KALABOSO ang 46-anyos na mister matapos inguso sa mga pulis na may dalang baril habang gumagala sa lansangan sa Caloocan City.

Batay sa report, nakatanggap ng impormasyon ang East Bagong Silang Sub-Station 13 hinggil sa isang armadong lalaki na pagala-gala sa Brgy. 176.

Agad namang rumesponde ang mga tauhan ng SS13 sa naturang lugar kung saan nakita nila ang isang lalaki na tumutugma sa iniulat  ng caller at may hawak bitbit na baril dakong ala-1:00 ng madaling araw.

Maingat nila itong nilapitan bago sinunggaban ang hawak na kalibre 9mm pistol na kargado ng dalawang bala sa magazine.

Nang kapkapan, nakuha pa sa suspek na si alyas “Rudy” ang isang patalim (balisong) na naging dahilan upang bitbitin siya ng mga pulis.

 Kasong paglabag sa R.A. 10591 (Comprehensive Firearms and Ammunition Regulation Act), B.P. 881 (Omnibus Election Code), at B.P. 6 (Illegal Possession of Bladed, Pointed, or Blunt Weapons) ang isinampa ng pulisya sa Caloocan City Prosecutor’s Office. (Richard Mesa)

INIREKOMENDA ng House of Representatives ang pagsasampa ng kaso laban kay Vice President Sara Duterte at iba pa dahil umano sa technical malversation, perjury, bribery at plunder.

May kaugnayan ang kaso sa hindi tamang paggamit ng confidential funds sa Office of the Vice President at sa Department of Education.

Sa ginanap na plenary session nitong Martes ay pinagtibay ng mababang kapulungan ang committee report ng House Committee on Good Government nd Public Accountability na siyang nagsagawa ng pagdinig ng kaso.

Base sa committee report na kanilang napatunayan sa committee hearings na nagkamal ng nasa P50 milyon na public fund habang ang confidential funds ay hindi nagamit ng tama na nagkakahalaga ng P612.5 milyon.

Dagdag naman ni Committee Chairperson Rep. Joel Chua na si Duterte lamangang unang bise president na humirit ng labis na confidential fund kung saan mahigit na P125 milyon ay nagastos sa loob ng 11 araw.

Magugunitang una ng itinanggi ng Bise Presidente ang mga alegasyon na ibinabato sa kanya. (Daris Jose)

SA BOTONG  177-0, inaprubahan ng kamara sa ikatlo at huling pagbasa ang panukalang maglalagay ng mekanismo at kriteria sa deklarasyon ng state of imminent disaster at pagtugon ng gobyerno kapag may bagyo at iba pang emergency.

Ayon kay Speaker Ferdinand Martin Romualdez, principal author ng House Bill No. 11430, layon ng panukala na maiwasan kundi mman mapigilan ang pagkawala ng buhay, pagkasira ng ari-arian at pagkawala ng pangkabuhayan tuwing may kalamidad o sakuna, maging ito ay natural o man-made.

Ang Pilipinas aniya ay nasa Pacific typhoon belt, na dinadaan ng nasa 20 bagyo kada taon na nagiging dahilan para maapektuhan ang buhay ng publiko at ekonomiya.

“The proposed Declaration of State of Imminent Disaster Act will enable the national government, local government units, and our communities to better prepare for and respond to disasters or natural calamities. Better preparation and responses will save lives, properties, and livelihoods,” the leader of the 306-strong House of Representatives said.

Sa ilalim ng HB 11430, bibigyan otorisasyon ang presidente na magdeklara ng State of Imminent Disaster sa ilang barangays, municipalities, cities, provinces, at regions gamit ang guidelines na ipinalabas ng National Disaster Risk Reduction and Management Council (NDRRMC).

Ang local chief executive (LCE), sa pamamagitan ng executive order at rekomendasyon ng local DRRM council, ay maaaring magdeklara ng state of imminent disaster sa kanyang hurisdiksyon.

Iba’t ibang hazards tulad ng natural at human-induced disasters, epidemics, pandemics, iba pang sakit na may public health concern, at iba pang sakuna na nakakaapekto sa normal na pagkilos ng komunidad ay maaaring wing dahilan para sa deklarasyon ng state of imminent disaster.

Papayagan ng deklarasyon ang national at local DRRM councils na gumamit ng national and local resources at mekanismo para sa ipatutupad na to implement anticipatory measures.

Ang mga local government units ay maaaring magsama ng planned interventions sa kanilang regular programs, plans, activities, at budgets. Para sa national government agencies, ang pondo ay kukunin mula sa National DRRM Fund. (Vina de Guzman)

SINIMULAN na ng Land Transportation Office (LTO), ang imbestigasyon laban sa 160 medical clinics sa buong bansa kaugnay ng mga ulat ng iregular na pag-isyu ng medical certificates.

Ayon kay LTO Chief, Assistant Secretary Atty. Vigor D. Mendoza II, isa sa mga pangunahing requirement sa pagkuha ng driver’s license ang medical certificate, subalit batay sa mga ulat na natanggap ng ahensya, sangkot umano ang ilang LTO-accredited medical clinics sa modus na pag-isyu ng medical certificates kahit walang aktuwal na pagsusuri sa aplikante.

“Malinaw na kahit hindi ka magpa-check up sa mga clinics na ito, basta willing kang magbayad, ay maiisyuhan ka ng medical certificates. Hindi ito tama at tinitiyak natin na hahabulin namin ang mga ito,” pahayag ni Asec Mendoza.

Dagdag pa ni Asec Mendoza, agad na ipinag-utos ni Secretary Dizon ang paghahanda ng mga kinakailangang kasong administratibo at kriminal laban sa mga sangkot, kabilang na ang mga doktor na pumirma sa mga pekeng medical certificates na walang personal na pagsusuri.

Una nang nangako si Secretary Dizon na magiging masigasig ang kanyang kampanya para sa kaligtasan sa kalsada, kabilang na ang paghabol sa mga pasaway na motorista at pagpapabuti ng mga imprastraktura sa kalsada.

Para kay Asec Mendoza, malinaw na nalagay sa panganib ang kaligtasan sa kalsada sa ginawang ito ng ilang medical clinics dahil wala umanong aktuwal na pagsusuri sa mga aplikante ng lisensya.

“Inatasan ko na ang mga regional directors na kunin ang lahat ng medical certificates na inisyu ng mga klinikang ito at abisuhan ang mga nabigyan ng lisensya gamit ang kaduda-dudang medical certificate na magpaliwanag,” ayon kay Asec Mendoza.

“Kung may sapat na ebidensya, agad naming babawiin ang akreditasyon ng mga klinikang ito at ipapataw ang habambuhay na pagbabawal sa anumang transaksyon nila sa LTO,” dagdag pa niya.

Ayon pa kay Asec Mendoza, simula ngayong linggo ay matatanggap na ng lahat ng 160 medical clinics sa buong bansa ang kanilang show cause order. (PAUL JOHN REYES)

KULUNGAN ang kinasadlalan ng isang lalaki nang makuhanan ng hindi lisensyadong baril sa bisa ng ipinatupad na search warrant ng pulisya sa Valenzuela City.

Sa ulat, nakatanggap ng impormasyon ang mga tauhan ni Valenzuela police chief P/Col. Relly Arnedo na nag-iingat umano ng hindi lisensyadong baril ang 37-anyos na lalaki na residente ng Brgy. Gen T. De Leon.

Bitbit ang search warrant na inisyu ni Valenzuela City Regional Trial Court Presiding Judge Evangeline S. Mendoza-Francisco, hinalughog ng mga tauhan ng Gen. T De Leon Police Sub-Station (SS2) ang bahay ng suspek sa Brgy. Gen T. De Leon dakong alas-5:20 ng hapon.

Nasamsam ng mga tauhan ng SS2 sa loob ng bahay ng suspek ang isang improvised UZI-type na baril na may limang bala ng kalibre .22 sa magazine.

Mahaharap ang suspek sa kasong paglabag sa Section 28 ng R.A 10591 o ang Comprehensive Law on Firearms and Ammunition. (Richard Mesa)

MINENTINA ng National Unity Party (NUP) ang kanilang buong suporta sa pananatili bilang lider ng Kamara ni Speaker Martin Romualdez sa papasok na ika-20th Congress.

Kasabay ito sa pagtuligsa ni NUP president Rep. LRay Villafuerte  sa umano’y personal agenda ng pinatalsik na miyembro ng partido na si Deputy Speaker at Cebu Rep. Vincent Franco “Duke” Frasco.

“The members of the supermajority coalition, with Duke’s exception, are four-square behind Speaker Martin (Romualdez) to remain at the helm of the House of Representatives in the next Congress to help stay the course of President Marcos’ agenda of better lives for all Filipinos. So, we actually do not know what discord he is talking about,” ani Villafuerte, outgoing congressman at governor-elect ng CamSur, kay Frasco, na pinatalsik ng NUP noong nakalipas na linggo dahil sa pag-alis ng suporta kay Romualdez na isang paglabag sa nagkaka-isang position ng partido na suportahan si Speaker.

Sinabi pa ni Villafuerte na lumilitaw na ang mambabatas ang siyang nagsusulong na sarili umano nitong personal at partisan interests.

“Frasco has slighted the official NUP position of support for Congressman Martin as a shrewd political ploy to arm-twist the Speaker into keeping him as Deputy Speaker in the incoming Congress. Duke was expelled last week for sowing disunity and discord himself in making his unilateral move to withdraw support from Congressman Martin in blatant contravention of the NUP’s unanimous support for the Speaker to keep his post in the next Congress—and without first consulting our party,” pahayag ni Villafuerte.

Iginiit naman nito na may karapatan ang sinuman na tumanggi at huwag lumagda.

“Pero may pananagutan din kaming itama ang maling impresyon—na ang tahimik na mayorya ay hindi nagkakaisa. Sa katunayan, mas matibay ang pagkakaisa ngayon kaysa dati. At this critical time in our national life, the Filipino people deserve less noise and more action. The House, under the leadership of Speaker Martin,  will continue to do its work—with clarity, competence, and conviction,” pagtatapos ng kongresista.

(Vina de Guzman)

NASA limang major na panukalang batas ukol sa extrajudicial killings, offshore gaming operations, land fraud, identity falsification at espionage ang naihain sa ginawang 15 marathon hearings na nagsagawa ng pinal na.

Kabilang sa mga panukala ay ang House Bill No. 10986 na nagka-klasipika sa extrajudicial killing bilang isang heinous crime at paglalaan ng reparations sa pamilya ng biktima; House Bill No. 10987 na nagbabawal sa lahat ng uri ng offshore gaming operations sa Pilipinas; House Bill No. 11043, na naglalaan ng civil forfeiture ng real estate na iligal na nabili o nakuha ng foreign nationals; House Bill No. 11117, na nagbibigay kapangyarihan sa estado na magkansela sa birth certificates na nakuha sa pamamagitan ng iligal na paraan at House Bill No. 10998, na nagpapataw ng and proposal to commit espionage.

Nagsagawa ng pagdinig ang Quad Comm kaugnay sa EJKs na naganap sa madugong drug war ng Duterte administration na ikinamatay ng libong pinoy.

Pinapurihan naman ni Manila Rep. Bienvenido “Benny” Abante, co-chair ng Quad Comm at chairman ng House Committee on Human Rights ang mga whistleblowers at saksi na tumestigo sa pagdinig.

“All this has been possible because good people chose not to be silent… To them, we say this: you may escape our reach, but not the long arms of the law,” ani Abante.

Sinabi naman ni Abang Lingkod Party-list Rep. Joseph Stephen “Caraps” Paduano, co-chair ng House Quad Comm at chair naman ng House Committee on Public Accounts, na lumabas sa pagdinig na kailangang harapin ang realidad na may mga pinoy at Chinese nationals na hinayaang magpagamit para paghati-hatiin ang sambayanang Pilipino.

Nabunyag din sa komite ang birth certificate fraud scheme na ginamit ng Chinese nationals para makapag-operate ng business at makabili ng lupa.

“These unscrupulous individuals would deliberately resort to illegal means… to lend a semblance of legitimacy to their unlawful intentions,” dagdag nito.

(Vina de Guzman)

UMABOT sa mahigit P.4 milyong halaga ng shabu ang nasamsam sa dalawang hinihinalang sangkot sa pagtutulak ng ilegal na droga matapos matimbog ng pulisya sa buy bust operation sa Malabon City.

Sa kanyang report kay Northern Police District (NPD) District Director P/BGen. Josefino Ligan, kinilala ni District Drug Enforcement Unit (DDEU) chief P/Capt. Regie Pobadora ang mga suspek na sina alyas “Letlet”, 27, at alyas “Wangbu”, 43.

Ayon kay Capt. Pobadora, positibo ang natanggap nilang impormasyon hinggil sa umano’y ilegal drug activities ng mga suspek kaya ikinasa nila ang buy bust operation, sa koordinasyon sa PDEA.

Dakong alas-6:43 ng umaga nang dambahin ng mga tauhan ni Capt. Pobadora ang mga suspek sa Barangay Potrero, Malabon City matapos bintahan ng isang sachet ng shabu ang isang pulis na nagpanggap na buyer.

Nakumpiska sa mga suspek ang nasa 60 grams ng hinihinalang shabu na nagkakahalaga ng P408,000.00 at buy bust money.

Mahaharap ang mga suspek sa kasong paglabag sa Sections 5, 11, at 26 ng R.A 9165, o ang Comprehensive Dangerous Drugs Act of 2002. (Richard Mesa)