ININSPEKSYON ni Pangulong Ferdinand R. Marcos Jr. ang paghahanda ng food packs na ipamamahagi sa lugar na apektado ng pananalasa ng Tropical Storm Crising.

Si Pangulong Marcos, kasama ang kanyang anak na si William Vincent, nagpunta sa Social Welfare and Development’s (DSWD) National Resource Operations Center sa Pasay City para i -check ang food packs na ipadadala sa Crising-hit areas.

Tinulungan naman ni DSWD Secretary Rex Gatchalian si Pangulong Marcos sa panahon ng inspeksyon.

Inayos at inihanda na ng DSWD ang mahigit sa 3 milyong kahon ng family food packs (FFPs) sa 935 storage hubs sa buong bansa.

Sa ngayon, ang DSWD ay mayroong P2.9 billion na standby funds at stockpile, binubuo ng mahigit sa 3 milyong FFPs, 28,107 ready-to-eat food boxes, at 334,791 non-food items.

Ang ahensiya ay nag-imbak ng P773 milyong halaga ng non-food items, kabilang na ang hygiene kits, water containers, at ba pang emergency shelter materials para sa mga displaced individuals.

Sa kabilang dako, inatasan naman ni Pangulong Marcos ang mga kinauukulang ahensiya ng gobyerno na maging alerto. (Daris Jose)

PINAPURIHAN ni reelected Leyte Rep. Ferdinand Martin Romualdez ang ginawang kautusan ni Pangulong Bongbong Marcos na pagbibigay ng 50% fare discount sa mga senior citizens at persons with disabilities (PWDs) sa Light Rail Transit Lines 1 at 2 at Metro Rail Transit Line 3.

Inilunsad ng President ang inisyatibo sa isang seremonya sa MRT-3 Santolan-Annapolis station nitong Miyerkules. Bukod sa dagdag diskuwento para sa matatanda at PWDs, una nitong inatasan ang Department of Transportation (DOTr) na taasan ang student fare discounts mula 20% sa 50%.

“Batid natin ang araw-araw na hirap ng mga mananakay sa pagbiyahe papunta at pauwi sa kanilang mga trabaho, paaralan at tahanan. Katungkulan naming mga kawani ng pamahalaan na padaliin ang kanilang biyahe, hindi lamang sa mas mabilis at kumportableng mga sasakyan, kung hindi sa pagbaba ng kanilang binabayarang pamasahe,” anang mambabatas.

Nagpayahag din suporta si Romualdez sa pagsusumikap ng administrasyon na pagandahin pa ang sektor ng transportasyon.

“Patuloy nating isusulong ang interes at kapakanan ng ating mga mananakay sa pagbukas ng 20th Congress. Sisiguruhin natin na ang pagpapalawig ng mga fare discounts at iba pang mga benepisyo para sa ating mga commuters ay may kaakibat na sapat na pondo,” pagtatapos ni Romualdez. (Vina de Guzman)

SINIBAK ang dalawang traffic enforcer ng Manila Traffic and Parking Bureau (MTPB) matapos na nangotong sa isang truck sa kahabaan ng A.H Lacson Avenue sa España, Maynila.

Nakasaad sa memorandum na inaprubahan ni Manila Mayor Isko Moreno-Domagoso na nang-aatas sa dalawang enforcer na tumigil sa pagpatupad ng tungkulin dahil sa kanilang pangongotong.

Nakunan ang pangyayari ng isang bystander at agad na nag-viral sa social media.

Sinabi ni MTPB Director Dennis  Viaje na nakakaapekto sa moral ng kanilang mga kasamahan  ang maling pag-uugali ng naturang mga enforcers  at  nagdudulot din ng labis na kahihiyan sa buong organisasyon ng MTPB.

Inatasan din ni Viaje ang dalawa na isuko na sa kanya ang uniporme at identification cards ng dalawa para sa tamang disposisyon.

Muli namang iginiit ng alkalde ang ‘One strike policy’ kung saan hindi na pagbibigyan pa ng pangalawang pagkakataon ang mga abusadong tauhan ng city hall. (Gene Adsuara)

PATULOY pa rin ang ginagawang pagsasaayos sa pasilidad ng Kamara bilang paghahanda sa papasok na 20th Congress at ika-apat na State of the Nation Address (SONA) ni Presidente Bongbong Marcos.

Ang HRep Engineering and Physical Facilities Department (EPFD), sa pangunguna ni Deputy Secretary General (DSG) Engr. Renato Dela Torre, ang siyang nanguna sa ginagawang renobasyon at refurbishments.

“It is a very hectic schedule. But we can do it. We are still prioritizing all the preparations for the SONA,” ayon kay Dela Torre.

Kabilang sa mga pasilidad na sumailalim sa upgrade ay ang audio system sa plenary hall.

“Yan ang major upgrade natin this SONA. Kasi napansin natin mayroong mga dead spot na sa plenary hall area na hindi na audible (ang proceedings). Iyong configuration natin nung plenary before, parang rectangular lang siya sa gitna, nag-expand tayo sa first gallery so ‘yung may mga portion dun na hindi na tinatamaan ng sounds, so nag-a-upgrade tayo. Ngayon balanse na yung tunog kahit saan kang area sa plenary hall, malinaw na,” pahayag ni Dela Torre.

Nilinis din ang 6×12 meter Philippine flag sa likod ng rostrum ng speaker sa plenary hall at ikinabit ulit nitong Huwebes.

Maging ang landscaping sa may helipad area ay inayos na ginawa naman ng Metro Manila Development Authority.

(Vina de Guzman)

NAGWAKAS na ang maligayang araw ng tatlong manyakis na lalaki na pawang wanted sa multiple counts of rape sa Malabon City matapos matunton ng tumutugis na mga pulis sa kanilang pinagtataguan sa magkahiwalay na lugar sa Bulacan

Ayon kay Northern Police District (NPD) Acting District Director P/BGen. Jerry Protacio, nakatanggap sila ng impormasyon hinggil sa pinagtataguang lugar sa Bulacan ng mga akusadong sina alyas “Welia”, 63, at alyas “Chen-Chen”, 37, kapwa residente ng Brgy., Santulan, Malabon City.

Aniya, kapwa nakatala bilang mga Most Wanted Person sa Malabon police ang dalawang puganti kaya inatasan niya ang District Special Operations Unit (DSOU) para tugusin ang ito.

Kaagad namang nakipag-ugnayan ang mga operatiba ng NPD-DSOU sa Regional Intelligence Unit National Capital Region (RIU NCR) bago ikinasa ang joint operation na nagresulta sa pagkakaaresto sa mga akusado dakong alas-2:20 ng madaling araw sa kanilang lungga sa Masagana Village, Pulong Yantok, Angat, Bulacan.

Hindi naman umano pumalag ang mga akusado nang isilbi sa kanila ng mga operatiba ng DSOU ang warrant of arrest na inisyu ng Malabon City Family Court Branch 4, noong September 2, 2022 para sa tatlong bilang na kasong Rape by Sexual Assault laban kay ‘Welia’ at apat na bilang ng Statutory Rape laban kay ‘Chen-Chen’.

May inirekomenda namang piyansa ang hukuman na nagkakahalaga ng P200K bawat isa sa tatlong rape by sexual assault habang walang inirekomendang piyansa para sa statutory rape.

          Nauna rito, natimbog din ng mga operatiba ng DSOU at Northern District Intelligence Team – Regional Intelligence Unit (NDIT-RIU) sa joint operation sa San Jose Del Monte-Norzagaray Road, Norzagaray, Bulacan dakong alas-4:30 ng hapon ang No. 8 Top Most Wanted Person ng Malabon police na si alyas “Nono”, 36.

          Si ‘Nono’ ay binitbit ng pulisya sa bisa ng warrant of arrest na inisyu ng Family Court, RTC Branch 5, Malabon City, para sa kasong Statutory Rape under Section 266-A of the Revised Penal Code in relation to RA 7610 na walang inirekonendang piyansa.

          Pinuri naman ni Gen. Protacio ang pagsisikap ng operating units para sa kanilang mabilis at decisive action. “This arrest demonstrates our commitment to bringing justice to victims and holding criminals accountable, no matter how long it takes or where they try to hide,” aniya. (Richard Mesa)

SA kanyang patuloy na giyera laban sa street gangs sa Valenzuela City, pinalayas ni Mayor WES Gatchalian sa lungsod ang hindi bababa sa 45 indibidwal na karamihan ay mga miyembro ng gang na sangkot sa sunud-sunod na criminal activities tulad ng iligal na droga at vandalism.

          Ayon kay Mayor Wes, ipinag-utos niya ang pagpapalayas sa miyembro ng gang na pinangalanang “Original Trouble Maker” at ang kanyang pamilya dahil sa paninira sa isang unit ng pabahay na pag-aari ng lungsod sa Disiplina Village, Bignay.

“Sinira ang kwarto, binasag ang salamin, sinira pa ang kagamitan n’ung pinapaalis sila,” ani alkalde.

Ang pamilya ng street gang member ay inilipat na sa kanilang orihinal na lugar sa Novaliches, Quezon City, habang inihahanda ang mga kaso laban sa kanila. Ang nasira namang unit ay aayusin at ibibigay sa mga lehitimong residente ng Valenzuela.

“Ang warning ko sa mga natitirang gang members sa Disiplina Village (sa Bignay, Ugong, at Lingunan), madadamay ang pamilya niyo. Kung patuloy kayong manggulo dito sa aming lungsod, umalis na kayo ng Valenzuela,” babala niya.

Kaugnay nito, ipinasa ng pamahalaang lungsod ang Resolution No. 3467, na nagdedeklara sa mga miyembro ng 13 natukoy street gangs sa lungsod bilang Persona Non Grata at Ordinance No. 1262, Series of 2025, na nagbabawal sa paglikha at pagpapatakbo ng street gangs, kabilang ang pangangalap ng mga menor-de-edad para sa marahas na aktibidad ng gang. (Richard Mesa)

GUMAWA ng kasaysayan ang Quezon City bilang kauna-unahang Local Government Unit sa bansa na nagpatupad ng isang komprehensibong Gender-Inclusive Health Ordinance, na naglalayong magbigay ng accessible, at magalang na health care para sa mga kasapi ng LGBTQIA+ community.

Ang ordinansa, na ipinakilala nina Konsehal Bernard Herrera at Dorothy Delarmente, ay lumilikha ng matibay na balangkas para sa paghahatid ng  gender-affirming primary care, mental health support, at mga dalubhasang serbisyong medikal sa pamamagitan ng pampublikong sistema ng kalusugan ng lungsod.

Sabi naman ni Quezon City Mayor, Joy Belmonte, ang makabagong ordinansang ito ay muling nagpapatibay sa pangako ng Quezon City sa isang sistema ng pangangalaga sa kalusugan na tunay na inklusibo.

Paliwanag pa ng alkalde, “bawat mamamayan ay nararapat sa pangangalaga na kumikilala at gumagalang sa kung sino sila. Sa batas na ito, sinisiguro natin na walang maiiwan sa ating layunin na makamit ang pagkakapantay-pantay sa kalusugan.”

Sa ilalim ng bagong ordinansa, ang lahat ng pampublikong pasilidad ng kalusugan sa Quezon City ay mag-aalok ng:

* Mga konsultasyon at pagpapayo na nagpapatunay sa kasarian (gender-affirming consultations and counseling)

* Gabay medikal at mga referral sa mga dalubhasang serbisyo * Suporta sa kalusugan ng isip na iniakma para sa mga indibidwal na gender-diverse at transgender.

Sa pamamagitan ng ordinansang ito, ang Quezon City ay gumagawa ng isang matapang at progresibong hakbang sa pagtiyak na ang pangangalaga sa kalusugan ay hindi lamang isang serbisyo kundi isang karapatan na nagpapatibay ng dignidad, pagkakaiba-iba, at pagsasama para sa lahat. (PAUL JOHN REYES)

BILANG paghahanda sa posibleng epekto ng Bagyong Crising, nagsasagawa na  ang Pamahalaang Lungsod ng Malabon ng pagbuo ng lahat ng kinakailangang mapagkukunan upang matiyak ang kaligtasan at kahandaan ng lungsod.

Isang pagpupulong ang ipinatawag ni Mayor Jeannie Sandoval mula sa grupo ng emergency  response ng lungsod at mga kinatawan ng iba’t ibang departamento kabilang  ang Malabon DRRMO, at iba pang national at lokal na ahensya.

Kabilang sa mga tinalakay ang mga komprehensibong estratehiya sa pagtugon at mga contingency measures sakaling maapektuhan ng bagyo ang ilang bahagi ng lungsod at upang matiyak ang maayos na komunikasyon sa pagitan ng mga ahensya ng pamahalaan upang maprotektahan ang mga residente sa anumang banta ng sakuna sa panahon ng malakas ng malakas na pag-ulan.

“Sa mga ganitong panahon, maipapakita at maipapamalas natin ang bayanihan, ang ating pagkakaisa para sa kapakanan ng lahat. Lahat ng kagamitan para sa kaligtasan ng mga Malabueño sa panahon ng mga sakuna ay inihanda na, pati na rin ang ating mga tauhan sa pagtugon sa sakuna. Binabantayan namin ang Bagyong Crising at ang posibleng epekto nito sa ating lungsod. Mangyaring makipag-ugnayan, makipagtulungan, at manatiling mapagbantay at handa upang matiyak ang mabilis at epektibong operasyon at ang inyong kaligtasan,” ani Mayor Jeannie.

Tiniyak naman ng MDRRMO sa publiko na ang kanilang Command and Communication Center, ay handa  upang  subaybayan ang lahat ng bahagi ng lungsod sa panahon ng masamang lagay ng panahon.

Nakipagpulong din ang MDRRMO sa mga konseho ng disaster risk reduction and management ng 21 barangay ng lungsod upang palakasin ang kahandaan at koordinasyon habang in-update naman ng pamahalaang lungsod ang mga lugar na madalas bahain at landslide-prone, kasama ang bilang ng mga pamilyang posibleng maapektuhan.

Nakahanda na rin ang mga sasakyang pang-rescue, bangka, mga sistema ng maagang babala, backup na kuryente at suplay ng tubig, kagamitan sa komunikasyon, at mga relief goods.

Bukod dito, 47 na evacuation center sa lungsod ang nakahandang tumanggap sakaling may mga pamilya na maaaring ilikas habang ipinaalala sa publiko na isasagawa ang sapilitang paglilikas kung kinakailangan, alinsunod sa City Ordinance No. 11-2012, na nagbibigay ng pahintulot para sa pre-emptive evacuation sa panahon ng mga emerhensiya.

Kaugnay nito, hinimok naman ni City Administrator Dr. Alexander Rosete ang mga Malabueño na manatiling mapagbantay at updated sa pamamagitan ng opisyal na social media channels ng lungsod.

Para naman sa agarang tulong, gamitin ng mga residente ang All Hazards One Network (AHON) Alert 24/7 Application o makipag-ugnayan sa Malabon Command and Communication Center sa 8921-6009 / 8921-6029 / 0942-372-9891. (Richard Mesa)