MATAGAL nang isinuko ni Department of National Defense (DND) Secretary Gilberto Teodoro Jr. ang kanyang Maltese passport bago pa siya maghain ng kanyang kandidatura noong 2022 elections.

“The alleged existing Maltese passport of Secretary Gilberto Teodoro (Jr.) was surrendered and renounced before the filing of his certificate of candidacy in 2021 for the 2022 elections,” ang sinabi ni DND spokesperson Assistant Secretary Arsenio Andolong sa isang kalatas.

Ito’y matapos lumabas ang ulat na sinasabing na-isyuhan si Teodoro ng Maltese passport noong Dec. 22, 2016, balido para sa 10 taon.

“It’s existence was disclosed to the Bureau of Immigration and Comelec (Commission on Elections) prior to the 2022 elections, as well as to the Committee on Appointments prior to their confirmation of his appointment as defense secretary,” ani Andolong.

“The motive of this rumor is clear and known to Secretary Teodoro. The timing of the article adds to this motive.”aniya pa rin.

Sa ilalim ng batas ng Pilipinas at Konstitusyon, ipinagbabawal ang dual citizenship sa mga public officials, lalo na iyong may hawak ng Cabinet-level positions.

Samantala, si Teodoro ay itinalaga ni Pangulong Ferdinand R. Marcos Jr. noong June 2023.

Hawak niya ang kaparehong posisyon mula August 2007 hanggang November 2009 sa ilalim ng administrasyon ni dating Pangulong Gloria Macapagal-Arroyo. (Daris Jose)

TUTULOY at mamamalagi si Pangulong Ferdinand Marcos Jr. sa makasaysayang Blair House sa kabilang panig ng White House sa Pennsylvania Avenue sa panahon ng three-day visit sa Washington para sa kanyang first-ever meeting kay US President Donald Trump bago matapos ang buwan, ayon kay Foreign Affairs Secretary Theresa Lazaro, araw ng Lunes.

“The famous residence is the official guest house of the US President for visiting heads of state and other dignitaries and has hosted notable world leaders, including Queen Elizabeth II and Nelson Mandela,” ayon sa White House website.

“Heads of states and governments are usually invited to the guest house “at the pleasure of the President,” dagdag nito.

Ang Blair House ay nagsisilbi rin bilang pansamantalang tahanan ng president-elect bago pa ang inauguration ceremonies bilang paghahanda sa magiging galaw ng administrasyon sa White House.

“Just wanted to say that it is President Trump who invited President Marcos to this meeting and probably the first if I am correct the first among the ASEAN leaders who have been invited by the president to the White House. It is an official visit, but he will be staying in the presidential guest house, the Blair House, so that means something,” ang sinabi naman ni Lazaro sa isang panayam.

Sa kabilang dako, sinabi naman ni Philippine Ambassador to Washington Jose Manuel Romualdez, na ang official working visit ni Pangulong Marcos ay ipinaalam sa Philippine Embassy sa Washington na may kasamang imbitasyon para sa Pangulo na manatili sa Blair House.

Sa kabilang dako, ang Blair House complex ay mayroong humigit-kumulang na 109 na kuwarto, kabilang na ang 15 guest rooms, ang bawat isa ay mayroong full bathroom, tatlong formal dining rooms, dalawang malaking conference rooms, isang hot and cold kitchen, isang beauty salon, isang exercise room, at isang in-house laundry facility.

Samantala, isinasapinal pa ang detalye ng summit sa pagitan nina Pangulong Marcos at Trump, ayon kay Lazaro subalit ang ‘defense and security’ sa gitna ng umiigting na agresyon ng tsino sa pinagtatalunang South China Sea, US tariffs at economic cooperation ay malamang na makasama sa kanilang talakayan. (Daris Jose)

NAGPATUPAD ang Pamahalaang Lungsod ng Navotas ng shortened in-person classes kahapon, July 14, 2025, sa piling mga paaralan sa lungsod dahil sa inaasahang pagtaas ng tubig baha na dala ng 1.9 metrong high tide sa ganap na 12:54 ng hapon.

Ayon kay Mayor John Rey Tiangco, ito ay base sa rekomendasyon ng Disaster Risk Reduction and Management Office at ng Schools Division Office-Navotas.

Ang mga paaralan na may schedule ng pasok ng mga estudyante ay ang Bagumbayan Elementary School, San Roque Elementary School, Tangos Elementary School, Tangos 1 Elementary School, Tanza Elementary School at Wawa Elementary School na may pasok na 6 am hanggang10 am at 2:30 pm hanggang 6 pm.

Ganun din sa Navotas National High School, Navotas National Science High School, San Roque National High School, Tangos National High School at  Tanza National High School o depende sa class schedule.

Samantala, regular naman ang schedule ng klase sa Daanghari Elementary School, Navotas Elementary School-Central, at Navotas Elementary School-1.

Ang pasok naman sa private schools ay nakaayon sa pagpapasya ng kanilang school administration.

Pinaalalahanan din ni Mayor Tiangco ang lahat, lalo na ang mga estudyanbte na kung nakalusong man ang mga ito sa baha, ay siguruhing manghingi at uminom ng Doxycycline sa health center o sa Navotas Medical and Wellness Center ng lungsod dahil libre aniya ito. (Richard Mesa)

LUMAGDA si Vice Mayor Tito Sanchez, na kumakatawan kay Mayor John Rey Tiangco, at Okada Foundation President James Lorenzana na sinaksihan nina Congressman Toby Tiangco at OFI Trustee Mitsukazu Nakata sa isang memorandum of agreement (MOA) sa pagitan ng Pamahalaang Lungsod ng Navotas at Okada Foundation, Inc. (OFI) para sa donasyon ng P130 milyong halaga ng medical equipment sa Navotas City Hospital (NCH). (Richard Mesa)

KASABAY na rin sa patong-patong na problemang pangkalusugan, patuloy na tumataas ang kaso ng mga nakatatandang Pilipinong nakararanas ng dementia at Alzheimer.

Sa isang pagtitipon sa University of the Philippines – Diliman Theater (UP Theater), binigyang diin ni United Senior Citizens Partylist Rep. Milagros Aquino-Magsaysay na panahon na para magkaroon ng malinaw na polisya at programa para harapin ang mga hamon ng dementia at Alzheimer.

Batay aniya sa datos ng Alzheimer’s Disease Association of the Philippines noong 2015, halos 800,000 Pilipinong nakatatanda ang may dementia at 60% o 6 sa10 na mga Pilipinong may dementia ay galing sa mahihirap na pamilya o low-income families.

Ayon sa mambabatas, isa umanong neurocognitive disorder ang dementia na nagpapahina ng cognitive function o pag-iisip, pagiging makalilimutin, at pagkawala ng memorya ng mga nakatatanda na siya namang nakakaapekto sa kanilang pang-araw-araw na buhay.

Sinabi ni Magsaysay na muli niyang isusulong ngayong 20th Congress ang nauna na niyang panukala na Philippine Dementia Care Policy dahil nanatiling pahirap ang dementia sa mga nakatatanda at dagdag din itong pasanin sa kanilang mga pamilya.

“Limitado po ang health care coverage pagdating sa dementia at Alzheimer. Kadalasan po hindi ito saklaw ng mga programa ng pamahalaan kaya po napipilitan ang mga nakakatandang gumastos mula sa sarili nilang bulsa o yung out-of-pocket payment. Pagwala pong pera, hindi na nakakapagpagamot. Nakakaawa po sila at ang kanilang mga pamilya. Huwag po sana nating ipikit ang ating mga mata sa katotohanang ito,” anang mambabatas.

Nanawagan din si Magsaysay kay Pangulong Marcos at sa mga kapwa mambabatas na bigyang pansin ang isyung ito lalo pa’t napakahalaga aniya ng kalusugan ng kaisipan ng mga nakatatanda.

Kung maisasabatas ang panukala, palalakasin nito ang basic health services, tutugunan ang kakulangan sa pasilidad at mga skilled o specialized health workers. Magkakaroon din ng komprehensibong programa at proseso para matugunan ang dementia at Alzheimer hindi lamang sa mga medical protocol kundi maging sa pagtuturo kung paanong aalagaan ng kanilang mga pamilya ang kaanak na may dementia o Alzheimer. (Vina de Guzman)