INAPRUBAHAN ng Department of Budget and Management (DBM) ang second batch ng teaching positions na kokompleto sa 20,000 new teaching items para sa taong 2025.

Sa katunayan, kinumpirma ni DBM Secretary Amenah Pangandaman ang pag-apruba sa 4,000 bagong Teacher I (Salary Grade 11) position, kasunod ng naunang pagpayag na 16,000 position noong nakaraang buwan.

“Sa ngayon, kumpleto na po at buo na ‘yung 20,000 na request po sa atin ng DepEd for 2025,” ang sinabi ni Pangandaman.

Ang mga bagong posisyon ay inilalaan bilang mga sumusunod: 1,658 para sa kindergarten at elementary, 391 para sa junior high school, at 1,951 para sa senior high school, para sa deployment sa school year 2025-2026.

“Parte pa rin po ito ng hangarin ni Pangulong Bongbong Marcos na madagdagan ang ating mga guro at matutukan nang mabuti ang mga estudyante. Ang sabi po n’ya, tulung-tulong lahat ng ahensya lalo na sa pagbubukas muli ng mga klase sa bansa. So, that’s what we’re doing,” ang sinabi ng Kalihim.

Ang pondo para sa mga bagong posisyon ay huhugutin mula sa Built-in Appropriations ng Department of Education sa ilalim ng FY 2025 General Appropriations Act, partikular na sa ilalim ng “New School Personnel Positions” program.

Nauna nang inaprubrahan ng DBM ang 10,000 na non-teaching positions para sa DepEd.

Ayon kay Pangandaman, ang hakbang ay magbibigay ng suporta sa mga guro.

Paglilinaw nito na ito ay bukod pa sa naunang 16,000 na bagong teaching position na kanilang inaprubahan noong nakaraang linggo.

Dagdag pa nito na ang inaprubahang posisyon ay itatalaga bilang Administrative Officer II na may salary grade 11 at ito ay ipapakalat sa mga elementary schools, junior high schools at senior high schools sa buong bansa.

Nais kasi ni Pangulong Ferdinand Marcos Jr na magkaaroon ng dagdag na non-teaching personnel para mabawasan ang load ng mga guro at makapag-focus sila sa kanilang pagtuturo.  (Daris Jose)

NANAWAGAN si Pangulong Ferdinand ‘Marcos Jr. ng isang pagpupulong kasama ang kanyang economic team sa gitna ng nagpapatuloy na krisis sa Gitnang Silangan.

Ito ang sinabi ni Palace Press Officer at Presidential Communications Undersecretary Claire Castro sa press briefing sa Malakanyang, araw ng Lunes.

Kabilang sa inaasahang epekto ng nagpapatuloy na krisis ay ang pagsirit sa presyo ng petrolyo.

Sa ulat, may inaasahang malakihang taas sa presyo ng mga produktong petrolyo sa susunod na linggo bunsod ng kaguluhan sa Gitnang Silangan, partikular ang labanan ng Israel at Iran.

Dahil sa epekto sa oil industry ng labanan ng Israel at Iran, tinatayang aabot sa P2.50 hanggang P3.00 per liter ang itataas sa presyo ng gasolina.

Nasa P4.30 hanggang P4.80 per liter naman ang maaaring madagdag sa presyo ng diesel. Habang P4.25 hanggang P4.40 naman sa kerosene.

Ang naturang pagtaya sa magiging galaw sa presyo ng mga produktong petrolyo ay inihayag ni Department Energy of Energy-Oil Industry Management Bureau, Assistant Director Rodela Romero, base sa resulta ng 4-day trading sa MOPS (Mean of Platts Singapore).

Kaya nga, pinaghahanda ng Department of Energy (DOE) ang mga motorista dahil sa panibagong taas presyo ng mga produktong petrolyo sa susunod na linggo.

Dagdag pa ng opisyal na nitong Miyerkules ay tumaas ng halos $3 kada bareles ang diesel kung saan maaaring magtaas ng hanggang P5.00 kada litro ito.

Huling nakaranas ng P5.00 pagtaas ng diesel ay noong Marso 2022 matapos na pagbawalan ni dating US President Joe Biden ang import ng Russian oil, liquefied natural gas at coal sa US.

Malalaman kung magkano ang taas presyo ng produktong petrolyo na karaniwang ipinapatupad sa araw ng Martes. (Daris Jose)

PINANGUNAHAN ni Pangulong Ferdinand R. Marcos Jr., araw ng Lunes, ang pagsisikap na mapahusay ang ‘access sa digital education at basic learning’ na kailangan sa Marawi City.

Binigyang diin ang commitment ng administrasyon na gawing mas accessible ang edukasyon sa mga kabataang Filipino lalo na sa conflict-affected at remote communities.

Bilang bahagi ng kanyang pagbisita, in-inspeksyon ni Pangulong Marcos ang Temporary Learning Spaces (TLS) sa Barangay Sagonsongan, kung saan mahigit sa 720 estudyante ang kasalukuyang naka-enroll sa limang eskuwelahan.

Ang TLS program ay ang nagpapatuloy na government intervention na nagsimula matapos ang naging bunga ng 2017 Marawi siege, nagbibigay ng emergency classrooms para sa mga mag-aaral kung saan ang mga eskuwelahan ay nasira o hindi na naging accessible dahil sa gulo.

Sa kabilang dako, personal na sinaksihan naman ng Pangulo ang pagkakabit ng Starlink internet unit-isang personal donation para suportahan ang mga estudyante at guro gamit ang maaasahang internet connectivity sa loob ng TLS site.

Idagdag pa rito, nagbigay din ang Pangulo ng isang Starlink unit sa bawat eskuwelahan sa remote areas ng lungsod gaya ng:

Bangon Elementary School, Bacarat National High School, Angoyao National High School, Cabasaran Primary School.

Kasama ng internet kits, namahagi ang Office of the President (OP) ng school bags na may  supplies sa lahat ng mga estudyante na kasalukuyang naka-enroll sa TLS sites.

Nagsagawa rin ang Pangulo ng pag-inspeksyon sa ibang ‘education, medical, at transportation facilities’ habang binibisita niya ang Marawi City.

Ang deployment ng Starlink satellite internet sa mga ‘underserved schools’ ay bahagi ng mas pinalawak na digital infrastructure, naglalayong itulay ang education gap sa geographically isolated at disadvantaged areas sa buong bansa. (Daris Jose)

ITO ang binigyang paglilinaw ni Atty. Princess Abante, tagapagsalita ng Kamara sa patutsada ni Senadora Imee Marcos ukol sa pagmementina sa San Juanico Bridge.

“Gusto lang po naming ituwid ang mga maling akala. Hindi totoo na pinabayaan ng Kongreso ang San Juanico Bridge. Simula pa po noong 2018, taon-taon nang may pondo na inilaan para sa rehabilitasyon ng tulay,” ani Abante.

Ilan sa mga ito ay ang

₱27M noong 2018; ₱22M noong 2019;

₱105M noong 2021; ₱90M noong 2022;

₱150M noong 2023; at may proposal na ₱400M para sa 2026.

Nangangahulugan aniya na ginawa na ng Kongreso, lalo na ni Speaker Martin Romualdez, ang trabaho niya kabilang na ang pagtulak ng pondo, nag-follow up, at personal na tumutok sa usapin ng tulay.

Sinabi pa ni Abante na noong Hunyo 5, nakipagpulong pa si Rep. Jude Acidre, sa atas ni Speaker, kay DPWH Secretary Bonoan para bilisan ang assessment at pagkumpuni.

Plano rin niyang itulak ang ikalawang San Juanico Bridge para hindi na maulit ang ganitong problema.

Ipinagtataka at ikinatatawa rin ni Abante kung bakit nagtatanong si Senadora Imee  kung bakit may aberya at puro panisi.

Tanong ni Abante, “ano na po ba ang aktwal ninyong ambag sa San Juanico Bridge? Kahit karatulang may nakalagay na “This Way to San Juanico Bridge” man lang, meron ba?

Kung tunay aniyang nagmamalasakit sa mga taga-Leyte at Samar ay dapat itigil na ang pasaring, trabaho muna bago pulitika.

” Hindi ‘to panahon ng paandar—panahon ‘to ng pagtutulungan'” pagtatapos nito. (Vina de Guzman)

DALA na rin higit 165,000 classroom shortage crisis, nanawagan sina House Deputy Minority Leader at ACT Teachers Partylist Rep. France Castro at  ACT Teachers Rep.elect Antonio Tinio, sa pamahalaan na doblehin ang education budget allocation sa 6% ng gross domestic product (GDP) ng bansa.

Ayon sa pag-aaral ng EDCOM II, matindi ang problema sa  classroom congestion sa  National Capital Region, CALABARZON, Region XII, at BARMM, kung saan may mga lugar na nagpapakita na 90% ng elementary students ang naka enrolled sa masikip o overcrowded schools na may student-classroom ratios na 1:50.

“The current budget allocation is clearly insufficient to address our education crisis. We need to double our commitment to education by allocating 6% of GDP to ensure we can build the classrooms our children desperately need,” ani Tinio.

Matatandaan na ibinunyag ng  Commission on Audit (COA) noong nakalipas na taon na ang  Department of Education sa ilalim ng dating  Secretary Sara Duterte ay nakakumpleto lamang ng 192 classrooms mula sa target na 6,379 rooms noong 2023 – o 3.01% completion rate.

“This is absolutely unacceptable. Habang may learning crisis na tayo, pinalala pa ng dating administrasyon ng DepEd ang sitwasyon ng ating mga estudyante. Sa dami ng pera na hawak niya noon kasama pa ang confidential funds, tapos ito lang ang nagawa niya? Saan niya ginastos ang mga pondong ‘yun tapos may gana pang magalit kapag sinita siya?” pahayag ni Castro.

Kawawa aniya ang mga estudyante noong panahon ni VP Duterte.

“Malala na nga ang learning crisis noon, pinalala pa niya. Now we’re seeing the devastating results of that neglect,” dagdag ni Castro.

Sa kanilang pag-iikot sa Balik-Eskwela noong Lunes ay nakita nila ang matinding siksikan, ang kakulangan ng silid-aralan, at ang nakapapagod na shifting schedules. (Vina de Guzman)

INALIS na sa pwesto si Atty. Gilbert Repizo, ang chairman ng Board Special Inquiry ng Bureau of Immigration (BI) dahil umano sa dami ng mga reklamo sa pamumuno nito.

Nauna nang nabanggit ang pangalan ni Repizo sa isyu ng umano’y pamimilit sa Bids and Awards Committee na aprubahan ang P3-bilyong e-gates project sa mga paliparan.

Sa kabila ng kautusan, sinabi ni Repizo sa kanyang social media post na magpapatuloy siya sa pagre-report sa BSI.

Sumulat din ito kay Justice Secretary Crispin Remulla kung saan ininvoke naman nito ang kaparehong civil service resolution na 1800692 o ‘yung 2017 omnibus rules of appointment.

Sa liham ni Repizo kay Remulla sinabi nya na hindi nya pwedeng sundin ang kautusan dahil iaakyat nya ang usapin sa Civil Service Commission.

Binigyan din umano niya ng kopya ng nasabing liham si Viado.

Samantala, kinumpirma ni BI Spokesperson Dana Sandoval na natanggap na nila ang Department Order 435 mula DOJ at agad itong ipinatupad.

Nakasaad sa nasabing Department Order na papalitan ni Atty Ruben Casibang si Repizo bilang head ng BSI.

Nakasaad pa umano rito na ipinalilipat sa DOJ si Repizo. (Gene Adsuara)