PAG-AARALAN ni Pangulong Ferdinand Marcos Jr., kung kakayanin ng mga negosyante na makapagbigay ng P200 na umento sa arawang sahod ng mga manggagawa kasabay ng pagbubukas ng 20th Congress.

“Pag-aaralan ito kung kakayanin ba talaga kasi kung magdudulot naman ito ng lay-off dahil hindi kakayanin ng karamihang maliliit na mga negosyante, mas marami pong mahihirapang mga manggagawa dahil  baka mawalan sila ng trabaho. Kaya po, itong lahat ng ito ay pag-aaralan para sa ikabubuti po ng lahat,” ang sinabi ni Palace Press Officer at Presidential Communications Undersecretary Claire Castro sa press briefing sa Malakanyang.

Ani Castro, noon pa naman aniya ay gumagawa na talaga ng programa si Pangulong Marcos para sa ikagagaan ng buhay ng bawat manggagawang Pilipino.

Tinukoy nito ang mga job fairs kung saan nakapagbigay na ang gobyerno mula 2022 hanggang kasalukuyang May 1 ng 170,000 na trabaho para sa mga kababayan.

“At dahil na rin nagkaroon din po ng 27 billion US dollar investment, nakapag-create na rin po ng 350,000 na jobs nationwide. At kung nagbigay po ngayon ang Regional  Tripartite Wages and Productivity Board ng P50 na wage hike, iyan po ang na-evaluate na maaaring ibigay sa ating mga manggagawa para maibsan po ang kahit kaunting hirap na lumalabas po ito ay₱1,300 per month,” ang sinabi ni Castro.

Winika pa ni Castro na ang lahat ng kakayanan ng administrasyon at pakikipag-usap sa lahat ng stakeholders – mga manggagawa, mga negosyante, mga investors , ang lahat aniyang ito ay pakikinggan para na rin sa kabutihan ng lahat, hindi lamang para sa manggagawa, hindi lang para sa mga investors o sa mga negosyante kundi para aniya sa lahat.

Sa ulat, itutuloy ng House Bill 88 ang makasaysayang kampanya para sa kauna-unahang legislated wage hike sa loob ng halos apat na dekada.

Ayon sa TUCP, ang panukalang ₱200 umento ay tugon sa lumalakas na panawagan mula sa publiko, mga taga-suporta sa Kongreso, at mga manggagawang nagkakaisa sa ilalim ng National Wage Coalition (NWC).

Ang ₱200 wage hike bill aniya ang kanilang pangunahing panukala sa pagbubukas ng Kongreso, sapagkat ito ang pangunahing hinahangad ng mayorya ng mga manggagawa.

Diin ni Mendoza, ito na lang ang natitirang pag-asa nila para sa makataong pagtaas sa kita.

Hinimok ng kinatawan ang mga kapwa mambabatas, na gawing prayoridad ang panukalang umento sa sahod upang maibsan ang nararanasang krisis ng maraming pamilyang Pilipino, sa gitna ng patuloy na pagsirit ng presyo ng bilihin at serbisyo.

“We feel that the wage bill should be the priority of the majority of the House of the People. We fight for the ₱200 wage hike because honest hardworking parents need to feed their children nutritious meals, send them to school, access healthcare, and get a fighting chance at a decent life,” ani Mendoza.

Isang kaparehong panukala, ang House Bill 78, ang inihain din ni Cavite 1st district Rep. Jolo Revilla. (Daris Jose)

NASA hurisdiksyon na ng Department of the Interior and Local Government (DILG) ang kapalaran ni dating Pangulong Rodrigo Duterte bilang Davao City Mayor, ayon sa Commission on Elections (Comelec).

Ayon kay Comelec Chairman George Garcia, hangga’t walang nakabinbing kaso ang mga nanalong kandidato sa Comelec, ang kanilang hurisdiksyon ay ililipat sa DILG.

Sa ilalim ng succession, sinabi ni Garcia na ang naproklamang Vice Mayor ang magsisilbi bilang acting Mayor.

Sinabi ni Garcia na ang nanalong kandidato na nasa labas ng bansa ay maaaring manumpa sa ambassador o Philippine Consul General.

Ani Garcia, walang nakalagay sa ating batas kung saan pupuwedeng mag-oath ang isang tao.

Ang dating Pangulo ay naaresto noong Marso 11 paglapag mula Hong Kong sa kahilingan ng International Criminal Court (ICC) kaugnay sa imbestigasyon sa kanyang war on drugs. (Gene Adsuara)

PARA sa Malakanyang, mas maganda talaga na maging transparent ang bawat galaw ng mga mambabatas at anumang transaksyon patungkol sa gobyerno para sa taumbayan.

Tugon ito ni Palace Press Officer at Presidential Communications Undersecretary Claire Castro sa naging pahayag ni House Speaker Martin Romualdez na suportado nito ang panawagan na ma-institutionalize ang transparent na budget process sa pamamagitan ng pagbubukas sa bicameral deliberations sa publiko.

Bahagi ito ng mas malawak na reporma sa budget na isusulong sa pagbubukas ng 20th Congress.

“We respect the independence of the Congress pero kapag po ang pinag-usapan ay pagsasapubliko ng anumang transaksiyon patungkol sa gobyerno mas maganda po talaga na maging transparent ang bawat galaw ng mga mambabatas para sa taumbayan,” ani Castro.

Sa ulat, sinabi ni Romualdez na ang transparency at pananagutan ang dapat na magsilbing haligi ng budget process kaya sinusuportahan niya ang hakbang na isapubliko ang diskusyon sa bicameral conference committee.

Sa pamamagitan aniya nito ay maibabalik ang tiwala ng mamamayan at masisigurong ang national budget ay sumasalamin sa kapakanan ng mga Pilipino.

Paliwanag ng Speaker, ang pag-livestream sa bicam proceedings para sa real-time access ng taumbayan at stakeholders ay makatutulong na gawing bukas sa pagbusisi ang budget process.

Binigyang-diin pa ni Romualdez na nakahanay ito commitment ng kanyang legislative leadership na protektahan ang pondo ng bayan.

Ang #OpenBicam campaign na itinutulak ng reform advocates ay nagsusulong ng full disclosure sa bicam deliberations na karaniwang pinal na yugto ng pag-reconcile sa House at Senate versions ng pambansang budget.

Dagdag pa ng leader ng Kamara, nailatag na sa 19th Congress ang pagpapaigting sa budget transparency partikular ang accountability measures kaya kailangang ituloy ang momentum sa pinaka-sensitibong proseso. (Daris Jose)

KASABAY ng makasaysayang panunumpa ng mga bagong halal na opisyal ng Lungsod ng Imus, Cavite at ang selebrasyon ng ika- 13th Anniversary ng pagiging Lungsod ng Imus ay pormal na ginanap sa Open Canal Road, Barangay Malagasang 2C.

Ang programa ay nagsimula sa isang mainit na pagtanggap sa mga panauhin sa pangunguna ni PMAJ Robert S. Dimapilis at sinundan ito ng mga inspirasyonal na mensahe mula kina Acting Chief of Police ng Imus City PLTCOL Chey Chey I. Saulog, City Fire Marshal ng Imus City FCINSP Hayceeline M. Obligar, Congressman AJ Advincula at Mayor Alex Advincula.

Bilang panauhing pandangal at pangunahing tagapagsalita ay binigyang-diin ni Secretary of the Interior and Local Government (DILG) Juanito Victor ‘Jonvic’ C. Remulla, ang kahalagahan ng pagpapatibay sa mga institusyon ng seguridad at kaligtasan.

Kasunod nito ang pormal na pagsasagawa ng ribbon cutting ceremony, unveiling of marker, at blessing ng BFP Central Fire Station at PNP Central Police Station, na pinangunahan nina Secretary Remulla at Mayor Alex Advincula.

Dumalo rin sa programa sina Vice Mayor Homer Saquilayan; DILG Provincial Director Danilo Nobleza; PBGEN Jack Wanky, Regional Director ng PRO4A CALABARZON; PCOL Dwight Alegre,Provincial Director ng Cavite PPO; FSSUPT Douglas Guiyab, na kumatawan kay FCSUPT Roy Roderick Aguto ng BFP Region 4A; FSUPT Genalyn Cabasal, Acting Provincial Fire Marshal ng Cavite; at mga miyembro ng Sangguniang Panlungsod ng Imus at Sangguniang Panlalawigan ng Cavite.

Ang pagkakatayo ng mga bagong pasilidad na ito ay malinaw na patunay ng patuloy na pagsusumikap ng Pamahalaang Lungsod ng Imus, katuwang ang mga pambansang ahensya, upang mapalakas ang serbisyong pampubliko at sa larangan ng seguridad at kaligtasan ng bawat mamamayang Imuseño.

(Text & Photos by Boy Morales Sr.)

MALUGOD na tinanggap ni Mayor WES Gatchalian ang pagsisimula ng kanyang bagong termino na may panibagong pananaw para sa inklusibo at napapanatiling pag-unlad, kasunod ng oathtaking ceremony ng mga bagong halal na opisyal ng Pamahalaang Lungsod ng Valenzuela na pinangasiwaan ni Court of Appeals Justice Jaime Fortunato Caringal na ginanap sa makasaysayang Casa de Polo, nitong Lunes ng umaga.

Kasama ni Mayor WES na nanumpa ang bagong halal na Vice Mayor Marlon Alejandrino, First District Congressman Kenneth Gatchalian, Second District Congressman Gerald Galang, at mga miyembro ng Sangguniang Panlungsod, na binubuo nina Cris Feliciano-Tan, Ghogo Deato-Lee, Atty. Richard Enriquez, Atty. Bimbo Dela Cruz, Kisha Ancheta, at Goyong Serrano mula sa unang Distrito; at Lorie Natividad-Borja, Niña Lopez, Sel Sabino-Sy, Chiqui Carreon, Mickey Pineda, at Louie Nolasco mula naman sa ikalawang Distrito.

Bago ang oathtaking, idinaos ang closing session ng 9th city council kung saan ipinasa ang isang resolusyon na nagbibigay pugay sa mga outgoing three-termer councilors na sina Ramon Encarnacion at Ricar Enriquez, at outgoing Vice Mayor na incoming second district Councilor  Lorie Natividad-Borja para sa kanilang huwarang serbisyo at paglilingkod sa mga Valenzuelano ng siyam na taon.

Isang congratulatory resolution din ang ipinasa bilang pagbati kay Mayor WES Gatchalian para sa kanyang ikalawang termino,  Vice Mayor Marlon Alejandrino, Congressman Kenneth Gatchalian at Congressman Gerald Galang para sa kanilang bagong posisyon bilang kinatawan ng una at ikalawang distrito ng lungsod.

Sa kanyang mensahe, ipinaabot ni Mayor WES ang kanyang taos-pusong pasasalamat sa mga taga-Valenzuela sa muling ibinigay sa kanya na pagtitiwala at sa kanyang team. Muli niyang pinagtibay ang pangako ng kanyang administrasyon na ipagpatuloy ang pagbabago ng Valenzuela sa isang inklusibo at liveable city. Binigyang-diin niya na ang susunod na tatlong taon ay magsisilbing bagong simula, bagong mandato at pagpapalakas ng enerhiya upang makabuo ng pundasyon ng mahusay na pamamahala. Nangako din siya na paigtingin ang pagsisikap na mailapit ang de-kalidad na serbisyo sa bawat barangay at tiyaking walang maiiwan na sektor. (Richard Mesa)