MAHIGIT P.7 milyong halaga ng shabu ang nasamsam ng pulisya sa isang drug suspect na itinuturing bilang High Value Individual (HVI) matapos madakma sa buy bust operation sa Valenzuela City.

Ikinasa ng mga operatiba ng Station Drug Enforcement Unit (SDEU) ng Valenzuela police sa pangunguna ni P/Capt. Joan Dorado, sa koordinasyon sa PDEA ang buy bust operation kontra kay alyas “Bumbay”, 29, ng Brgy. Veinte Reales.

Ayon kay Capt. Dorado, nakatanggap sila ng impormasyon hinggil sa umano’y illegal drug activities ng suspek hanggang sa magawa ng isa niyang tauhan na makipagtransaksiyon kay alyas Bumbay.

Dakong alas-11:59 ng hating gabi nang makipagtagpo umano ang suspek sa isang undercover police na nagpanggap na buyer sa tabi ng construction site sa Rubber Master St., Brgy., Lingunan na nagresulta sa pagkakaaresto sa kanya.

Sa ulat ni Capt. Dorado kay Valenzuela police OIC chief P/Col. Gerson Bisayas, nakuha nila sa suspek ang nasa 105 grams ng hinihinalang shabu na may katumbas na halagang P714,000.00, buy bust money na isang tunay na P500 bill at anim pirasong P1000 boodle money, at 200 cash.

Ayon kay SDEU investigator P/MSgt. Ana Liza Antonio, kasong paglabag sa. Sections 5 at 11 under Article II ng RA 9165 o ang Comprehensive Dangerous Drugs Act of 2002 ang isasampa nila laban sa suspek sa pamamagitan ng inquest proceedings sa Valenzuela City Prosecutors Office. (Richard Mesa)

BINITBIT sa selda ang 24-anyos na obrero matapos inguso ng kanyang mga ka-lugar na may dalang baril sa Caloocan City, kahapon ng madaling araw.

Sa ulat, habang nagpapatrolya ang mga tauhan ni Caloocan City Police OIC chief P/Col. Joey Goforth sa Brgy. 175, Camarin nang lapitan ng isang residente sa Sitio Matarik dakong alas-12:30 ng madaling araw at isinumbong ang pabalik-balik na paglalakad ng suspek habang may bitbit na baril.

Nang magtungo sa naturang lugar ang mga tauhan ng Cadena De Amor Police Sub-Station 11, inabutan pa nila ang suspek na palakad-lakad habang may hawak na armas kaya’t maingat nilang nilapitan at tinanong kung may dokumento ang hawak nab aril.

Dahil walang maiprisintang legal na dokumento ang suspek na si alyas “Junior”, inaresto siya ng mga pulis at kinumpiska ang hawak na kalibre .38 revolver na kargado ng dalawang bala.

Ayon kay Northern Police District (NPD) Director P/BGen. Josefino Ligan, sasampahan nila ng kasong paglabag sa the Comprehensive Firearms and Ammunition Regulation Act ang suspek sa piskalya ng Caloocan City. (Richard Mesa)

HINIMOK ng multisectoral group na “Kongreso ng Bayan” si House Speaker Ferdinand Martin Romualdez na magbitiw na sa kanyang puwesto. Sa isang press conference ay nanawagan ang koalisyon at sinabi na “We are calling the immediate resignation of House Speaker Martin Romualdez resign now na!”

Ayon sa grupong tinawag na KONGRESO NG BAYAN, masyado na umanong pini-personal ni Romualdez ang mga kalaban sa politika kung kaya’t nagkakagulo ang bansa.

Humarap din sa nasabing Press Conference ang mga grupong naghain ng mga kaso kabilang ang Graft case sa Ombudsman laban kay Romualdez. Sinabi ni Atty. Virgil Garcia na nakabinbin ngayon sa Office of the Ombudsman ang kasong falsification of legislative documents na inihain nila laban kay Speaker Romualdez dahil ang constitutional issue na inihain ni Atty. Vic Rodriguez sa Korte Suprema ay dapat munang lutasin. Tiniyak niya ang “impeccable integrity” ni Ombudsman Samuel Martires sa paglutas ng falsification ng mga legislative document na inihain nila laban kay Speaker Romualdez. “Sana ay mapukaw namin ang natutulog nyong damdamin. Nararapat bang manatili si Speaker Romualdez o dapat na siyang palitan. Kami po ay nagsisimula lamang at nasa inyo na po ang susunod na hakbang,” dagdag pa ni Garcia.

Nilinaw ng grupo na panahon na para bumaba or mag resign na si Romualdez dahil kulang na ang pamunuan at panahon na para kay Speaker Romualdez na tumabi na at ibigay na ang pamumuno ng Kongreso sa ibang Kagawad ng Kongreso. At ayon pa sa grupo ay inihaharap nila sa mga tao ang tunay na sitwasyon at binubuksan ang mga mata sa kung ano ang maaaring gawin ng mga tao mismo sa kani-kanilang Congressional District kung kaya’t ang aksyon ay dapat magmula sa mga taong apektado mismo.

May mga pangalang lumutang na maglalaban para sa House Speakership at ito ay sina ALBEE BENITEZ, Bacolod City Lone District., ANGELO BARBA, Ilocos Norte 2nd District., TOBY TIANGCO, Navotas City Lone District, MARTIN ROMUALDEZ, Leyte 1st District.

Si “ALBEE BENITEZ ang napupusuan ng grupo na maaaring mas karapat-dapat na mamuno bilang susunod na Speaker of the House of Representatives of the Philippines.

Ang “Kongreso ng Bayan” ay isang koalisyon ng iba’t ibang grupo, mga pinuno mula sa relihiyon, katutubo, Muslim, abogado, OFW, negosyo, at sektor ng transportasyon, at mga retiradong tauhan ng militar at ordinaryong Pilipino. Nauna na nilang binawi ang kanilang suporta kay Pangulong Ferdinand “Bongbong” R. Marcos, Jr. (PAUL JOHN REYES)

KAMAKAILAN  lamang   ay   inilunsad   ni   President   Ferdinand   E.   Marcos, Jr.   ang “Pamilya Pass 1 + 3 Promo” sa mga rail lines sa Metro Manila tulad ng Metro Rail Transit Line 3 (MRT3), Light Rail Transit Line 1 (LRT 1) at Light Rail Transit Line 2 (LRT2).

Ang promo ay nagbibigay ng libreng sakay sa 3 pasahero kasama ang 1 pasahero na magbabayad tuwing araw ng Linggo lamang. Sinimulan ang promo noong nakaraang June 1 sa lahat ng mga rail lines sa Metro Manila.

Nagkaroon ng launching kung saan ang President Marcos kasama ang Unang

Ginang Liza Araneta-Marcos at ang kanilang 3 anak na sumakay sa estasyon ng MRT 3 GMA-Kamuning sa Quezon City. Hinihikayat ni Marcos na gamitin ang programa upang mapatibay ang pamilyang Filipino.

“In Filipino culture, Sundays are for family, for loved ones to have a family bonding.

That’s why we created this program called the 1 + 3 program,” wika ni Marcos.

Ang programa ay naglalayon na mabigyan ng mas madaming pagkakataon ang mga pamilyang Filipino na magkaroon ng quality time na sama-sama lalo na ngayon na

maraming pinagdaraan ang mga sumakasay na publiko.

“So that families and friends can have the chance to be together. Hopefully, we can give our fellow Filipinos the chance to feel what Sunday means truly. I also acknowledged the struggles faced by many commuters who often miss family time due to long work hours and exhausting travel,” dagdag ni Marcos.

Samantala, sa sektor naman ng land transportation, kinansela ng Metropolitan Manila Development Authority (MMDA) ang planong pagpapatupad ng odd-even scheme

sa kahabaan ng EDSA matapos ang pagpapaliban sa gagawing rehabilitasyon ng EDSA.

Ginawa ang pagpapaliban upang ang mga ahensiya ng pamahalaan na mamahala sa   rehabilitasyon   ay   magkaroon   ng   masinsinang   pag-aaral   sa   nasabing   plano   na

mapagaan ang inaasahang pagkakaron ng matinding trapiko habang ginagawa ito.

“Pursuant to the directive of the President, the MMDA will suspend the imposition of the odd-even scheme, which was part of the traffic management plan that was laid

down intended to decongest EDSA before the looming rebuild,” sabi ni MMDA chairman Don Artes.

MAY plano ang Department   of Transportation (DOTr) na magtayo ng busway system na magdudugtong sa Espana at Quezon Avenue sa 2026 bilang isa sa pagsisikap na paraan upang magkaroon ng magandang urban mobility sa Metro Manila.

“The most viable and most needed one is Espana to Quezon Avenue. We are

doing the feasibility study and hopefully next year, it’s not difficult to build. That’s the long-term solution to the busway,” wika ni DOTr Secretary Vince Dizon.

Ayon sa kanya ang bagong corridor ay makakatulong sa ginagawang upgrading ng EDSA Busway system na isang proyekto bilang flagship mass transit na nilungsad noong 2020 upang mabawasan ang pagsisikip sa mga pangunahing lansangan sa kalakhan

Maynila.

Habang ang ginagawang rehabilatasyon naman ng EDSA Busway ay patuloy pa

rin sa loob ng buong taon.

Nakikipag-usap   naman   ang   DOTr   sa   International   Finance   Corporation   (IFC) upang magkaroon ng  privatization   ang   operasyon at pag-aayos ng   nasabing busway upang magkaroon ng mas epektibong sistema ito.

Ang pamahalaan ay nagkaroon din ng partnership sa mall operator ng SM Prime Holdings Inc. ng pamilyang Sy upang gumawa ng commuter concourses along EDSA.

Inaasahan na matatapos ang bagong pasilidad sa SM Megamall bago matapos ang 2025 matapos ang pagbubukas ng bagong concourse sa SM North EDSA ngayon taon.

Naglalayon ang mga concourses na magbigay ng direct access sa EDSA busway sa pamamagitan ng pagkakaron ng mga ramps at elevators.

Ang EDSA Busway ay isang proyekto na  ginawa kasama ang Department of

Public Works and Highways (DPWH) at ng Metropolitan Manila Development Authority (MMDA) na naglalayon na magkaron ng ligtas na paglalakbay at upang mas gumanda ang transport reliability sa Metro Manila.

Sa   kabilang   dako   naman   ay   sinabi   rin   ng   DOTr   na   puwedeng   magawa   ang rehabilitasyon ng  EDSA sa loob lamang ng anim (6) na buwan sa pamamagitan ng gagamiting modern technology.

Ayon kay Dizon ay may nakita siyang mga mungkahi galing sa mga iba’t ibang

grupo na ayon sa kanya ay kakayanin na gawin ito sa loob ng 6 na buwan. Ang kailangan lang ay gamitan ng makabagong technology at hindi na ang makalumang paraan ang gagamitin.

“This is the time that we could modernize our construction methodology,” saad ni

Dizon.

Sana ay sisimulan ang rehabilitasyon ngayon buwan subalit ang planong odd-even scheme na gagawin sa EDSA na lilimitahan sana ang mga motorista sa pagdaan at paggamit ng EDSA ay nagkaron ng maraming pagtuligsa mula sa publiko. Sinabi rin ng mga tao na walang mga alternatibong daraanan ang binigay ng pamahalaan sa mga

motorista na gumagamit na ng matagal sa EDSA. LASACMAR

INANUNSYO ni San Juan City Mayor Francis Zamora na nagtalaga ang lokal na pamahalaan ng ‘Basaan Zone’ para sa nalalapit na pagdaraos ng ‘Wattah Wattah Festival’ sa Hunyo 24, Martes, sa pagdiriwang ng araw ng kapistahan ni St. John, The Baptist.

Ayon kay Zamora, alinsunod sa revised City Ordinance No. 14, Series of 2025, ang basaan ay isasagawa lamang sa Pinaglabanan Road, sa pagitan ng P. Guevarra St. at N. Domingo St. sa San Juan, gayundin sa bisinidad ng Pinaglabanan Shrine, mula 7:00AM hanggang 2:00PM lamang.

Aniya, layunin ng naturang hakbang na matiyak ang kaayusan at kapayapaan ng naturang okasyon at upang hindi na maulit ang kaguluhang nangyari sa okasyon noong nakaraang taon. Magpapakalat sila ng mahigit 300 pulis sa lugar na siyang magpapanatili ng kaayusan at magmo-monitor sa loob at labas ng designated zone.

Nagpaalala rin naman si Zamora na mahigpit pa ring ipinagbabawal ang paggamit ng maruming tubig sa pambabasa, gayundin ang paggamit ng ‘water bombs’ o yaong tubig at yelo na nakalagay sa plastik, bote o anumang lalagyan, na maaaring magresulta sa pananakit o pagkasugat.

Hindi rin aniya pinahihintulutan na buksan ang mga pinto ng sasakyan o pagpasok sa loob ng isang bukas na sasakyan upang mambasa ng tubig, gayundin ang pananakit o pagbabanta, pag-akyat, at pag-uga sa isang sasakyan.

Ipatutupad din ang liquor ban sa buong lungsod, mula 12:01AM hanggang 2:00PM ng Hunyo 24 kung saan ang pagbebenta at pagkonsumo ng alcoholic beverages sa mga pampublikong lugar, kabilang ang groceries, supermarkets, restaurants, at sari-sari stores, ay mahigpit na ipinagbabawal.

NAGWAKAS na ang maliligayang araw ng 41-anyos na lalaki na akusado sa ilang ulit na pagmamalupit sa menor-de-edad na babaeng biktima bago ginawan umano ng kahalayan hanggang tuluyang gahasain sa Valenzuela City.

Sa ulat, inilunsad ng mga tauhan ni Northern Police District (NPD) Director P/BGen. Josefino Ligan ang manhunt operation laban sa puganteng nagpapakilala sa mga alyas na “Rambo” at “Daddy” nang maglabas ng warrant of arrest ang hukuman matapos ang ginawa niyang pagtatago sa batas.

Dakong alas-7:10 ng gabi nang tuluyang masukol nina P/Capt. Ferdinand Orbeta, hepe ng Intelligence Section ng District Mobile Force Battalion (DMFB) ng NPD ang akusado sa Barangay Malinta, Valenzuela City matapos ang ilang linggong pagtugis sa kanya.

Gumamit ng alternatibong recording device tulad ng cellular phone ang pulisya nang isilbi sa akusado ang warrant of arrest na inilabas ng Valenzuela City Family Court Branch 16 para sa mga kasong isang bilang na Statutory Rape, dalawang bilang na  Sexual Assault, isang bilang ng Acts of Lasciviousness, at apat na bilang na paglabag sa R.A. 7610 o ang Special Protection of Children Against Abuse, Exploitation, and Discrimination Act.

Ayon kay NPD Public Information Office (NPD) Chief P/Capt. Marcelina Pino, walang piyansang inirekomenda ang korte sa kasong statutory rape laban sa akusado habang may kabuuang piyansang P400,000 sa dalawang bilang na kasong Sexual Assault, P180,000 sa Acts of Lasciviousness at tig-P80,000 kada bilang sa R.A. 7610 para sa pansamantalang paglaya. (Richard Mesa)

KALABOSO ang isang hinihinalang tulak ng ilegal na droga na itinuturing bilang High Value Individual (HVI) matapos makuhanan ng mahigit P.5 milyong halaga ng shabu nang maaresto ng pulisya sa ikinasang buy bust sa buy bust operation sa Valenzuela City, kahapon ng madaling araw.

Sa kanyang ulat kay Northern  Police District (NPD) District Director P/BGen. Josefino Ligan, sinabi ni District Drug Enforcement Unit (DDEU) Chief P/Capt. Regie Pobadora na nakatanggap sila ng impormasyon hinggil sa umano’y ilegal drug activities ni alyas “Eseng”, 33, construction worker ng Brgy. Bignay.

Nang magawang makipagtransaksiyon sa suspek ng isa sa kanyang mga tauhan, ikinasa ni Capt. Pobadora ang buy bust operation, katuwang ang Valenzuela Police Sub-Station 7, sa koordinasyon sa PDEA laban sa suspek.

Nang tanggapin umano ng suspek ang marked money mula sa pulis na nagpanggap na buyer, kapalit ng isang plastic sachet ng shabu ay agad siyang sinunggaban ng mga operatiba dakong alas-3:35 ng madaling araw sa Northville II, Blk 1, Brgy., Bignay.

Nakumpiska sa suspek ang humigi’t kumulang 80 grams ng hinihinalang shabu na may standard drug price value na P544,000 at buy bust money.

Ayon kay Capt. Pobadora, kasong paglabag sa Sections 5 at 11 under Article II ng R.A 9165 o ang Comprehensive Dangerous Drugs Act of 2002 ang isasampa nilang kaso laban sa suspek sa Valenzuela City Prosecutor’s Office. (Richard Mesa)

ITO ang naging pahayag ni Rep. Bienvenido “Benny” Abante Jr. matapos magpalabas ng desisyon ang Commission on Elections’ (Comelec) na i-annul ang proklamasyon ni Luis “Joey” Chua Uy ant ideklara si Abante bilang duly elected Representative ng ika-6 na distrito ng Maynila.

Giit ni Abante, malinaw na isinasaad sa konstitusyon na tanging natural-born Filipino citizens ang kuwalipikadong magsilbi sa Kongreso. Kinumpirma ng naging desisyon ng Comelec ang nasabing requirement at prinotektahan nito ang integridad ng demokratikong institusyon.

Sabi pa ni Abante, “This case sets an important precedent. It reminds us that those seeking public office must be held to the highest standards of eligibility and truthfulness. Our people deserve leaders whose allegiance to the country is beyond question, and whose qualifications are beyond doubt.”

Sa naging desisyon, sinabi ng Comelec na nagkaroon ng material misrepresentation si Uy sa kanyang certificate of candidacy (COC) sa pamamagitan ng pagdedeklara nitong natural-born Filipino citizen.

Inihayag ng komisyon na si Uy ay “at most a naturalized citizen” kung kaya hindi ito maaaring kumandidato sa kongreso sa ilalim ng Section 6, Article VI ng 1987 Constitution, kung saan nakasaad na “No person shall be a Member of the House of Representatives unless he is a natural-born citizen of the Philippines.”

Dahil dito, pinawalang bisa ang proklamasyon ni Uy at idineklara si Abante na tanging kuwalipikadong kandidato na nakakuha ng pinakamataas na bilang ng boto ang siyang nahalal na miyembro ng Kamara.

“A natural-born citizen acquires citizenship by birth, without the need for any act or proceeding. Mr. Uy’s case clearly required legal processes under naturalization laws, disqualifying him from ever being considered natural-born,” nakasaad sa ruling.

Iginiit ni Abante na ang isyu ay hindi tungkol sa personalidad kundi sa rule of law. (Vina de Guzman)