TINIYAK ng Philippine National Police (PNP) na kanilang kakasuhan ang mga pulis na sangkot sa pagkawala ng 34 na mga sabungero.

Kasunod ito sa naging pagbubunyag ng isang witness na mayroong ilang kapulisan ang sangkot sa pagkawala ng nasabing sabungero.

Sinabi ni PNP spokesperson Brig. Gen. Jean Fajardo na hinihintay pa nila ang ilang mga detalye ng akusado na siya ngayon ay nag-aapply bilang state witness.

Giit aniya sa kanya ni PNP chief General Nicolas Torre III na kahit sino pa man ang sangkot sibilyan man o mataas na opisyal ng PNP ay hindi nila ito sasantuhin.

Handa rin aniya silang magbigay ng seguridad sa potensyal na state witness ganundin ang pakikipagtulungan sa Department of Justice (DOJ) ukol sa kaso. (Daris Jose)

NIRESBAKAN ng Malakanyang ang patutsada ni Vice-President Sara Duterte na hindi trabaho ng Pangulo ang pagpapa-picture sa mga nasabat at sinunog na illegal na droga.

Personal kasing sinaksihan ni Pangulong Ferdinand Marcos Jr. ang pagsunog sa bultu-bultong shabu sa pamamagitan ng thermal decomposition sa Capas, Tarlac at pagkatapos ay nagpakuha ng larawan kasama ang mga susunuging ilegal na droga.

“Ang Pangulo, ay gumising ng maaga kahapon, pumunta sa Tarlac, nag-trabaho, nag-utos, hindi nagbakasyon at binantayan ang pagsisira ng illegal na droga. Nais ng Pangulo, na masawata ang droga, ang illegal na droga sa ating bansa. At ang pagta-trabaho po ng Pangulo ay dapat maramdaman ng tao. Hindi po ito pang photo ops lang, ito ay nagsisilbing babala sa mga criminal at nagsisilbi rin po itong inspirasyon sa taumbayan na nagnanais na masawata ang illegal na droga,” ang sinabi ni Para kay Palace Press Officer at Presidential Communications Undersecretary Claire Castro sa press briefing sa Malakanyang.

“Mas maganda po siguro talaga na pasinayaan at makita mismo ng Pangulo ang pagsira sa mga illegal na droga na ito kaysa po walang gawin sa mga nawalang illegal na droga sa magnetic lifter.”

“Kailan nga ba ito nawala? 2018 iyan at baka po nakalimutan din po ng Vise Presidente na ang kanyang ama ay nagkaroon din po ng pagwi-witness sa incineration ng 7.51 billion dangerous drugs sa Cavite. Ito po, baka po nakalimutan niya po ito, baka puwede natin palakihan. Kailan po ba ito? Wait lang 2020 lamang. So, baka nakalimutan po ito ni Bise Presidente.,” aniya pa rin saba sabing “So, ang pagtatrabaho po naman ay hindi dapat itago dapat nakikita ng taumbayan, dapat nagre-report ang Pangulo sa taumbayan.”

(Daris Jose)

APRUBADO ng Department of Finance (DOF) ang donasyon ng 1,251.68 litro ng nasamsam na gasolina sa Philippine Coast Guard (PCG).

Sa katunayan, sinabi ng DOF na nagbigay ng ‘thumbs up’ si Finance Secretary Ralph Recto para sa donasyon ng nasamsam na langis sa PCG para “support the country’s maritime safety and security operations.”

Ang 1,251.68 litro ng gasolina ay isinalin o inilipat ng Bureau of Customs (BOC) alinsunod sa Seksyon 1113 ng Customs Modernization and Tariff Act (CMTA) dahil sa paglabag sa fuel marking regulations.

Ang Fuel marking, “which involves injecting chemical identifiers into tax-paid oil products, is being carried out under the Tax Reform for Acceleration and Inclusion (TRAIN) Act to curb the smuggling of petroleum products.”

Ang donasyon ng nasamsam na gasolina ay nakaayon sa direktiba ni Pangulong Marcos na paigtingin ang laban sa smuggling at palakasin ang national security.”

“This donation not only shows our commitment to bolstering our defense sector, but is a clear warning to all businesses that any illicit act will not go unpunished. Hinding hindi namin palalampasin ang anumang panlalamang at iligal na gawain,” ang sinabi ni Recto.

“Section 1141 of the CMTA authorizes the donation of goods subject to disposition to another government agency, upon the approval of the Secretary of Finance,” ayon sa DOF.

(Daris Jose)

INANUNSIYO ni Iranian President Masoud Pezeshkian nitong Martes ang “pagtatapos ng 12-araw na digmaan.”

Hinimok din ng Presidente ang lahat ng mga kinatawan ng gobyerno at mga revolutionary institution na ituon ang lahat ng kanilang mga pagsisikap sa pagsasaayos ng mga nasirang gusali at lugar.

“Today, after your brave and historic resilience, we witness a ceasefire and the end of the 12-day war imposed on the Iranian nation by the adventurism of Israel,” sinabi ni Pezeshkian sa kanyang mensahe sa mga mamamayan ng Israel matapos ipatupad ang ceasefire.

Sinabi rin ni Pezeshkian na hindi nagtagumpay ang kanilang kalaban na sirain ang kanilang mga nuclear facilities.

“The aggressive enemy failed to achieve its nefarious goals of destroying nuclear facilities and undermining nuclear knowledge, as well as inciting social unrest,” sabi ni Pezeshkian.

Napaulat na sa isang tawag sa telepono sa ­Pangulo ng United Arab Emirates na si Sheikh Mohamed bin Zayed Al Nahyan, sinabi ni Pezeshkian na handa ang kanyang bansa na lutasin ang mga isyu sa loob ng international frameworks at negotiating table.

Noong Hunyo 13, naglunsad ang Israel ng malala­king airstrike sa iba’t ibang lugar sa Iran, kabilang ang mga nuclear at military sites, na ikinamatay ng mga senior commander, nuclear scientist, at mga sibilyan.

Tumugon ang Iran sa pamamagitan ng pag­lulunsad ng ilang mga pag-atake ng missile at drone sa Israel, na nagdulot din ng matinding pinsala.

Kasunod ng pag-atake ng Iran, inihayag ni US President Donald Trump ang tigil-putukan sa pagitan ng dalawang bansa. (Daris Jose)

ISANG makasaysayang sandali para kay Konsehala Shannin Mae Olivarez ang  pormal niyang panunumpa ng tungkulin sa harap ng mahal na Pangalawang Pangulo ng Pilipinas, Hon. Inday Sara Duterte, kahapon Hunyo 26, Huwebes.

“Hindi lang ito simpleng oathtaking—ito ay simbolo ng pangakong buo ang puso, tapang, at dedikasyon para sa tunay na pagbabago at malasakit sa bayan,” pahayag ng butihing Konsehala Shannin.

(BOY MORALES SR.)

NASAKOTE ng Highway Patrol Group Region 3 sa entrapment operation ang isang Chinese national sa bahagi ng Brgy. 674, Paco, Maynila Miyerkules ng gabi.

Narekober mula sa dayuhan ang isang luxury car at isang SUV na pinaniniwalaang galing sa carnap.

Nadiskubre rin ang ilang hinihinalang iligal na droga, armas at ilang mga bala ng baril nang halughugin ng mga awtoridad ang kotse.

Base sa imbestigasyon ng pulisya, miyembro umano ang nahuling Chinese national ng isang malaking Chinese triad na sangkot sa iligal na armas at droga.

Sa ngayon ay patuloy pa ring inaalam ng pulisya ang buong pagkilanla ng  naarestong dayuhan. (Gene Adsuara)