SA kulungan ang bagsak ng isang ginang at kanyang kasabwat sa pagno-notaryo ng mga dokumento, gamit ang pangalan ng isang abogado ng walang pahintulot nang matiklo sa entrapment operation sa Caloocan City, kamakalawa ng hapon.

Dakong ala-1:30 ng hapon nang ikasa ng mga tauhan ni Northern Police District (NPD) Acting Director P/BGen. Arnold Abad ang entrapment operation sa West Grace Park, Brgy. 71, na nagresulta sa pagkakaaresto  sa mga suspek na sina alyas “Montemayor” 54, at alyas “Cañete.”, 35.

Batay sa reklamo ng 81-anyos na bihasang abogadong biktima na may Notary Public sa Quezon City, ginagamit umano ng mga suspek ang kanyang pangalan, dry seal, at lagda ng wala siyang pahintulot para mag-notaryo ng mga dokumento sa Caloocan City kapalit ng perang ibabayad ng kanilang mga kliyente.

Nang magsagawa ng beripikasyon ang mga operatiba ng DSOU-NPD, napatunayang totoo ang bintang ng abogado na dahilan ng pagkakadakip sa mga suspek at nakuha sa kanila ang P500 marked money na bayad sa pagnotaryo ng pulis na nagpanggap na kliyente.

Ani NPD-PIO chief P/Capt. Marcelina Pino, mahaharap ang mga suspek sa kasong paglabag sa Article 177 (Usurpation of Authority), Article 315 (Estafa through Other Deceit), at Article 172 (Falsification by Private Individuals). (Richard Mesa)

INAASAHANG haharap sa korte si dating Negros Oriental Rep. Arnolfo Teves Jr sa gaganaping arraignment at pre-trial matapos ipag-utos ng Manila Regional Trial Court Branch 12.

Gaganapin ang arraignment at pre-trial sa Hunyo 30,2025 sa ganap na alas- 8:30 ng umaga.

Batay sa kautusang inilabas ni Presiding Judge Renato Enciso, kinilala ang pag-aresto kay Teves noong Mayo 29 ng mga tauhan ng NBI Cybercrime Division at Special Task Force .

Inutusan din ng korte ang NBI na iharap ang akusado sa petsa ng pagdinig .

Pinahaharap din ng korte ang testigong si Luciana Pialago Bato mula sa Siaton, Negros Oriental sa pagdinig sa parehong petsa.

Nahaharap sa kasong murder si Teves kasama ang ilan pang akusado na naganap noong 2019 kung saan kabilang din dito ang nangyaring pananambang sa dating ahente ng NBI.

Nakatakda namang maghain ng motion to defer all scheduled proceedings ang kampo ng mambabatas dahil patuloy pang nagpapagaling matapos siyang operahan.

Si Teves ay pansamantalang nakakulong sa BJMP Bicutan, Taguig City. (Gene Adsuara)

NAREKOBER ng pinagsanib na puwersa ng mga awtoridad ang 166.6 milyong pisong halaga ng hinihinalang shabu na nadiskubre ng mga Pilipinong mangingisda sa baybayin ng  Barangay Kaychanarianan, Basco, Batanes, noong Hunyo 25, 2025.

Ayon sa mangingisda, nadiskubre niya ang mga kontrabando na may timbang na humigit-kumulang 24.5 kilos noong Hunyo 19 sa nasabing baybayin.

“Initially thinking that the packs contained tea, he brought them home for safekeeping. After several days, he opened the content and noted that the substance resembled ‘shabu,’ prompting him to report the matter to authorities,” sinabi ni Coast Guard Station (CGS) Batanes.

Ayon pa sa PCG, boluntaryong isinuko ang isa sa nakabukas nang sako na naglalaman ng 24 vacuum-sealed plastic packs at isang nakabukas na pakete ng   labeled ‘Daguanying’ na may lamang white crystalline substances.

Sa kasalukuyan, ang narekober na mga kontrabando ay nasa kustodiya ng PDEA Batanes Provincial Office at isusumite sa PDEA laboratory para sa tamang   examination at disposisyon. (Gene Adsuara)

KINONDENA ng mga mambabatas ang alegasyon ni Vice President Sara Duterte na ‘binayaran’ ang mga mambabatas na pumirma sa impeachment laban sa kanya.

Mariing ibinasura ni House Assistant Majority Leader at Manila 1st District Rep. Ernesto Dionisio Jr. ang alegasyon na nagsabing ang mga salitang ganito ay para iwasan ang tunay na isyu.

“The issue is there’s an impeachment complaint filed by a Filipino citizen, dinala sa Kongreso. We have to act upon it as a constitutional mandate by Congress. That’s exactly what the House did. May batayan ba? May pamantayan? Yes. So that’s why it was elevated to the Senate. Now they’re there to act as impeachment court,” ani Dionisio.

Aniya dapat sumunod na lamang sa proseso dahil ito ang mabisang paraan para patunayan kung nagkasala o hindi ang isang personalidad at maipakita sa taumbayan na walang itinatago.

“Ipakita natin na patas ang gobyerno, na patas ang institusyon, at patas ang proseso as mandated by our Constitution. Doing so, the issues na nahaharap sa kahit sinong leader sa ating bansa—they will either be judged accordingly in history as tama ba o mali,” pahayag nito.

Tinuligsa rin ni Lanao del Sur 1st District Rep. Zia Alonto Adiong, chairman ng House Ad Hoc Committee on Marawi Rehabilitation and Victims Compensation, ang pahayag ni Duterte.

Ayon sa mambabatas, ang Articles of Impeachment ay pinagbotohan ng mayorya ng mga mambabatas at ipinasa ng Kamara.

“Compared to the devious acknowledgment receipts, the verified impeachment complaint has the blessing—it carries with it the blessing—of the Constitution. Sabi nga ni Cong. Ernix, the process wherein we ensure that our Constitution is alive and well,” ani Adiong.

(Vina de Guzman)

INIHAYAG ni Cavite Rep. Jolo Revilla na agad niyang ihahain ang panukalang legislated wage hike sa pagbubukas ng ika-20 kongreso makaraang mabigo ang 19^th Congress na maipasa ang panukala bago ito mag-adjourn.

“Our workers have waited long enough. They’ve sacrificed, endured, and carried our economy through crises. It’s time government meets them halfway—with action, not just empty praise. Let’s re-file the bill and get it done,” anang mambabatas.

Isa si Revilla sa mga original authors ng House Bill No. 7871 nitong 19th Congress para sa ₱150 across-the-board increase in daily wages para sa lahat ng private sector workers sa buong bansa. Isinama ito sa panukalang ₱200 wage hike na siyang inaprubahan ng Kamara nitong March 2025 ngunit hindi naipasa ang bago ang sine die adjournment.

Sinabi ni Remulla na nanatiling mababa ang minimum wage. Sa ilang rehiyon sa bansa, sa kabila ng wage board adjustments ay hindi sapat ang sahod ng mga manggagawa para suportahan ang kanilang pamilya.

Nagbabala ang mambabatas na ang inflation, dagdag pa ang global conflicts at domestic supply issues, ang patuloy na nagpapababa sa halaga ng sahod kung maraming pamilyang pinoy ang nahihirapan.

“Wage reform is not a handout. It’s an investment in our workforce. If we want real inclusive growth, we need to put more money in the hands of those who keep the economy moving—our workers,” pahayag pa nito.

Nanawagan naman si Revilla sa dalawang kapulungan ng Kongreso na magkaisa at gawing prayoridad ang pagpasa ng panukala upang hindi na maulit ito.

(Vina de Guzman)

BINALAAN ni Navotas City Representative Toby Tiangco ang publiko sa tumataas na paggamit ng artificial intelligence (AI) sa mga scam at hinimok ang lahat na manatiling alerto.

“Nakakalungkot dahil habang umaangat ang ating teknolohiya, nagiging high tech na rin ang mga scammers,” ani Tiangco, chairman ng Information and Communication Technology (ICT) ng Kamara.

Binanggit niya ang dumaraming ulat ng AI na ginagamit upang lumikha ng mga pekeng transaction slip, na ipinapadala ng mga scammer para linlangin ang mga individual at may-ari ng negosyo.

“Paalala po sa ating mga kababayan, pati na rin sa mga negosyo, huwag basta-basta maniwala sa ipinapakitang resibo ng transaksyon. Mag-double check, mag-validate, dahil kayang-kaya na ngayong gumawa ng pekeng slip gamit ang AI,” pahayag niya.

Ipinag-alala din niya ang pagtaas ng romance at investment scams na ginawang mas nakakumbinsi sa pamamagitan ng AI-generated videos at images.

“May mga scam ngayon kung saan may ka-video call ka pa. Akala mo totoo ang kausap mo, pero AI-generated na pala ang mukha at boses.” sabi ng kongresista.

“Nakakatakot dahil napakadali nang manlinlang ngayon. Ginagamit pa ang mukha ng mga kilalang tao para manlinlang ng iba. Kaya tandaan natin, kung sobrang ganda ng offer, malamang scam na ‘yan,” dagdag niya.

Binigyaang-diin ni Tiangco ang pangangailangang protektahan ang publiko at bigyang babala sa mga nasa likod ng naturang mapanlinlang gawain.

“Itigil na po ang ganitong mga gawain dahil sa oras na mahuli kayo ng kinauukulan, maaari kayong sampahan ng kasong paglabag sa Cybercrime Prevention Act, pati na ang Anti-Financial Scamming Act na magdudulot ng 12 hanggang 20 taon na pagkakakulong,” babala ng mambabatas. (Richard Mesa)