INALIS na ng Department of Agriculture (DA) ang pansamantalang pagbabawal sa importasyon ng domestic at wild birds, gayon din sa poultry meat at mga  produkto mula sa anim na estado sa Estados Unidos:  Indiana, Maryland, Missouri, New York, Ohio at Pennsylvania.

Sinabi ni Agriculture Secretary Francisco P. Tiu Laurel Jr. sa kanyang inisyung Memorandum Order no. 32, ang pagbabawal na ipinatupad sa mga unang buwan ng taon ay dahil sa pagkalat ng Highly Pathogenic Avian Influenza (HPAI) na inalis na matapos kumpirmahin ng mga veterinary authority sa US na naresolba na ang pagkalat nito. Ang report na isinumite sa World Organisation for Animal Health, ay nagsasaad na walang mga bagong kaso ng bird flu sa mga apektadong lugar simula June 9.

Ang pagbabalik ng importasyon ay inaasahang  magpapalakas sa  poultry supply ng bansa at makakatulong na mapagaan ang pressure sa presyo, alinsunod sa pagsisikap ni Pangulong Ferdinand Marcos Jr. na masiguro ang seguridad sa pagkain sa harap ng inflation. Ang tumataas na presyo ng pagkain ang nananatiling susi sa pagbilis ng inflation sa bansa.

Kabilang sa mga sakop ng pag-alis sa import ban ay ang  poultry products tulad ng itlog, day-old na mga sisiw, at semilya na ginagamit sa artificial insemination.

Gayonman, sinabi ni Secretary Tiu Laurel  na lahat ng padating na kargamento ay dapat na sumunod sa umiiral na veterinary quarantine protocols at food safety regulations ng DA. Ang pag-alis ng ban  ay mananatiling epektibo maliban na lamang kung bawiin ito sa panulat.

Ang update sa polisiya ay muling pagpapatibay sa pangako ng DA na ang mga desisyon ay nakabatay sa siyensiya at responsableng pandaigdigang  kalakalan. (PAUL JOHN REYES)

KASADO na ang unified ID system para sa persons with disabilities (Pwds) Nationwide .

Ayon kay DSWD Assistant Secretary for Information and Communications Technology and Chief Information Officer (CIO) Johannes Paulus Acuña, ipatutupad ang bagong sistema sa Oktubre sa piling local government units upang malabanan ang pagkalat ng pekeng ID para sa mga PWD.

 “May mga ginagawa na po kaming internal technical pilots tapos pinapakita na po namin sa mga katuwang po natin sa NCDA. So internal testing development na po yung ginagawa namin this July, August and September para po mapaghandaaan po namin yung actual roll out sa mga [pilot] LGUs starting po October of this year,” pahayag ni Acuña na sinabing nasa internal pilot testing stage na ang bagong sistema.

Ayon kay Acuña, ang unified ID system para sa PWD ay inisyatibo ni DSWD Secretary Rex Gatchalian na base naman sa utos ni Pangulong Ferdinand Marcos Jr. na gawing inklusibo ang mga programa at polisiya para sa mga bulnerableng sector.