay , binigyang diin ang “impracticality” ng pagdaraos ng BSKE sa nasabing petsa. Ang nasabing petsa ay bumagsak sa unang Lunes ng Nobyembre sa susunod na taon.

Sinabi pa ni Macalintal na hindi na dapat pang paalalahanan ang legal team ni Pangulong Marcos hinggil sa Supreme Court (SC) 2022’s ruling sa Macalintal vs. Comelec.

“The Court held that any postponement of a barangay election, or any election for that matter, must be supported by a valid government interest to ensure a “free and meaningful exercise of the right to vote requiring the holding of genuine periodic elections,” ani Macalintal.

Idinagdag pa ni Macalintal “[t]he reconciled bill that Congress wants Marcos to sign lacks any valid reason or government interest to support its passage, making it another bill that postpones an election in a manner that is “unduly arbitrary or oppressive of the electorates’ right of suffrage,” as echoed by the Court in the Macalintal case.”

Dagdag pa ni Macalintal, hindi dapat ulitin ng Pangulo ang pagkakamaling ginawa sa paglagda ng RA 11935.

“The President must avoid repeating the error of endorsing what the Supreme Court has already declared unconstitutional: an act that deprives voters of their right to elect local leaders and instead subjects them to appointed incumbents through legislative fiat,” amg pahayag ni Macalintal.

Sa kabilang dako, hinikayat ni Macalintal si Pangulong Marcos na sumunod sa ruling Korte Suprema sa kaso ng Macalintal vs. Comelec alinsunod sa pagpapaliban ng BSKE.

“The Court warned that election postponement “could foster a government that is not democratic and republican as mandated by the Constitution,” ang pahayag ni Macalintal.

“RA 11935, which the President previously signed, was declared unconstitutional for “unreasonably and arbitrarily infringing on the people’s right of suffrage,” ani Macalintal. (Daris Jose)